Pewaliana 29
29
Hi Akoꞌ i tambina hi Laba
1Katoꞌo nopololiu womo patengkaꞌane hi Akoꞌ nolou pe woiꞌ tinaꞌ i motoꞌando. 2I patengkaꞌana, noꞌokiꞌmo haꞌanu bubu i popada to nitutuꞌi hante watu to kodeꞌ, uwaꞌ woꞌo tolu ntibura gimba to molukuꞌ dodungku i bubu tiꞌo, alaꞌ itoꞌo paꞌinuare, 3ane hirampumohi lekiꞌ-lekiꞌna gimba itoꞌo, topolambaꞌ mololiaki watu to nipopotutuꞌi honiꞌi ropopaꞌinumo gimbare. Uko tiꞌo rotutuꞌi mahuliꞌ. 4Katoꞌo meꞌitano hi Akoꞌ pe topolambaꞌ tiꞌo notiꞌi, “Halali-halali, tohapokei hieꞌe?” Mehoniꞌhi, “Ingka hieꞌe to ka Hara.” 5Notenei womohi, “Ibahaꞌlukeito hi Laba, oꞌuweꞌne hi Nahor?”
Mehoniꞌhi “Kibahaꞌlu.” 6Katoꞌo nopeꞌitanoki womo, “Moromiꞌ-romiꞌlu?”
Mehoniꞌhi rotiꞌi “Moromiꞌ-romiꞌlu. Eleꞌi tiꞌolu humei anaꞌne towoweꞌe mangkomi gimbana, konaꞌna hi Raheli.”
7Notiꞌi womo hi Akoꞌ, “Hinewoꞌena pohoꞌando tene handoaꞌi tempona gimba nirampu hei nipopekahi i gimpura. Aginamo ipopaꞌinuhi duluna, honiꞌi ilambaꞌmohi i popada.” 8Angkana mehoniꞌhi, “Handoaꞌhi kipopaꞌinu gimba ane handoaꞌhi hupaꞌ lekiꞌ, ane hupaꞌmohi lekiꞌ honiꞌi kilolihakimo watu potutuꞌine bubu hei kipopaꞌinuhi.” 9Kolentuꞌana tene hi Akoꞌ mololita hante iohi, hupaꞌmo hi Raheli mangkomi gimbana hi Laba umoꞌna, alaꞌ io to molambaꞌno. 10Konoꞌokiꞌnalu hi Akoꞌ hi Raheli, anaꞌna hi Laba, halalina inoꞌna, mangkomi gimbana umoꞌna, toloumo pe bubu mololihaki watu potutuꞌina, hei nopopaꞌinuhi gimba tiꞌo. 11Hi Akoꞌ moꞌumaꞌ hi Raheli hei meꞌola nopokobue alaꞌ komotanaꞌna. 12Katoꞌo hi Akoꞌ mololita pe hi Raheli notiꞌi, “Aku hieꞌe anaꞌna hi Rubeka hineeꞌna umoꞌmu.” Katoꞌo hi Raheli mehilai mahuliꞌ pe tambira ako mampololitaki umoꞌna. 13Konohorinalu hi Laba kohupaꞌne hi Akoꞌ pinoꞌanaꞌna mehilaimo ako mampohidupaꞌkiꞌi. Liu nokopui hei noꞌumaꞌ honiꞌi nokomi pe tambina. Katoꞌo hi Akoꞌ mololita mampopengaa to mewali i io. Koꞌukonalu hi Akoꞌ mololita, 14notiꞌi hi Laba, “Tuꞌu-tuꞌu ingkiꞌ hieꞌe haroraꞌaki.” Katoꞌo meꞌohaꞌmo hi Akoꞌ i io hambula komoruene.
