YOHANES 18
18
Jhara lua kappe Yesus
(Mat. 26:47-56; Mrk. 14:43-50; Luk. 22:47-53)
1Ta alla Yesus pehebhajha mina harre, ta kako ke No nga ana hekola he la hebhakka Loko Kidron. Pa ni do era hewue ne dhoka. Ta maho ke Yesus nga ana hekola No he la dhara dhoka do naanne. 2Ne era do naanne do toi ke ri Yudas do mone tao apa ne; rowi do tima ke Yesus nga ana hekola No he la peteni la anne. 3Moko ta kako ke Yudas la era do naanne nga aggu hekewolo horodhadhu Romawi nga do parri ddau mone jaga Ammu Deo, do pepu ri kattu-kattu mone tunu-menahu he nga ri do Farisi he. Dakka ro nga aggu rakka, latera nga obo. 4Do toi ke ri Yesus hari-hari ne nga ne do ta jadhi pa ngi'u No. Hakku ri do mina harre ke, ta pehedharra-anni ke No nga ddau-ddau do na harre jhe kebhali ”Nadu ne do kale ri mu?”
5Bhale ri ro, ”Yesus do Nazaret ne.”
Ta lii ke Yesus, ”Ya ke dhe No.”
Yudas do mone tao apa ne, do titu paanne nga ro. 6Pa awe nga lii ne Yesus, ”Ya ke dhe No”, ta nuni-anni ke ro hari-hari jeh herabba la worai. 7Ta kebhali ri ke Yesus pa ro, ”Nadu ne do kale ri mu?”
Bhale ri ro, ”Yesus do Nazaret ne.”
8Ane Yesus pa ro, ”Adjo do alla ke Ya pe lii ma pa mu, ta Ya ma ke No. Ki do Ya ma ke ne do kale ri mu, hani we ne ddau do na hedhe pe langnga ngati dhe.” ( 9Ri lipali do naanne ke, ta tobo he ke ne lii Yesus do alle pepale uru jhara ri No, ”Ama, ngati ddau-ddau do wie ri Ama he pa Ya, bhule dho heddau he do ila.”)
10Simon Petrus do nga kadho hebhangngu kelewa, ta radde ke ri no, jhe pare pa heddau naannu kattu mone-ae ngati mone tunu-menahu, hakku happo ne wodilu hebhakka kedhanga ne ngati naannu do naanne. Ne ngara naannu do naanne Malkus. 11#Mat. 26:39; Mrk. 14:36; Luk. 22:42 Moko ta lii ke Yesus pa Petrus, ”Hope kebhali ne kelewa au ne. Ne penge ri au, do medae ta do dho ngino ke ri Ya ne gela lua hedui herui do wie ri Ama dhe pa Ya?”
Yesus aggo la hedhapa Hanas
12Ta kappe ke Yesus ri do horodhadhu Romawi he nga ri kattu horodhadhu ne, nga ri mone jaga-mone do Yahudi he, jhe ujhe ri ro. 13Ta aggo ke ri ro uru jhara la hedhapa Hanas ama matu ri Kayafas. Kayafas kattu mone-ae ngati mone tunu-menahu pa dhara ttau do naanne, 14#Yoh. 11:49-50 jhe no ke ne do alla petakkali pa mone pereda do Yahudi he, ta do rihi ie ta made heddau ddau tu hari-hari ddau rai.
Lua pehile Yesus ri Petrus
(Mat. 26:69-70; Mrk. 14:66-68; Luk. 22:55-57)
15Do pedute ma Yesus ri Simon Petrus nga heddau ana hekola No do wala ri. Ne ana hekola do wala do naanne do tade ri kattu mone-ae mone tunu-menahu ne, hakku ta maho le ke no pedute Yesus la kebhalla ammu kattu mone-ae do naanne. 16Bhale Petrus ta titu pa tele he ke, pa ubha toka ne. Ta dhai ne ana hekola do wala ne, ta la pedai lii ke nga banni jaga ubha toka ne, jhe la aggo ri no Petrus tu ta maho la dhara. 17Ta lii ke ne banni jaga toka ne pa Petrus, ”Wai, adho ke tau au lema dhe hala heddau ngati ana hekola ddau do na nidhe?”
Bhale ri Petrus, ”Adho.”
18Pa awe naanne do meringi-rai, hakku ne ddau jhagga he nga mone jaga he do alla ke petao rao-ai ta menyiru. Ta kako ke Petrus la titu hela'u tu ta la menyiru ai nga ro.
Yesus keree-tajjhe-tajjhe ri Kayafas
(Mat. 26:59-66; Mrk. 14:55-64; Luk. 22:66-71)
19Moko ta kebhale ke pa Yesus ri Kattu Mone-ae mone tunu-menahu ne, jhara lua ana hekola No he, nga jhara liajha No. 20Ta bhale ke ri Yesus, ”Do era loro-loro ma Ya ne pedaili nga do dho pewuni-wuni pa hedhapa ddau lowe. Do tima Ya ta wie liajha pa ammu-ammu hebhajha nga pa Ammu Deo, pa era do tima do Yahudi ta peowu-peteni. Ngaddi dho Ya ta pedai ne nga-nga nga pewuni-wuni. 21Hakku ta nga Tuan ne ma pekebhali nga Ya? Kebhali we pa ro ma do alla pedhanno ne liajha Ya he. Do bhara tatu ta do toi ma ri ro ne nga ne do pali ri Ya he.”
