Markus 11
11
Hi Yesu mekahi pe Yerusale, hei ropokodeꞌ toaꞌ to woriꞌ
(Mat. 21:1-9; Luk. 19:28-38; Yoh. 12:12-15)
1 #
Mrk. 6:7; 14:13 Dodungkumohi hi Yesu hante topeguruna i kota Yerusale, wutemohi i bolaꞌ Bepage hante Betania i Biri Saitu. Itoꞌo, hi Yesu morumbaꞌmo roduo topeguruNa 2#Mat. 21:1-2Notiꞌikihi, “Noloumokei pe bolaꞌ to hingkiꞌ topoliuhi tiꞌo. Ane hupaꞌkei itoꞌo, hingkiꞌ iꞌokiꞌkei hambaꞌa kalide to moleaꞌ tene to nipehiluꞌki, handoaꞌi tene kahampiha nipelambaꞌi. Iꞌuweꞌkei ka konipehiluꞌakina hei ikomikiꞌAkei humei. 3Ane uwaꞌ toaꞌ to meꞌitano pe ingkei mahamporeꞌi hinaꞌ iꞌuweꞌkei? Ihoniꞌkei waheꞌe: ‘Noparaluꞌi Pueꞌ, hei hingkiꞌ kipopahuliꞌlu intu.’”
4Noloumohi topeguruNe to roduo tiꞌo, rohuamo mpuꞌu hambaꞌa kalide to moleaꞌ tene to nihiluꞌ i tanobaꞌa tambi i hiri lala. Kolentuꞌara moꞌuweꞌ ka konikohoihana 5toaꞌ to metotiꞌihi itoꞌo meꞌitano pe iohi, “Mahamporeꞌi hinaꞌ iꞌuweꞌkei kalide tiꞌo?”
6Mehoniꞌhi hibali to Notiꞌikihi hi Yesu hingkenia. Korohorina toaꞌ tiꞌo lolitare, rotedehimohi mangkomi kalide tiꞌo. 7Kalide tiꞌo nikomi nolou pe hi Yesu, rolampii hante jubara. Uko rolampii, melambaꞌmo hi Yesu. 8-9Uko tiꞌo, noloumohi pe Yerusale. Woriꞌ toaꞌ metuntu pe Io. Uwaꞌhi to medulu, uwaꞌhi woꞌo to kamuri. Woriꞌhi to mowuraꞌ jubara i lumbu lala to hingkiꞌ nopoliuhi hi Yesu, hei hantenaꞌhi woꞌo nolou moroa taweꞌ loti ka kineteꞌ honiꞌi ropeꞌaliꞌ i lumbu lala, tandaꞌ pepokodeꞌra pe hi Yesu. Toaꞌ to woriꞌ tiꞌo moloaꞌhi nturusi, rotiꞌi:
“Hosana! Tepokodeꞌmo Pueꞌ Ala!
Pueꞌ Ala mobarakati Toaꞌ to hupaꞌ
i lali konaꞌNa!
10Pueꞌ mobarakati kodatuaNa.
Io hingkiꞌ moparenta hibali Datu Daudi, tododulunta hampiha.
Tepokodeꞌmo Pueꞌ Ala to i suruga!” (Mas. 118:25-26)
11Kohupaꞌna hi Yesu i kota Yerusale, liu-liu mekahi i lali tanobaꞌa Tambina Pueꞌ Ala hei Noparesaꞌ mantuleliꞌ. Uko tiꞌo, alaꞌ hingkiꞌ mokorindimoꞌi, hi Yesu mahuliꞌmo moꞌawa-awa hante topeguruNahi to hampuluꞌ meroduo nolouhi pe bolaꞌ Betania.
Hi Yesu motundaꞌ loti ara
(Mat. 21:18-19)
12Poꞌonina, molai womohi hi Yesu hante topeguruNa ka Betania nolou pe Yerusale. I lumbu lala, biloramo hi Yesu. 13Ka moꞌela tene, Noꞌokiꞌmo hapongko loti ara to mabomboꞌ taweꞌna. Koꞌakonamo Noꞌele loti tiꞌo, ba uwaꞌi wuaꞌne, angkana hawaꞌi uwaꞌ howeꞌ haꞌanu wuaꞌne, alaꞌ handoaꞌi tene tempona mowuaꞌ. 14Iomo horiana hi Yesu motundaꞌ loti tiꞌo, Nopantiꞌiki, “Mepongka hinewowoꞌena, hamboaꞌmoko hingkiꞌ mowuaꞌ.” Rohori topeguruNa lolitaNe tiꞌo.
Hi Yesu mobue toaꞌ to mobaluꞌ-baluꞌ i Tambina Pueꞌ Ala
(Mat. 21:12-13; Luk. 19:45-48; Yoh. 2:13-16)
15Hupaꞌ womohi hi Yesu hante topeguruNa i Yerusale, noloumo hi Yesu pe tanobaꞌana Tambina Pueꞌ Ala. Itoꞌo, Io mobue toaꞌ to mobaluꞌ-baluꞌ. Nodungka meja potopua doiꞌ, hei Nodungka woꞌo meja pobaluꞌ-baluꞌa tinti merpati. 16Hawaꞌi woꞌo Nopoliu toaꞌ mangkomi parewara moliu i tanobaꞌa Tambina Pueꞌ Ala. 17#Yes. 56:7; Yer. 7:11Uko tiꞌo, Io mampoturuꞌhi, Notiꞌi, “Hawaꞌireꞌi ibahaꞌkei hapo to teꞌukiꞌ i lali Suraꞌ Mangkolehi? Pueꞌ Ala mantiꞌi waheꞌe: ‘TambingKu hingkiꞌ mewali tambi pekokaeha to nopakeꞌ toaꞌ ka humanele duniaꞌ.’ Angkana ipopewalilukei tambi porampuana topanako!”
