LUKAS 7
7
Ap tentara mene inoe kain amingmingengge mene Yesus nen ou higitikhe wene
(Mat. 8:5-13)
1At Yesus nen afuni hokhorogo omanogo ineilhanem wene a'nogo mondogat yagaisasikhesik he, o Kapernaum kwi wagaikhe. 2Kwi wagaikhemo, andoma ap tentara mene inoe kain ekhe amingmingengge endawinggen hundik mene oba ou hokho wanhi logolik wa'lasu hak welagaikhe. 3A'nogo weregen, ap tentara mene a'nogo inoe kain Yesus abok esanggo holhikhesik he, amingmingengge a'nogo higisi wesuageluk, ap inaluendek Yahudi mene ekhe yagaisasikhesik he, ”Yesus ha lani o,” isikhe. 4-5A'nogo isikhemo, it omanogo Yesus oba wagaukwasik he inane ninghogoat yagatukwa: ”At ap tentara mene inoe kain andi afuni nit mene endawit ninafik, aren o nit samban ogorek oba wutnisigik, hilingiterek andi nen he, at amingmingengge mene andi ou higisi lagain o,” iluk a'nogo yagatukwama re, 6Yesus ebe inom lagaukwa. Aiba lagaukwasik he, kuogeluk horokhogo asi lagaukwa hak he, ap tentara mene inoe kain a'nogo nen agoromi ekhe wene Yesus yagasi loageluk lakfisa wagaikhe. Lakfisa wagaikhemo, it omanogo nek Yesus oba wagaukwasik he, mel yagatukwa: ”Noe. Nit ninoe nen he, at eisok alemarogo wesinogo. An inawe a'ma meneatma, at an naiba kwi wesigin elo'legaro. 7Nen an nen, at oba lagain iluk anggigi mene ogore elo'legat. We, at ane nek healumo nen he, an namingmingengge mene yi fano asigin o. 8An ogo re, nogogwi kaindek mene inawe a'ma logolik, inane holhik, nen an nagoromi tentara mene andi an nawe a'ma logolik, an nane holhik, hilingitorek andi nen he, an nen, at ekhe, lano, iluk yagati halok lagarek. Nen, ekhe, eme o iluk yagati halok he, wagaregaro. Nen, namingmingengge ekhe, yi hilingisin, iluk yagati halok he, hilingiteregaro, iluk yagahesuageluk lakninobagai wagama wago,” iluk yagatukwa. 9Yagatukwama, at Yesus nen he, mel isikhe: ”Ap andi nailo e,” iluk, fogeratikhesik he, elokhe hebekhogo afuni hokhorogo ombo'ne lagaukwa mene omanogo mel yagaisasikhe: ”Ap andi endawinggen an noba himbiret fikhe andi hangge, it afuni Israel mene ekhe inendawinggen a'nogo himbiret fugunem isigirek lek mene nailo e,” iluk isikhe. 10A'nogo yagaisasikhemo, it yonggo wagaukwa mene omanogo inaiba lagaukwa hak he, ap it inoe tentara mene amingmingengge mene a'nogo arat fano agaikhesik were'ma ineilenggen ha lagaukwa.
Yesus nen yenggerek ekhe o Nain mene warek were'ma eluget fesikhe wene
11A'nogo hilingi'luk he, hobuk at Yesus o sili enu Nain lageluk lagunem he, at agoromi ane wanhi lagaukwa mene omanogo inom, afuni fena inebe mondok hokhorogo inom, ombo'ne lagaukwa. 12Laga lagaukwasik, leget pa'leget kwe ambe palek oba asi lagaukwa hak he, yenggerek ekhe ebe alegat tago mene agaisa sogwe were'ma wa'lagaikhemo re, afuni o sili a'nogo mene inebe hokhorogoat yenggerek warek e yerogo waluk agaisa inom wulibi wagunem eilenggen yerisasikhe. 13Yerisasikhesik he, Tuhan Yesus nen he, he sogwe a'nogo eilenggen hasikhesik, endawi agaikhesik, mel yagatikhe: ”Nerei e. Le agun o,” iluk yagatikhesik he, 14yenggerek warek e yerogo waluk wagaukwa a'nogo era'lu lagaikhesik he, enggi fakhasikhe. Enggi a'nogo fakhugunem afuni nen warek e ye'luk wagaukwa mene omanogo menlagaukwa. Menlagaukwama re, at Yesus nen yenggerek warek a'nogo yagati logolik he, mel isikhe: ”Namlogo yi! Helugame, iluk yagaheti lagi o,” iluk yagatikhemo re, 15yenggerek wa'lagaikhe mene a'nogo eluk agaikhesik hurek logolik ane isikhe. Ane isikhemo re, Yesus nen yenggerek a'nogo agaisa wogetikhe. 16A'nogo hilingitikhemo afuni hokhorogo omanogo inailo agaikhesik he, Allah fogerati logolik, mel isukwa: ”Ap kain Allah ane yaganisikhi logogin mene ekhe ninanggele'ma nen weinam aga yi o!” iluk igik, nen it ekhe nen he, ”Allah nen againafuri telninabigeluk waga o!” iluk igik, isukwa. 17A'nogo isukwasik he, wene hilinglagaikhe mene andi, o Yudea tonggwe yi awi ti awi andoma nen pikhit he, o esanggokwe andoma Yesus abok waluk wulifukwama wial lagaikhe.