22Ta dhai Yesus ta lii mina harre ta tabbhe ke Yesus ri heddau mone jaga jhe lii no, ”Bhani tarra worawwu Au dhe ta lii mina harre penaja nga Kattu Mone-ae mone tunu-menahu.”
23Ta bhale ke ri Yesus, ”Ki do hala ne lii Ya, peke we ri au pa dhe ne nga ne hala Ya! Tapulara ki do petu ne lipedai Ya, ta nga hakku tabbhe Ya ri au?”
24Ta alla pemina harre, ta lii ke Hanas pa ddau he ta aggo Yesus nga ujhe-ai la nga Kattu Mone-ae mone tunu-menahu Kayafas.
Ta pehile ri ke Yesus ri Petrus
(Mat. 26:71-75; Mrk. 14:69-72; Luk. 22:58-62)
25Simon Petrus do pee ko ma nga menyiru-ai paanne. Ta lii ne ddau he pa no, ”Adho au lema ke heddau ne ana hekola ddau do na nidhe?” Tapulara ta pehile ke ri Petrus jhe lii, ”Adho.”
26Heddau ngati naannu kattu mone-ae mone tunu-menahu do pea'a-ari nga do happo wodilu ri Petrus ne, ta lii ke, ”Adho do ngadde au ri ya, do hela'u-la'u nga No pa dhara dhoka ne ngine ne?”
27Moko ta pehile ke Yesus ri Petrus, ’Adho,’ – moko pa dhara awe do naanne dhangnge ta tutu-oo ke manu.
Yesus aggo la hedhapa Pilatus
(Mat. 27:1-2, 11-14; Mrk. 15:1-5; Luk. 23:1-5)
28Rai jhammi-ae-ae ta aggo ke Yesus ri ro ti ammu Kayafas la ammu gubernur. Ne do Yahudi he miha, adho do maho la dhara rae gubernur, mita do dho lakka ri rue nga taru pedutu nga uku aigama ro, rowi do ddhei ro ta pedutu ne lua nga'a kewahhu Paskah ne. 29Rowi do mina harre ta kako ke Pilatus la tele ne la nga ro jhe kebhali, ”Ne nga ne lii kela mu penaja nga ddau do nadhe?”
30Ta bhale ke ri ro, ”Kita do dho bhule he No nga hala, aggo dho No ri jhi ma nga Ama Gubernur.”
31Ta lii ke Pilatus pa ro, ”Aggo we No ri mu jhe la happo miha ne hala No pedutu nga wee mu ma miha!”
Tapulara ta bhale ke ri do Yahudi he, ”Ie dho jhi ta wolo ddau pemade.” ( 32#Yoh. 3:14, 12:32 Nadhe mita tobo ke ne do pale ri Yesus ne jhara loro jhara lua made No ne.)
33Ta maho bhale ke Pilatus la dhara, jhe la pedoe Yesus, jhe kebhali pa No, ”Au ke ne Duae do Yahudi ne?”
34Bhale ri Yesus, ”Ne likebhali do nadhe, do ngati au miha, we era ddau do wala ne ma peke pa au ne jhara lua Ya dhe?”
35Bhale ri Pilatus, ”Ta do Yahudi ke ya? Ne do ma jhole Au pa ya, ddau-rai Au dhangnge ma miha nga kattu-kattu mone tunu-menahu he. Ne nga ke ne do alla petao ri Au?”
36Ta lii ke Yesus, ”Raipereda Ya adho ngati raiwawa do nadhe. Kita ne raipereda Ya ngati raiwawa do nadhe, moko ne ddau-ddau Ya do ta pelawa-pemuhu, mita do dho jhole Ya ma dhara wolaabba mone pereda do Yahudi. Tapulara do tarra ne raipereda Ya adho ngati raiwawa do nadhe!”
37Moko ta kebhali ke Pilatus pa Yesus, ”Ki do mina harre, Au dhe dua?”
Bhale ri Yesus, ”Au ma do pali ta Ya dhe, duae. Ne metana nga dakka Ya ma raiwawa dhe, tu hahhi lua pedabbho we, tu ta ma peteleo ne jhara lua mola-mira ne. Ddau do ngati lua mola mira ne do pedhanno nga Ya.”
38Ta kebhali ke Pilatus pa Yesus, ”Ne nga ke ne lua mola-mira ne?”
Wolo tu Yesus, wole ta pemade
(Mat. 27:15-31; Mrk. 15:6-20; Luk. 23:13-25)
Moko ta mahhu-anni ri ke Pilatus la peabu nga do Yahudi he, jhe lii pa ro, ”Ngadde dho ri ie ta hahhi hala he pa ddau do naanne. 39Tapulara pedutu pa tima do ta golo ri ya heddau do rate pa Lodho Nga'a Kewahhu Paskah. Ddei ma ke mu ta gole ri ya ne duae do Yahudi ne tu mu?”
40Ta bhale ke ri ro nga peka-ka, ”Adho, bhole No, tapulara Barabas!” (Barabas dhe, heddau do mone raba onu-oha ddau).
Currently Selected:
YOHANES 18: LAIHVN
Highlight
Share
Copy
Want to have your highlights saved across all your devices? Sign up or sign in
