YOANES 4

Yesus min Samaria kwe min wene ndiriga wene

4:1-42

1”Yesus-nen ap wok unpuruk, yi mat unpusu nab-e kwarar-et nde, Yoanes-nen ap wok unpuruk yi mat unpusu nab-e wonarak nggal-o” luk yidnak wene-ge Parisi nap-nen kuliga-o. 2(Ndemerer-e Yesus at-nen-e ap yi ma inpigit lag-o. Are, at owosirak perak nde ap yi ma unpugwi-o.) 3Nde, ”Parisi nab-e kat-nen kwarusu yu-ge kuliga-o” luk yidnak wene na aru luk, Yesus na Yurea wi keya buruk, tuguruk Nggalilea wi mbirij-o. 4Iri me mborosolar-e, Samaria tu nggwe-t mbirij-o. 5Yesus na wasolar-e, o Samaria iri me o siri Sikat iri me wok yij-o. Nde, Sikat iri-ge nanduk Yakup-nen at ambara Yusup wok tidnak nggweyak iri na korok korog-o. 6Yakup-nen yi kenanggurak pem nggweyak emnde nenaridnak na-ge o iri me woragaij-o. Nde, Yesus na-ge tula lobok yosolat ababok lak yidnak me, yi emnde mbarak iri na eralu kore yij-o. Nde, iri kore yid iri-ge mo enggendumu nggal kore yij-o. (jam duabelas).

7-8Nde, at owosirag-e nunggwi mende onggo puwokluk, o siri iri me mbirigarik woragola, Samaria kwe misig-e yi kenanggeyekluk lobok yosola-ge, Yesus-nen kwe na yak tosolar-e: ”Yi kenang niri-o” luk yak tij-o.

9Yak tosoloma-ge, Samaria kwe na-nen at yak tosolar-e: ”Kar-e Yawuri nab-et nde, Samaria kwe an nimin-e ’Yi kenang niri-o’ yigen iri-ge noluk-nen yigen-o?” luk yij-o. (Yawuri nap-nen-e Samaria nap inidmbe arem nunggwi bug-o.)

10Yosoloma-ge, Yesus-nen kwe na yak tosolar-e: ”Mbal Pem Nagawan-nen onggo lag-et we wok ondoso mende min kat kebem yi nggi yidnak nap an min karu nggal-nen-e kat-nen ’Yi kenang niri-o’ luk yak norosola-ge, an-nen-e unlug-et wolmomtak yi wok ketleb-o” luk yak tij-o.

11Yak tosoloma-ge, kwe na-nen at yak tosolar-e: ”Nab-o. Kat kinggem-e yimbe na lak, yi emnde mbarak yi-ge yoboksa mbidnak yu-t nde, unlug-et wolmomtak yi iri-ge ngge me-nen wanugun-o? 12Nit nenlawingga Yakup-nen-e yi emnde mbarak yu wok nindij-o. Nde, at min at ilirak min owam min pidsa-ge yu me-t yi nonggolat woraiga-o. Nde, kar-e Yakup na marik tak puruk, kat kambikpebe nggok yosolat-nen yigen-a?” luk yij-o.

13Yosoloma-ge, Yesus-nen yosolar-e: ”Yi yu nujwa nab-e tuguruk yi nere ma-t nde, 14an-nen kenangga mak timin yi nujwa nab-e pempa pempa yi nere kujwa bug-o. Nde, an-nen kenangga mak timin yi iri-ge at arem-nen unlug-et wolmomtak yi urusu kundik mborosolar-e, urug-et woralik nalik wolmomtak elem wok tuwa-o” luk yij-o.

15Yosoloma-ge, kwe na-nen yosolar-e: ”Nab-o. An-e tuguruk nere kagit lak yosolat, yi kenanggil yu me lobok yigit lak yosolat eyek-nen kat-nen yigen yi iri-ge mak niri-o!” luk yij-o.

16Yosoloma-ge, Yesus-nen kwe na yak tosolar-e: ”Kar-e mburugundik, kun wene mbo buruk imin lobok yi-o” luk yak tij-o.

17Yak tosoloma-ge, kwe na-nen yosolar-e: ”An nun-e lag-o” luk yosoloma-ge,

Yesus-nen yosolar-e: ” ’Nun-e lag-o’ yigen iri-ge lud tag-et yigen-o. 18Kar-e kuntak lima wanigen-o. Nde, ap yawo kimin worasu-ge kat kun-e lag-o. Lud tag-et yak nirigen-o” luk yij-o.

