LUKAS 8

To bou-boune anu nontulungi i Yesus

1Madi' pinin lengkat i aijo', i Yesus nambamo i kota-kota ka' i kampu-kampung da mompolele Lele Ma'ima', saba' Tumpu Allah montampu'unimo mompalentah susumo Tomundo. Sampulu' ohua' na anu saja' mombatuki namba hingga-hinggat ka' Ia. 2#Mat. 27:55-56, Mrk. 15:40-41, Luk. 23:49 Sumo aitu mule' to pia-piangkuka na boune anu na'alinmo, anu kinona nu roh ma'idek ka' panyakit. Aha aijo'mo i Maria anu osa-osanggohi Magdalena (popitu' na roh ma'idek anu sinabatakon hi ia); 3singkona i Yohana bengkele' i Khuza, anu ko kalaja i laigan daka' hi Herodes; i Susana, ka' manjoo' mule' na boune sangga'at. Posi ongkos nu aha na montulungi Yesus ka' anu saja' mombatuki Ia.

Kantuangan monsa'u binee'

(Mat. 13:1-9, Mrk. 4:1-9)

4To mia-mian saja' toka hi Yesus lengkat mae i ngangahan nu kota. Ka' salatan nanjoo'mo na mian sinihuk, i Yesus nonsisikakonmo hi aha kantuangan sumo uuka: 5“Samian na topo ale' namba nonsau bine'. Hau-haunyo ia monsa'u, daagi' ko bine' anu ola nanabu' i jalan. Sambagian pineja' nu mian ka' sangga'at tinoluk nu tomonsi'. 6Daagi' mule' ko anu ola nanabu' i tampat anu ko batunyo. Salatan tinumuu'mo, anu sinu'annyo aijo' ola nangkaluale, kalana tano'nyo madi' ma'omuk. 7Daagi' mule' ko bine' anu ola nanabu' i uno nu hemput anu ko hii'nyo. Hemput mihii' aijo' tinumuu' hingga-hinggat tiba bine' aijo', ka' nombolungi sampe i nanggas. 8Panyo daagi' ahi' ko bine' anu nanabu' i tano' anu ma'omuk, lantas tinumuu' mohasinakon bua'nyo pininsa'atu lipat.”

Lapas nonsisik kantuangan aijo', i Yesus notataemo, “De ko bihing, hongo!”

Kadaka' i Yesus mompake kantuangan

(Mat. 13:10-17, Mrk. 4:10-12)

9Anu saja' mombatuki Yesus nompokilawa hi Ia alati'nyo nu kantuangan aijo'. 10#Yes. 6:9-10 I Yesus nontaami, “Komiu binee'anmo balakat da monsumbu' lahasia mosia na Tumpu mompalentah susumo Tomundo. Panyo to mia-mian sangga'at o ajan nu kantuangan, da aha mongintomakon, panyo madi' monsumbu' pa' apaa na anu timbali; ka' aha mohongo, panyo madi' mangalati'.”

I Yesus nontalangkan kantuangan, samian anu topo monsa'u bine'

(Mat. 13:18-23, Mrk. 4:13-20)

11“Aiya na alati'nyo nu kantuangan aijo': Bine' aijo', aijo'mo potatae nu Tumpu. 12Bine' anu nanabu' i jalan sumomo to mia-mian anu mohongo potatae aijo'. Panyo Ibilis tinoka ka' nongagoi lele aijo' i kinyonyoa nu aha, da aha boli palesaya ka' oposalamat. 13Bine' anu nanabu' i tampat anu ko batunyo sumomo mian anu mohongo lele aijo', kinyonyoanyo sanang na montalima. Panyo lele aijo' madi' nimbakat i kinyonyoa nu aha. Aha palesaya ola sasaingoni', ka' de soba'an toka, aha madi'mo mule' palesaya. 14Bine' anu nanabu' i totonga' nu hemput hii'on, sumomo mian anu mohongo lele aijo', panyo bata-bata i kantumuu'an nu aha, ka' mongindi tumuu' molabi ka' sanang i dunia aiya. Iwi-iwi' aijo' mompeedi aha sahingga madi' mohasinakon bua' matantu. 15Bine' anu nanabu' i tano' anu ma'omuk, sumomo mian anu mohongo lele aijo', lantas monguna' i kinyonyoa anu ma'ima' ka' hodi'. Aha moko ala sabaan sampe mohasinakon bua'.”