Yohanes ima pelaginafi lagaikhe mene a'nogo nen agoromi Yesus oba lakfisa wagaikhe wene
(Mat. 11:2-19)
18Abok waluk wulifukwama re, it at Yohanes agoromi ane wanhi lagaukwa mene omanogo nen, wene hilinglagaikhe mene a'nogo at Yohanes yagatukwama esanggo holhikhesik he, aren agoromi inebe pire wolisasikhemo wagaukwama re, 19mel yagaisasikhe: ”Ap ekhe wesigin ikhi lagaukwa a'nogo harara? I a, athe, ap hunogoat mene ekhe yerogo logogun a, iluk yagasi lani o,” iluk, Tuhan Yesus oba lakfisa wagaikhe. 20Lakfisa wagaikhemo, Yesus oba wagaukwasik he, mel yagatukwa: ”Ninoe. At Yohanes ima pelaginaferek mene a'nogo nen he, ap ekhe wesigin iluk ikhi lagaukwa a'nogo harara? I a, athe, hunogoat mene ekhe yerogo logogun a, iluk, oba heinok wani lani iluk lakninobagai wagama wago,” iluk yagatukwa. 21A'nogo yagasi wagaukwasik werek kwelek andem sambul he, at Yesus nen he, afuni ou weak mene inom, heinet hokhorogo wati lagaukwa mene inom, fano higirinafik, munggwarengge obabut weak mene inendawimo kwisikhesik were'ma henegeisogo wulakfisigik, ineilenggen mum mene fano asuageluk fenggenogo hilinginafik, ikhi lagaikhesik, 22Yohanes agoromi wagaukwa mene omanogo mel yagaisasikhe: ”Hiren he, an yi'nogo ti'nogo hilingitunem hineilenggen niigik, wene ugunem hinesanggo holhik, egep mene andi, at Yohanes furogo yagasi lano o. Ineilenggen mum mene fenggenogo fano agik, inawe wut warek mene kwe lagik, inoba henanggo inailo mene higirinafunem fano agik, inesanggo tagum mene huakhogo holhik, warek mene inelugerinafik, it ekhe inagarek lek mene fano wene yagaisigik ugunem hineilenggen neegep a'nogo furogo yagasi lano.#Yes. 35:5-6, 61:1 23Yagaisambik he, sa nen An abiret nobagagi'lek logogin halok he, endawimo agaiyek hikhi logogin o, iluk yagasi lano o,” iluk yagaisasikhe.
