Lukas 18

Sukamno subot nggonna dik yo si yepasye

1Orge Yefun Yesus gwat sukamno dik yo wa An duno An bi pakon, subere kamdik-kamdik pakon ne ki suk su Yefun petok sor, subere án bambraiwa ete misyar nde. 2Yefun Yesus ki do, ”Yepasye dik yo kem mo kota dik yo, an ye gato kibot nje bi sukmaskwa mone. Yepasye ne yo nyuwa Yefun Allah nde. Yepasye ne bi sukjimnut sye mo an dakai sor re, an yo nutbot ye yi nde. 3Nggonna dik yo kem mo kota ne dom. Kamdik-kamdik nggonna ne mu ku yepasye ré petok sor. Nggonna ne ndek mo yepasye ré do, ’Nan ós ji et! Nan ki os yo ndo wa ji. Nan syogat ye gato ben sukibit nai ji ne bi kit ji kekro et!’ 4Kam bok yo, ete yepasye ne bariwa ós nggonna ne. Sarewo kom mo rut sa, yepasye ne nut mo an dakai do, ’Ji yo nyuwa Yefun Allah nde, ji yo nutbot ye yi dom nde, 5sarewo nggonna ré ma syimfar ji gat. Sa ndo sa ji ós mom et. Ji syogat ye gato ben sukibit nai mom bi kit mom kekro subere nggonna ré yo ma syimfar ji o nde.’ ”

6Orge Yefun Yesus ki do, ”Yepasye ré, an yo ben bi suk-i ri-roi nde. Sarewo nin nutbot yepasye ré bi sukdu-i sisu ndo et. 7Tepsu yepasye ne syogat ye ben sukye nai ye gato ben sukibit nai nggonna ne, bere Yefun Allah syo sukye nai ye gato ben sukibit nai Yefun bi rus-i gato ndekwa Yefun ós án noru nombrak sor. Bere Yefun Allah ki do, ’Ji me mo et’ bado? 8Sane nde, wo Ji ki sare do, bere Yefun Allah ós An bi rus-i kekro. Sarewo kapyo tak Ji, gato Yetu bi Pa, satu ma mo bur ré it yo, bere Ji ku ye gato onyar kem mo Yefun Allah mó, bado?”

Sukamno subot ye Farisi si ye gato nai sugum kadit nje wa pemerintah

9Yefun Yesus duno nje mone sa, ye deyo nut do án sa, yé gato ben sukndo tepsu Yefun mit wai kadit ye yi neya. Yé ne bes án nggwa kok, yé ne nut do ye yi yo ben suk-i ndo teker nde. 10Sane Yefun Yesus gwat sukamno dik yo. Yefun Yesus ki nai yé gato bes án nggwa kok ne do, ”Yetu ka we mu ki suk su Yefun mo Yefun Allah bi nu. Ye we dik yo ye Farisi, ye we dik yo o ye gato nai sugum kadit nje wa pemerintah. 11Ye Farisi ti mone, an ki suk su Yefun Allah, sarewo an ki subot an dakai sare do, ’Ndo mo Yefun Allah, Nan, we ji yo ben sukibit sato ye yi nde. Ji yo gro sye wa suk nde, ji yo syimsi suk nde, ji yo kidar suk nde, ji yo ben siri su nggon yo mo nde. Yé mwa ne ben suk sane, wo ji yo ben suk sane nde. Ji ki ndo mo Yefun Allah, Nan, we ji ré yo ben sukibit tepsu ye gato nai sugum kadit nje wa pemerintah gato ti reya nde. 12Ari dik, ji mewa ji nggwa kadit sugit yei wam we, we ji ki suk su Nan sor. Suk mwa gato ji ku ne yo, ji syo deyo nai Nan, Yefun. Ji ku sugum det musyu dik yo, ji syo det dik yo nai Nan, ji ku det musi.’ 13Sarewo ye gato nai sugum kadit nje wa pemerintah ne, an ti ko gan kadit ye Farisi ne. An yo sok mu nim mo gu nde, an nggo an tunap, we an nderku an nggwa mo sukibit mwa gato an ben ne. An ki do, ’Yefun Allah o, ji anato ye gato ben sukibit mwa. Nan maskwa ji o nde, wo Nan jimnotku ji et.’ ”