Sulu' anu okulubi nu gumbang

(Mrk. 4:21-25)

16 # Mat. 5:15, Luk. 11:33 “Madi' ko mian anu montutungi sulu', lantas mongkulubi nu gumbang kabai mompo'una' i aluk nu kahoyotan. Ia tionyo mompo'una' sulu' i sulaannyo nu sulu', da mian anu minsoop montoa jingkanyo. 17#Mat. 10:26, Luk. 12:2 Madi' ko anu sulu-suluk na madi' kantoan; ka' madi' ko anu ohokotakon na madi' o hongo ka' osumbu'.

18 # Mat. 25:29, Luk. 19:26 Mokonyo aitu o intomakon ma'i-ma'ima' apaa na anu i hongomo miu. Kalana mian anu daagi'mo opaka bee'i mule' lebe manjoo'; panyo mian anu madi' ko apa-apaa, sangkiding pe'e anu daagi' hi ia suele o ala.”

Tinanyo ka' to utu-utusnyo i Yesus

(Mat. 12:46-50, Mrk. 3:31-35)

19Tinanyo ka' to utu-utusnyo i Yesus kahanda' toka tinoka hi Ia, panyo aha madi' noko ala tinoka hi Ia, kalana mian talalo da'isan. 20Lantas daagi' ko samian na notatae hi Yesus, “Kita Tuuma, tina ka' to utu-utus nu kita Tuuma kiijo' i sambiha'nyo. Aha mongka'oho' singkabot ka' kita Tuuma.”

21Panyo i Yesus notatae hi aha, “To mia-mian anu mohongo potatae nu Tumpu ka' montuluti, ahamo na tina ka' to utu-utus-Ku.”

I Yesus nompobelenti baleba' makansang

(Mat. 8:23-27, Mrk. 4:35-41)

22Daagi' ko sansinaan i Yesus tiba anu saja' mombatuki Ia sinumake' i duangan. “Imbo' da kita mamba i santoa nu dowiwi,” koonyo i Yesus hi aha. Lantas aha nambamo. 23Tempo'nyo aha hau-haunyo tinalabut, i Yesus kinahoyotanmo. Monti-montiik baleba' makansang nombokolimo dowiwi aitu. Uee nontampu'unimo ninsoop i duangan, sampe nombahayaimo aha iwi-iwi'. 24Anu saja' mombatuki Yesus nambamo hi Ia, ka' nombulakon Ia. Aha notatae, “Tuumangku Gulu', Tuumangku Gulu', kita silakamo!”

I Yesus nobula ka' nonsegai baleba', ka' bokon anu hau-haunyo kumelembuang aijo'. Baleba' ka' bokon aijo' binelenti ka' dowiwi aijo' tinendamo hondo. 25Lantas i Yesus notatae hi anu saja' mombatuki Ia, “Ka' kadaka' komiu madi' palesaya hi beleng-Ku?”

Aha binangang ka' nabuhuk. Ka' notatae na aha samian ka' samian, “Ihe sabenannyo na mian aiya sampe mompalentah baleba' ka' bokon, ka' Ia mule' i hongonyomo!”

