YIDNAK YIDNAK WENE 2
2
Konak Indi mbuwaidnak wene (Pentakosta)
2:1-13
1Nde, Pentakosta iri na ndak ndak wok yosola tarem-e it oboksa-ge o misik me lambuksa woraiga-o. 2Worakmu-ge, mimo ereya na-net mbal nggwe-nen obube nggal kwarat puk kil mbuwasolar-e, ene pu iri na-ge it koreyak woraidnak sa o ma irit yebet yij-o. 3It na yik karok worakmu-ge, kan amare tinggiringgi nggal wiyuluk, it komondomok enpem pak yosola kaiga-o. 4Pak yosola-ge, Konak Indi-nen it pidsa kobong tak onposola, Konak Indi-nen wene yaga wok ondosola-ge, ir-e nin wene nan wene bem yogolat woraiga-o.
5Iri tarem-e Yawuri nap, Mbal Pem Nagawan indi aye worak nab-e yi wi ndi wi-nen lobok yidnag-e Yerusalem irit woraiga-o. 6Ene pu iri kuluruk, ap kwarat kil ndok worogola-ge, it wirik inpidnak nap na-nen wene yogola-ge, it pidsa enne ndomok yidnak kolak woragolar-e, wendet luk inndi kabak yiga-o. 7Kwiye karuk, wi langgu mbatluk, it pidsa-nen yak kerak mbogolar-e: ”Ap yu-ge pidsa Nggalilea nab-et nde, 8nggerak puruk-nen nit pidsa ndet ninpidnak sa nenne lombok pem yogola kulili-o? 9Nir-e Paratia nap min Meria nap min Elam nap min Mesopotamia woragwi nap min Yurea woragwi nap min Kapandokia woragwi nap min Pontus nap min Asia nap min 10Perigia nap min Pampilia nap min Mesira nap min Kirene koroga Libia nap oboksa min ap sal wandak-nen lobok yidnap nap Oroma nap min 11Yawuri nap min enlem nin nab-et nde Yawuri nap nggal tak inpidnak nap min Kereta nap min Arap nap min nit oboksa nit nenambikpebe nenne bem Mbal Pem Nagawan-nen kwiye worak mende kwaroso na-ge it-nen yogola kulili-o” luk yiga-o. 12Yurug-e, it na wi langgu mbarogolat inndi kabak yogolat, yak kerak mbogolar-e: ”Yu-ge ngge kwarosolar-o?” luk yiga-o. 13Nde, it erep-nen it na nda ondogolar-e: ”Lag-o. It yu-ge anggut engen amburu undu nektak me, inmbitsa ninggidnak-nen yili-o” luk yiga-o.
Peterus-nen aid wene yidnak wene
2:14-42
14Nde, Peterus na-ge it ap sebelas na inmin menluk, ene ngguloksa-t yak ondosolar-e: ”Yawuri nap min kit Yerusalem woragwi nap oboksa min wa-e. An yak kindimin wene yu-ge kenaru luk, kwara kinndi-n yebet ker-o. 15’It yu-ge anggut engen amburu ninggarik-nen inndi lak lak yili-o’ luk peraigep iri-ge lag-o. Yawo-ge kuplila jam sembilan-nen yusu-o. 16Alat nde, Mbal Pem Nagawan-nen yidnak wene lomboksa yoso nap Yoel-nen yosolar-e, yu nggal yamu-o:
17’Mbal Pem Nagawan-nen yosolar-e:
”I woronosolat tarem-e an Nindi-ge ab-e ap enpem nggilara mberak pil mbuwamin-o. Iri ala-ge, kit kenmbararak min kenararak min-e urul pogolat, kunsugwerak-nen-e yik kagwi mende na yik kagolat, kineidtak inndi worak-nen-e yi nabi ndi nabi kagolat irit yuwa-o.
18Nde, ereya tarem-e an ndegel nubugwi ap min kwami min enpem-e an Nindi nggilara mberak pil mbuwasola-ge, it-nen-e urul pogolat wolma-o.
19Nde, an-nen kwarosolar-e, wi yurak mende na teram nggwe mbal pem-nen kwarosolat, nggweyak ma ena nggwe-nen na yenggerak purak mende-ge eyabi min kanduk min kule min irit nam tak pimin-o.
20Nde, Nagawan Indo-nen idnak Tarem, nggulok abinal worak Tarem iri wok yigit lak ma-ge, molengen na lumu yosolar-e, mom ki yosolat, waneya na eyabi worak yosolat ma-o.
21Nde, ta-nen nde Nagawan Indo unu luk wene mbo buwa nab-e irit inmiri yaga wok unduwa-o” ’ yij-o.
22Kit Isarael nap wa-e. Wene yu koler-o. Nasaret nap na-ge Mbal Pem Nagawan-nen at mirik konposolar-e, kwiye worak mende min wi yurak mende min yenggerak purak mende min-e Mbal Pem Nagawan-e Yesus arem woralat-nen kit kennggendumu-nen irit kwarosolat woragaid na-ge kir-e kenaru irir-o. 23Mbal Pem Nagawan-nen at indi-n pidnak pem at-nen irit kwarimin-o luk peragaid iri na ndak ndak tak posolar-e, Yesus na-ge wesera kininggem pamu, kit-nen-e it wene tarugwi nap endam pogola, it ininggi-nen-e e lang pang tak pem panggarak ibiga-t nde, kit-net wirigep nar-o. 24Alat nde, Mbal Pem Nagawan-nen tuguruk uruk tak posolar-e, wat yugwi elem iri-nen Yesus tena wolmomtag-e mondok meya me, wat yugwi elem yane wurugwi iri inggiyem-nen at-nen weserak pamu-o. 25Ndaud-nen at imin yosolar-e:
’Nagawan Indo-ge an nurugwe nggwe pempa worala kagi-o.