14Sane Yefun Yesus ki do, ”Ji ki sare do, ye gato nai sugum kadit nje wa pemerintah ré, an satu mo an bi nu sa, Yefun Allah nut do, ye ré anato ben sukndo tepsu Yefun Allah mit. Yefun Allah yo maskwa an mo sukibit gato an ben ne o nde. Wo Yefun Allah yo iwa ye Farisi ne nde. Sane, ye gato bes an nggwa kok tepsu an yepasye, bere Yefun Allah ben an damen or re, wo ye gato ben an nggwa ga tepsu pa wokgan, bere Yefun Allah dakai bes an gum yepasye o re.”

Yefun Yesus ak syim mo pa wokgan subere ri ma Yefun Allah ben sukndo su pa ne

(Mat. 19:13-15; Mrk. 10:13-16)

15Yetu ge bok yo gwat an bi pa wokgan ma mo Yefun Yesus wa Yefun Yesus ak syim mo pa ne subere ri ma Yefun Allah ben sukndo su pa ne. Yefun Yesus bi pakon me yé gwat pa wokgan ne ma mo Yefun Yesus sa, pakon ne maskwa, pakon ndantom ye gato gwat pa wokgan ma ne. 16Sarewo Yefun Yesus kendo pa wokgan ne ma, Yefun Yesus ki nai An bi pakon do, ”Nin misyar pa wokgan ma mo Ji sor, nin duyawa nde, we ye gato jammo Ji tepsu pa wokgan jammo bi ai, bere Yefun Allah jowa ye ne. 17Suk gato Ji ki ré suksangge anare, ye to bariwa jammo Yefun Allah tepsu pa wokgan jammo bi ai ne yo, bere ye ne yo ku os wa sok mo Yefun Allah bi rus-i nde.”

Yekwesu gato bi suk mwa

(Mat. 19:16-30; Mrk. 10:17-31)

18Ye Yahudi bi yekwesu dik yo ndo mo Yefun Yesus do, ”Yeguru, Nan sa, Nan ben Nan bi suk-i ndo. Ji ben suk sato suma subere ji kem ndo to kapyo mato kapyo ne?”

19Yefun Yesus ki nai ye ne do, ”Suma ben to nan ki do, Ji ben Ji bi suk-i ndo ne? Yetu gato ben bi suk-i ndo yo mo nde, wo Yefun Allah ka dik sor anato ben bi suk-i ndo. 20Nan jam Yefun Allah bi sukduno sato: Nin ben siri daret nde, nin gu ye yi kwop daret nde, nin syimsi suk nde, nin ndak ye yi gum su sukkidar nde, nin jammo nin bi ai si nin bi im.”

21Ye ne ki do, ”Sukduno mwa ne sino ji benbot kadit ji ka yemsok ne it.”

22Yefun Yesus jam ye ne bi sukdu sa, Yefun Yesus ki nai an do, ”Suk dik yo anato nan yo benbot nde tó, sare do, nan mu nan so nan bi suk mwa gato nan ku ne, orete suk mwa ne bi sugum nan syo nai ye gato yo ku suk yo mo nde, sane bere nan ku suk mwa mo gu. Nan syo sugum ne nai ye gato yewa suk, orete nan ma simo Ji et.” 23Ye ne jam sukdu gato Yefun Yesus ki ne sa, ye ne jimnutbot ndo nde, we ye ne bi sukjimnut sye mo an bi suk mwa ne.

24Yefun Yesus jam ye ne jimnot teker subot an bi suk mwa. Sane Yefun Yesus sokme ye ne ete Yefun Yesus ki do, ”Ye gato bi suk mwa iwa an gum sok mo Yefun Allah bi rus-i ne yo, bergan os ne yé teker wa an re. 25Te suge sye gato gum do unta sok ket sum parke wak mó bado, nde e? Yo sok mo nde, sukye teker ware. Sane dom yé gato bi suk mwa iwa án gum sok mo Yefun Allah bi rus-i yo, suk ne sukye teker wa án re.”

