Pewaliana 25
25
Muleꞌna hi Burahima ka hi Ketura
1Hi Burahima mohantambi womo korompihana, konaꞌna hi Ketura. 2Towoweꞌe tiꞌo mampoꞌanaꞌki hi Simira, hi Yoksa, hi Medaꞌ, hi Midia, hi Isibaꞌ hante hi Sua. 3Hi Yoksa mampemuleꞌki hi Seba hante hi Dedaꞌ. Muleꞌna hi Dedaꞌ iomo toAsuru, toLetusi hante toLeume. 4Anaꞌ-anaꞌna hi Midia iomo hi Epaꞌ, hi Epeꞌ, hi Henoꞌ, hi Abida hante hi Elda. Iomohila lekiꞌna muleꞌna hi Ketura. 5Hi Burahima mampepaꞌaniki lekiꞌna lumana pe hi Isaki. 6Angkana pe anaꞌ-anaꞌnahi to nohua ka hawiꞌ-hawiꞌna io mampewei pepaꞌani, katoꞌo io morumbaꞌhi i tempo kotuwuꞌana tene mampolihi hi Isaki. Anaꞌna hieꞌe, nolouhi pe motoꞌando.
Hi Burahima mahi hei nitawu
7Hi Burahima moꞌumuruꞌ 170 ntoꞌa, 8honiꞌi io mahi. Io mahi i tempona motodimo hei oꞌuamo. 9Hei anaꞌ-anaꞌna, hi Isaki hante hi Sumaeli motawuꞌi i lali woloꞌ watu petawua i Makapela, i popada to uwaꞌ i motoꞌando Mambere iomo popada Eporoꞌ, to ka anaꞌna hi Sohar, toaꞌ toHet tiꞌo, 10to nohilimo hi Burahima ka toHet. Inoꞌomola nitawuꞌi hi Burahima hante hi Sara hantambina. 11Ikomahinalu hi Burahima, Pueꞌ Ala mobarakati hi Isaki, anaꞌna, hei hi Isaki meꞌohaꞌ dodungku bubu Lahai-Roi.
Muleꞌna hi Sumaeli
12Hieꞌemola muleꞌne hi Sumaeli, anaꞌna hi Burahima, to nopoꞌanaꞌkiꞌi hi Hagar, towoweꞌe toMasiri, hawiꞌna hi Sara tiꞌo. 13Hieꞌemola konaꞌne anaꞌ-anaꞌna hi Sumaeli, nitiꞌi motuntuni huntuna konipoꞌanaꞌakina, hi Nebaio, hi Kedaꞌ, hi Adebele, hi Mibsa, 14hi Misima, hi Dumaꞌ, hi Masaꞌ, 15hi Hadaꞌ, hi Teman, hi Yeturiꞌ, hi Napisi hante hi Kedamaꞌ. 16Iomola anaꞌ-anaꞌne hi Sumaeli, hei iomola konaꞌ-konaꞌre to mewali woꞌo konaꞌra bolaꞌra hei konaꞌ bambaruꞌra hori-hori. Hampuluꞌ meroduo datu, hante tinona hori-hori. 17Tinuwuꞌna hi Sumaeli iomo 137 ntoꞌa, honiꞌi io mahi. 18Iohi meꞌohaꞌhi i lumbuna woiꞌ Hawila hante Suru, to uwaꞌ i motoꞌando Masiri to momenonto hante Asur. Iohi meꞌohaꞌ momehanupe hante lekiꞌna halalira.
Hi Esau hante hi Akoꞌ
19Hieꞌemola lolitonane muleꞌna hi Isaki, anaꞌna hi Burahima. Hi Burahima mampemuleꞌki hi Isaki. 20Hei hi Isaki motinuwuꞌmo iba mpuluꞌ ntoꞌa i tempona hi Ribeka noroa mewali hantambina. Hi Ribeka iomo anaꞌna hi Betuel, toaꞌ toAra ka Pada-Aram, halalina hi Laban towoweꞌe, toaꞌ toAram. 21Mekokaemo hi Isaki pe Pueꞌ Ala noniuꞌ hantambina, alaꞌ hantambina tiꞌo lalo. Pueꞌ Ala mampehoromua pekokaena, horiana hi Ribeka, hantambina tiꞌo mehinonaꞌi. 22Angkana anaꞌna mometinuni i lali hinaꞌina horiana notiꞌi hi Ribeka, “Mahamporeꞌi hinaꞌ mewali hatoꞌo?” Io horiana noperapiꞌ lala pe Pueꞌ Ala.
23Pohawaꞌna Pueꞌ Ala pe hi Ribeka: “Hi mido to i lali hinaꞌimu moropaꞌ, hei roduora hingkiꞌ mewalihi meroꞌonu roboꞌ to momeꞌewa. Haꞌanu roboꞌ maroho ka roboꞌ ntaniꞌna. Muleꞌna tohinoneeꞌ hingkiꞌ mokuasaꞌi muleꞌna tokokaꞌ.”
24I temponamo andona hingkiꞌ moꞌanaꞌ, anaꞌ to uwaꞌ i lali hinaꞌina umbiꞌ moropaꞌ. 25Memolomo to uluꞌana, lentena momeaꞌ, lekiꞌna wotana hibali baduꞌ mowilolu, iomo horiana io nikokeneꞌi hi Esau. 26Uko tiꞌo memolomo womo tohinoneeꞌ, korawena motiko pakoꞌna hi Esau, io horiana nikokeneꞌi hi Akoꞌ. Hi Isaki motinuwuꞌmo oni mpuluꞌ ntoꞌa i tempona nipoꞌanaꞌkihi. 27Katoꞌo kokodeꞌ-kodeꞌamohi oꞌanaꞌ meroduo tiꞌo, hi Esau mewali haduo to jago moꞌahu, hei nolei meꞌohaꞌ i popada, angkana hi Akoꞌ, iomo haduo toꞌa to monondiiꞌ hawaꞌi pe imbo-imbo i bambaruꞌlu. 28Hi Isaki mampotundeꞌ hi Esau, alaꞌ io palei mangka bauꞌ to noꞌahu, angkana hi Ribeka mampotundeꞌ hi Akoꞌ. 29Hampiha tempo, hi Akoꞌ kolentuꞌana moꞌunda, katoꞌo mehupaꞌmo hi Esau ka popada liaꞌ biloramo hante luleꞌ. 30Notiꞌi hi Esau pe hi Akoꞌ, “Paꞌaniꞌakae mangka hangkiuꞌ ka to momeaꞌ tiꞌo, alaꞌ biloraꞌa.” Iomo horiana nikokeneꞌi hi Edom. 31Angkana notiꞌi hi Akoꞌ “Ipobaluꞌmo duluna kotokokaꞌama pe aku.” 32Mehoniꞌ hi Esau, “Hingkiꞌ mahimoꞌa bilora, haporeꞌi podumbuꞌane kotokokaꞌangku tiꞌo?” 33Notiꞌi hi Akoꞌ, “Mosumpamoko doduluna pe aku.” Katoꞌo mosumpamo io pe hi Akoꞌ, hei hi Esau mampobaluꞌ mpuꞌu kotokokaꞌane pe hi Akoꞌ. 34Uko tiꞌo hi Akoꞌ mampaꞌani depa hei to momeaꞌ tiꞌo pe hi Esau, io mangkamo hei maꞌinu, katoꞌo metotiꞌi hei molai. Watoꞌomola hi Esau mampariwoiꞌ kotokokaꞌana.
Currently Selected:
Pewaliana 25: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
