Pewaliana 19
19
Sodomo hante Gomora nilobuꞌi
1Meroduo malaꞌeka tiꞌo mehupaꞌ i Sodomo i tempo kononewa. Hi Lot kolentuꞌana mahura i wambaꞌ bente pekahia pe kota Sodomo. Ikonoꞌokiꞌnalu, io metotiꞌi ako modupaꞌhi, katoꞌo io melingkotuꞌ hante rouꞌna wute pe woiꞌ, 2hei mololita, “Tua, maweomokei pe tambina hawiꞌmi hieꞌe, iwaheꞌmokei kapuꞌmi hei mohaminimokei iseꞌe, poꞌoni romo mehoꞌolu honiꞌkei mampololiu patengkaꞌami.” Mehoniꞌhi “Hawaꞌi, ingka hingkiꞌ mohaminika i tanobaꞌa.” 3Angkana alaꞌ noparukuhi maweo, katoꞌo iohi maweohi mpuꞌu mohamini i tambina, katoꞌo io mampatimomo kopongkonara to motomiꞌ, io metunu depa to hawaꞌi keragiꞌ, uko tiꞌo mangkamohi. 4Angkana ikohandoaꞌara turu, lekiꞌna tomaꞌanihi to i kota Sodomo tiꞌo, moromiꞌ to moleaꞌ wute tomotodi, hawaꞌi uwaꞌ to isaliana, mehupaꞌhi molimbuꞌ tambi tiꞌo. 5Iohi meꞌoꞌando pe hi Lot rotiꞌi, “Iꞌumbohireꞌi tomaꞌani to mehupaꞌ pe ingko hingkonia? Komihi mesuwu humei pe ingka, hingkeꞌna kipohantambihi.” 6Katoꞌo mesuwumo hi Lot mampohidupaꞌkihi i hinaro wambaꞌ, angkana wambaꞌ nowiti ka tunduna, 7hei io mololita, “Halali-halalingku, inioꞌkei mowalia to kodake. 8Ibahaꞌlukei, uwaꞌ meroduo anaꞌka towowalo to handoaꞌi ka noruntui tomaꞌani, hinamoiae iohi kukomi mesuwu pe ingkei, iwalimokei pe iohi hibali to itiꞌikei moromiꞌ, asalanalu tolori to uwaꞌ i tambingku inioꞌkei ipahampo-hampohi, aku masipatoꞌa mamperorui tolori to uwaꞌ i lali tambingku.” 9Angkana iohi mantiꞌi pe hi Lot, “Inioꞌka ilowaꞌ! Ingko toaꞌ to mehupaꞌluko anioꞌko mewali to mobutusi pe ingka! Polai katoꞌo! Ane hawaꞌko molai hinewowoꞌena hingkiꞌ kipopoꞌioꞌioko meliu ka toaꞌ to meroduo tiꞌo!” Katoꞌo iohi mohomunaki hi Lot hei akohi mosomunaki wambaꞌ. 10Angkana meroduo toaꞌ tiꞌo mampetandoki korawena pe hi Lot, katoꞌo robiniꞌ hi Lot mekahi pe lali ntambi, honiꞌi rowiti wambaꞌo. 11Hei iohi mampobilo matana toaꞌ to itoꞌohi i hinarona tambi tiꞌo, ka to kokiuꞌ wute i to kodeꞌ, horiana moreraꞌ-reraꞌhi mampaliꞌ-paliꞌ wambaꞌ.
12Katoꞌo meroduo toaꞌ tiꞌo mololita pe hi Lot notiꞌi, “Ane uwaꞌi tinoma iseꞌe, moniamu ba anaꞌmu tomaꞌani, anaꞌmu towoweꞌe, ba himolu tinoma i kota hieꞌe, ikomimohi molai ka peꞌohaꞌa hieꞌe, 13alaꞌ ingka hingkiꞌ mampopeꞌawuka peꞌohaꞌa hieꞌe, alaꞌ woriꞌi pangkonunuꞌane toaꞌ noniuꞌ kota hieꞌe i hinarona Pueꞌ, iomo horiana norumbaꞌka Pueꞌ molobuꞌi kota hieꞌe.” 14Mesuwumo hi Lot, ako mampatiꞌikihi meroduo to hingkiꞌ mewali moniana, to hingkiꞌ hamoko hante meroduo anaꞌna towoweꞌe, notiꞌi, “Peꞌaromo, molaimoki ka peꞌohaꞌa hieꞌe, alaꞌ Pueꞌ hingkiꞌ molobuꞌi kota hieꞌe.” Angkana rotiꞌireaꞌ hi Lot mohalaꞌ-halaꞌlu.
