YOHANES 9
9
Ki Yesus Nongundam kon Intau Bilog
1Wakutu in ki Yesus minayá, Sia in nokoontong kon intau bilog inta nongkon noilahirpamai. 2Murí-Nea mita in noḻibó kon i Yesus, “Pak Guru, nongonu sin intau tanaa in pinolahirbí bilog? Popisí in dosa i ine intua dosanea tontaní andeka dosa i iná bo i amánea?”
3Ki Yesus in notubag, “Sia in nobilog deemanbí popisí in dosanea andeka dosa in guyanganea, táe bá poponiatadon kon inia in kawasa i Allah. 4Kon dodai in nobayagpa, kita in musti mogaid kon oaidan i-Nia inta nopotabá kon i-Nakó. Moiangoibí in doḷom, bo diábí in tobatúmai intau in motaau mogaid. 5#Mat. 5:14; Yoh. 8:12 Kon dodai in Akuoi kon duniapa naa, Akuoibí naa in bayag in dunia.”
6Naonda in nosingog mako natua ki Yesus nonduyá kon butá. Bo duyá-Nea tatua in pinoyokitog-Nea in butá. 7Onda intua pinoyapu-Nea kon mata intau bilog tatua, poḷat noguman, “bayádon pongiamot kon tabang Siloam.” (Siloam mangaḻenea ‘Pinotabá’.) Dá intau tatua in minayádon doman nongiamot. Dodai in sia nobuidon mangoi, sia in nokoontongdon.
8Táe topodiugnea mita bo intau mita inta nokoimontandon nokoontong kon inia ḻimitúmai bo moigum kon doit kon intau inta moitaḻibmai, komintan noguman, “Aka diá moitaḷá siabí tanaa inta biasamai tumompoḻitúanmai bo moigum kon intau moitaḻib?”
9Oyúon in notubag, “Totuu, sia naa.” Táe oyúon doman in noguman, “Deeman, sia nion tongábí notombatangan in intau tatua.”
Táe intaudon tatua tontaní in nongaku, “Akuoibí naa inta i makusud monimu.”
10Dá iḻibódon monia, “Naondabí sin iko in nokoontong bidon?”
11Sia in notubag, “Intau inta ki Yesus in tangoi-Nea nogamá kon butá topiḻik bo nopoyokitog-Nea in duyá bodongka pinoḻepo-Nea kon mataku poḷat noguman kon inakó, ‘Bayádon kon tabang Siloam bo pongiamot.’ Bo minayá domandon in akuoi. Naonda in nongiamot in akuoi, yo nokoontongdon.”
12Dá iḻibó monia, “Kon onda intau tatua?”
Sia in notubag, “Diábí kinotaauanku.”
Intau in Parisi nonaridi kon soaḷ kinopiaan tatua
13-14Dodai intua singgai in Sabat wakutu in ki Yesus nopoyokitog in butá takin duyá-Nea sin pinongundam kon intau bilog tatua. Dá intau inta bagupa nokoontong tatua in dinia kon intau mita in Parisi. 15Mosia noḻibó doman kon inia mongo naondabí sin sia in nokoontong bidon. Sia in notubag, “Sia nopoḻepo in yoná kon mataku, bo nongiamotdon in akuoi bo poḷatdon nokoontong.”
16Táe tongonumai in intau kon sigad intau mita in Parisi tatua noguman, “Diábí doman intau inta nomia kon soaḷ tatua nongkon i Allah, sin diádon pinandung-Neamai in singgai in Sabat.”
Táe intau ibanea in nosingog, “Diábí doman in intau binaradosa bo momia kon soaḷ mita inta mokoherang ná tanaa?” Bo nomukádon in bobayowan kon sigad monia tua.
17Dá intau mita in Parisi in noḻibó bui kon intau tatua, “Aka podudui in raianmu, yo naonda in soaḷ Sia inta nongundam kon matamu nion?”
“Sia tua in nabibí,” tubag in intau tatua.
18Táe itoi mita intau Yahudi tatua doí mopirisaya kon intau inta koina nobilogpa bo tanaa ain nokoontong. Tuamai mosia in nogoinídon kon guyanganea, 19bo noḻibó, “Totuu degá kon ki adímu in naa inta kai monimu noilahir bilog? Yo Naondabí sin Sia in nokoontong bidon in tanaa?”
