YOHANES 1
1
Pirman inta ain nobaḻí Intau
1Nongkon pinomangkoianpamai, wakutu in dunia naa diápa pinomia, Pirman i Allah tatua in koyongan bidon oyúon.
Pirman i Allah tatua in koyotaki-takin i Allah,
bo Sia-Siakabí in ki Allah.
2Nongkon pinomangkoianpabímai Sia in noyotakin i Allah.
3Bayongan in yagi-yagi pinomia pinodoyon kon i-Nia,
bo nongkon bayongan inta oyúon,
diábí in tobatúmai in pinomia diá pinodoyon kon i-Nia.
4Pirman tatua in pangkoi in kobiagan,#1:4: Pirman tatua in pangkoi in kobiagan: ande Bayongan yagi-yagi inta binaḻí, mokouḻí kon kobiagan kon bonu in pinonobatúan in Singog.
bo kobiagan tatua inta monimbayag kon intau.
5Bayag tatua in nonindar kon sindip,
bo Sia in diábí kokawasaan in sindip tatua.
6 #
Mat. 3:1; Mrk. 1:4; Luk. 3:1-2 Namangoidon in tobatú intau inta pinotabá i Allah,
ki Yohanes in tangoinea.
7Sia in namangoi nopotaau kon soaḷ bayag tatua,
sinbá mopirisayadon in bayongan intau.
8Sia tontaní in deemanbí bayag tatua,
sia in tongábí nopotaau.
9Bayag totokanea inta monimbayag kon bayongan in intau,
mamangoi in dunia.
10Pirman tatua in naadon kon dunia,
Siabí tua in nomia kon dunia naa,
táe dunia in diábí nonotaau kon i-Nia.
11Sia in namangoi in dunia inta pinomia-Nea tontaní
táe intau mita kapunyaan-Nea tatua in doí motarima kon i-Nia.
12Tongá oyúon doman in notarima kon i-Nia
bo nopirisaya kon i-Nia;
mosia tua in inogoian hak mobaḻí ki adí i Allah,
13inta pinononggadí deeman nongkon intau,
sin kobiagan mobagu tua in nongkon i Allahbí in pangkoinea.
14Pirman ain nobaḻí intau,
Sia in nogutun kon sigad naton,
bo kita ain nokoontong kon kamuliaan-Nea.
Kamuliaan inta sinarima-Nea
saḷaku Adí tuḷong i Amá.
Pinongin i-Nia tua kita mokoontong kon i Allah
bo tabi-Nea kon i naton.
15Ki Yohanes in namangoi saḷaku sakusi-Nea,
sia in nopohabar:
“Naadon in Sia inta pinogumanku:
Moiduduimai kon inakó,
moiangoi in Sia inta mokawa-kawasa nongkon inakó,
sin Sia in oyúondon kon wakutu in akuoi diápa.”
16Moḷoben totok in tabi-Nea;
diá in gogainea
Sia in momarakat kon i naton.
17Hukum i Tuhan sinarima naton nongkon i Musa.
Táe tabi bo kososatia i Allah in pinoniatadon kon i Yesus Kristus.
18Diábí in nokoimontanmai in nokoontong kon i Allah, koḻikudbí in ki Adí tuḷong i Amá,
inta notongkai i Amá bo modagin totok kon i-Nia.
Kon i-Nia tuata moniata kon i naton in ki Amá.
Kosakusian i Yohanes
(Mat. 3:1-12; Mrk. 1:1-8; Luk. 3:1-18)
19Pongawasa mita in Yahudi kon Yerusalem nopotabá kon imang mita bo intau mita in Lewi minayá kon i Yohanes bo noḻibó nanaa, “Ki ine iko naa?”
20Taran-tarangandon in ki Yohanes in noguman, “Akuoi in deemanbí Datu Mopoposaḷamat.”
21 #
Ul. 18:15, 18; Mal. 4:5 Dá bui iḻibó monia, “Aka natua, yo ki ine iko? Ki Elia degá iko?”
Tubagnea: “Deeman”.
“Tobatú nabi degá?”#1:21: Ki Nabi: Sia inta iharap mako moiangoi bo mopotaau in koangoian i Datu Mopoposaḷamat. iḻibó bui monia.
Táe ki Yohanes in notubag doman: “Deeman”.
22“Aka natua, dá pogumandon kon inami mongo ki ine in iko naa? Sinbá kotaauan nami in potubag kon i monia inta nopotabá mangoi kon inami. Aka podudui in raianmu yo ki ine in iko nion?”
23 #
Yes. 40:3
Ki Yohanes in notubag: “Akuoibí naa inta imakusud in singog i Nabi Yesaya nanaa:
‘Intau inta nobaḷú kon padang gurun:
Tondodaidon daḷan kon i Tuhan.’ ”
24Intau mita inta pinotabá in intau in Parisi#1:24: Intau mita inta pinotabá i intau in Parisi: ande “Mosia inta ain pinotabá tatua in intau in Parisi” ande “mosia”. 25noḻibó kon i Yohanes nanaa: “Aka iko deeman Datu Mopoposaḷamat, deeman ki Elia, bo deeman doman tobatú nabi, yo nongonu sin iko i mobaptisbí?”
26Ki Yohanes in notubag, “Akuoi in mopobaptis in tubig. Táe kon yua-yuak monimu, oyúon in tobatú intau inta diá kinotaauan monimu. 27Sia inta namangoi noiduduimai kon inakó, táe umpaka tongá mobuka kon togot in sapatu-Nea, yo diá patus in akuoi.”
