LUKAS 6
6
Afuni Yahudi mene Allah faget weat werek kwelek Yesus agoromi gandum enggen palogo nilik lagaukwa wene
(Mat. 12:1-8; Mrk. 2:23-28)
1Afuni Yahudi mene inenggi sabit oba Allah faget weat welagaikharek a'nogoba ekhe sambul he, at Yesus agoromi ane wanhi lagaukwa mene omanogo inom, gandum yagokwe laga logolik he, gandum enggen palogo inenggi nen wulil tagalogo nilik-nilik lagaukwa.#Ul. 23:25 2A'nogo nilik lagunem he, it ap Farisi mene ekhe nen he, ”Hit yi ninenggi sabit oba Allah faget weat logolik he, a'nogo hilingisugun lek, iluk wene melalek werek meneat he, nenahalok palik wagep?” iluk yagaisasukwa. 3A'nogo yagaisasukwama, at Yesus nen he, ”At Daud agoromi ombo'ne lagaukwa mene inom sumburu inaik fesikhemo re, aren hilingitikhe mene Allah aneba lisu palek a'nogo hiren enu salhi'lek welagep nogo? Enu salhi lagebaro. 4Allah awi wuri'mo kwisikhesik sumburu roti Allah faget fisagarek mene hesangge nogoin mondok lek. We, it Allah eisewerek mene halok enek nogoin iluk wene melalek werek meneat he, at Daud en wanhikhesik, at ekhe ninggi logolik he, ekhe agoromi ombo'ne lagaukwa mene omanogo wogisasikhe, iluk lisu palek werek a'nogo hiren enu salhi'lek welagep nogo,” iluk yagaisasikhesik he, wene ekhe mel yagaisasikhe:#1Sam. 21:1-6 #Im. 24:9 5”Ninenggi sabit oba Allah faget weat welagorek andi, eisewerek he, an abat ta'lasi wagagi nebe yiaro,” iluk yagaisasikhe.
Allah faget weat werek kwelek, Yesus nen ap ekhe enggi wutwarek mene fano higitikhe wene
(Mat. 12:9-14; Mrk. 3:1-6)
6Nen, inenggi sabit oba ekhe sambul, it Allah faget weat werek kwelek, at Yesus o afuni Yahudi mene samban agarek oba ekhe kwisikhesik he, wene yagaisasikhe. Yagaisugunem ap ekhe enggi ebekwe warek mene andoma welagaikhe. 7Were'ma re, it ap Allah ane lisu palek eisewerek mene inom, Farisi mene inom, inendawimo nen he, ”Yogondak ninenggi sabit oba Allah faget weat werek kwelek, aren ap ari higisigin a? Lega. Higite halok he, hat weak hilingiten, iluk wene oba fouwogo,” iluk, ineil wanhi lagaukwa. 8A'nogo ineil wanhu kwelek, at Yesus nen inendawimo anggasukwa mene enegat futfisasikhesik he, ap enggi warek mene a'nogo mel yagatikhe: ”Hebe menla'luk tulem ya eme o,” iluk yagatikhemo, ap a'nogo menla'luk tulem aremnogo menlasi lagaikhemo re, 9at Yesus nen afuni omanogo mel yagaisasikhe: ”An nen wene ekhe heinok wokhisak. Ninenggi sabit oba Allah faget weat logolik hilingisugun andi re, fano hilingisugun a? Weak hilingisugun a. Telinabugun a? Inoasugun a. Hiren ini o,” iluk, 10a'nogo yagaisasikhesik he, it mondogat eilenggen isilik lagaikhesik he, ap a'nogo mel yagatikhe: ”Henggi pisathan,” iluk yagatikhemo enggi pisathasikhemo, arat fano agaikhe. 11A'nogo higitikhemo, it ap Allah ane lisu palek inelu mene omanogo inom, it Farisi mene omanogo inom, ina'mage hokho mene lagasukwasik he, ”At Yesus ninggi'nogo hilingisuok he,” iluk, it-it abok palhi lagaukwa.
