LUKAS 22
22
Yesus wuruwokluk wene mbridnak wene
22:1-2
(Mt 26:1-5; Mk 14:1-2; Yo 11:45-53)
1Oroti Lomboroso Mende Pigit Lak Worakwi tarem na panggo yij-o. Nde, iri tarem unu misig-e O Anggul Pandok Mbiridnak tarem-o. 2Nde, ap kwarat ereba na inndi aye-nen tepan omborak nagawan min imiri mbarak pidnak wene enaru nap min-nen-e Yesus wuruwokluk teberebe tu kore yogolat woraiga-o.
Yuras-nen Yesus iminep wisirid wene
22:3-6
(Mt 26:14-16; Mk 14:10-11)
3Misik tarem-e Yesus imin nugwi nap ap duabelas ennggendumu Yuras unu misik Ikariot na arem-e Sere nggwij-o. 4Arem nggosola-ge, Yuras na-ge tepan omborak nagawan min Mbal Pem Nagawan uwi yik karok wolmakluk mendak inpidnak nap min endam mberarik, at-nen Yesus iminep wesera it ininggem purak wene mbarij-o. 5Iri bem-e, it na enalen kwarat luk, at yak togolar-e: ”Onggo tol wok kurul-o” luk yak tiga-o. 6Yak togolikma-ge, Yuras na ”Konag-o” luk, ap enaru ma naru mbik mbok Yesus wesel undurak tarem kore yosolat woragaij-o.
Yesus owosirak inmi-o O Anggul Pandok Mbiridnak Tarem saguwokluk lid lud tak piga wene
22:7-13
(Mt 26:17-25; Mk 14:12-21; Yo 13:21-30)
7Oroti Lomboroso Mende Pigit lak Worakwi tarem na wok yij-o. Nde, iri tarem-e O Anggul Pandok Mbiridnak tarem yebet kagolar-e, lomba wam-e wosa nunggwi tarem-o. 8Iri tarem ala-ge, Yesus na Peterus min Yoanes min wirik onposolat-nen yak ondosolar-e: ”O Anggul Pandok Mbiridnak tarem nunggwi mende nok-nen kir-e lid lud tak pobok-nen mberer-o” luk yak indij-o.
9Yak ondosoloma-ge, it-nen at yak togolar-e: ”Iri-ge nir-e ngge me lid lud tak pul-o?” luk yiga-o.
10Yogolikma-ge, at-nen it yak ondosolar-e: ”Kir-e o silmu iri me wok yukmu-ge, ap misig-e yi kenangguruk mborosoma, imin lid pid lug-e, at mborosola-ge, imin mburugupndig-e, o at ngguwa iri me-t kit na imin nggurug-e, 11o iri na winde yak togolar-e: ’Mul Nondoso Nap-nen yak korosolar-e: An nowosirak inmin-e O Anggul Pandok Mbiridnak tarem yebet kagolat nunggwi mende-ge o ngge me-nen nul-o? luk yamu-o’ luk yak tugub-o. 12Yak togola-ge, o iri na winde-nen mirik konposolar-e, o kuri worak nggulok silabaga mondok lid lud tak pidnak irit mirik kunpuwa-o. Iri me nit norak mende saga lid lud tak pogolat wolmer-o” luk yak indij-o.
13Yak ondosoloma, it na mbirigarig-e, Yesus-nen yak indid na iri na nggal-et ndak ndag-et karug-e, O Anggul Pandok Mbiridnak tarem yebet kagolat norak nunggwi mende lid lud tak piga-o.
Nandug-et Yesus-nen konak mende norak mul indidnak wene
22:14-23
(Mt 26:26-30; Mk 14:22-26; 1 Kor 11:23-25)
14Norak tarem ndak alama-ge, Yesus na wirik inpidnak nap inmin nunggwi mende nokluk kore yij-o. 15Iri luk, at-nen it yak ondosolar-e: ”An-e awo andi bandi kagit lak ma O Anggul Pandok Mbiridnak tarem yebet kagolat norak nunggwi mende yu-ge kit kinmin norag-e mondok nindingen kagi-o! 16Nde, an yak kendeyeg-o. An yawo nasu yu kuri-net ninggit lak irit woramindik, nunggwi mende nili yu ebe kwat ma tarem Mbal Pem Nagawan-nen tanagaidnak wi iri me-nen perak namin-o” luk yij-o.