19Yosoloma-ge, kwe na-nen yosolar-e: ”Kar-e Mbal Pem Nagawan ene lomboksa yoso nab-et keyagi-o” yurug-e, 20”Nit nenlawingga-nen-e ndobo yu bem-nen Mbal Pem Nagawan erembel wanugwi-t nde, kit Yawuri nap-nen-e ’Mbal Pem Nagawan erembel wanugwi sa-ge Yerusalem nag-o’ luk yili-o” luk yij-o.

21Yosoloma-ge, Yesus-nen kwe na yak tosolar-e: ”Kwe yu-ge wa-e. An-nen yusu wene yu-ge karu wolmin-o. Abog-e Nineid erembel wanogolar-e, ndobo yu bem-nen na irit, Yerusalem-nen na irit, at erembel wanuwa bug-o. 22Kit Samaria nap-nen-e kenaru buk mende-t nde, erembel wanugwi-o. Nde, ap inmiri elem-e Yawuri nap enpem-nen lobok yoso me, nit Yawuri nap-nen-e nenaru nap iri na-t erembel wanugwi-o. 23Alat nde, Nineid erembel lud tag-et wanuwa tarem-e panggo yusu-o. Iri tarem-e yawo wok yid yur-o. Nde, it-nen erembel wanogolar-e, Nineid indi-n pidnak ndak ndag-et kwara erembel wanuwa-o. 24Mbal Pem Nagawan-e Indi-nen yusu me, at erembel wanogolar-e, mondok ndemeret inndi bem-net erembel wanuwag-o” luk yak tij-o.

25Yak tosoloma-ge, kwe na-nen at yak tosolar-e: ”Mesias unu misig-e Kerisut iri-ge lobok yuwa-o luk an-e naru-o. Nde, at iri na lobok yuwarig-e, yi mende ndi mende pidsa kwarurak iri yak nunduwa-o” luk yij-o.

26Yosoloma-ge, Yesus-nen kwe na yak tosolar-e: ”Iri na-ge kat kimin wene ndurusu nap an yur-o” luk yak tij-o.

27Wene yukmu ereya na-net at owosirak na wok yiga-o. Wok lug-e, ar-e kwe na imin wene ndorosola karuk, wi yiga-t nde, ap misiger-o luk tet-nen kwe na yak togolar-e: ”Kar-e no kindingen-o?” luk yak togolat, nde, Yesus kin wok obogolar-e: ”Noluk-nen kwe yu imin wene ndurusu-o?” luk yak tigit lag-o.

28Iri rak puruk, kwe na-ge at idmbe yumbuk karuk, o silmu mberarik, ap pidsa yak ondosolar-e: 29”Ap misig-et an-nen kwaridnak mende pidsa para yak nirid nap iri kil lobok yer-o. Ap iri-ge Mesias-nen yusu, lak?” luk yij-o. 30Wene na yosoloma kuluruk, o siri na keya buruk ap ereba na-ge Yesus eram mbiriga-o.

31Nde, ap ereba na Yesus eram lobok yogola-ge, at owosirak-nen Yesus yak togolar-e: ”Mul Ondoso Nap wa-e. Mburu yu min-o!” luk yak tiga-t nde,

32Yesus-nen it yak ondosolar-e: ”Nunggwi mende an-e worasu-t nde, kir-e kenaru bug-o” luk yak indij-o.

33Yak ondosoloma-ge, at owosirak-nen kin wok kerak mbogolar-e: ”Ap-nen at amanggim nunggwi mende wok til lobok yikma, lak?” luk yiga-o.

34Yogolikma-ge, Yesus-nen it yak ondosolar-e: ”An numburu-ge an wirik nibil lobok yidnak nap iri na indi-n pidnak nak kwarosolat, at-nen yabu nebem pidnak na woroksa wanosolat yurak irir-o. 35Kit-nen yogolar-e: ’Waneya empat nak worak puruk, ogore yosola, ndagul-o’ luk yugwi-o. Nde, an-nen yak kondosolar-e: Yik ker-o. Yabu yabu pidsa mburu ogore yidnak me, ndagurak nak worasu-o luk yak kundusu-o. 36Nde, mburu ndagoso nap-nen-e onggo wanosolar-e, unlug-et woralik nalik momtak amanggim ndok woroso-o. Iri bem-e, yagoso nap min ndagoso nap min-e enmbereg-et enalen worak wolma-o. 37’Nin nap-nen yagosoma, nin nap-nen ndagoso-o’ luk yugwi na-ge ndemerer-o. 38Kit-nen yabu wanigit lak sa-t nde, mburu ndagobokluk-nen wirik kinpigi-o. Nin nap-nen yabu wanuruk, yagaidnak mburu-ge kir-e kenalen pem we-t ndakub-o” luk yak indij-o.

