LUKAS 21

Kwe togwe mbi-nen Mbal Pem Nagawan amanggim pid wene

21:1-4

(Mk 12:41-44)

1Iri yuruk, Yesus na yik eneyagaidnggal-e, insilobulo kwarat worak nab-e Mbal Pem Nagawan ama-nen Mbal Pem Nagawan amanggim yarak pugwi ondoro na arem ontol-e yarak pogola, eneyagaij-o. 2It iri na ennggendumu-ge arengge mondok lak woraso kwe togwe misik-nen kerep tol marik mberen-et nak pil nggosola, kagaij-o. 3Karuk, at-nen yosolar-e: ”Ndemeret yak kendeyeg-o. It erep-nen pil nggwiga-ge marik komosa-t nde, kwe togwe yu-nen pil nggwid iri perak nde mondok nggulog-o. 4Nde, it erep-nen piga-ge, insilobulo kwarat worala-nen piga-t nde, kwe na-ge isilobulo lag-et nde, at norak onggo purag-et nde, at arengge tigisa pij-o” luk yij-o.

Yesus-nen Mbal Pem Nagawan uwi mijarak purak wene yij-o

21:5-6

(Mt 24:1-2; Mk 13:1-2)

5It erep-nen Mbal Pem Nagawan uwi na erembel wanogolat-nen yogolar-e: ”O yu worogolat kerep kona mendaidnak na min Mbal Pem Nagawan amanggim pidnak mende min yu-ge wir-o!” luk erembel waniga-o. Wanogolikma-ge, Yesus-nen yosolar-e: 6”Kir-e o yu kali yu-ge abog-e o yu worogolat kerep kona mendagil laidnak yu-ge iniksa wolma-ge lag-o. Mijara lak tak puwa-o” luk yij-o.

Worok tak purak tarem-nen kwaruwa wene

21:7-19

(Mt 24:3-14; Mk 13:3-13)

7Iri yosoloma-ge, at owosirak-nen at kin wok obogolar-e: ”Mul Nondoso Nap wa-e. Kat yigen iri-ge mepme tarem-nen kwat ma-o? Nde, iri kwarurak tarem ndak yosola-ge, nir-e no mende karuk-nen: ’E! Yawo-ge panggo yusu-o’ luk nenaru mul-o?” luk yiga-o.

8Yogolikma-ge, Yesus-nen yosolar-e: ”Kit konmbol pem lujwa naru, kwil kwalsa wolmer-o. Nde, an nggal kwasa ap kwarat lobok yogolat-nen yogolar-e: ’Kerisut na an-er-o’ yogolar-e: ’Iri kwat ma tarem-e panggo yij-o’ luk yil lobok yuwa-t nde, kit-nen iri yuwa nap enne mondok kulurak pug-o. 9Nde, wim obok min nari wari mbogola kulurug-e, kwiye kudtak pug-o. Worok tak purak tarem iri-ge awo worasola, iri mende-ge nandug-et kwat ma-o” luk yij-o.

10Iri luk, Yesus-nen wene erep kondosolar-e: ”Ap enlem misik-nen-e ap enlem misik inmin wim mbarogolat, nagawan misik-nen tenagaidnak wi woragwi-nen-e nagawan misik-nen tenagaidnak wi woragwi inmin wim mbarogolat ma-o. 11Nin me nan me o lele nggok yosolat, nogoro mbud yosolat, kugi enpem mbosolat ma-o. Kwiye kudtak mende min kwiye worak mende min mbal nggwe-nen kwat ma-o. 12Alat nde, iri mende pidsa kwarigit lak ma-ge, ap-nen tenaga lel mberel kunpuruk, kit kenpem wene mbaruwakluk tepan yugwi ma kinpil mbutluk, o kubu me kinpil nggogoluk, kir-e an nowosirak ala karuk, nagawan nagawan min pemerinta min-nen kit kenpem wene mbaruwakluk it ininggem kunpuwa-o. 13Iri kwat kunpuwa iri-ge nanongga-nen ap aid wene yak undurag-o. 14Iri bem-e, awo kwat kinpigit ma-nen ’An nondomok nimiri yosolar-e, no nde yimin-o?” luk kinndi kabak yugup naru mondok kinndi uwi ya-t wolmer-o. 15An-nen wene mot mot yobokluk kinndi nggat nggat lem wok kundumu me, kit kunuwim nap ap misiget ter-o luk-nen wene yugup na tarogolat, wene eyak wururag-e meya ma-o. 16Kinminep wosorogolar-e, kineid kiniya-nen, na konowe konowot-nen na, kenlem nap-nen na, kennggamirak-nen na wesel kunpuwa-o. Nde, kit kennggendumu ap ereb-e kunduwar-o. 17Nde, kir-e an wok nibigep pem, ap oboksa-nen insili rak kunpuwa-o. 18Alat nde, kit kenanggulsu misiget ter-o luk pul ma-ge mondok lag-o. 19Kit-nen nde tugup lak mamak puruk woragup pem-e kinmiri yaga wanugub-o” luk yij-o.