Yesus nen ap inebe 12 nen wenagaisogo fisasikhe wene
(Mat. 10:1-4; Mrk. 3:13-19)
12Andi sambul he, at Yesus samban igeluk tom oba lagasikhe. Lagasikhesik hubanggo Allah ayonggo fugu mondok were'ma, o arat wei isikhe. 13O wei isikhemo re, at agoromi ane wanhi lagaukwa mene omanogo wolisasikhemo wagaukwama re, it mene inebe 12 nen wenagaisogo fisasikhesik he, ”Hinebe lakhinobagagin,” iluk menfisasikhe. 14Ap wenagaisogo fisasikhe andem inenu re, Simon enu ekhe Petrus salhikhe mene a'nogo inom, agot enu Andreas inom, Yakobus inom, Yohanes inom, Filipus inom, Bartolomeus inom, 15Matius inom, Tomas inom, Alfeus amlogo Yakobus inom, Simon, ”O yoma ninawi werek mene nek logogun,” iluk ikhi lagaikhe mene a'nogo inom, 16Yakobus amlogo Yudas inom, Yudas Iskariot Yesus wasuageluk hobuk yonggo lagain mene a'nogo inom, inebe andem wenagaisogo fisasikhe.
At Yesus nen afuni mondok hokhorogo omanogo wene yagaisigik, ou fano higirinafik, isikhe wene
(Mat. 4:23-25)
17At Yesus a'nogo agoromi wenagaisogo fisasikhesik, inom tom oba nen pi wagaukwasik he, kweang tonggwe fanoma andoma kamo isukwasik were'ma, at agoromi ane wanhi lagaukwa mene omanogo fena inebe hokhorogoat inom, afuni mondok hokhorogo o Yudea tonggwe mene inom, o Yerusalem mene inom, o Tirus Sidon i laut aik oba welagaikharek mene inom, 18iren at Yesus ane holhik, aren it ou weak mene higirinafik, uageluk he, oba andogosi wagaukwa. A'nogo andogosi wagaukwama, munggwarengge obabut weak mene inendawimo kwisukwasik were'ma inomat fano higirinafikhe. 19Afuni ineleage wulafarek hak, aren omamerogo higirinafunem, it afuni inebe hokhorogoat a'nogo higirinabuageluk, inebe mondogat inenggi fakfouwogeluk walhasukwa.
It ekhe fanorinafunem inendawimo inagaiyek agik, it ekhe weagerinafunem inendawimo heiselhik, igin isikhe wene
(Mat. 5:1-12)
20A'nogo hilingitunem, at Yesus nen agoromi ane wanhi lagaukwa mene omanogo eilenggen inoba fesikhesik he, mel yagaisasikhe: ”Hit hinelagaik mene halok, Allah awe a'ma hinobagagin andi nen he, hinendawimo hinagaiyek hikhi logoino o.
21Nen, hit yogondak hinendawimo nele welagep mene halok, hobuk wokhisugunem hinalabut ninghogo nogoin andi nen he, hinendawimo hinagaiyek hikhi logoino o.
Nen, hit le aga lagep mene halok, hobuk endo asugun andi nen he, hinendawimo hinagaiyek hikhi logoino o.
22-23Nen, it ap yoma inambu-inombalagen, it ap attak Allah ane yagaisikhi lagaukwa mene hilinginafi lagaukwa hagat, hit yogondak an abat ta'lasi wagagi a'nogo nane wanhep andi nen inapsiri wathinobagakhi logolik, hit enek fologo hinobagagik, inane puk weak wenakhisigik, ap yi weak, iluk hinenu ikhi logolik hinabok weak palhik, a'nogo hilinghinafu halok, onggo wokhisagain mene pogoroba hokhorogo werek andi nen he, hinendawimo hinagaiyek hikhi logolik hu'lenggen wuni wati logoino.#1Ptr. 4:14 #2Taw. 36:16; Kis. 7:52
24A'nogo meneat he, hit ap kain hineilmo werek mene halok enek he, hinangge hokhorogo werek andi nen he, hinendawimo hinagaiyek hikhi lagep mene, hobuk weagethinabigin o.
25Nen, hit ekhe yogondak elama faget enek hinalabut ninghogo ninggi lagep mene halok, weagethinafunem hobuk nongakhogoin o.
Nen, hit yogondak elama faget enek endo aga lagep mene halok, weaget hinafunem hinendawinggen warikhi logolik le asugun aro.
26It ap yoma inambulagen he, it ap ekhe Allah ane yagaisagarek mene hangge lalinafu kwelegat fogerinafi lagaukwa hak, afuni mondogaren fogethinafu halok he, weagethinabigin o,” iluk yagaisasikhe.
