YIDNAK YIDNAK WENE 4
4
Peterus min Yoanes min-e wene mbarugwi nap inmbiri bem-nen yiga wene
4:1-22
1Nde, ir-e ap ereba na wene yak ondogolat worakmu-ge, it tepan omborak min Mbal Pem Nagawan ama yik karok woragwi nap ennggendumu-nen wari mendak pidnak nap min Saruki nap min it endam lobok yiga-o. 2Lobok yogolar-e, mberen nap iri-nen ap ereba na mirik onpogolar-e, Yesus na uruk yidnak pem-e wat yidnak nap ennggendumu-nen-e ap unluk momtak wene owak na mirik onpogola karuk, it insilepma kwarat mberen nap na enpem piga-o. 3Purug-e, o keyama nggwe ala-ge, kup-nen wene mbaruwokluk mberen nap yu na kamboksa o kubu me inpil nggwiga-o. 4Alat nde, it-nen yidnak wene kuluruk, inndi angin tubu yiga nab-e ap nag-e lima ribu (5,000) nggal-o.
5Nene luk, kub-e Yerusalem-nen ndok worogolar-e, it nagawan nagawan min ogore yidnak nap min engga enaru nap min 6tepan ombo nggulok Anas min Kayapas min Yoanes min Alekandat min tepan ombo nggulok owe owosi pidsa min iri me ndok wiriga-o. 7Ndok wutluk, mberen nap na-ge it ennggendumu mendak unpuruk, kin wok onpogolar-e: ”Kir-e no amawi bem-nen, ta unu bem-nen yu nggal kwarigeb-o?” luk yiga-o. 8Yogolikma-ge, Konak Indi-ge Peterus arem kobongsa woralat-nen yosolar-e: ”Kit ap nagawan nagawan min ogore yidnak nap min wa-e. 9Ap ijok nggorak na konak tak pidnak ala karuk, ’No amawi bem-nen kwarigeb-o?’ luk nit kin wok ninpili ala-ge, 10kit min Isarael nap pidsa min-e wene yu kenaru mer-o. Ap ki yaga wok tidnak kit kinmbiri bem mendak worasu yu perak nde, Yesus Kerisut Nasaret nap unu bem ki yidnak worasu-o. Yesus iri-ge kit-nen e lang pang tak pem wirigep na-t nde, Mbal Pem Nagawan-nen uruk tak pij-o. 11Yesus iri-ge kit o wurugwi nap-nen mbo bigep kereb-et nde, at iri-ge o unggut nggwe paro pidnak kerep nde kwat yij-o. 12Nin nap mbi unu bem ninmiri yaga wok undurag-e meya-o. Nggweyak ma yu me, o kuri ap kuri-nen nit ninmiri yaga wok nundurak Unu-ge ap-nen unu yaridnak nin mbi-ge lag-o” yuruk yij-o.
13Yosoloma-ge, it-nen yik eneyagolar-e, Peterus min Yoanes min na enmbereg-e we nap, sekola yugwi buk nab-et nde, wene kwiye lag-et yogola karuk, ir-e wi langgu mbarogolar-e, it enmbereg-e Yesus imin nugwi nap irit yenggerak eneyaiga-o. 14Nde, ijok mot tak pidnak nap na it mberen nap inmin lambuksa worala me, it-nen wene onggo yurag-e meya-t agaij-o. 15Alama-ge, ap mberen na mbepme wirik unpuruk, it nak it nak yak kerak mbogolar-e: 16”Ap mberen yu inmin-e no nde kwat unpul-o? It-nen kwiye worak mende nggulok kwariga yu-ge Yerusalem woragwi nap pidsa-nen kulidnak me, nit-nen-e ’Kwarigit lag-o’ yurag-e meya-o. 17Alat nde, wene yu waruk ap pidsa naru karu yugu-o luk, it yak ondogolar-e: ’Kir-e at unu bem wene-ge ap misiger-o luk tet yak undurak pug-o’ luk nenne amawi min watsa yak unduwog-o” luk yiga-o. 18Yogolug-e, it mberen nap na wene mbo unpuruk-nen enne amawi min watsa yak ondogolar-e: ”Kir-e Yesus unu bem wene yogolat, ap mirik onpogolat yurak puk na-e” luk yak indiga-o. 19Yak ondogolikma-ge, Peterus min Yoanes min-nen it yak ondogolar-e: ”Mbal Pem Nagawan-nen konag-o luk perasu-ge kit-nen yidnak yidnak nak kwarurak iri, lak? Are, Mbal Pem Nagawan-nen yidnak yidnak nak kwarurak iri-a? Kit-nen nak mbenarer-o. 20Alat nde, nit-nen kaidnak wene min nit-nen kulidnak wene min iri-ge yik tenak wulmul-o” luk yak indiga-o. 21Yak ondogolikma-ge, tuguruk enne amawi min-et watsa yak ondogoluk, mberen nap na wisirik inpiga-o. Mberen nap-nen kwiye worak mende kwaridnak ala karuk, ap pidsa-nen Mbal Pem Nagawan erembel wanogolat woragola karuk, ap ereba na inndi aye-nen it andi bandi rak unpurak elem-e lak me, wisirik inpiga-o. 22Kwiye worak mende kwasa ki rak pidnak nap iri-ge molengen lasolat mbosolat empat pulu (40 tahun) nggal woraidnak nab-o.