24A'nogo yagaisasikhemo, it Yohanes nen yonggo lakfisa wagaikhe mene omanogo lagaukwama re, hobuk at Yesus nen afuni hokhorogo omanogo Yohanes abok mel yagaisasikhe: ”Hit he, o leimo afuni le'ma andoma nena mene hineilenggen houwogeluk laga lagep nogo. Findayo enggen parenggen sogoi en funhogo lagik-wagik ugunem houwogeluk laga lageba? 25I a, athe, nena mene hineilenggen houwogeluk laga lagep. Ap ekhe asu fano mondok mene laberek were'ma houwogeluk laga lageba? Yethani! Ap kaindek inaiba logolik halogat inasu fano mene labetik, inagarek yi mene ti mene hokhorogo fisogo welagik, agarek anggigi! 26Halok he, andoma nena mene houwogeluk laga lagep. I a, athe, ap Allah ane yagaisagarek mene ekhe were'ma houwogeluk laga lageba? Eberogoat andi aro. An nen yagahisak. It ap Allah ane yagaisikhi lagaukwa mene ekhe welagaukwa meneat he, it andi inenu elo'lek hak. Meneat he, at Yohanes andi nek he, enu werek esin aro. 27Wene at Allah nen mel isikhe:
Namlogo e. Hat hobuk lagainkwe,
hanggwe ebekwe yakhafi logouwageluk,
ap ekhe ayonggo fembik attak lakfagain,
iluk isikhemo lisu palogo fesukwa andi,
ebe re, at Yohanes fagerat isikhe o.#Mal. 3:1
28Halok he, an nen wene ekhe yi yagahisak. Afuni mondogat inagaisalagen taginabik wagaukwa meneat he, inenu lek enek. Meneat he, Yohanes andi nek he, enu werego. Meneat he, Allah awe a'ma fisikhere'ma andoma, at Yohanes enu lek hak meneat he, it afuni ekhe inenu lek mene andi inenu werek hangge aro,” iluk yagaisasikhe.
29A'nogo yagaisasikhemo, afuni hokhorogo omanogo inom, pemerintah uang faget kino iluk andogorogo fagarek mene omanogo inom, at Yohanes nen fageat ima pelaginafikhemo andi nen he, wene Yesus nen yagaisasikhe mene andi inesanggo holhukwasik, ”Allah endawimo nen anggikherek mene andi re, higit mondogo,” iluk isukwa.#Mat. 21:32; Luk. 3:12 30A'nogo isukwa meneat he, it ap Farisi mene inom, it ap Allah ane lisu palek yagaisikhi lagaukwa mene inom enek he, Yohanes nen ima pelakfisoageluk lagi'lek logolik, Allah nen a'nogo hilingiti logouwageluk endawimo anggasikhe mene a'nogo inabiren herakfisasukwasik welagaukwa.
31At Yesus nen wene ekhe yagaisikhi logolik he, ”It afuni o yogondak yaba werek he, nena mene oba lirogo yagahisak. Ki hangge werek. 32It inebe re, yi emberek higit. Yenggerugwi pasar onggo wanharek oba hurek logolik, inagaila'lak inom inane lakfigik wakfigik ikhi logolik, niren wuni hit wathinobagauwogeluk elugun wulafo meneat he, hiren hunikhe lagi'lek. Nen, le asuogeluk le wuni elugun wulafo meneat he, hiren le ebe agi'legat, iluk agarek andi hagat hilingiri'lagwi o. 33At Yohanes ima pelaginaferek mene wagaikhe andi re, sumburu inom, anggur enggen amusu inom, ninggi'lek wagaikhe andi nen he, hiren: Munggwarengge obabut weak mene endawimo kwikhesik werego, iluk ikhi lagagip. 34Meneat he, an abat ta'lasi wagagi a'nogo nek he, sumburu inom, anggur enggen amusu inom, hesangge nilik wagagi andi nen he, hiren he: Yethani! Ap yi re, sumburu inom, anggur enggen amusu inom, ambe lagalek weak nilik nikhi logolik he, ap uang pemerintah faget kino'luk wanharek mene inom, ap weak hilingitarek mene inom, hunet fakhaluk nikho yi hani? iluk yaganeti lagep andi. 35A'nogo meneat he, at Allah endawimo kagalek logolik hilingiterek a'nogo, it ekhe nen fano anggaluk, a'nogo higithogo hilingiti logogun halok, andi higit iluk futfogoin aro,” iluk, yagaisasikhe.
