Lukas 21

Nggonna gwat sugum bok mo peti wa som Yefun Allah

(Mrk. 12:41-44)

1Yefun Yesus kem mo Yefun Allah bi nu de sa, Yefun Yesus sokwa yepasye gato ku suk mwa ma mone. Yefun Yesus sokwa yé ne bok bi sugum mo peti dik yo mone. Yé bok sugum mo peti ne wa yé ne som Yefun Allah su ne. 2Yefun Yesus sokwa nggonna dik yo ma mone dom. Nggonna ne ye gato yewa suk, mom yemiskin gato ku suk mo nde. Nggonna ne gwat bi sugum wokgan yi sor. Mom bok sugum det wokgan we mo peti mit ne. 3Yefun Yesus ki nai An bi pakon do, ”Suk gato Ji ki ré suksangge anare, nggonna gato yewa suk ré bok bi sugum-i mo peti mwa wai kadit yé mwa ré sino, 4we yé mwa ré da bok sugum mwa, sarewo án syo sukwokgan kadit án bi suk mwa gato án ku ne. Nggonna ré da bok sugum wokgan sor re, sarewo mom syo suk gato mom ku ne sino, mom bok or sino mo peti re.”

Yefun Yesus ki subot kam gato bere yé ben Yefun Allah bi nu ibit

(Mat. 24:1-2; Mrk. 13:1-2)

5Yefun Yesus bi pakon sokbot Yefun Allah bi nu ne sa, An bi pakon deyo ki do, ”Jok gato yé nggo nu su ne, jok ne ndo wai o re. Suk mwa gato yé grem mo nu wa som Yefun Allah su ne, nin me ne, ndo wai o re.” Sane Yefun Yesus ki do, 6”Suk mwa gato nin me more, kam sari ne ma ibit sino. Jok mwa gato yé nggo nu su ne, bere yé ma krut jok mwa ne or re, dik yo ut mo dik yo o nde.”

Yé ku sukye, yé ben sukibit nai yu

(Mat. 24:3-14; Mrk. 13:3-13)

7Yefun Yesus bi pakon ndo mo An do, ”Yeguru, sukdu gato Nan ki subot Yefun Allah bi nu ne te, kam ot ete suk mwa gare bor ne? Suk sato suma anato bere bor nyim wa ós men jam do, bergan suk mwa ne bor it, kam gato Nan ki ne ana gare it ne?”

8Yefun Yesus ki do, ”Nin mewa nin nggwa sawe ye yo ma kidar nin. Bere yé mwa ma ki do, ’Ji anato Kristus, kam gane ana ma it, bur ré kru it anare,’ ete kidar yé bok ne sino jammo án re. Yé do ma ki sukdu sane yo, nin simo yé ne nde. 9Bere nin jam sukdu subot yé ben sukndi karowa nin, bere nin jam sukdu subot yé gu yu mo peyo-peyo, sarewo nin nyu nde. Bur ré yo kru nde tó, bere yé ben sukndi ete gu yu nyim et.”

10Yefun Yesus ki nai An bi pakon o do, ”Bere negara deyo futma gu negara deyo o, bere yewis deyo futma gu yewis deyo o mone tó. 11Bere sui sye juwai bur ré ram mo peyo-peyo. Bere sukonde sye bor mo peyo-peyo dom. Bere suki ben yé mwa ne i. Bere suk bok yo gato kadum Yefun bi suktinggi bor mo gu nim ben nje mo bur ré nyu ndo nde. 12Sane suk mwa gane yo bor nde tó, bere yé but nin, bere yé ben sukye nai nin. Yé gwat nin deyo mu mo ye Yahudi bi nu ari dom, ete yé ndobot nin mone. Yé gwat nin deyo sok mo sel dom. Bere yé but nin, we nin onyar kem mo Ji, ete nin ben Ji bi suk-i. Bere yé gwat nin mu mo yepasye gato jowa bur ré, bere nin ti mo yeraja si gubernur gwem. 13Yé do gwat nin mo yepasye ne gwem it yo, nin ku os mone wa nin ki sukdu subot os ndo gato Yefun Allah fro wa yetu ne nai yepasye ne jam. 14Sane yé yo gwat nin mu mo yepasye nde tó, nin nai sukjimnut dik do, nin jimnot teker subot suk gato bere nin ki ne nde. 15We, bere Ji anato ós nin ki sukdu gato ndo nai ye gato ndobot nin ne. Ji ós nin jam suk subere ye gato maskwa nin yo duwer nin mo suk gato nin ki ne nde. Bere ye gato maskwa nin yo ku os wa iswen nin mo sukdu gato nin ki ne nde. 16Bere nin deyo bi ai si bi im meret os ete syo nin mo ye gato bariket nin syim. Nin deyo bi nji, bi mben, bi yesyim meret os wa nin dom, yé ne syo nin mo yepasye syim dom, orete yepasye syokom yé gu nin deyo kwop wé. 17Nin ben Ji bi suk-i, sane bere yé mwa ne sino bariket nin. 18Sarewo Yefun Allah mewa nin pe, nin sugo wokgan yo ibit mo nde. 19Nin onyar kem pe mo Ji it yo, bere nin kem ndo to kapyo mato kapyo.”