Tepan yogolar-e: ”Kwiye lak yaga wok nindi-o” yidnak wene
4:23-31
23It mberen nap wisirik onpogolikma-ge, ennggamirak endam mbirigarig-e, tepan ombo nggulok min ogore yidnak nap min-nen it yak indidnak wene ndegera yak indiga-o. 24Yak ondogolikma-ge, it kuluruk yigarik, it inndi misiget luk, Mbal Pem Nagawan eram tepan yogolar-e: ”Nagawan Indo wa-e. Mbal min nggweyak min yi koma min arem worasu mende pidsa-ge kat nak-nen ndak wirigen-o. 25Kat ndegel koboso nap nenlawingga Ndaud emendam tak posolat, Konak Indi-nen yosolar-e:
’Enlem nin nab-e noluk-nen insilepma yili-o?
Ab-e ap pidsa-ge noluk-nen ebe lak mende nak yebet kali-o?
26Nggweyak ma nagawan nagawan min ese mendak inpidnak nap min ndok worogolar-e, Nagawan Indo min at-nen idnak Kerisut min inmin wim mbaruwokluk ndok wiriga-o’ luk yij-o.
27Ndemerer-o. O siri yu me-nen Erores min Pontius Pilatus min-e enlem nin nap min Isarael nap min ndok worogolar-e, kat Ndegel Koboso Len Ibidnak Nap Yesus, kat-nen amburu ebem kilidnak nap imin wim mbaruwokluk ndok wiriga-o. 28Ndok wiriga iri-ge, kat kamawi min kat kindi-nen irit kwaruwag-o luk nanduk peraigen mende irit lud makluk kwariga-o. 29Nagawan Indo wa-e. Yawo-ge it enne amawi min-et watsa yak nindidnak wene iri-ge yebet ki-o. Yebet karug-e, kat ndegel kubugwi nap nir-e kat-nen yidnak wene yik tenak wolmok-nen kwiye kagwi buk elem wok nindi-o. 30Kat kinggi mberak puruk, ap ki yaga wok indi-o. Kat Ndegel Koboso Nap Yesus, Len Ibidnak Nap unu bem kwiye worak mende min kagwi buk mende min irit kwari-o” luk tepan yiga-o. 31Tepan yogolikma-ge, it ndok worak woraiga o na-ge yuk lenak mbosolar-e, Konak Indi-ge it enarem yebet yosolar-e, Mbal Pem Nagawan-nen yidnak wene-ge kwiye lag-et yogolat woraiga-o.
It insilobulo pidsa wok kerak mbidnak wene
4:32-37
32It inndi Yesus ebem angin tubu yidnak nap pidsa-ge inndi misiget luk lambuksa woragolar-e, insilobulo-ge enariktak-nen-e ”Yu-ge an narengge-o” luk yigir-e lak. Are, ”Nit nenarengge-o” luk insilobulo-ge lambuksa irit winde woraiga-o. 33Nde, wirik inpidnak nap na-nen-e Nagawan Indo Yesus uruk yidnak wene-ge ”Nenlengen-net kaigerig-o” luk mondok amawi min konggorogolat woraiga-o. Worakmu-ge, Mbal Pem Nagawan-nen we wok ondoso indi kwarat it pidsa enpem woragaij-o. 34It ennggendumu-nen-e insilobulo lak nap misiger-o luk tet woragir-e lag-o. Woragolar-e, it unuwi ala na, onnggweyak ala na, onggo wanuruk, onggo wanidnak tol na pil lobok yogolar-e, 35wirik inpidnak nap na ininggem pogolat woraiga-o. Pogola-ge, tol ereba na-ge tol lak nap tembesa wok ondogolat woraiga-o.
36Iri nggal kwarogolar-e, ap misik unu-ge Yusup iri-ge, it wirik inpidnak nap-nen unu mbi yarogolar-e, Mbaranabas yariga-o. At unu yogolar-e, Inndi Yangonoso La-o yogolat. At elem-e Lewi nap, nde, at uwi-ge Siperus-nen lobok yidnak nap na-nen-e 37at onggweyak onggo wanuruk, tol na pil lobok yosolar-e, wirik inpidnak nap ininggem pij-o.
Currently Selected:
YIDNAK YIDNAK WENE 4: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
