YOHANES 14
14
Ki Yesus in daḷan mayá kon i Amá
1“Donaai mohawatir in ginamu,” guman i Yesus kon i monia. “Popirisayadon#14:1: Popirisayadon: ande Moiko in mopirisaya. kon i Allah, bo popirisaya kon i-Nakó doman. 2Kon Baḷoi i Amá-Ku nobayong tampat pogutunan. Akuoi in mayá intua sin moposadia kon tampat kon i monimu. Akuoi in diábí moguman natua aka kuma bo tua in diábí natua.#14:2: Kon baḷoi … diá natua: ande Kon baḷoi i Amá-Ku nobayong in pogutunan; aka kuma bo diá natua yo umpaka dá poguman-Ku kon i monimu kon Akuoi in mayá intua sin moposadia in tampat kon i monimu? 3Naonda in Akuoi mayádon moposadia in tampat kon i monimu, Akuoi in buibí mamangoi monontomu kon i monimu, sinbá kon onda in Akuoi, kon tua doman i moiko. 4Kon onda in bayáan-Ku, yo kotaauan monimu in daḷannea.”
5Bo ki Tomas in noguman kon i Yesus, “Tuhan, diá kotaauan nami mongo kon onda in bayáan i Tuhan, yo naondabí in kotaauan nami in daḷannea?”
6Ki Yesus in notubag, “Akuoibí naa in daḷan kon monotaau kon i Allah bo mokouḻí kon kobiagan. Diábí in tobatúmai intau in mokoyaput kon i Amá, aka diá mongin i-Nakó. 7Aka kuma bo kinotaauandon monimu in Akuoi, yo pastibí kon kinotaauan#14:7: Aka kuma bo kinotaauan monimu in Akuoi yo pastibí kon kinotaauan: tongonumai in naska dungkuḷmai: Popisí in moiko in nonotaaudon kon i-Nakó … moiko in monotaaubi. bidon monimu in ki Amá-Ku. Tanaa in kinotaauandon monimu in Sia, bo inontong domandon monimu in Sia.”
8Dá ki Pilipus in noguman kon i Yesus, “Tuhan, popoontongdon kon inami in ki Amá, sinbá mopuasdon in kami.”
9Táe ki Yesus in noguman kon inia, “Noonggotdon in Akuoi noyotakinmai monimu, bo diápa doman kinotaauan-Mu in Akuoi Pilipus? Intau inta ain nokoontong kon i-Nakó, yo sia tua in nokoontong domandon kon i Amá. Yo nongonu sin iko in mogumanpabí, ‘Poontongdon in ki Amá kon inami’? 10Pilipus! Diá degá in iko mopirisaya, kon Akuoi in notobatú i Amá, bo ki Amá in notobatú takin-Ku? Onu in pinoguman-Ku kon inimu naa deemanbí singog-Ku tontaní. Ki Amábí inta notobatú takin-Ku, Siabí in nogaid kon bayongan tua. 11Pirisayabí in singog-Ku tanaa, kon Akuoi in notobatúbí takin i Amá bo ki Amá in notobatú takin-Ku. Andeka diá bo diá, yo pirisayadon sin inontongdon monimu in onu inta ain inaidan-Ku. 12Poguman-Kudon kon i monimu: Intau inta mopirisaya kon i-Nakó, mogaidbí kon onu inta ain inaidan-Ku, modapot in moiḻiubí kon tua in aidannea, sin Akuoi in mayá kon i Amá. 13Bo onukabí in poigumon monimu podoyon kon tangoi-Ku, aidan-Kubí intua kon i monimu, sinbá ki Amá in pomuliaan pongin i Adí. 14Onukabí in poigumon monimu#14:14: Onukabí in poigumon monimu: tongonumai in naska dungkuḷmai: Onu kabí in igumon monimu kon i-Nakó. podoyon kon tangoi-Ku, yo aidan-Kubí.”