15Dungku ando, meroduo malaꞌeka tiꞌo mampopeꞌaro hi Lot, rotiꞌi, “Ikomimo hohiꞌ hantambima hante meroduo anaꞌmu to uwaꞌ iseꞌe, hingkeꞌna inioꞌkei mahi alaꞌ pehukuna Pueꞌ i kota hieꞌe.” 16Hi Lot molebaꞌ-lebaꞌlu, katoꞌo malaꞌeka to meroduo motiko korawena hi Lot, hantambina hei anaꞌna, nokomihi molai ka kota tiꞌo hingkeꞌna iohi salamaꞌ. 17Uko tiꞌo haduo malaꞌeka mantiꞌi, “Pehilaimo iposalamaꞌmo wotama! Anioꞌko mehahiliꞌ pe tundumu hei inioꞌko woꞌo meꞌoha-ohaꞌ. Mehilaimoko pe birina hingkeꞌna hawaꞌkei mahi.” 18Notiꞌi hi Lot pe iohi, “Inioꞌ wongkenaꞌ i powatoꞌoka uweꞌ. 19Kotuꞌuana hawiꞌmu hieꞌe nipaꞌanimo rima i hinaromu, hei uweꞌku mowalimo komoromiꞌ pe aku, angkana ane mehilaiꞌa pe birina, bateꞌna hingkiꞌ nodongkeꞌa woꞌo kohorewuꞌ moꞌawa hante kota tiꞌo. 20Kotuꞌuana kota ndiꞌo dodungkulu nipehilaihi nolou, kota tiꞌo kokiuꞌ hinamoiae mehilaika nolou hingkeꞌna kisalamaꞌ.” 21Mehoniꞌ malaꞌeka tiꞌo pe io, “Kutorimomo perapiꞌma. Noniuꞌ kota to itiꞌi tiꞌo hawaꞌi hingkiꞌ kulobuꞌi. 22Mehilaimoko nolou, alaꞌ ane handoaꞌko tene wute inoꞌo handoaꞌi hingkiꞌ kulobuꞌi.” Io horiana konaꞌ bolaꞌ ngkokiuꞌ tiꞌo nikokeneꞌi Soar. 23Mewanta ando hi Lot wutemo i Soar.
24Katoꞌo Pueꞌ mampopengkohou ura watu to moꞌapi i kota Sodomo hante Gomora. 25Katoꞌo mewalimo mpuꞌu pelobuꞌi i kota-kota tiꞌo hei i ngamba Yarade hante lekiꞌna toaꞌ to uwaꞌ i kota moꞌawa-awa hante lekiꞌna to tuwuꞌ i woiꞌ. 26Angkana hantambina hi Lot, to matengkaꞌ metuntu, mehahiliꞌ pe tunduna, katoꞌo io mewali watu ntoaꞌ bure. 27Hi Burahima mehoꞌolu-olu nolou pe peꞌohaꞌana to liu, metotiꞌi i hinarona Pueꞌ, 28hei io mepopanto pe nontona Sodomo hante Gomora hei lekiꞌna woiꞌ ngamba Yarade. Himpale noꞌokiꞌ oroꞌ to timambuha hibali oroꞌ podompua.
29Watoꞌomola kopewaline pelobuꞌina Pueꞌ Ala i kota-kota peꞌohaꞌana hi Lot. Angkana Pueꞌ Ala mamponindi hapo perapiꞌna hi Burahima, iomo horiana hi Lot noposalamaꞌ.
Hi Lot hante meroduo anaꞌna towoweꞌe
30Molaimo hi Lot ka Soar hei io lebaꞌ moꞌawa-awa hante meroduo anaꞌna towoweꞌe i birina, alaꞌ io hawaꞌi wurani meꞌohaꞌ i Soar, katoꞌo lebaꞌmo io i lali woloꞌ watu moꞌawa meroduo anaꞌna. 31Katoꞌo i hampiha tempo anaꞌna tokokaꞌ mololita pe hineeꞌna, “Umoꞌta motodimo, hei hawaꞌi uwaꞌ tomaꞌani i peꞌohaꞌa hieꞌe to mangkododungkuiki, hibali to biasana to mewali i humalekiꞌna duniaꞌ. 32Hoki topaꞌaniꞌi umoꞌte maꞌinu angoroꞌ, katoꞌo turuki hante io, hingkeꞌna noꞌuwaꞌ muleꞌne umoꞌta ka ingkiꞌ.” 33I wini tiꞌo iohi mampaꞌani umoꞌra maꞌinu anggoroꞌ, katoꞌo mekahimo to kokokaꞌ ako turu hante umoꞌna, hei umoꞌna tiꞌo hawaꞌi nobahaꞌ hapo to nowali anaꞌne. 34Ikonokoꞌondoina mololitamo kokaꞌne pe hineeꞌna, “Hiwowini aku turumoꞌa hante umoꞌta, hinamo wini hieꞌe topopaꞌinu womo angoroꞌ, hingkeꞌna mekahimoko ako turu hante io, hingkeꞌna noꞌuwaꞌ muleꞌne umoꞌta ka ingkiꞌ.” 35I wini tiꞌo, iohi mampaꞌani umoꞌra maꞌinu anggoroꞌ hingkeꞌna nomolanu, katoꞌo meꞌaromo tohinoneeꞌ ako turu hante umoꞌna, hei umoꞌna tiꞌo hawaꞌi nobahaꞌ hapo to nowali anaꞌne. 36Katoꞌo anaꞌna to roduo mehinonaꞌimo mpuꞌu ka hi Lot umoꞌra. 37To kokokaꞌ moꞌanaꞌ haduo oꞌanaꞌ tomaꞌani, hei nokokeneꞌi hi Moab, iomo peꞌuluana toaꞌ toMoab wute hinewowoꞌena. 38Tohinoneeꞌ woꞌo moꞌanaꞌ haduo anaꞌ tomaꞌani, hei nokokeneꞌi hi Ben-Ami, iomo peꞌuluana toAmon wute hinewowoꞌena.
Currently Selected:
Pewaliana 19: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
