YESAYA 38
38
Ki Datu Hizkia notakit bo inundaman
(Dat.2. 20:1-11; Taw.2. 32:24-26)
1Kon dodai intua doman ki Hizkia notakit gogió bo minatoi. Ki Nabi Yesaya ki adí i Amos, minayá nokipodungkuḷ kon inia bo noguman, “Ki Tuhan in nongoyow kon ki Tuang datu in moginḷapatdon kon bayongan in oaidan, sin ki Tuang datu in diádon mopia bui. Diádon moonggot in ki Tuang datu bo matoi.”
2Ki Hizkia in nomurow sinumayow kon dinding, bo nosambayang, 3“Tuhan, toropdon kon akuoi in nogundoidon kon ini-Mu takin motoindudui bo motuḻid in gina. Akuoi in umuran moḷongasi dumudui kon ibog-Mu.” Bo ki Hizkia in nongombaḷ totok.
4Naonda in ki Yesaya minaya, ki Tuhan in nopotabá kon inia 5mayá bui kon i Hizkia bo mopotaau in koyow tanaa, “Akuoi, ki Tuhan, Allah inta sinumba i Daud mogoguyangmu, nokodongogdon kon sambayangmu bo nokoontongdon kon ḷuámu. Dugangan-Kudon in umurmu mopuḷúpa bo ḻima notaong. 6Iko bo kotá in Yerusalem poḷuaton-Kudon nongkon i datu in Asyur. Kotá tanaa in tantú-Kubí ḷukadan.”
Bo ki Yesaya in nopotabá in intau nododok kon bungai in ara kinorimok bo pinoḻeponea kon bituḷ i Hizkia sinbá mopia. Ki Datu Hizkia in noḻibó, “Onu in mobaḻí tomponuot kon ki Tuhan in mongundam kon inakó bo akuoi in motaaudon mayá kon Baḷoi Tuhan bui?”#38:6: tontagá 21 bo 22 pinais kon naa, kon sigad in tontagá 6 bo 7.
7Ki Yesaya in notubag, “Naa in tomponuot inta ogoi i Tuhan kon i Tuang datu kon intompodan-Neabí in dandi-Nea. 8Kon totundú in jam mata in singgai inta inaidan i Datu Ahas, aidan i Tuhan in oḻinownea umundok mopuḷú nogares.” Dá inumundokdon in oḻinow tatua mopuḷú nogares.
9Naonda in nopia mako in ki Hizkia, nomais in sia kon dondong dodayow tanaa:
10“Gumanku, bagu notombotak in umur akuoi in mustidon mayá,
monimpod kon ki agat in kobiaganku kon dunia in intau minatoi.
11Gumanku, akuoi in diádon mokoontong bui kon i Tuhan kon dunia,
andeka moindoi kon intau kon dunia naa.
12Nyawaku nobontow, nodapotdon in wakutuku,
ná ḷoḷaigan in gombala inta kinokai;
ná didit pinongkó nongkon pakakat gogaboḷan;
kon inakó kamai simpodandon i Allah in kobiaganku.#38:12Kamungkinan moḷoben mangaḻenea kon inakó kamai … kobiaganku.
13Kino ouput in doḷom momaḷú in akuoi mogigon kon monakit,
tuḷanku naonda bo butukon in singa tobatú;
kon inakó kamai ki Allah monimpodon kon kobiaganku.#38:13: Kon bonu in naska Ibrani tontagá tanaa diá nosilangmai in mangaḻenea.
14Singogku in motoyokdon bo moyangkó,
naonda bo ḷagapan tarangkuku mogamui.
Mataku in moḷopí popisí in ḷumangag kon ḷangit,
Tuhan, poḷuatdon in akuoi nongkon roriga tanaa.
15Onu in motaauku singogon? Naa in aidbí i Tuhan;
diá mokosiug in akuoi popisí in morobonoḷ in gina.
16Oo Tuhan, ogoiaidon in akuoi in kobiagan
in tosingogon bo aid-Mu,
biódon mako akuoi mobiag tongádon kon ini-Mu.#38:16: Kon bonu in naska in Ibrani tontagá 15 bo 16 diá nosilang in mangaḻenea.
17Robonoḷ in ginaku in mobaḷuibí mobaḻí ḷunganga in gina,
Iko in moposaḷamat#38:17: Podudui in tongonumai in terjemahan dungkuḷmai moposaḷamat; podudui in naska Ibrani monotabi. kon inakó nongkon anib;
dosaku mita inampungan-Mudon komintan.
18Kon bonu in popatoi diábí in modayow kon ini-Mu,
intau minatoi in diábí umandoḷ mako kon kososatia-Mu.
19Tongábí intau nobiag in modayow kon ini-Mu, ná inta inaidanku singgai in naa.
Guyanga in mongonguman kon i adínea
kon totuubí kon mosatia totok in Iko, o Tuhan.
20 Tuhan, Iko in nongundamdon kon inakó,
dá kami in nopodondongdon in dodayow kon Baḷoi-Mu
pinongin mokuti kon kecapi,
kino ouput in kobiagan nami.”#38:20: Tontagá 21 bo 22 in pinais noiduduimai kon tontagá 6.
Currently Selected:
YESAYA 38: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
