YESAYA 52
52
Ki Allah in mopoḷuatbí kon Yerusalem
1 #
Why. 21:2, 27 Pobangondon, ei Yerusalem, pobangondon!
Korigon in ginamu! Paké in ḷambung kahoromatanmu!
Ei Yerusalem, kotá inta motusi,
intau nonajis in diá bidon tumuot mongin bonawangmu.
2Sindogdon nongkon ḷobud, ei Yerusalem,
ponopirdon in ḷobud inta noikompit kon inimu.
Ḷuatdon in rante inta pinotokig kon sigogowmu,
ei intau in Sion inta dinakop!
3Ki Tuhan in noguman kon umat-Nea, “Moiko in pinotaḷui mako natua, dá tanaa in poḷuaton doman mako natua. 4Koḻipod in moiko minayá in Mesir bo nogutun kon tua nobaḻí intau ango-angoi. Onda intua Asyur nogamá kon kapunyaanmu takin diá in kinodoyonannea. 5#Rm. 2:24 Tanaa onu in urusan-Ku kon naa? Intau in Babel nodakop kon i monimu natua mako. Mosia inta nondorot kon i monimu dinumodia bo tantú mopoompámai kon i-Nakó. 6Tuamai in moiko in mongakubí kon Akuoi in Allah, bo kon dodai intua kotaauandon monimu kon Akuoibí inta nosingog kon inimu.”
7 #
Nah. 1:15; Rm. 10:15; Ep. 6:15 Totuu mosanang in mokoontong kon koangoian in totabá,
Sia in mayá mongin buḷud
bo modia kon habar mopia habar kobiagan mopia,
habar kasaḷamatan kon Sion,
kainia, “Allahmu in Datu!”
8Indongogaidon in kokow pia in gina in moḷoḷukad in kotá,
mosia in morogiow moyotakin!
Sin mata monia tontaní in nokoontong
kon ki Tuhan in namangoi bui in Sion.
9Porogiowdon, ei rumbun mita in Yerusalem,
sin ki Tuhan in noḻipoi kon umat-Nea
bo nopoḷuat kon Yerusalem.
10Ki Tuhan in nopoontong in kawasa-Nea
kon tayowon in mata in bayongan intau.
Dá bayongan butá in mokoontongdon
kon kasaḷamatan nongkon i Allah naton.
11 #
Kor.2. 6:17
Bayádon! Taḷaaidon in kotá in Babel,
ei moiko inta nodia kon pakakat mita in Baḷoi i Allah!
Dikadon moḻiai kon pakakat inta nonajis:#52:11: pakakat inta nonajis: Pakakat inta inanggap diá nodarit in atorang in agama.
potusidon in awakmu kon dodai in diápa mobuat.
12Moiko in diábí ḻimika-ḻikat in mayá,
bo diábí ná intau inta moḷagui.
Sin ki Tuhan in modiabí kon i monimu:
ki Allah in Israel in mogoḻiungbí kon i monimu nongkon bayongan tampat.
Mogogundoi inta nobaba kon roriga
13Ki Tuhan in noguman,
“Totuubí, mogogundoi-Ku in mokodapotbí kon aidannea;
sia in horomatonbí bo poḷantudon.#52:13: in horomatonbí bo poḷantudon andeka: sia in horomaton bo poḷantudon bui.
14Dungkuḷmai nobayong in intau in noitaḻikokog in nokoontong kon inia,
pogotnea in pinoguyaat dá deemandon ná pogot in intau.
15 #
Rm. 15:21
Táe tanaa nobayong in bangusa in binaḻínea nongoherang,
datu mita nongobió popisí in noitongau.
Mosia in mokoontong bo momangaḻe,
inta dungkuḷmai diá kinotaauan monia.”
Currently Selected:
YESAYA 52: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