At Yesus nen, ”It ap hinaselei mene andi hinendawirogo logogun o,” iluk, isikhe wene
(Mat. 5:38-48, 7:12)
27A'nogo yagaisasikhesik hobuk he, mel yagaisasikhe: ”A'nogo meneat he, hit an nane holhi lagep mene yi, an wene ekhe yagahisak. It afuni hinom weak mene hinendawirogo logoino o. Iren inabithogo inabiret hinafu kwelegat he, hiren onggo fano mene nek hilinginafi logoino o. 28Iren hit homan hinobagagu kwelegat he, hiren he, agaugwerinafi logoino o. Nen, it weagethinabi'lagwi mene andi, Allah nen fanorinabuageluk, it faget samban ikhi logoino o. 29It ekhe nen hinelokhonggen fena lambukhogo hinoatu halok he, fena inomat hinoasuageluk wogisano o. Nen, it ekhe nen hinasu sogoi su mene andi helugu halok he, hinasu eilemkwe mene andi inomat heloagen he, elele wanhubo. 30It ekhe nen, hit mene wo'nisani o, iluk kino yagahisugu halok he, inebe lombok wogisikhi logoino. Nen, iren hit hinagarek mene wanhu halok he, hobuk, wo'nisani iluk kino yagaisagubo. 31Hit hinendawimo nen he, it ekhe nen yi'nogo hilingninabilebe! iluk anggikhi lagep andi hagat hiren it andi a'nogoat hilinginafi logoino o.#Mat. 7:12
32Nen, it ap inendawit hinafarek mene nek hiren hinendawirinafep halok he, fano, iluk yagahisogoin nogo? It afuni weak hilingitarek mene nen a'nogo inendawirinafarek mene, iren ogo re, inendawirinafaregaro. 33It afuni fano hilinghinabi'lagwi mene andi nek, hiren fano hilinginafi lagep halok he, fano, iluk yagahisogoin nogo? It afuni weak hilingitarek mene inobabut a'nogoat hilingitarek. 34Hiren, it afuni onggo wo'nisoak, iluk anggikhi logolik wogisikhi lagep halok he, fano, iluk yagahisogoin nogo? It ap weak hilingitarek mene andi re, hobuk onggo higithogo wo'nisoak, iluk inagaila'lak weak hilingitarek mene ekhe wogisugunem, iren ogore, wogisagaregat. 35It a'nogo hilingitarek meneat he, hiren he, hinom weak mene hinendawirinafik, fanorogo leberisigik, onggo iren ekhe wo'nesuak, iluk anggigi'legat we hesangge wogisigik, ikhi logogun halok he, hinebe Tuhan Allah againafuriat were'ma re, onggo hokho mene wokhisagain o. Afuni nen, at ebe hai wati'lek weak hilingitu kwelegat he endawirinaferek andi. 36Halok he, Nineisena nen endawirinaferek andi hak, hiren afuni a'nogoat hinendawirinafi logoino o,” iluk yagaisasikhe.
Afuni wene inoba figik kotik agarek mene faget isikhe wene
(Mat. 7:1-5)
37A'nogo yagaisasikhesik he, wene ekhe mel yagaisasikhe: ”Allah nen wene hinoba feinogo iluk he, hiren afuni ekhe wene inoba fugubo. Allah nen wene hinoba fembik he, weaget hinabinogo iluk, hiren afuni ekhe wene inoba fuluk he, weagerinafubo. Halok he, hiren weak hilingiti lagep mene Allah nen sebelogo legetfisoageluk he, afuni nen weaget hinabi'lagwi mene hiren sebelogo legetfisikhi logoino o. 38Hiren hinangge yi mene ti mene it ekhe wogisegep halok he, Allah nen hirogo a'nogoat hesanggeat wokhisagain aro. Nen, ilirengge waruk elema kwelagaisogo ambem peterogo kwalhunem, yamukhogo pelakfuluk hobuk oba loukhogo peterogo ekhe pulelogo pugu kwelek wogisikhi lagep andi hak, Allah nen a'nogoat hokhorogo wokhisagain o. Hiren ilirengge walhalugen wogisikhi lagep andi hak, Allah nen ilirengge andibaat walhogo wokhisagain o,” iluk, yagaisasikhe.
