LUKAS 5

It ap ikan wanhi lagaukwa mene afuni woginabik nikhi logouwageluk attak inayonggo fesikhe wene

(Mat. 4:18-22; Mrk. 1:16-20)

1Inenggi ekhe sambul he, at Yesus i Genesaret yenggele'ma andoma mendek were'ma, afuni mondok hokhorogo Allah ane inesanggo holuogeluk oba andogosi lagaukwa.#Mat. 13:1-2; Mrk. 3:9-10, 4:1 2Andogosi lagu kwelek, it ap ikan wanhi lagaukwa mene ekhe e so pire mene i aik oba fuluk he, ikan su kwalhi lagaukwa mene sobalhunem eilenggen isasikhe. 3Eilenggen isasikhesik he, at Yesus ebe e so Simon mene elema kwisikhesik he, ”E so yi higilogo re, i enggen tulem hangge endebat higilogo lakfeni o,” iluk, Simon yagatikhe. A'nogo yagatikhesik, at ebe e so elema hu'lagaikhesik he, afuni hokhorogo omanogo i aikwe were'ma wene yagaisasikhe.

4Arat yagaisasikhesik he, at Yesus nen Simon mel yagatikhe: ”Ikan hokhorogo wanubagaigen he, hinebe i enggen tulam hak andem lambik su ikan su ari pelakfei lani o,” iluk yagatikhemo, 5at Simon en he, ”Noe! Hubanggo pelafu mondok welago mene re, ekhe mondok wanhi'lego. Meneat he, haren yaganetenma andi nen he, an nen ikan su pelabigin aro,” iluk,#Yoh. 21:3 6a'nogo yagatikhesik pelakfesukwa hak he, ikan mondok hokhorogo elonggoma kwalagaikhemo inasu a'nogo tilibu hak hilinglagaikhe.#Yoh. 21:6 7A'nogo hilinglagaikhemo, it inagaila'lak e so hunogoat mene elema welagaukwa mene nen leberisa wesuageluk, inenggi lamok wolisasukwa. A'nogo wolisasukwama, it a'nogo wagaukwasik he, ikan omanogo tindelogo re, e so ekhe elema kwalhik, ekhe elema kwalhik, e so pireat ambem peterogo kwalik lagaukwa meneat he, ikan engginsek he, e so i elonggoma wula'lakhogo pigeluk isikhe. 8A'nogo hilinglasigeluk isikhemo, at Simon a'nogo Yesus eilhanem eindep awi yagaisogo soma isikhesik he, ”Noe e! An weak hilingitirek mene yi re, yoma nobagaluk lan o,” iluk yagatikhe. 9Ikan hokhorogo wanhukwa andi nen, at Simon agaila'lak inom inailo agaukwasik a'nogo yagatikhe. 10Andi hak, at Simon agaila'lak inom hundik mene Zebedeus againafuri Yakobus Yohanes emberek, a'nogoat inailo agaikhemo re, at Yesus nen Simon mel yagatikhe: ”Hailo agun o. Ikan wanhi lagen andi hak huli yogondagen he, afuni woginabik nikhi logogin o,” iluk yagatikhe. 11A'nogo isikhemo re, e so a'nogo i aik oba fei wagaukwasik he, yi mene ti mene mondogat herakfisaluk Yesus ombo'ne lagaukwa.

Yesus nen ap ekhe oba ou henanggo mene were'ma higitikhe wene

(Mat. 8:1-4; Mrk. 1:40-45)

12A'nogo lagaukwasik oba nen, inenggi ekhe sambul he, Yesus o sili ekhe lagaikhesik were'ma, ap ekhe oba ou henanggo inailo mene ebene hokho agaikhesik logolik, aren Yesus eilenggen hasikhesik he, eindep awi yagaisogo hai wati logolik mel yagatikhe: ”Yesus, noe! Haren fano higitnabigin anggegen halok he, elok fano higitnabin o,” iluk, yagatikhe. 13Yagatikhemo re, at Yesus nen ap a'nogo enggi fakhikhi logolik he, ”Fano higithabigeluk ikhi lagi. Halok he, fano ame o,” iluk, yagatu kwelek aremnogoat he, oumo henanggo inailo mene a'nogo mondok lek agaikhe. 14Lek agaikhemo, at Yesus nen he, mel yagatikhe: ”Haren he, Yesus nen a'nogo higitnafe iluk he, afuni ekhe mondok yagaisagun o. We, ap Allah eisewerek mene nen eilenggen heowagen he, oba lambik, mel hilingi'no. At Musa nen ikhi logolik, afuni inoba fano arik, Allah faget yi'nogo fisogoin, iluk isikhe a'nogo higithogoat, noba henanggo inailo mene a'nogo lek agama fano agi, iluk Allah faget ekhe fugunem futhobagauwagen he, ekhe fei lano,” iluk komorogo lakfesikhe.#Im. 14:1-32 15Komorogo lakfesikhe meneat he, ap a'nogo lagaikhesik he, Yesus nen hilingitikhe mene omanogo mondok piling-palanghogo yagaisasikhemo re, afuni hokhorogo at ane holhukwasik he, it yi ou ti ou inoba werek mene higirinabuageluk he, Yesus oba mondok hokhorogo andogosi waga lagaukwa. 16A'nogo hilingitu kwelek meneat he, at Yesus samban igeluk ebe afuni le'ma o leimo andoma laga lagaikhe.

