YESAYA 31
31
Ki Allah in mogoḻiungbí kon Yerusalem
1Moboditodon in intau inta mayá in Mesir sin mokituḷung! Mosia in mopongatabí in ropot in tontara in Mesir inta tumakoi kon kabaḷo bo kabaḷonea inta mongoropot bo keretanea inta mobayong. Táe mosia in diábí mopirisaya kon i Tuhan, Allah mokudus in Israel bo diá mokituḷung kon i-Nia. 2Ki Tuhan mobijaksana bo kotaauan-Nea onu in aidan. Sia in mopoangoi in bodito bo mopobayá in onu inta pinogogondok-Nea sin mohukum kon intau moraat bo intau inta motuḷung kon i monia. 3Intau in Mesir tongábí intau, deemanbí Allah. Kabaḷo monia in biagbí biasa, deemanbí ná ki Allah. Aka ki Tuhan mopoaid in oaidan-Nea, bangusa inta mototuḷung tatua in moipintudbí bo bangusa inta sinuḷungannea in moḷabúbí. Dá taya dua tua in tumpaḷa moyopú.
4Ki Tuhan in noguman kon inakó, “Naonda bo singa moganggor sin moḷukad kon onu inta noaḷapnea bo diábí motaau gogondokon in karak bo guak in gombala topaanan inta pinotabá moḷawang kon inia, natua doman in Akuoi in moparangbí bo moḷukad kon Buḷud in Sion. 5Naonda bo ḷagapan tobatú mobuká kon koḻikipnea kon pugadnea sin moḷukad kon i adínea mita, natua doman in Akuoi, ki Tuhan Inta Totok in mokawasa in moḷukad, moduḷu bo moposaḷamat kon Yerusalem.”
6Ki Tuhan in noguman, “Bangusa in Israel, moiko ain nomaḷawang kon i-Nakó bo binaradosa kon i-Nakó. Táe tanaa, pobuidon mangoi kon i-Nakó! 7Moiangoibí in wakutunea moiko komintan moḷumbú kon patong mita berhala nongkon saḷaka bo buḷawan inta pinomia monimu tontaní takin nopuḻing in dosa. 8Asyur in yopúonbí kon parang, táe deemanbí podoyon kon ropot in intau. Intau in Asyur in moḷaguibí nongkon tampat popoparangan, bo intau mita monia inta mongobagupa in baḻíon bobantung. 9Datu monia in moḷagui takin ondok, bo itoi in tontaranea mita in totokdon in moitaḻikokog, dá taḷaandon monia in bandera mita in parang.” Ki Tuhan ain nosingog, ki Tuhan inta sinumba bo ihoromat pinongin nobogoi in kuruban payongon kon Yerusalem.
Currently Selected:
YESAYA 31: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