28Tua komintan in nobaḻí kon Betania inta kon ḷoḷanmai in Ongkag in Yordan inta pobaptisanmai i Yohanes.
Ki Adí domba i Allah
29Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia. 30Sia tuata inta imakusud in singogku, moiduduimai kon inakó mamangoi in Sia inta mokawa-kawasa nongkon inakó, sin kon wakutu in akuoi diápa pinolahir, Sia koyongandon oyúon. 31Akuoi tontaní, diábí nonotaau kon i-Nia in koḻipod. Bokaka akuoi namangoi nobaptis in tubig sinbá intau mita in Israel monotaau kon i-Nia.”
32Ki Yohanes in noguman doman nanaa, “Akuoi in nokoontong kon Roho i Allah in noponag nongkon ḷangit naonda bo ḷagapan paḷoma dinumompá bo nogutun kon i-Nia. 33Tungkuḷ intua diápabí kinotaauanku mongo ki ine in Sia. Táe ki Allah inta nopotabá kon inakó mopobaptis in tubig nogumandon kon inakó nanaa, ‘Aka mokoontong in iko kon Roho i Allah moponag bo mogutun kon intau tobatú, yo intaubí tatuata inta mopobaptis in Roho i Allah.’ 34Bo inontongkudon tontaní intua,” guman i Yohanes, “Bo potaaukudon kon i monimu kon Siabí tua in ki Adí i Allah.”
Murí mita i Yesus inta Muna
35Nopoikoḷomai kon singgai, ki Yohanes kon tampat bui tatua takin murínea doyowa. 36Naonda inontongnea in ki Yesus noitaḻib, Sia in noguman: “Indoiai! Tuata in Adí Domba i Allah.”
37Dinongog in murínea doyowa tatua in singognea tatua, dá minayá in taya dua dinumudui kon i Yesus. 38Ki Yesus in nobobui kon i monia inta dumuduianmai kon i-Nia bo poḷat noḻibó, “Onu in tayakon monimu?”
Tubag monia, “Rabi, kon onda in pinogutunan i Rabi?” (Rabi mangaḻenea guru.)
39Dá kai Yesus doman, “Koḻigai! Indoiaidon monimu tontaní.” Mosia in namangoi domandon bo noindoi kon pinogutunan-Nea. Dodai intua jam opatdon moḷoḷabung. Singgai intua mosia in nogutunpa noyotakin i Yesus.
40Tobatú kon sigad nayadua tua inta ain nokodongog kon onu inta pinoguman i Yohanes bo inta minayá dinumudui kon i Yesus, tangoinea in ki Andreas ki utat i Simon Petrus. 41Dá ki Andreas in ḷagi notayak kon i Simon ki utatnea bo noguman kon inia, “Kami ain noyodungkuḷ i Mesias!” (Mesias notongkai in Kristus: Datu Mopoposaḷamat.)#1:41: (Mesias … Mopoposaḷamat): Indoiai in kamus kon ḻimonag in tosingogon Kristus. 42Ki Simon dinia i Andreas minayá kon i Yesus.
Ki Yesus inimindoi kon i Simon, bo noguman: “Iko ki Simon, ki adí i Yohanes. Iko in tangoiondon ki Kepas.” (Kepas notongkai in Petrus, mangaḻenea buḷud batu.)
Ki Yesus Nogoiní kon i Pilipus bo kon i Natanael
43Nopoikoḷomai kon singgai ki Yesus in nonantúdon kon mayá in Galilea. Sia in noyodungkuḷ i Pilipus. Ki Yesus in noguman kon i Pilipus, “Koḻigai duduidon kon i-Nakó!” 44Ki Pilipus naa intau in Betsaida, kotá inta pinogutunan i Andreas bo i Petrus. 45Bo ki Pilipus in noyodungkuḷ i Natanael bo poḷat noguman kon inia, “Nouḻídon nami in intau inta sinangoi i Musa kon bonu in buk hukum i Allah, bo inta ain pinotaau muna in nabi mita. Sia tua in ki Yesus, intau in Nazaret, ki adí i Yusup.”
46Táe ki Natanael in noguman, “Eta oyúon degá in mopia in mamangoi nongkon Nazaret?”
Dá kai Pilipus doman, “Koḻigai, indoianmudon tontaní!”
47Inontong i Yesus in ki Natanael namangoi, dá ki Yesus in noguman nanaa soaḷ ki Natanael tua, “Indoiai, tua in intau in Israel motuḻid, diábí in uboḷ kon ginanea!”
48Dá ki Natanael in noḻibó kon i Yesus: “Naonda in kinototaau i Amá kon inakó?”
Tubag i Yesus, “Wakutu in diápa inoiní i Pilipus in iko, inontong-Kudon iko kon ḻimonag in pangkoi ara tatua.”
49“Pak Guru, guman i Natanael, ki Amá in ki Adí i Allah!”
50Ki Yesus in noguman kon i Natanael, “Iko in nopirisaya kon i-Nakó tongá popisí degá in Akuoi noguman kon inimu kon iko inontong-Kudon kon siungonmai in pangkoi in ara tatua? Soaḷ mita inta moḷobe-ḷoben nongkon tua koontonganmubí!” 51#Kḻn. 28:12 Ki Yesus noguman doman, “Totuu, popirisayadon! Iko mokoontongbí kon ḷangit mobukat bo malaekat mita i Allah moponik-moponag mamangoi kon i Adí Intau.”
Currently Selected:
YOHANES 1: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
