YESAYA 40
40
Tosingogon mita inta mokoropot kon gina
1Nanaa in tosingogon i Allahmu,
“Ḻipoidon, ḻipoidon in bangusa-Ku!
2Poonowdon in gina in intau in Yerusalem,
pogumandon kon pononggataan kon i monia in nopaḷutdon.
Taḷá monia in inampungan-Kudon,#40:2: Taḷá … Inampungan-Kudon andeka: Mosia in pinotobutdon kon taḷá monia.
dosa mita monia in ihukum-Kudon kodua noguntuḷ.”
3 #
Mat. 3:3; Mrk. 1:3; Yoh. 1:23 Oyúon in singog in nopobaḷú,
“Sadiadon in daḷan kon padang gurun kon i Tuhan.
Tuḻidon in daḷan kon rawang kayuon
kon i Allah naton! #Luk. 3:4-6
4Bayongan in oyuknea musti bumbunan,
buḷud bo tombuḷudnea in tondodaion.
Butá inta notombuḷud in motonḷopá,
bo inta nongotangkaḻembong in ḷamagon.
5Dá kamuliaan i Tuhan in poniatadon;
bayongan in umat in mokoontongdon.
Totuu, ki Tuhan tontaní in nopodandi kon tua!”
6 #
Yak. 1:10-11; Pet.1. 1:24-25 Oyúon in singog in noguman, “Popotaaudon!”
Akuoi in noḻibó, “Onu in musti potaauku?”
“Potaaudon kon intau tua in naonda bo bonok,
naonda bo bungang inta tongá motoyong in kogaganea.
7Bonok in moingkag bo bungang in moḷaḷow,
aka ki Tuhan mopoirup in tompot inta mopatú.
Totuubí kon bangusa tatua in naonda bo bonok.
8Bonok in moingkag bo bungang in moḷaḷow,
táe tosingogon i Allah naton in mononoibí.”
9Potakodon kon tudu in buḷud inta moḷantud,
bo pobaḷúdon in habar mopia kon Yerusalem!
Pomaḷúdon koropot,
bo pobaḷúdon in habar mopia kon Sion!#40:9: Potakodon … Sion andeka: Yerusalem, potakodon kon buḷud inta moḷantud bo pobaḷúdon in habar mopia! Sion, porogiowdon koropot, bo pobaḷúdon in habar mopia!
Pogumandon kon kotá mita in Yohuda
kon ki Allah monia in mamangoi!
10 #
Yes. 62:11; Why. 22:12 Indoiai, ki Tuhan Allah in namangoi takin kawasa
sin mogaid kon oaidan pongin ropot-Nea.
Sia in sinakinan in intau mita inta ain pinoḷuat-Nea.#40:10: intau mita inta ain pinoḷuat-Nea andeka: tondan in pinogaidan-Nea, bungai inta nouḻí-Nea.
11 #
Yeh. 34:13-15; Yoh. 10:11 Naonda bo gombala Sia in noḷukad kon paanan-Nea;
Sia tontaní in mosipun kon i monia.
Ki adí mita in domba koyotan-Nea,
takin moḷukó in tosingogon Sia in modia kon i indenea mita.
Ki Allah in Israel diá in ponanding
12Ki ine in mogukur kon baḷangon takin mopomaké in ḷogú in ḻimanea,
andeka mogukur kon ḷokutoi momaké in yangow?
Ki ine in mogukur kon butá in dunia naa takin simbangan
andeka monimbang kon buḷud bo tombuḷudnea mopomaké in simbangan bambéon?
13 #
Rm. 11:34; Kor.1. 2:16 Ki ine in modia kon i Tuhan,
andeka motundú kon i-Nia mobaḻí monononggina-Nea?
14Ki ine in poḻibóan i Tuhan
sinbá mokouḻí kon totaau bo komangaḻean?
Ki ine in mobogoi in totundú kon i-Nia
sinbá mogaid moitombutung?