Yesus-nen Yerusalem mijarak purak wene yij-o

21:20-24

(Mt 24:15-21; Mk 13:14-19)

20Yuruk, Yesus-nen yosolar-e: ”Nde, wim nap san ombo-nen Yerusalem na kambuk tak pogola karug-e, Yerusalem na yawo-net lak tak puwa-o luk kenaru mer-o. 21Iri kwarogola tarem-e, Yurea woragwi nap-nen-e ndobo bem mburuwag-o. Nde, o silmu woraidnak nap-nen-e o siri na keya buruk mborogolat, mbepme nggwe woraidnak nap-nen na o silmu nggwigit lak mag-o. 22Iri kwaruwa tarem iri-ge it meya yidnak pem angin worak mende enpem mberak purak tarem-o. Nde, iri kwat unpuwa iri-ge Mbal Pem Nagawan engga bem-nen mbaridnak iri na ndak tak posolat-nen kwaruwa-o. 23Iri kwaruwa tarem-e o yu ebem-e angin worak mende nggulok mbosolat, Mbal Pem Nagawan isilepma ap yu enpem mondok posolat ma me, kweyap enabila min li kamo mak undugwi kweyap min enpem mbuwa mende bem enabuwa-o! 24Ap ereb-e yalawi bem ondogolat, ereb-e kamasa wok unpuruk yi wi ndi wi mborogolat ma-o. Mbal Pem Nagawan-nen kuri pidnak tarem ndak yigit lak worasola-ge, Mbal Pem Nagawan enaru buk nap-nen-e Yerusalem na-ge unuwok liri rak pogolat wolma-o” luk yij-o.

Ap Ambara lobok yuwa wene

21:25-28

(Mt 24:29-31; Mk 13:24-27)

25Yuruk, Yesus-nen yosolar-e: ”Iri tarem-e molengen min waneya min wonaru min-e arik nin nggal kwiye worak mende kwarosola kagub-o. Nde, nggweyak ma yu me-nen-e yi koma usune kwarat luk, yi yuk lenak mbosola-ge, yi ap ndi ab-e kwiye luk, inndi kabak ma-o. 26Teram amawi rak poso mende na nari wari yosolar-e, nggweyak ma yu me kwat ma mende iri na yik karug-e, kwiye-nen ap inndi lak luk wat yidnak nggal ma-o. 27Iri tarem-e Ap Ambara an-e nggan nggan arem-nen kek tak amawi worak irit lobok yosola, niyujwa-o. 28Nde, an yigi yeba kwat yosola karug-e, ’Nit ninmiri yurak tarem na panggo yusu-o’ luk men luk kundugun pugaksa wolmer-o” luk yij-o.

”E ara-nen kwaroso bem kenaru mer-o” luk yid wene

21:29-33

(Mt 24:32-35; Mk 13:28-31)

29Iri yuruk, Yesus-nen nden karuk wene yu yak ondosolar-e: ”E ara min e erep min-nen kwaroso mende na kwara yebet ker-o. 30E na angga lerak mbidnak na tuguruk ambarok posola-ge, E! O kibi yusu-o luk kir-e kenaru nar-o. 31Nde, iri nggal-et, an-nen yak kindigi ereba kwat yosola-ge, Mbal Pem Nagawan-nen tenagaidnak wi-ge panggo yusu-o luk kenaru yurag-o.

32Kenaru mer-o. Ap yawo worali yeba pidsa wat yigit lak ma-net an yak kindigi yeba pidsa kwat ma-o. 33Mbal min nggweyak min lak ma-t nde, an-nen yidnak wene-ge mondok lag-e bug-o” luk yij-o.

Kwil kwalsa wolmomtak wene

21:34-38

34Yuruk, Yesus-nen yosolar-e: ”Kir-e kinndi-ge nunggwi mende nggok sakwi min enanggul nden kaso yi ndonggosa nunggwi min nak ebem pogolat, kit-nen kwarurak mende nak kunmud kagolat woragolar-e, kir-e lid lud tak pigit lak worakmu mimo wok yimin-o luk kir-e mondok kwil kwalsa wolmer-o. 35An lobok yimin tarem iri-ge sapna ma mena al lebeksa worak poso nggal kwasa nggweyak ma nap pidsa enpem mbuma-o. 36Nde, abok kenpem mbuma mende inggem-nen mengga mbururak amawi wok kondosolat, Ap Ambara an nimbiri bem mendak wolmomtak nap tak konposolat makluk, kir-e kunluk woragolat, tepan kundugu kundugu yogolat wolmer-o” luk yij-o.

37Nde, Yesus na-ge lengge-ge Mbal Pem Nagawan ama-nen ap mul ondosolat, nde, kubu-ge Saitun ndobo bem mbutluk, nene yosolat woragaij-o. 38Nde, ap oboksa-ge pempa kuplila ala-ge, Yesus-nen mul undusu wene na kuluwokluk, Mbal Pem Nagawan ama lobok yogolat woraiga-o.

Currently Selected:

LUKAS 21: inondx

Highlight

Copy