Ki Yesus nopodandi in Roho i Allah
15“Aka moiko in motabi kon i-Nakó, yo moiko in dumuduibí kon parenta-Ku mita. 16Poigumon-Kubí kon i Amá, bo ogoian-Neabí moiko in mototuḷung ibanea, inta umuran mogutun moyotakin monimu. 17Sia tua in Roho i Allah inta mopoontong in inta nobanar soaḷ ki Allah. Dunia naa in diá mokotarima kon i-Nia, sin mosia in diá nokoontong ande diá nonotaau kon i-Nia. Táe moiko in nonotaaubí kon i-Nia, sin Sia in mogutun moyotakin monimu bo motobatúbí#14:17: bo motobatúbí: tongonumai in naska dungkuḷmai: bo motobatú. takin i monimu.
18Moiko in diábí taḷaan-Ku tontaní ná uno-unon. Akuoi in mamangoibí bui kon i monimu. 19Diádon moonggot bo diádon ontongon in dunia naa in Akuoi. Táe moiko in mokoontongbí kon i-Nakó. Bo lantaran in Akuoi nobiag, dá moiko in mobiagbí doman. 20Aka wakutuneadon, dá kotaauan bidon monimu kon Akuoi in notobatúbí takin i Amá, moiko in notobatú takin-Ku, bo Akuoi in notobatú takin i monimu.
21Intau inta notarima kon parenta-Ku mita bo nopoaid, sia tuata inta motabi kon i-Nakó. Bo Akuoi in motabibí doman kon intau tatua bo mokipogontongbí kon inia.”
22Ki Yudas (deemanbí ki Yudas Iskariot) in noḻibó kon i Yesus, “Tuhan, nongonu sin ki Tuhan in mokipogontongbí kon inami deemanbí kon dunia?”
23Ki Yesus in notubag: “Intau inta motabi kon i-Nakó, dumuduibí kon totundú-Ku. Bo ki Amá-Ku in motabibí kon inia. Ki Amá bo Akuoi in mamangoibí kon inia bo mogutun moyotakinnea. 24Bo intau inta diá motabi kon i-Nakó, in doíbí dumudui kon totundú-Ku. Totundú inta dinongog monimu tua, deemanbí nongkon i-Nakó, táe nongkon i Amábí inta nopotabá kon i-Nakó.
25Bayongan intua in poguman-Kudon kon i monimu kon dodai in Akuoi koyota-yotakinpa monimu. 26Táe Roho i Allah, Mototuḷung inta bain potabá i Amá podoyon kon tangoi-Ku. Siadon tua in motundú kon i monimu kon bayongan rupa-rupa bo moponorop bui kon i monimu kon bayongan inta ain pinotaau-Ku kon i monimu.
27Kobiagan moonow bo motompia taḷaan-Ku kon i monimu. Dodamean-Kubí tontaní in ogoi-Ku kon inimu. Onu in ogoi-Ku tua deemanbí ná inta inogoi in dunia naa kon i monimu. Dika moḻia-ḻiaw in gina bo dika moondok. 28Dinongog bidon monimu in Akuoi in noguman, ‘Akuoi in mayábí, táe buibí in Akuoi mamangoi kon inimu.’ Aka moiko in motabi kon i-Nakó, yo mosanangbí in gina monimu in Akuoi in mayá kon i Amá, sin ki Amábí in moḷobe-ḷoben nongkon i-Nakó. 29Tanaa in muna-Kudon potaau kon i monimu wakutu intua diápa mobaḻí, sinbá mopirisaya in moiko aka soaḷ tatua bo mobaḻídon. 30Diádon moantó in oumanon-Ku kon i monimu, sin wakutuneadon mongongawasa in dunia naa mamangoi. Táe diábí kokawasaannea in Akuoi. 31Tongá tua mita musti mobaḻí bá kotaauan in dunia naa kon Akuoi in motabibí kon i Amá bo mogaid doman kon bayongan inta pinarenta i Amá kon i-Nakó.
Yo, koḻigai mayádon in kita nongkon naa.”
Currently Selected:
YOHANES 14: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