Hi Akoꞌ meharo pe hi Laba
15Notiꞌi hi Laba pe hi Akoꞌ, “Hawaꞌi moromiꞌ ane majamako ntooꞌ-ntooꞌ i aku, kehapoꞌi mohalaliki. Itiꞌikiꞌa hapo to hintotoꞌ kupopoharoiko?” 16Hi Laba uwaꞌ anaꞌne meroduo anaꞌntowowalo. Tokokokaꞌ konaꞌne hi Lea hei tohinoneeꞌ konaꞌne hi Raheli. 17Hi Lea maranga matane, angkana hi Raheli manobaꞌ mpololeke lenteane. 18Hi Akoꞌ dokoꞌ pe hi Raheli, iomo horiana notiꞌi, “Umoꞌ hiniꞌa majama i ingko pitu ntoꞌa hingkeꞌna anaꞌmu hi Raheli mewali hantambingku.” 19Notiꞌi hi Laba, “Moromiꞌ ane kupaꞌanikiko hintina toaꞌ ntaniꞌ. Lebaꞌmoko iseꞌe i aku.” 20Katoꞌo majamamo mpuꞌu hi Akoꞌ pitu ntoꞌa angkana to pitu ntoꞌa tiꞌo hibalilu to haꞌumbora ando nohori, alaꞌ nokomi kodokoꞌna pe hi Raheli. 21Uko tiꞌo, mololitamo hi Akoꞌ pe hi Laba notiꞌi, “Ipaꞌanikimoꞌa wulia hantambingka alaꞌ tutumo tempoka majama hingkeꞌna kupoloꞌorimoꞌi.” 22Honiꞌi nowowoimo hi Laba lekiꞌ-lekiꞌne toaꞌ topeꞌohaꞌ itoꞌo dodungku i io hingkeꞌna mampoꞌuwaꞌmohi susaꞌ ngkodeꞌ. 23Angkana wini tiꞌo, hi Laba moroa hi Lea, honiꞌi nokomiki hi Akoꞌ, katoꞌo hi Akoꞌ mampohantambiꞌi. 24Hei hi Silipa hawiꞌna hi Laba nopaꞌaniki hi Lea mewaliꞌ hawiꞌna. 25Angkana ikompihoꞌoluna, noꞌele hi Akoꞌ hi Lea. Io horiana notiꞌi hi Akoꞌ pe hi Laba, “Mahamporeꞌi hinaꞌ hatoꞌo waliama pe aku? Majamaꞌa hingkeꞌna ipaꞌaniꞌa hi Raheli, haporeꞌi hinaꞌ ipampowowutikiꞌa?” 26Mehoniꞌ hi Laba, “Hibali adaꞌki iseꞌe hawaꞌi wadi tohinoneeꞌ mpoꞌdulu momaꞌani ka to kokokaꞌ. 27Topoꞌuko duluna pitu ando kohamokomio hieꞌe, honiꞌi kupaꞌanikiko hi Raheli, asala majama womoko iseꞌe i aku pitu ntoꞌa.” 28Lolita tiꞌo noponiuꞌ hi Akoꞌ, hei ganaꞌmo pitu ando uko nipohamoko, katoꞌo hi Laba mampewei womo hi Raheli nopohantambi hi Akoꞌ. 29Hei hi Bilha, hawiꞌna hi Laba, nopaꞌaniki hi Raheli mewaliꞌ hawiꞌna. 30I tempo tiꞌo, hi Akoꞌ mampohantambimo hi Raheli hei nopotundeꞌ tene ka hi Lea, uko tiꞌo majama womo hi Akoꞌ pitu ntoꞌa komoruene i hi Laba.
Anaꞌ-anaꞌna hi Akoꞌ
31 Pueꞌ Ala pangkiꞌ hi Lea hawaꞌi rahi nopotundeꞌ maꞌanina horiana Pueꞌ mampaꞌaniꞌi moꞌanaꞌ angkana hi Raheli lalo. 32Katoꞌo hi Lea mehinonaꞌi hei moꞌanaꞌ haduo tomaꞌani, notiꞌi, “Noꞌokiꞌmo Pueꞌ komaporiꞌka. Hinewowoꞌena hingkiꞌ nopotundeꞌa maꞌaningku.” Anaꞌna tiꞌo nokokeneꞌi hi Rube. 33Mehinonaꞌi womo hi Lea, hei mampoꞌanaꞌki haduo tomaꞌani notiꞌi, “Tuꞌu-tuꞌu mpuꞌu Pueꞌ mampehoromua, hei Nopaꞌani womoꞌa oꞌana alaꞌ hawaꞌa nopotundeꞌ maꞌaningku,” Iomo horiana anaꞌ tiꞌo nokokeneꞌi hi Simeo. 34Mehinonaꞌi womo hi Lea, hei moꞌanaꞌ haduo tomaꞌani, notiꞌi, “Hinewowoꞌena hingkiꞌ medokiꞌ laline maꞌaningku i aku alaꞌ mampoꞌanaꞌkimoꞌa tomaꞌani tolu duo. Io horiana anaꞌ tiꞌo nokokeneꞌi hi Lewi.” 35Uko tiꞌo mehinonaꞌi womo hi Lea hei mampoꞌanaꞌki haduo tomaꞌani notiꞌi, “Hinewowoꞌena mampokodeꞌa Pueꞌ”, io horiana anaꞌ tiꞌo nokokeneꞌi hi Yehuda. Uko tiꞌo hi Lea hamboaꞌmo moꞌanaꞌ.
Currently Selected:
Pewaliana 29: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