I Yesus nompa'alin mian anu sinoku'on nu roh ma'idek

(Mat. 8:28-34, Mrk. 5:1-20)

26I Yesus tiba anu saja' mombatuki Ia lau-laus tinalabut tinoka i da'erah nu Gerasa i santoa nu Dowiwi Galilea. 27Tempo'nyo i Yesus nintau'mo i katano'an, Ia i lambanan mae nu samian na mo'ane anu sinoku'onmo nu roh ma'idek. Mian aijo' lengkat mae i kota. Pininmo na ia madi' mibaju' ka' madi' mongka'oho' jojoong i laigan. Ia ola mongka'ima'i lewa' jojoong i liang pompo'una'an mian anu silakamo. 28Salatan nontoa i Yesus, ia noloboo'mo, lantas tinolodadupumo i ahop i Yesus, ka' notatae daka-daka', “Yesus Anak nu Tumpu Anu Matangkas na Kuasanyo! Nu posiamo na aku aiya? Ku poita boli monsakisa aku!” 29Mian aijo' notatae sumo aitu, kalana i Yesus nompalentah roh ma'idek aijo' mosabat lengkat hi ia. Saja'mo ia nukona nu roh ma'idek aijo', sahingga mau mule' lima ka' tengkenyo o pungumo nu lante' ka' ia o toongi hoso-hoson hondo, ia daagi' moko botu'akon lante' aijo', lantas nuboa nu roh ma'idek i padang bone'.

30Pinokilawa i Yesus hi mian aijo', “Ihe na sanggoum?”

“Sanggongku i ‘Legiun’,” tinaaman nu mian aijo' – kalana manjoo' na roh ma'idek anu ninsoopmo i uno nu butongnyo. 31To roh-roh ma'idek haha aijo' nongkakasemo da i Yesus boli molaa' aha manabu' i Keles Kapatean.

32Koko tampat aijo', daagi' ko bau' manjoo' hondo anu hau-haunyo molio mongkaan i sohipi' nu bungkutnyo. To roh-roh ma'idek haha aijo' nongkakase hi Yesus da opobee' minsoop i uno nu to bau-bau' haha aijo'. 33I Yesus sinetuju, saba' to roh-roh ma'idek aijo' nosabat nompala'i mian ka' ninsoop i bau' haha aijo'. Lantas to bau-bau' haha aijo' nopadeka' ka' ningkanabu' nokaiyong i dowiwi ka' nolomos.

34Anu monjagai bau' haha aijo' nontoa anu tinimbalimo aijo'. Saba' aha nopadeka'mo namba ka' nompaha poto'i lele aitu i kota, ka' i kampung toto ise-ise' anu mompaha ohani. 35Lantas to mia-mian nosabatmo ka' nontoa apaa na anu tinimbalimo. Aha tinoka hi Yesus, ka' i kiijo' aha nontokai mian anu pinala'ianmo nu to roh-roh ma'idek aijo' hau-haunyo suha-suhang koko tengke i Yesus. Ia nimbaju'mo ka' pikilannyo sininsumbu'mo. Aha haha aijo' nabuhukmo. 36Aha anu nontoa apaa na tinimbalimo aijo' nonsisik hi to mia-mian mosia na mian aijo' pina'alin. 37Lantas songko-songko na anu jojoong i da'erah Gerasa aijo' nompoita sabole-bole da i Yesus mompala'i tampat aijo', kalana aha iwi-iwi' nabuhukmo hondo. Jadi, i Yesus sinumake'mo i duangan kahanda'mo minsusule'. 38Mian anu pinala'ianmo nu roh-roh ma'idek aijo' nompoita hi Yesus da ia timbali mombatuki.

Panyo i Yesus nonsai ia mamba, tukoo-Nyo, 39“Pinsusule'mo ka' polele apaa na anu binaumo nu Tumpu hi beleyum.”

Saba' mian aijo' i namba nompoto'i songko songko na puus nu kota, apaa na anu binaumo i Yesus hi ia.