An tugup lak yaga wok nereyekluk, ar-e an ninggi kigit nggwe worasu-o.
26Iri bem-e an nindi-nen na alen kasolat, nemende nggwe-nen na kijik kijak kasolat yusu-o.
Nebe-nen an nindi ebem mbung mbung tak puruk woraso iri na ebem yamuksa worasu-o.
27Kat-nen-e an nindi-ge wat yidnak nap woragwi sa iri me keya bugun pug-o.
Kat-nen-e kat-nen idnak Lenak Pidnak Nab-e piri ma naru keya bugun pug-o.
28Unluk wolmomtak tula na mul nirigen-o. Kat woraso sa worala-ge, nalen-e kobongsa wok nurugun-o’ luk irit yij-o.
29Nanggamirak wa-e. Nam-et yak kendeyeg-o. Nit nenlawingga Ndaud iri na-ge wat yamu, yapma pikma-o. At yapma pidnak sa-ge yawo na nit nennggendumu worasu-o. 30Iri bem-e at Ndaud na-ge Mbal Pem Nagawan ene lomboksa yoso nap me, Mbal Pem Nagawan-nen owak mbatluk urul posolar-e: ’Kat-nen ndakun lolo misig-e an-nen nagawan tak pumu-ge, nagawan kat kore yoso ondoro ebem-et kore yuwa-o’ luk yidnak wene iri-ge Ndaud na aru woragaij-o. 31Iri yak tidnak aru bem-e Ndaud-nen-e Kerisut uruk yurak wene na obok yosolar-e: ’At iri-ge wat yidnak nap woragwi sa iri me keya bigit lak, at ebe na piri yigit lak ma-o’ luk yij-o. 32Yesus yu-ge Mbal Pem Nagawan-nen uruk tak pamu-o. Uruk tak pidnak na-ge nit pidsa nenlengen-nen kaige-o. 33Iri bem-e, Yesus na Mbal Pem Nagawan inggi kigit nggwe-nen kek tak puruk, Eid-nen obok yak tidnak Konak Indi-ge at wok turuk, tak purug-e, at-nen nit nenpem nggilara pil mbuwasola-ge, kit-nen kagolat, kologolat kwatli yur-o. 34-35Ndaud na-ge aid arem-e lagit lag-et nde, at ondomok-net yosolar-e:
’Nagawan Indo-nen an Nagawan Indo yak tosolar-e:
”Kat kimin wim nab-e kat kijok ondoro rak enpeyek-nen kar-e an ninggi kigit eralu yu me koreyak wolmin-o” luk yak tij-o.’
36Iri bem-e, kit-nen e lang pang tak pem wirigep nap Yesus na-ge, Mbal Pem Nagawan-nen Nagawan Indo min Kerisut min tak pidnak nap-nen yusu-o luk Isarael nap it lolo pidsa-nen wene yu mondok kwara enaru mag-o” luk yij-o.
37Iri yosola kuluruk yigarig-e, it-nen inndi andi min-et Peterus min it wirik inpidnak nap erep na min yak ondogolar-e: ”Nowe nowot wa-e. Ngge kwarul-o?” luk yiga-o. 38Yogolikma-ge, Peterus-nen it yak ondosolar-e: ”Kondok yer-o. Kit meya yogolat woraidnak lak tak puwakluk, kenarik tak Yesus Kerisut unu bem yi ma konpogola-ge, Konak Indi-ge onggo lag-et we irit wanugub-o. 39Nde, urul pidnak wene iri-ge kit kenmanggim na, kit kinlirak enmanggim na, it erepma worali nap pidsa, Mbal Pem Nagawan nit Nagawan Indo-nen yonggo unpuwa nap pidsa enmanggim na irit urul pij-o” luk yak indij-o.
40Yak undurug-e, wene erep kwarat nimi nomosa yak unduruk, nggomo kiri keresa yak ondosolar-e: ”Yawo worali nap meya nak kwarugwi nggal yugub-o luk kenambikpebe-t kinmiri yer-o” luk yak indij-o. 41Yak ondosoloma-ge, at-nen yidnak wene waniga nab-e yi ma inpiga-o. Iri tarem-et it inmin lambinil nggogolar-e, ab-e tigaribu (3,000) nggal yiga-o. 42Iri lug-e, ir-e pempa wirik inpidnak nap-nen mirik inpidnak wene puksa wanogolat, it inmin kundik woragolat, mburu ndeksa nonggolat, tepan yogolat irit kwarogolat woraiga-o.
It inndi angin tubu yidnak nap-nen woragolat kwaridnak wene
2:43-47
43Nde, wirik inpidnak nap-nen-e kwiye worak mende min kagwi buk mende min kwarogola-ge, ap pidsa-nen kwiye kwarat kaiga-o. 44It inndi Yesus ebem angin tubu yidnak nab-e lambuksa woragolat, enarengge na it lambuksa winde woragolat woraiga-o. 45It onggweyak min insilobulo min onggo wanuruk, tol-e tembesa ap pidsa ndak ndak wok ondogolat woraiga-o. 46Nde, pelin na pelin na it inndi lambuksa Mbal Pem Nagawan ama ndok worogolat, it enma lombok-nen mburu ndeksa nonggolat yiga-o. Nunggwi mende nonggolar-e, inndi mot mor-et enalin min nonggolat, 47Mbal Pem Nagawan erembel wanogolat kwarogola-ge, ap pidsa-nen it inndingen tak inpiga-o. Iri ala-ge, pelin na pelin na Nagawan Indo-nen-e inmiri yidnak nab-e it inmin nambenak onposolat woragaij-o.
Currently Selected:
YIDNAK YIDNAK WENE 2: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