He weak hilingiterek mene ekhe nen amusu amben fano mene Yesus eisok oba watfesikhe wene
36At Yesus nen a'nogo yagaisasikhesik were'ma re, ap Farisi mene ekhe enu Simon, Yesus emberek sumburu at aiba nuogeluk ayonggo fesikhe. Ayonggo fesikhemo aiba kwisikhesik emberek sumburu nuogeluk, hu'lagaikhe. 37Hu'lagaikhesik, sumburu ninggi logolik were'ma, he o sili andoma mene ekhe weak hilingiti lagaikhe mene abok afuni inelu mene, afuni nen, ”Yesus o a'li logolik sumburu nili'logo,” iluk isukwama esanggo holhikhesik he, amusu amben fano mene onggo hokho palogo iwak helep enu pualam mene hilingik oba elonggoma hinago waluk wagaikhe.#Mat. 26:7; Mrk. 14:3; Yoh. 12:3 38Waluk wagaikhesik oloba kwisikhesik he, Yesus eisok unggutmo ambotma horok-horok wagaikhesik he, andoma mendek logolik le aga lagaikhe. Le agunem eil amusu Yesus eisok oba pisikhemo re, esiba hobuk horatikhe. Horatikhesik he, eisok oba hai ambe saluk watikhesik he, amusu amben fano mene waluk wagaikhe a'nogo Yesus eisok oba watfesikhe. 39A'nogo hilingitunem, ap Farisi mene nen, ”Yesus, sumburu nemberek nouwok iluk,” ayonggo fesikhe mene a'nogo endawimo nen mel anggasikhe, ”Ap yi Allah ane yagaisikherek mene logoilepma re, he yi weak hilingiterek mene nen hilingnafe iluk enegat futfeilep,” iluk endawimo anggugunem, 40at Yesus nen he, mel yagatikhe: ”Simon. An wene ekhe yagahesik,” iluk yagatikhemo aren he, ”Noe. Yaganom o,” iluk yagatikhemo, 41at Yesus nen he, mel yagatikhe: ”Ap inebe pire mene, ap ekhe arupiah elama faget wogisikhi lagaikhe mene nen wogisasikhemo inoba palek welagaikhe. Ekhe uang hokho mene 500 ribu rupiah hangge. Nen, ekhe 50 ribu rupiah hangge inoba palek welagaikhe. 42A'nogo were'ma, iren onggo wogosugun elok legagaikhemo re, uang wanhukwa mene lisu palek andi at kain a'nogo nen terogo hebisaluk he, Weat helegebo, iluk, yagaisasikhe. A'nogo hilingitikhemo re, ap inebe pire aremnogo sa nen hak inoe kain a'nogo endawiratikhe anggegen?” iluk isikhemo, 43at Simon nen he, ”Andi ap ekhe uang hokho hak oba palek welagaikhe meneat he, weat helegen o, iluk yagatikhe andi nen, endawiratikhe,” iluk yagatikhemo re, at Yesus nen, ”Egen andi aro,” iluk yagatikhe. 44A'nogo yagatikhesik he, at Yesus elokhe hebekhogo, he a'nogo wogetikhesik he, mel yagatikhe: ”Simon. He yi heilenggen hegen a? Lega. An hat haiba kwi wagi meneat he, haren, heisok oba sobalin, iluk, i ekhe wo'neten lek. Meneat he, he yi nek he, eil amusu neisok oba pelafesik he, esiba hotnafe o. 45Nen, haren hai hambe saluk watnafen legaro. Meneat he, he yi nek he, an kwi wagi huli nen, neisok oba hai ambe saluk watnafu mondok werego. 46Nen, haren amusu an nunggul oba ekhe watnobagegen lek meneat he, he yi nek he, amusu amben fano mene neisok oba watnobagaikhe o. 47A'nogo hilingite andi nen he, an nen hat ekhe yagahesik. At he yi nen weak hokhorogoat hilingiterek meneat he, at endawimo nen he, Yesus nen sebelogo legetfisikhemo, iluk hokhorogo endawitnafe andiba enegat hilinglaga o. It afuni weak endebat hilingiri'lagwi mene, Allah nen sebelogo legetfisugunem we endebat hak inendawiratarego,” iluk yagatikhesik he, 48At Yesus nen he a'nogo mel yagatikhe: ”Weak hilingiti lagen mene andi, arat sebelogo legetfisigi o,” iluk yagatikhe. 49A'nogo yagatikhemo, it afuni Yesus inom hurek logolik sumburu nasukwa mene omanogo, it-it ikhi logolik he, mel isukwa: ”Afuni weak hilingiri'lagwi mene sebelogo legetfisili'logo yi, ebe sa hagen legetfisili'logo anggegep,” iluk ugu kwelek,
50Yesus nen he a'nogo yagati logolik he, mel yagatikhe: ”Hat hendawinggen eberogo nenat noba himbiret fegen andi nen telhafi o. Halok he, hendawimo fanorogo haiba lan o,” iluk lakfesikhe.
Currently Selected:
LUKAS 7: inohap
Highlight
Share
Copy
Want to have your highlights saved across all your devices? Sign up or sign in
