YESAYA 33
33
Sambayang mopoigum in totuḷung
1Moboditodon in musung mita naton! Mosia in mogagow umpaka diá pinogagowan, bo nomaḻidawan umpaka diá Pinomaḻidawan. Táe naonda in mopaḷut mako mogagow bo momaḻidawan, mosia tontaní in mobaḻí bidon kuruban in pogagowan bo Pinomaḻidawan.
2O Tuhan, kotabipa kaasí in kami. Iko in nobaḻí oandoḷan nami. Ḷukadaidon in kami muḷoi in singgai bo posaḷamatdon in kami kon dodai in koantugan in roriga. 3Aka simindog in Iko bo mopodongog in singog-Mu inta mogonugur, bangusa mita in moḷaguibí bo posibayá. 4Naonda bo paanan in pangkoḷá intau monubu bo mogagow kon kaoyúonan monia.
5Ki Tuhan in momulia totok; Sia in nongawasa kon bayongan yagi-yagi. Sia in moposindogbí in hukum bo koadilan kon Yerusalem 6bo mobogoi in inta moaman kon umat-Nea. Kaoyúonan inta mokosaḷamat kon i monia in kabijaksanaan bo sinotaau takin horomat kon i Tuhan.
7Intau mita inta mongobarani momaḷú mokituḷung; totabá mita inta moḷongasi kon dodamean in mongombaḷ takin monakit totok in gina. 8Daḷan mita moḷoben totok in mokoanib dá mobaḻídon moingongow; Diádon in intau in mongintua. Dodandian in sinaḷáan bo yopakat in diá sinarima. Diádon in pinandungmai. 9Ḻipú sinaḷáan nobaḻídon noingongow. Kayuon mita in Libanon kinoantugan in takit, bo Ḷopá in Saron inta moḷumbá mobaḻí naonda bo padang gurun. Kon Basan bo kon Buḷud in Karmel daun mita mongototak.
Ki Tuhan nobogoi in tompoingat kon musung-Nea mita
10Ki Tuhan in noguman kon bangusa tatua, “Tanaa simindogdon in Akuoi bo mopoontongdon in kawasa-Ku. 11Tomayámu diá in mangaḻenea, bo bayongan inta pomiaanmu diá in baragunanea. Torúmu in naonda bo tuḷú inta momokak kon inimu tontaní. 12Moiko in naonda bo batu karang inta sinubá sin pomiaan silon; naonda bo bonganga inta pinupuḷ bo sinubá kon bonu in tuḷú. 13Pomayádon mako in bayongan in intau inta nodiug andeka inta noyayú mokodongogdon kon onu inta inaidan-Ku bo akúon monia in kawasa-Ku.”
14Intau mita binaradosa kon Sion mourot popisí in moondok. Guman monia, “Bontow in tosingogon i Allah in naonda bo tuḷú inta nodokot modapot in mononoi. Degá oyúon in mokotahang kon bonu in tuḷú inta moyopú tatua?” 15Moiko in mokotahangbí aka moiko in mosingog bo mogaid kon inta totuu. Dika motayak kon untung pongin momakisa mogamá kon intau bogá, bo dika motarima kon doit tondan in pelekara. Dika dumudui kon intau inta monomayá kon poḻimodan andeka aid moraat ibanea. 16Dá moiko in kosiunganbí takin moaman, naonda bo kon bonu in poḷoḷukadan inta moropot. Kaanon bo inumon in sadiaanbí kon inimu.
Kobiagan moiduduimai inta mooyúon
17Moiangoi in wakutunea moiko in mokoontong kon datu tobatú inta momarenta takin kamuliaan kon sinangkub in butá kon bayongan in tampat. 18Ondokmu inta moiḻiu kon intau mita inta moigum kon pajak, pojabat bo pongawas ango-angoi in dongkadon toropon. 19Moiko in diá bidon mokoontong kon intau mita ango-angoi inta moromú inta mosingog kon tosingogon inta diá kinomangaḻean monimu. 20Indoiaidon in kotá in Sion, tampat poramean naton kon singgai mita in agama. Indoiaidon in Yerusalem! Totuu moaman in tampat tatua pogutunan, naonda bo ḷoḷaigan inta diá kon dodai in onda in pinamping, patoknea in diá kon dodai in onda in irabut bo tontogotnea in diá kon dodai in onda in nobontow. 21Ki Tuhan in mopoontongbí in kamuliaan-Nea kon i naton. Kita in mobiagbí kon bingkí in ongkag inta mooḷad, inta diá motaau ḻeagan in kapaḷ in musung.#33:21: Kon bonu in naska in Ibrani tontagá tanaa diá nosilang in mangaḻenea. 22-23Bayongan in touḷut kon kapaḷ monia diá in mangaḻenea; ḻeagnea mita diá motaau songkaan! Bayongan in kaoyúonan in musung in agowon naton, bo mobayong totok, modapot in intau ḻempeng in mokouḻíbí doman kon tonsilai. Ki Tuhan tontaní in mobaḻí datu naton; Sia in momarenta, moposindog in hukum bo moposaḷamat kon i naton nongkon musung. 24Diábí tobatúmai in intau kon butá naton in mogamui popisí in motakit, bo bayongan in dosa in ampunganbí.
Currently Selected:
YESAYA 33: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