18Korohorinalu tutuꞌ-tutuꞌ tadulako mpenomba hei guru-guru agama hapo to nowali hi Yesu, mampaliꞌhi lala hingkiꞌ morokoꞌI. Hampiꞌana motehuꞌhi pe Io, alaꞌ robahaꞌ woriꞌ toaꞌ motanaꞌhi mampehoromua poturuꞌNa. 19Alaꞌ hingkiꞌ mokorindimoꞌi, hi Yesu hante topeguruNa molaimohi ka kota Yerusale.
Mepoꞌohimokei pe Pueꞌ Ala
(Mat. 21:20-22)
20Poꞌonina mehoꞌolu-olu, mahuliꞌ womohi hi Yesu hante topeguruNa nolou pe Yerusale. I lumbu lala, pangkiꞌhi loti ara to notundaꞌ hi Yesu hiwinia mahimo, mobani wute i uwakaꞌna. 21Noponindi hi Peturuꞌ lolitane hi Yesu, iomo hinaꞌ notiꞌi pe hi Yesu, “Guru! Ele loti ara to Itundaꞌ tiꞌo, banimo!”
22Notiꞌi hi Yesu, “Mepoꞌohimokei pe Pueꞌ Ala. 23Kutiꞌikikei: Ane rapaꞌna itiꞌikikei pe biri tiꞌo, ‘Tehinimoko hei mengkonawuꞌko i lali tahiꞌ!’ Bateꞌna hingkiꞌ mewali, asalana hawaꞌi bata-bata lalimi hei ipoꞌohikei mpuꞌu hapo to itiꞌikei. 24Mewaliꞌ, nipehoromua lolitangKa hieꞌe. Ane mekokaekei merapiꞌ ba hapo-hapo, hangangaa ipoꞌohikei kohingkiꞌ nopaꞌanimi Pueꞌ Ala, hei hingkiꞌ itorimokei.
25Ane mekokaekei hei uwaꞌ awami to ipokoiꞌkei, niꞌampuni dulu, hingkeꞌna Umoꞌmi to uwaꞌ i suruga hingkiꞌ moꞌampuni woꞌo salaꞌmi. [26Angkana ane hawaꞌi niꞌampuni awami, Umoꞌmi to i suruga hawaꞌi woꞌo hingkiꞌ moꞌampuni salaꞌmi.]”
Tadulako agama Yahudi meꞌitano pe hi Yesu ka imbo kuasaꞌNe
(Mat. 21:23-27; Luk. 20:1-8)
27Hupaꞌ womohi hi Yesu hante topeguruna i Yerusale. I tempora matengkaꞌ i tanobaꞌa Tambina Pueꞌ Ala, hupaꞌmohi tutuꞌ-tutuꞌ tadulako mpenomba, guru-guru agama hante tomotodi-tomotodira toYahudi to ntaniꞌna. 28Meꞌitanohi pe hi Yesu, rotiꞌi, “Itiꞌikika, himo to mampakuasaꞌiKo mobue topobaluꞌ-baluꞌ ka Tambina Pueꞌ Ala hiwinia hante mampaguru toaꞌ to woriꞌ?”
29Nohoniꞌhi hi Yesu, “Uwaꞌ woꞌo halangkaꞌ peꞌitanongKa pe ingkei. Ane ihoniꞌAkei, hingkiꞌ Kutiꞌi kohihimona to mampakuasaꞌiꞌA mowali lekiꞌ-lekiꞌna tiꞌo. 30Hihimo to mampakuasaꞌi hi Yohanes Toperiu moriu toaꞌ? Ka Pueꞌ Ala, ba ka toaꞌ?”
31Mororapaꞌmohi tadulakore toYahudi tiꞌo haduo hei haduo, rotiꞌi, “Hohumbomo kotohoniꞌne? Ane totiꞌi ka Pueꞌ Ala, hingkiꞌ Nohoniꞌki, ‘Ane watoꞌoꞌi, mahamporeꞌi hinaꞌ hawaꞌkei mepoꞌohi?’ 32Angkana maporiꞌ woꞌo ane totiꞌi ka toaꞌlu.” Tadulakora toYahudi tiꞌo motehuꞌhi mampononaꞌa hi Yohanes Toperiu hingkeꞌna inioꞌhi noꞌewa toaꞌ to woriꞌ, alaꞌ lekiꞌ-lekiꞌna toaꞌ mantiꞌi hi Yohanes tiꞌo haduo nabi. 33Katoꞌo rohoniꞌ, “Hawaꞌi kibahaꞌ.”
Iomo hinaꞌ notiꞌikihi hi Yesu, “Ane watoꞌoꞌi, hawaꞌkei woꞌo hingkiꞌ Kutiꞌiki hihimo to mampakuasaꞌiꞌA mowali lekiꞌ-lekiꞌna tiꞌo.”
Currently Selected:
Markus 11: LAILJE
Highlight
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