39A'nogo yagaisasikhesik he, wene ekhe oba lirogo yagaisikhi logolik he, mel yagaisasikhe: ”At ekhe eilenggen mum mene nen, ekhe eilenggen mumat mene yagati logolik, kwe yi kwe lou, iluk enggi fagaisogo waluk logoin anggegep? A'nogo logoin halok he, emberegat foluksek i kalok wagane'ma pile hela'pugun lek nogo? Pugun aro.#Mat. 15:14 40It guru lak wene yagaisagarek mene sebelek hak werek kwelegat, it inagainafuri yagaisagarek mene andi lego hak welagaikharek lego. A'nogo meneat he, sa nen wene arat wanhesik furogo elu aga halok he, eisena yagaisikherek mene andi emberek higiraro.#Mat. 10:24-25; Yoh. 13:16, 15:20
41Hit hinonggwarek hineilenggenma e hokho obakhe palek mene walurek werek andi kwelakhigi'legat he, it hinerugwi hinagaila'lak ekhe ineilenggenma ilingal endebat kuluk were'ma wogisuogeluk kwelagisikhi lagep andi nenahalok? 42Hinonggwarek hineilenggenma e hokho mene palek walurek werek andi higi'lek logoligat he, hinerugwi hinagaila'lak andi yagaisikhi logolik, heilenggenma ilingal kwikhe mene andi wokheago, iluk ugun nogo? Hinagap oba nek fano hangge hinendawinggen pire yi ri! Hinonggwarek hineilenggenma e palek hokho mene walurek werek andi tak wokhambigen, hineilenggen arat selek aga halok he, hobuk hinerugwi hinagaila'lak ineilenggenma ilingage werek mene andi, elok wokhogoin o,” iluk yagaisasikhe.
”E enggen iterek oba nen ero enegat futfagarek,” iluk yagaisasikhe wene
(Mat. 7:16-20, 12:33-35)
43A'nogo yagaisasikhesik he, hobuk ekhe mel yagaisasikhe: ”E ero fano mene ekhe enggen weak mene iterek lek. Andi hak he, e ero weak mene enggen fano mene ekhe iterek legat. 44Yi e ti e andi re, enggen iterek andiba ero enegat futfagarek. Panggi alok weak meneat he, enggen ara fano mene enggen hangge ekhe itunem palharek mondok lek. Andi hak he, e mun meneat he, enggen he, anggur enggen fano mene itunem palharek mondok legat.#Mat. 12:33 45Afuni nen yi wene ti wene inambeba nen agarek andi re, inendawimo peterek logolik, kagalogo lagai wagunem agarego. Inobabut fano mene inendawimo fano mene peterek logolik, wene fano meneat wulabi wagaikharego. Meneat he, afuni inobabut weak mene inendawimo weagat logolik wene weak meneat wulabi wagaikharego,” iluk yagaisasikhe.#Mat. 12:34
Ap inebe pire mene nen o pireat wutukwa iluk oba lirogo yagaisasikhe wene
(Mat. 7:24-27)
46A'nogo yagaisasikhesik he, mel yagaisasikhe: ”Hit an nen yagahisikhi lagi mene hilingiti'lek logoligat he, noe, noe, iluk nenahalok yaganeti lagep. 47-48Sa nen an noba we'luk nane holheresik higithogo hilingiri'logo mene andi, o wutarek mene oba lirogo yagahisak. At andi, aben o wutarek andi hangge aro. Ap ekhe o wusigeluk kweang a'marogo habulfulugen, helep fesikhesik he, o tik helep oba loukhogo fesikhesigen o ebe wutikhe. A'nogo wutikhemo nen, hobuk i fu hokho waga logolik o a'nogo watwaret hasikhe mene re, mondok ninghogo wutikhemo andi nen he, abolok ekhe igi'lek mondok kamo isikhe. 49A'nogo meneat he, sa nen an nane holhi logoligat he, higithogo hilingiri'logo lek halok he, ap ekhe o wusigeluk o tik kweang oba figi'lek wutikhemo, i fu hokho waga logolik o a'nogo sanokhogo ane ku ugu kwelek waluk lagaikhe andi hangge aro,” iluk yagaisasikhe.
Currently Selected:
LUKAS 6: inohap
Highlight
Share
Copy
Want to have your highlights saved across all your devices? Sign up or sign in