20Ki iná bo ki amá intau tatua notubag, “Totuu ki adí nami in sia; bo totuu kon sia in bilog noilahirpabímai. 21Táe aka soaḷ sia nokoindoidon nion, yo diábí kinotaauan nami. Ḻibódon kon inia tontaní, sin noguyang bidon in sia; motaau bidon motubag tontaní.” 22Guyanganea in noguman natua sin moondok in mosia kon itoi mita in Yahudi; sin mosia ain noyopakat kon intau inta mongaku kon ki Yesus tua in Datu Mopoposaḷamat, diádon motaau in tumuot kon baḷoi pososambayangan. 23Tuamai ki iná bo ki amá in intau bilog tatua noguman, “Noguyangdon in sia; ḻibódon kon inia tontaní.”
24Bo mosia in buidon nogoiní kon intau inta kon iná nobilog tatua, bo noguman kon inia, “Pongibotdon kon iko in mogumanbí kon totuu. Kinotaauan nami kon intau tatua intaubí binaradosa.”
25Dá kai intau tatua doman, “Dinosa andeka diá in Sia, tua in diábí kinotaauanku. Táe totontagá in kinotaauanku; koḻipod akuoi bilog, táe masai naa in nokoontong bidon in akuoi.”
26Bo mosia bui noḻibó kon inia, “Onu in pinomia-Nea kon inimu? Naonda in pinogogaid-Nea sin nokoontong bidon in iko?”
27Intau tatua in notubag, “Aindon inoumanku kon inimu, táe moiko in doí mopirisaya. Nongonu sin buipabí in moiko moḻibó? Degá moibog doman in moiko mobaḻí dumodudui-Nea?”
28Dá sinibáan monia in sia bo poḷat noguman, “Ikobí in dumodudui-Nea; kami in deemanbí! Kami in dumoduduibí i Musa. 29Kinotaauanbí nami kon ki Allah ain nobogoi in pirman-Nea kon i Musa. Táe aka Intau tatua, diábí kinotaauan nami in asaḷ-usuḷ-Nea.”
30Intau tatua in notubag, “Mokoherangbí totok aka diá kinotaauan monimu mongo nongkon onda in Sia, bokaka bo binaḻí-Neadon nokoontong in Akuoi. 31Kinotaauanbí naton kon ki Allah in diábí mokidongog kon intau mita inta binaradosa, táe tongábí mosia inta mohoromat kon i Allah, bo inta mogaid kon onu in kinoibog-Nea. 32Nongkon pinomangkoianmai in dunia naa diápa dodai onda in kinodongogan oyúon intau nopobaḻí kon intau bilog inta nongkon noilahirpamai nobaḻí nokoontong. 33Aka intau tatua deeman nongkon i Allah, tantú diábí in Sia mokoaid kon onu bo onu.”
34Dá tubag monia kon inia, “Onu? Iko inta nopuḻing in dosa nongkon noilahirpamai, iko in moibog motundú kon inami?” Dá mulaidon singgai tuata sia in diádon inogoi monia sinumuot kon baḷoi pososambayangan.
Bilog in gina
35Kinodongogandon i Yesus kon intau tatua in diádon inogoi monia sinumuot kon baḷoi pososambayangan. Dá sinayak-Nea in intau tatua bo noguman kon inia, “Degá iko mopirisaya kon i Adí Intau?”
36Intau tatua in notubag: “Ki ine in Sia tua, Tuang? Tuḷungaipa poguman kon inakó sinbá mopirisaya in akuoi kon i-Nia.”
37“Iko in nokoontongdon kon i-Nia,” tubag i Yesus. “Sia tuata inta moyosingogmumai naa.”
38Dá intau tatua in sinumungkud kon tayowon i Yesus bo poḷat noguman, “Akuoi in mopirisaya, Tuhan.”
39Ki Yesus in noguman, “Akuoi mamangoi in dunia naa sin mohakim; sinbá intau inta bilog in mokoontongdon, bo intau inta mokoontong, mobilogdon.”
40Tongonumai intau in Parisi inta kon tua in nokodongog kon i Yesus nosingog natua, bo mosia in noḻibó kon i-Nia, “Makusud-Mu in kami naa in bilog doman?”
41Ki Yesus in notubag, “Aka kuma bo moiko bilog, yo diábí in moiko binaradosa. Táe popisíbí in moiko noguman, ‘kami mokoontongbí,’ dá tua in mangaḻenea moiko in binaradosapa.”
Currently Selected:
YOHANES 9: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