39Kwe iri na-nen yosolar-e: ”An-nen kwaridnak mende pidsa para yak nirij-o” luk yidnak pem, o iri me woragwi Samaria nap kwarat-nen Yesus ebem inndi angin tubu yiga-o. 40Iri ala-ge, Samaria nap na-nen Yesus eram lobok luk, at emengen mbarogolar-e: ”Totno wolmog-o” luk yogola-ge, inmin mberen nene yij-o.

41Inmin nene yosola-ge Yesus-nen yidnak wene kuluruk, ap kwarat erep min-et at ebem inndi angin tubu luk, 42it-nen kwe na yak togolar-e: ”Yawo ninndi angin tubu yili yu-ge kat-nen yidnak pem nak-nen yili-ge lag-o. Are, nit na nondomok-net at-nen yidnak wene kuluruk, at yu-ge ndemeret ki nap pidsa Inmiri Yoso Nap-nen yusu-o luk nenaru yili-o” luk yak tiga-o.

Yesus-nen pemerinta nagawan ambara ki rak pid wene

4:43-54

43O Sikat iri me mberen nene lug-e, keya buruk, Nggalilea mbirij-o. 44Nde, Yesus at-nen yosolar-e: ”Mbal Pem Nagawan ene lomboksa yoso nab-e at ambik ama-nen-e kek tak ubugwi bug-o” luk yij-o. 45Nde, it Nggalilea nab-e Yerusalem-nen O Anggul Pandok Mbiridnak tarem yebet kagolat Yesus-nen kwiye worak mende kwarosola kaidnak me, Yesus na Nggalilea wok yosola-ge, enalen min-et wok ibiga-o.

46Iri lug-e, Yesus na-ge Nggalilea nggweyak pem o siri Kana, at-nen we yi-t nde anggut engen amburu kwarak pid sa iri na me tuguruk wok yij-o. Nde, pemerinta nagawan mbi ambara-ge o Kaperenaum iri me kugi worak woragaij-o. 47Nde, ”Yesus na Yurea-nen Nggalilea wok yij-o” yogola kuluruk, ap iri na Yesus eram mberarik, at emengen mbarosolar-e: ”An nambara-ge komo wat eyekluk yusu me, ki rak ponok-nen Kaperenaum mburuwog-o” luk yij-o. 48Yosoloma-ge, Yesus-nen at yak tosolar-e: ”Kit-nen nde kagwi buk mende min kwiye worak mende min kagit lak-nen-e kinndi-ge an nebem angin tubu yugup pug-o” luk yak tij-o.

49Yak tosoloma-ge, pemerinta nagawan-nen yosolar-e: ”Nab-o. An nela wat yigit lak worala ya-t ndag-et nak lobok yi-o” luk yij-o.

50Yosoloma-ge, Yesus-nen at yak tosolar-e: ”Kat kambara ki yidnak kagun-o. Kar-e mbiri-o” luk yak tosoloma-ge, ap iri na-ge Yesus-nen yak tidnak wene iri na bem indi angin tubu luk mbirij-o. 51Mborosoma, tulama at ndegel ubugwi nap inmin lid pid lug-e, it-nen at yak togolar-e: ”Kambara na ki yamu-o!” luk yak tiga-o. 52Yak togolikma-ge, at-nen kin wok onposolar-e: ”Molengen-e ngge bem-nen la na ki yij-o?” luk kin wok onposoloma-ge, it-nen yogolar-e: ”Tono molengen ndumu nggal worala, jam satu bem embem na-ge lak yij-o” luk yiga-o. 53Yogolikma-ge, eid na-nen indi yebet kagaidnggal-e, Yesus-nen at yak tosolar-e: ”Kambara ki ma-o” luk yak tid jam iri na ndak ndak pem-net ki yidnak ala karug-e, at min at ogwe la inmin pidsa-nen Yesus ebem inndi angin tubu yiga-o.

54Yesus-nen Nggalilea wi-nen kwiye worak mende kwarosolar-e, Yurea-nen lobok yarik kwarid iri-ge kwiye worak mende mberen pem tak posolat-nen kwarij-o.

Currently Selected:

YOANES 4: inondx

Highlight

Copy