YESAYA 65
65
Hukuman i Allah kon intau mita momomarontak
1 #
Rm. 10:20
Ki Tuhan in noguman, “Akuoi in nosadiadon motubag kon umat-Ku, táe mosia in diábí nosambayang kon i-Nakó. Akuoi in moibogbí angoian monia, táe mosia in diábí notayak kon i-Nakó. Bangusa tatua in diábí nogoiní kon i-Nakó, umpaka Akuoi nosadiadon motubag: Naadon in Akuoi! 2#Rm. 10:21 Akuoi in umuranbí mogoḷat mako in motomu kon umat-Ku, táe mosia in moibog momarontak. Bangusa tatua in mogaid kon inta moraat bo dumudui kon tomayánea tontaní. 3Mosia in umuranbí mopobaḻí kon i-Nakó tumorú popisí in moposumba kon sosumba kon gobá mita sin ogoi kon dewa mita#65:3: gobá mita sin ogoi kon dewa mita: Indoiai 1:29. bo motubá kon kamania kon mezbahnea mita. 4Kon tungkuḷ in doḷom mosia in mayá in angob mita bo poḷoḷobongan sin mopoigum in tonggina mita in dimukud mita. Mosia in mokaan kon tapú in boké bo monginum kon tubig mita in ponoyá inta poton. 5Mosia in noguman ‘Bayádon koyayú, dika moḻiai kon inami sin kami in motusi bo noitondí nongkon i monimu!’ Akuoi in diádon mokoigon in mokoontong kon dodia monia! Torú-Ku kon i monia in naonda bo tuḷú inta diá mopio-piong.
6Hukuman monia in noipaisdon kon tayowon-Ku. Totuu, Akuoi in diábí tongá kibio-biómai. Akuoi in motuḻíbí kon aid monia inta moraat 7popisí in dosa monia bo dosa in mogoguyang monia. Mosia in nopoompámai kon i-Nakó pinongin notubá kon kamania sin posumba kon dewa mita kon tampat pogogundoian kon tombuḷud mita. Akuoi in motuḻíbí kon i monia podudui in oaid monia dungkuḷmai.”
8Ki Tuhan in moguman, “Bungai in anggur inta oyúonpa in tubignea in diábí ḷumbúon, táe baḻíondon tubig in anggur. Natua doman in bangusa-Ku diábí yopúon-Ku komintan, sin kon sigad monia oyúonpa inta mogundoi kon i-nakó. 9Tongosilai in Intau in Israel nongkon suku in Yohuda in barakatan-Ku, bo buí monia in mokadai kon butá buḷud-Ku. Intau mita inta piniḻí-Ku inta mogundoi kon i-Nakó in mogutunbí kon tua. 10#Yos. 7:24-26 Umat-Ku in mosumbabí kon i-Nakó; domba bo sapi monia in mokaanbí kon bonok kon rata in Saron bo kon Ḷopá in Akhor.
11Táe deemanbí natua in ukur in intau mita inta nonaḷámai kon i-Nakó, inta diá noindoimai kon Sion, tombuḷud-Ku inta motusi,#65:11: tombuḷud inta motusi: Indoiai 2:3. inta noposumba in kaanon inoḷud kon Gad bo Meni, dewa mita inta mobogoi in kauntungan bo ukur. 12Moiko komintan in matoibí mita mobaḻí kuruban in aid moraat. Sin, kon dodai in Akuoi nogoiní, moiko in doíbí sinumubag, bo kon dodai in Akuoi nosingog, moiko in doíbí nokidongog. Moiko in moibo-ibogbí moḷawang kon i-Nakó bo mogaid kon inta moraat. 13Totuu, intau inta mosumba kon i-Nakó in mongaanbí táe moiko in koaputanbí in gogoy. Mosia in monginumbí, táe moiko in koaputan in rogang, mosia in moḷunganga, táe moiko in pokopooyáanmai. 14Totuubí, mosia in morogiow takin ḷunganga in gina, táe moiko in mongombaḷbí takin moajar in gina. 15Intau mita inta piniḻí-Ku in momaké in tangoimu mobaḻí kutuk: ‘Igumon mako in ki Tuhan Inta Totok in moḷantud moḻimod kon i monimu ná mosia!’ Táe intau inta motoindudui kon i-Nakó in ogoian-Kubí in tangoi mobagu. 16Pomuḷoi in intau kon butá tatua inta mopoigum in barakat, in mopoigumbí sinbá barakatan i Allah inta mosatia. Pomuḷoi in intau inta moibog mongibot, in mongibotbí podoyon kon tangoi i Allah inta mosatia. Sin roriga inta koḻipod ain noinggamá bo iḻiongdon.”
Mia toimbotú
17 #
Yes. 66:22; Pet.2. 3:13; Why. 21:1 Ki Tuhan in noguman,
“Akuoi in momiabí kon ḷangit inta mobagu
bo butá inta mobagu.
Onu inta nobaḻí mita koḻipod in koḻionganbí
bo diá bidon toropon bui.
18Pokosanangdon bo pokoḷungangadon modapot in mononoi
sin onu inta binaḻí-Ku.
Akuoi in nomaḻí kon Yerusalem mobagu nopuḻing in ḷunganga,
bo intaunea mita in morogiow.
19 #
Why. 21:14
Akuoi tontaní in mosanangbí popisí in Yerusalem,
bo moḷunganga in gina popisí in intaunea.
Kon kotá tatua in diá bidon in ombaḷ,
bo diá bidon in kuani mokituḷung.
20Ki adínea mita diábí in matoi kon tungkuḷ mointokpa,
bo intau mogurang mokodapotbí kon umur moḷanggó.
Intau inta umur mogatut notaong in inanggapbí nobagupa,
bo inta minatoi noiuna kon tua in inanggap kinotugatan in hukuman-Ku.
21-22Intau in moposindogbí in baḷoi
bo mogutun kon tua tontaní;
intau ibanea in diábí mogutun kon tua.
Mosia in momuḷabí kon gobá in anggur
bo monginum kon tubig in anggurnea;
intau ibanea in diábí monginum kon tua.
Umat-Ku in moumurbí in kobiagannea naonda bo pangkoi in kayu,
bo mokaan kon bungai in ḷopí monia.
23Bayongan inta aidan monia in kodapotanbí,
bo ki adí mita monia in diábí daḻi-daḻí matoi.
Mosia bo buí monia
in barakatan-Ku modapot in mononoi.
24Kon tungkuḷ in mosia diápa mopoigum Akuoi in motubag;
kon tungkuḷ in mosia diápa mopaḷut mosambayang,
Akuoi in notubagdon kon sambayang monia.
25 #
Yes. 11:6-9
Serigala bo ki adí in domba in tumpaḷa mokaan kon bonok;
singa in mokaan kon wawa naonda bo sapi,
bo uḷag in diá bidon mokoanib.
Kon sinangkub in tombuḷud-Ku inta motusi,
diá bidon in mokorugimai andeka momia kon inta moraat.”
Currently Selected:
YESAYA 65: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