Yefun Yesus ki subot kam gato bere yé ben kota Yerusalem ibit

(Mat. 24:15-21; Mrk. 13:14-19)

20”Nin do me yeko futma wairi wa Yerusalem it yo, nin jam do, bergan yeko ne ben kota ne ibit. 21Nin do me yeko ne ma yo, ye gato kem mo bur Yudea titi mu mo banbo et. Ye gato kem mo kota titi kadit kota et. Ye gato kem mo kota de nden sok mo kota mit nde. 22We, su kam gane Yefun Allah syo sukye nai yé bok ne sino mo kota ne. Yé ku sukye sane, subere tepsu suk gato yé krom mo Yefun Allah bi sukdu kam nyim bere bor re. 23Su kam gane nggon gato syimfar si nggon gato ku bi pabom er tó ne, bere ku sukye ndo nde. Ye gato kem mo bur Yudea bere ku sukye ndo nde, we Yefun Allah maskwa ket yewis gato kem mo bur Yudea re. 24Yé mwa mone, bere yeko ne syek deyo kwop su nyom. Bere yeko but deyo ete gwat yé ne mu mo bur yi neya tepsu pakwerut. Orge ye gato jam nde Yefun jom nje mo Yerusalem krat. Yé ne jom nje mone sor kom mo kam gato Yefun Allah ki ne.”

Kam gato Yetu bi Pa satu ma mo bur ré

(Mat. 24:29-31; Mrk. 13:24-27)

25”Bere Yefun Allah bi suktinggi bor mo gu anato kam e, aina e, bí e ne yo kas ri o nde. Bere sem nap sye teker dom. Yé mwa mo bur ré sino me suk sane, ete án nyu ndo nde, án jimnotbot teker. 26Yé me suk bok gare, ete yé kwabom kro, ye deyo mbrin mone. Yé nutbot do, ’Suk bok gare bere koirut sa u ne?’ Yé ne nutbot suk bok ne teker, we suk mwa mo gu nim ne yo kas ri o nde. 27Yé do me suk mwa ne bor sane it yo, Yetu bi Pa to Ji ré ma it anane. Bere yé mwa ne sino me Ji is ma sisu nyotem, Ji kaim rer-rik su Ji bi suktinggi bor mone. 28Nin me suk mwa ne do bor it yo, nin ti nggi, we bergan suk gato ndo wai bor mone. Bergan sor ete Yefun Allah sombok nin wé kadit sukye, ete Yefun nai nin kem ndo to kapyo mato kapyo mo An bi nat-i.”

Sukduno gato ye jam kadit suk gato bor mo kwe ara

(Mat. 24:32-35; Mrk. 13:28-31)

29Orge Yefun Yesus gwat sukamno sare do, ”Men nut subot kwe ara si kwe yi mwa neya. 30Men me i-nat kup be bor sim yo, men jam do, bergan no kro it anane. Nin me su nin gro re. 31Sane dom, nin me suk mwa gato Ji kibot gare bor it yo, nin jam do, bergan sor ete Yefun Allah ma wa An jowa yetu mo bur ré tepsu yetu bi Yekwesu it anane.

32Suk gato Ji ki ré suksangge anare, yé gato kem mo bur su ré, án sino yo kwop nde tó, suk mwa gato Ji ki ne bor sino re. 33Gu nim ne si bur ré bere kru re, wo Ji bi sukdu ne kem sor to kapyo mato kapyo.”

Nin frawa nin nggwa

34”Nin frawa nin nggwa subere su kam gato Ji satu ma ne, nin fro wa re. Nin mewa nin nggwa subere nin bi sukjimnut kas ri et. Nin yenau nde, nin simo sukibit gato yenau ben ne nde, nin jimnotbot suk mwa gato yetu yémo, sato sugit e, san e, sugum e ne teker nde. Nin bi sukjimnut sye mo suk mwa ne teker nde, sawe nin gensu kam gato Ji satu ma mo bur ré su ne. 35Sane nin frawa nin nggwa, we kam gane bere bor re, yetu bok ne sino mo bur ré bere gensu sukye gato bor mone. 36Nin frawa nin nggwa pe et! Nin ki suk su Yefun Allah petok sor subere An ós nin titi fro wé kadit sukye gato bere ma ne. Nin ndek mo Yefun Allah dom subere su kam gato Ji, gato Yetu bi Pa ma ndobot nin yetu ne, nin yo damen mo suk gato nin ben ne nde.”

37Kamdik-kamdik Yefun Yesus duno nje mo Yefun Allah bi nu. Nombrak yo, Yefun Yesus duno nje mone. Noru yo, An mu mo kota de nden ete An sem mo bobuk Zaitun. 38Nyotkwo, ete yé bok ne sino ma mo Yefun Allah bi nu subere án syaretwa Yefun Yesus ki bi sukdu-i mone.

Currently Selected:

Lukas 21: KGR

Highlight

Copy