YOSUA 15
15
Sigad mita kon butá in suku Yohuda
1Motoḷuadí nongkon suku in Yohuda notarima kon tonsilai butá inta noiduduimai naa in sigadnea:
Kon dotá in toḷatan, butá tatua nosimbanat nodapot kon popod inta totok in kon toḷatan butá kon padang gurun Zin kon pinosigadan in Edom; 2pinangkoi kon popod in toḷatan kon Laut Mati, 3bo minayá ná toḷatan nongin oyuk mita in buḷud kon Akrabim nodapot kon Zin. Noiduduimai kon tua nongin toḷatan Kades-Barnea, minayá nongin Hezron, notakod kon Adar, onda intua nomurow nopobayá ná Karka. 4Nongkon tua minayá doman ná Azmon, bo notaḷug kon tapá kon pinosigadan in Mesir, onda intua nodapot kon Dagat Toyuak. Tuata in sigad kon dotá in toḷatan butá inta inogoi kon suku in Yohuda. Bo sigad doman tatua inta nobaḻí sigad kon dotá in toḷatan in bayongan butá in Israel.
5Kon dotá in pomukaan, sigadnea in Laut Mati, minayá ná utuan nodapot kon minanga in Ongkag in Yordan.
Kon dotá in utuan, sigadnea in pinangkoi nongkon minanga in Ongkag in Yordan tatua, 6bo notakod kon Bet-Hogla, bo minayá ná sigad in Ḷopá in Yordan. Nongkon tua sigad in utuan notakod monik kon utuan nodapot kon Batu Bohan (Bohan in ki adí i Ruben), 7onda intua minayá ná Ḷopá in Roriga nodapot kon Debir, bo nomurow bui ná utuan nopobayá ná Gilgal kon tampat inta noyogintayow in oyuk mita in buḷud kon Adumim kon dotá in toḷatan in ḷopá tatua. Nongkon tua minayá bui muik kon bokaká in tubig En-Semes, bodongka nopobayá ná En-Rogel, 8Onda intua notakod nongin Ḷopá in Hinom ná toḷatan in buḷud, inta kinoukatan in Yerusalem, kotá in intau in Yebus. Nongkon tua sigad tatua pinotakod kon tudu in buḷud tatua kon dotá in toyopan kon Ḷopá in Hinom, kon popod in utuan Ḷopá in Repaim, 9onda intua minayá ná bokaká in tubig Me-Neptoah, nodapot kon kotá mita inta kon diug in Buḷud Epron. Nongkon tua in sigad in butá tatua nomurow ná Baala (inta Kiryat-Yearim), 10bo noḻibu kon dotá in toyopan Baala nopobayá ná Buḷud in Edom, bo minayá ná dotá in utuan Buḷud in Yearim (tuata in Buḷud in Kesalon), bo noponag kon Bet-Semes, onda intua minayá ná Timna. 11Nongkon Timna, sigad tatua nopobayá ná dotá in utuan kon Buḷud in Ekron, bodongka nomurow nopobayá ná Sikron, noitaḻib kon Buḷud in Baala, bo nopobayá ná Yabneel, bo sinimpod kon Dagat Toyuak, 12inta nobaḻí botok tonsigad kon dotá in toyopan kon butá in suku Yohuda.
Butá tatua in pinogutunan in intau mita inta nongkon motoḷuadí mita kon bonu in suku Yohuda.
Ki Kaleb nogagow kon Hebron bo Debir
(Hak. 1:11-15)
13 #
Hak. 1:20
Podudui in parenta i Tuhan kon i Yosua, tongosilai in butá i Yohuda ogoi kon i Kaleb adí i Yepune nongkon suku in Yohuda. Inogoi kon inia in Hebron, kotá inta kapunyaan i Arba, ki amá i Enak. 14Buí i Enak in intau in Sesai, Ahiman bo Talmai. Inuntun i Kaleb in mosia komintan nongkon Hebron. 15Nongkon tua sia minayá nonubu kon intau mita inta nogutun kon Debir. (Kotá inta koḻipod sinangoian Kiryat-Seper.) 16Guman i Kaleb, “Ki ine in mokoagow kon Kiryat-Seper, sia in motaau motonibuḷoi i Akhsa inta adíku bobay.” 17Ki Otniel, adí i Kenas inta ki utat i Kaleb, nogagow kon butá tatua; dá inogoi i Kaleb in ki Akhsa pinobuḷoi i Otniel. 18Kon singgai pinonikaan monia, ki Otniel nodondouḷug kon i Akhsa#15:18 Ki Otniel nodondouḷug kon i Akhsa: (Indoiai Hak. 1:14): kon bonu in teks in Ibrani ki Akhsa nodondouḷug kon i Otniel. sinbá moigum kon tongosilai in butá kon i amánea. Dá noponagdon in ki Akhsa nongkon keledainea, dá ki Kaleb noḻibó kon inia mongo onu in koibognea. 19Ki Akhsa in notubag, “Koibogku in butá inta oyúon doman in bokaká, sin butá inta inogoi i amá kon inakó tua diá in tubig.” Dá inogoiandon doman i Kaleb in sia in butá inta oyúon in bokaká kon dotá in uḷuan bo bokaká inta kon dotá in sioḷan.