Yesus nen ap ekhe enggi eisok wut warek mene fano higitikhe wene

(Mat. 9:1-8; Mrk. 2:1-12)

17Inenggi ekhe sambul he, at Yesus wene yagaisugu were'ma, it ap Farisi mene inom, Allah ane lisu palek mene yagaisikhi lagaukwa mene inom, inawi o Galilea nen, Yudea nen, o kota Yerusalem en, oba wagaukwasik inesanggo hologo hurek were'ma, nineisena Tuhan Allah nen afuni ou weak mene Yesus nen higirinafi logouwageluk omame wogetu kwelek fano higirinafi lagaikhe. 18A'nogo higirinafu were'ma, ap ekhe enggi eisok wut warek mondok welagaikhe mene lit talogo nogo ikherek oba wengik werek kwelek yerogo waluk wagaukwasik he, Yesus ebe oloba were'ma elokhoma fei kuogeluk isukwa. 19A'nogo hilingisuogeluk isukwa mene re, afuni mondok peteregen he, ninggi'nogo waluk ku heat hilinglagaikhemo, ap a'nogo o tum oba waluk lagasukwasik he, tum healogo lit talek nogo ikhi lagaikhe mene a'nogo ebe talek mondogat afuni hokhorogo omanogo inanggele'ma tulem, at Yesus werek higithogo elokhoma earogo pelakfesukwa. 20Pelakfesukwama, at Yesus nen, ”It andi inendawinggen noba himbiret fagasigen waluk wagaikha higi,” iluk, eilenggen enegat isasikhesik he, ”Namlogo e! Hat weak hilingiti lagen mene re, an nen sebelogo legetfisigi o,” iluk yagatikhe. 21A'nogo yagatikhemo, it ap Allah ane lisu palek inelu mene inom, it ap Farisi mene inom, inendawimo nen he: ”Nit afuni weak hilingiti lago mene andi, it afuni ekhe nen sebelogo legetfisogoin nogo? We, at Allah alegaren elok sebelogo leget fisikherek meneat he, at yi nen Allah endawimo seramet fikhesik enu weaget fili'logo yi sa anggegep,” iluk inendawimo anggasukwa. 22A'nogo anggasukwama, at Yesus nen, it inendawimo anggasukwa mene enegat futfisasikhesik he, ”Hit hinendawimo a'nogo anggikhi lagep andi nenahalok. 23An nen ap yi wene yagasigin he, se hangge ki anggegep. Hat weak hilingiti lagen mene arat sebelogo legetfisigi, iluk yagati andi se hangge anggegeba? I a, athe, Hebe menla'luk lan o, iluk yagasigin andi se hangge anggikhi lageba. Lego. Hebe menla'luk lan, iluk yagasumo enggin aro. 24Enggin meneat he, an abat ta'lasi wagagi a'nogo re, kweangma yoma logolik, afuni yi weak ti weak hilingitarek mene an nenat sebelogo legetfisikhi logouwageluk, Allah nen eisewerek nobagaikhe mene andi futfanubagaigen,” iluk yagaisasikhesik, ap enggi eisok wut warek mene a'nogo mel yagatikhe: ”Hebe menla'luk halit talogo nogo ikhi lagen mene ari helaluk he, haiba lan o,” iluk yagatikhe. 25A'nogo yagatu kwelek aremnogoat he, ap a'nogo afuni omanogo ineilhanem menlagaikhesik he, alit talogo nogo ikhi lagaikhe mene a'nogo helaluk, Allah fogerarik-arik aiba lagaikhe. 26A'nogo hilingitikhemo afuni omanogo inebe mondogat inailo hokho agaukwasik he, mel isukwa: ”Nineilenggen yogondak hogo andi, mondok hunogoat mene hogo. Nailo e,” iluk Allah fogeratukwa.