15Kon i Tuhan in bangusa mita in naonda bo tubig tongo totuyú kon bonu in totayuk,
naonda bo ḷobud tougat kon pononimbangan;
ḻibuton mita notongkai in kogaannea in ḷobud moaḷus.
16Bayongan in biag kon kayuon in Libanon diá tugat
baḻíon kuruban payongon;
pangkoinea mita totuu moyakag
baḻíon kayu pondungú.
17Bayongan in bangusa diábí in mangaḻenea kon i-Nia,
naonda bo diábí in kon tayowon-Nea.
18 #
Rsl. 17:29
Dá ki ine in popotongkaianmu kon i Allah?
Ki ine in inanggapmu notombatangan-Nea?
19Sia in deemanbí ná patong mita inta pinomia in mongongurig,
patong inta inoḻitan in buḷawan bo pinoḻitú kon saḷaka.#40:19: Kamungkinan moḷoben mangaḻenea: inaipan … saḷaka.
20Intau inta diá mokotaḷui kon buḷawan andeka saḷaka,#40:20: Kamungkinan moḷoben mangaḻenea diá mokomampu … saḷaka; naska in Ibraninea in diá nosilang.
momiḻí kon kayu inta diá mogampang mogoguyaat.
Sia in notayak kon mogogimok inta mopia totok
sin mogaid kon patong inta diá mogampang modandú.
21Umpaka yo diá kinotaauanmu bo diá nokodongog,
bo diá pinopotaau kon inimu nongkon dungkuḷmai?
Umpaka yo iko in diá momangaḻe nongkon pinomangkoianmai
naonda in pinomangkoian in dunia?
22Inta nomaḻí in nomarenta kon tudu in butá noḻimbatu,
intau mita inta nogutun kon dunia naa in ontongon mongointok naonda bo pangkoḷá.
Sia in nosongká kon ḷangit naonda bo daing,
bo nopoatop naonda bo ḷoḷaigan sin pogutunan.
23Binaḻí-Nea in mongongawasa mita diá kodaya,
bo intau mita moḷoben kinobuḻian in kawasanea.
24Mosia tua in naonda bo pinomuḷa noguod
inta bagu momuká in uakatnea.
Aka ki Tuhan mopoirup in tompot,
moingkag in mosia bo poḷayugon naonda bo wawa.
25Ki ine in inanggapmu notombatangan i Allah Inta Totok in mokudus?
Ki ine i popotongkaianmu kon i-Nia?
26Ḷangagdon kon ḷangit, bo taridika!
Ki ine in nomaḻí kon tundi mita?
Sia inta nonompia kon i monia naonda bo tontara,
kinotaauan-Nea in kobayong monia,
bo mogoiní kon batúannea podudui in tangoinea-tangoinea.
Diábí tobatúmai in mobuḻi,
popisí in moḷoben totok in kawasa i Tuhan!
27Dá Israel, nongonu sin iko in mogamuibí,
naonda bo ki Tuhan Allahmu in diá nonotaau kon rorigamu?
Naonda bo diá indoian-Neamai in kobiaganmu,
bo diá noindoimai kon hakmu?
28Umpaka dá iko in diá nonotaau bo diá nokodongog?
Ki Tuhanbí in Allah inta mononoi,
inta nomaḻí kon sinangkub in dunia.
Sia in diábí kon dodai in onda in moḷopí andeka moḷungkoyó;
raian-Nea in diábí motaau doḷopon.
29Sia in moginropot kon intau inta moḷopí,
moporigon kon gina monia inta diá kodaya.
30Tayow mobiag mita in moḷopí bo moḷungkoyó
ede mita in tayow mobiag in moḷabú moipintud.
31Táe intau inta mopongata kon i Tuhan,
in mokouḻí kon ropot mobagu.
Mosia in naonda bo ḷagapan boniá
inta ḷumayug moonik mopongata in koḻikipnea.
Mosia in moribatuk bo diábí moḷopí,
mosia in mayá bo diábí moḷungkoyó.
Currently Selected:
YESAYA 40: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