Anak i Yairus – Boune anu nontiik i Yesus

(Mat. 9:18-26, Mrk. 5:21-43)

40Tempo'nyo i Yesus ninsusule'mo i santoa nu dowiwi, ilame'mo na to mia-mian nompolabot Ia, kalana aha hau-haunyo solaa' montanda'i Ia. 41Lantas tinoka na samian kapala nu laigan Pogalejaan i kiijo'. Sanggonyo i Yairus. Ia tinolodadupu i ahop i Yesus, ka' nompoita sabole-bole da i Yesus sonso' i lagiannyo, 42kalana samba-sambatunyomo na anaknyo boune umunnyo sampulu'mo ohua' na taun, me ise-ise' sinilakamo.

Hau-haunyo i Yesus laja-lajang mokiijo' i laigan i Yairus, to mia-mian nogogensotanmo mokiijo' hi Ia anu lengkat iyayamae. 43I kiijo' daagi' mule' ko samian na boune anu umunnyo sampulu'mo ohua' na taun masakit binuntulan nu home, ola kalana tinokamo na adat nu boune. Ia nongingkotimo iwi-iwi' na halata'nyo bau bapakuli' hi dokoten, panyo madi' ko anu noko pa'alinakon. 44Boune aijo' nongohani Yesus lengkat mae i hiku, lantas nontiik puus nu juba'-Nyo. Sinangkinihap home nu boune aijo' kinowotmo. 45Pinokilawa i Yesus, “Ihe na anu nontiik Aku?”

Iwi-iwi' na mian nojalomo. Lantas i Petrus notatae, “Kita Tuuma, manjoo' hondo na mian tiku-tikup hi kita Tuuma; aha nogogensotanmo atina' hi kita Tuuma!”

46Koonyo i Yesus, “Panyo daagi' ko mian anu nontiik Aku. Kusumbu' na aijo', kalana daagi' ko kahosonan anu nosabatmo lengkat hi beleng-Ku.” 47Boune aijo' tinonginau'mo, taalu' anu binaunyo sinumbu'mo. Jadi ia tinoka batuk nu lakat tinolodadupumo hi ahop i Yesus. Lantas sinisiknyo i ahop nu mian iwi-iwi', ka' kadaka' ia nontiik i Yesus, ka' mule' panyakitnyo na'alinmo tempo'nyo aitu mule'. 48I Yesus notatae hi ia, “Anak-Ku, kalana beleyum palesaya hi beleng-Ku, beleyum na'alin. Lako'mo sinalamatmo.”

49Hau-haunyo i Yesus daagi' motatae, samian na posaihon tinokamo lengkat mae i laigan i Yairus. Ia notatae hi Yairus, “Anak langkoyang nu kita Tuan sinilakamo. Bolimo kita Tuan momposusa' mule' Tuumanto Gulu'.”

50Salatan i Yesus nohongo aijo', Ia notataemo hi Yairus, “Boli mabuhuk. Palesayamo anakum ma'alinje.”

51Salatan tinoka i laigan i Yairus, i Yesus madi' nompobee' mau samian pe'e minsoop tiba Ia, boli mompiakon i Petrus, i Yohanes, i Yakobus ka' tina tuuma nu anak aijo' samata-mata. 52Iwi-iwi' na mian hau-haunyo humaang montando'i kalana kasilakan nu anak aijo'. Panyo i Yesus notatae, “Boli humaang. Anak aijo' madi' sinilaka, ia ola i hoyot!”

53Aha nongkokojoi Yesus, kalana nusumbu' nu aha anak boune aijo' sinilakamo. 54Lapas aitu, tinoongan i Yesus nalima nu anak aijo' ka' notatae, “Bulamo, Anak!” 55Santuu' nu anak aijo' minsusule'mo hi anak aijo', ka' sakajab aijo' mule' ia nobulamo. Lapas aijo', i Yesus nompokaumo aha mombee'i mongkaan anak aijo'. 56Tu'anyo nu anak aitu binangang hondo. Panyo i Yesus nontewa' aha monsisik anu tinimbalimo aijo' mau mule' hi he.

Currently Selected:

LUKAS 8: LAILOE

Highlight

Copy