Yesus nen ap Lewi ayonggo fesikhe wene

(Mat. 9:9-13; Mrk. 2:13-17)

27A'nogo hilingi'luk at Yesus o andoma nen wulifikhesik he, kwe laga logolik eilenggen yethasikhe re, ap uang pemerintah faget kino iluk wanharek mene ekhe enu Lewi andi, kantor uang kino iluk fikhi lagaikheba hurek were'ma eilenggen hasikhe. Andoma were'ma eilenggen hasikhesik he: ”Nombo'ne eme o,” iluk yagatikhemo re, 28menlagaikhesik, yi mene ti mene mondogat herakfisaluk he, ombo'ne lagaikhe.

29Lagaikhesik he, at aiba Yesus faget hokhorogo isatikhe. A'nogo isatikhesik he, afuni hokhorogo uang pemerintah faget kino iluk wanhi lagaukwa mene inom, afuni fena inom, at inom hu'lagaukwasik sumburu misi'mo ninggi lagaukwa. 30A'nogo nunggu were'ma, it ap Farisi mene inom, it ap Allah ane lisu palek inelu mene inomenat Yesus agoromi ane wanhi lagaukwa mene omanogo mel yagaisasukwa: ”Hit he, ap uang pemerintah faget kino iluk wanharek mene inom, it ekhe afuni mondogaren inabok weak pali'lagwi mene inom, hinom sumburu misi'mo ninggi lagep andoma nenahalok?” iluk yagaisasukwa.#Luk. 15:1-2 31A'nogo yagaisasukwama, at Yesus nen he, ”It afuni ekhe inoba fano mene, dokter lagen ou higirinabuageluk inayonggo fogoin nogo? Lego. We, inoba ou werek halogat, dokter lak inayonggo fogoin o. 32An wagagi andi re, afuni fano hilingitarek mene inayonggo feigeluk wagagi fuk. Lego. We, afuni weak hilingitarek mene andi inaweak herakfisaluk inobabut hebelasuageluk wagagi o,” iluk yagaisasikhe.

Samban uogeluk sumburu ninggi'lek weat welagaikharek wene

(Mat. 9:14-17; Mrk. 2:18-22)

33A'nogo yagaisasikhesik oba nen he, it afuni ekhe nen Yesus mel yagatukwa: ”It ap Yohanes agoromi ane wili'lagwi mene andi, inenggi hokhorogo welagi'lek, samban uogeluk halok he, sumburu ninggi'lek logolik sambanat ugu welagaikharek. Nen, it ap Farisi mene inagoromi inane wili'lagwi mene andi re, a'nogoat hilingitarek. Meneat he, it ap hat hane wili'lagwi mene andi re, we yugunat sumburu ninggik, enggen amusu ninggik, ili'lagwi andi ri!” iluk yagatukwa. 34A'nogo yagatukwama at Yesus nen he, mel yagaisasikhe: ”Ap ekhe agwe ikhikhi logolik he, erugwi agaila'lak inayonggo fagain mene inom logolik, hit sumburu ninggi'lek logoni o, iluk yagaisagain anggegep? Elo'lego. 35A'nogo meneat he, ap andi erugwi agaila'lak fisaluk ebe waluk logoin oba weregaro. A'nogo waluk logoin andem sambul enek he, it andi inenggi ekhe sumburu ninggi'lek logogun aro,” iluk yagaisasikhe.

36A'nogo yagaisasikhesik he, wene ekhe oba lirogo mel yagaisasikhe: ”Afuni nen, su attak laberi'lagwi mene tilibikhe halok he, su kain ket mene tiliphogo attak mene andiba te'merogo finggin kwatarek lek. A'nogo kwasugun halok he, su kain ket mene fano werek kwelek he mining mene tilibigin andi nen weak agik, attagat mene andiba kwasumo emberek higit lek andi nen he, weak asigin o. 37Andi hak, afuni nen anggur enggen perelogo amusu ket mene iwak wam agap mene endamat hilingik mene elema hinatarek lek. A'nogo hinasugun halok, amusu ket mene andi nen he, supukhogo yenggalogo enggen amusu ebe kweisalaga logolik, iwak andi inomat yenggalasigin o. 38Halok he, anggur enggen amusu ket mene halok he, iwak ket meneat elema hinasugun fano o. 39Nen, it afuni nen he, Anggur enggen amusu attagat mene enduk fano ninggirek, iluk agaresik he, hobuk ket mene na inabiro,” iluk yagaisasikhe.

Currently Selected:

LUKAS 5: inohap

Highlight

Copy