26Yé mwa gato jam sukdu gato Yefun Yesus ki ne, án ndo mo Yefun Yesus do, ”Sane bere je u anato ku os wa sok mo Yefun Allah bi rus-i ne?”

27Yefun Yesus ki do, ”Yetu yo bi os mo nde, wo Yefun Allah sa, bi os mó. Yefun Allah nggi wai mó re.”

28Orge Petrus ki do, ”Men gare, men misyar men bi rus si suk mwa gato men ku ne sino kem, ete men simo Nan.”

29Yefun Yesus ki nai án sino do, ”Suk gato Ji ki ré suksangge anare, ye to misyar bi nu e, bi nji e, bi yenggras e, bi pa e, bi suk mwa e ne kem ete jammo Yefun Allah tepsu an bi Yekwesu yo, 30sugato an kem mo bur ré tó yo, Yefun Allah syo suk gado ne satu nai an mwa wai o re. Bere kam sari ne ma, ye ne kem ndo to kapyo mato kapyo.”

Yefun Yesus ki sukdu subot kam gato bere yé gu An kwop su ne kom mo wam dogri

(Mat. 20:17-19; Mrk. 10:32-34)

31Yefun Yesus kendo An bi pakon ge musyu dik sop we ma dor kadit yé yi, orete Yefun Yesus ki nai An bi pakon ne do, ”Men mu mo Yerusalem it anare. Suk mwa gato yenabi krom subot Ji gato Yetu bi Pa ne bere bor mone. 32Bere yé syo Ji mo yewis yi syim-i. Yewis yi ne bere ki Ji ket kwayo-kwayo, yé ne kabor Ji, yé ne sukut tom Ji, yé ne kwam Ji su bus, orete yé ne gu Ji kwop. 33Sarewo kom mo kam we rek, bere Ji sun kadit sukkwop o re.”

34Yefun Yesus bi pakon jam nde sukdu gato An ki ne re, pakon ne jam wokgan yo dom nde. Sukdu gane bi sukjimnut ne, Yefun Allah gurik kadit pakon ne re, sane án jam nde re. Pakon ne nalar mo sukdu gato Yefun Yesus ki ne or re.

Yefun Yesus ben ye gato gro ndu ne gro ndo satu

(Mat. 20:29-34; Mrk. 10:46-52)

35Yefun Yesus mu karowa Yerikho saresa, yetu ge dik yo gato gro ndu kem mo os de, ete an ndek suk mo ye gato mu wai ket os ne. 36Ye gato gro ndu ne kem mo os de sa, an jam yé mwa wai ket os mone, sane an ndo mo yé mwa ne do, ”Yé ben suma sare ne?”

37Yé ki nai an do, ”Yesus, ye Nazaret, wai ket os tore.”

38Sane ye gato gro ndu ne saiye do, ”Yesus o, yeraja Daud bi Dat o, Nan jimnotku ji et!”

39Orge ye gato mu nyim mo Yefun Yesus gwem maskwa ket ye gato gro ndu ne, ete yé ndantom an do, ”Nan not tom!” Yé da ndantom an, sarewo ye gato gro ndu ne saiye gat nggi wai o do, ”Yeraja Daud bi Dat o, Nan jimnotku ji et!”

40Sane Yefun Yesus ti not, An syogat yé gwat ye gato gro ndu ne ma mo An. Ye gato gro ndu ne do ma sa, Yefun Yesus ndo mo an do, 41”Nan iwa Ji ós nan su suma ne?”

Ye ne ki nai Yefun Yesus do, ”Yenggras, Nan ós ben ji gro ndo et.”

42Yefun Yesus ki do, ”Nan gro ndo satu tom! Nan onyar kem mo ji, sane nan ge it anare.”

43Yefun Yesus do ki An bi sukdu or sa, ye ne gro ndo satu it anane. Orge an si Yefun Yesus mubot os ne, ete an un Yefun Allah mone. Yé mwa mone me suk gato Yefun Yesus ben ne sa, yé mwa ne un Yefun Allah dom.

Currently Selected:

Lukas 18: KGR

Highlight

Copy