Kotá mita in Yohuda
20Noiduduimai naa in butá inta inogoi kon motoḷuadí mita inta kon bonu in suku Yohuda sin mobaḻí kapunyaan monia. 21-32Kotá mita inta totok in moyayú kon dotá in toḷatan, inta nobaḻí kapunyaan i Yohuda, tuata inta noiukat kon pinosigadan in Edom, tua komintan doyowa nopuḷú bo siow in kotá, noituot domandon in ḻipú mita inta kon diugneamai. Kotá mita tatua in: Kabzeel, Eder, Yagur, Kina, Dimona, Adada, Kedes, Hazor, Yitnan, Zip, Telem, Bealot, Hazor-Hadata, Keriot-Hezron (tuata in Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain bo Rimon.
33-36Kotá mita, noitakin doman in ḻipú mita kon diugneamai, inta noiukat kon sipangkoion mita in buḷud, kobayongnea komintan in mopuḷú bo opat in kotá, tuata in: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera bo Gederotaim.
37-41Bo mopuḷú doman bo onom in kotá noiduduimai naa takin ḻipú mita kon diugnea: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama bo Makeda.
42-44Bo siow doman in kotá noiduduimai naa, noitakin doman in ḻipú mita inta kon diugneamai: Libna, Eter, Asan, Yiptah, Asna, Nezib, Kehila, Akhzib bo Maresa.
45Bo Ekron takin kotá mita mointok bo ḻipúnea mita, 46takin bayongan in kotá bo ḻipú mita kon diug in Asdod, nongkon Ekron nodapot kon Dagat Toyuak. 47Ná doman tua in Asdod bo Gaza takin kotá mita mointok bo ḻipúnea mita inta noibaya-bayá mako nodapot kon diug in tapá kon pinosigadan in Mesir bo pintad in Dagat Toyuak.
48-51Kon butá kon buḷud in mopuḷú bomitá in kotá bo ḻipú mita kon diugneamai: Samir, Yatir, Sokho, Dana, Kiryat-Sana (inta Debir), Anab, Estemoa, Anim, Gosyen, Holon bo Gilo.
52-54Bo siow doman in kotá noiduduimai naa, noitakin doman in ḻipú kon diugneamai: Arab, Duma, Esan, Yanum, Bet-Tapuah, Apeka, Humta, Kiryat-Arba (inta Hebron) bo Zior.
55-57Bo mopuḷú doman in kotá noiduduimai noitakin doman in ḻipú mita kon diugnea: Maon, Karmel, Zip, Yuta, Yizreel, Yokdeam, Zanoah, Kain, Gibea bo Timna.
58-59Bo kotá onom noiduduimai doman naa, noitakin in ḻipú mita inta kon diugneamai: Halhul, Bet-Zur, Gedor, Maarat, Bet-Anot bo Eltekon.
60Bo kotá doman doyowa noiduduimai naa takin ḻipú mita inta kon diugneamai: Kotá in Kiryat-Baal, (tuata in Kiryat-Yearim) bo Kotá in Raba.
61-62Kon butá in padang gurun, onom in kotá noiduduimai naa takin ḻipú mita kon diugneamai: Bet-Araba, Midin, Sekhakha, Nibsan, Kotá in Simuton bo En-Gedi.
63 #
Hak. 1:21; Sam.2. 5:6; Taw.1. 11:4 Kotá in Yerusalem noitakin doman kon kapunyaan i Yohuda, táe intau in Yohuda in diábí mokountun kon intau mita in Yebus inta nogutun kon tua. Dapot in tanaa intau mita in Yebus nogutunpabí noyotakin in intau in Yohuda kon kotá tatua.
Currently Selected:
YOSUA 15: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.