17Iri yuruk, Yesus-nen yimbe na wanuruk, Mbal Pem Nagawan wa yak turuk-nen yosolar-e: ”Yimbe yu wanuruk, kit temberer-o. 18An yak kendeyeg-o. Yawo kuri-nen anggut engen amburu yu ereb-e ninggit lak woramindik, Mbal Pem Nagawan-nen tenagaidnak wi wok yuwa tarem-net namin-o” luk yij-o.
19Iri luk, at-nen mburu wanuruk, Mbal Pem Nagawan wa yak turuk, ndeksa ndeksa puruk, it tembesa wok ondosolat-nen yosolar-e: ”Yu-ge an nebe [kit kenmanggim pidnak-nen yusu-o. Kinndi an nebem mbung mbung tak woragolar-e, yu nggal-et kwarogolat wolmer-o” luk yij-o. 20Yuruk, mburu nuruk, ir na nggal-et kwasa yimbe na wok ondosolat-nen yosolar-e: ”Yimbe yu-ge Mbal Pem Nagawan-nen ngget urul pidnak wene an neyabi kit pidsa kenmanggim mbiridnak neyabi-nen ebe rak pidnak-nen yusu-o.”]
21Alat nde, yu nde ker-o. An niminep wusururak nab-e an nimin totno nili yur-o! 22Ap Ambara an-e Mbal Pem Nagawan indi-n pidnak pem-et wat yimin-et nde, an niminep wusuruwa nap iri perak nde ebem mbuwa mende iri bem abuwa-o!” luk yij-o.
23Yosoloma-ge, it-nen yak kerak mbogolar-e: ”Iri kwat ubuwa nab-e nit nennggendumu-ge ta-nen kwarurak nde yij-o?” luk yak kerak mbiga-o.
”Ta nde nggulok ma-o?” luk imiri kimiri yiga wene
22:24-30
24Yesus owosirak na ennggendumu-ge: ”An nde nggulok yimin, lak? Kat nde nggulok yugun, lak?” yogolar-e, iri na wene lit lit ngguno piga-o. 25Alama-ge, Yesus-nen it yak ondosolar-e: ”Mbal Pem Nagawan enaru buk nap nagawan nagawan-nen it inlirak tena unpuruk worali-o. Nde, it nagawan-nen yidnak wene kwarugwi nap iri inmin yogolar-e: ’Inlirak enanggul pem wosarak woragwi nab-o’ luk yugwi-o. 26Alat nde, kir-e iri nggal kwarurak pug-o. Are, kit kennggendumu-nen kek yidnak nab-e li marik nggal mag-o. Nde, enne kulugwi nde ala-ge, ndegel unpugwi nap kwat mag-o. 27Nggog-e ta nde kali-o? Koreyak-nen nunggwi nap iri nde nggulok, lak? Are, koreyak-nen nunggwi nap na ndegel unpugwi nap nde nggulok-a? Lag-o. Koreyak-nen nunggwi nap irit nggulog-o. Alat nde, an-e kit kennggendumu woralar-e, ndegel unpugwi nap nggal-et worasu-o.
28Nde, an nebem anggun panggun mbosola, kir-e pempa nimin woraigeb-o. 29Nde, an Neid-nen nagawan tak nibid nggal, iri nggal kit na nagawan tak kinpimin-o. 30An-nen tenagaidnak wi-nen nunggwi mende min yi min totno nul-o. Nde, kir-e nagawan-nen kore yugwi ondoro duabelas na bem kore luk Isarael nap enlem duabelas na tena unpuruk woragub-o” luk yij-o.
”Kenan pem ’Ap iri an naru bug-o’ yugun-o” luk Peterus yak tidnak wene
22:31-34
(Mt 26:31-35; Mk 14:27-31; Yo 13:36-38)
31Yuruk, Yesus-nen yosolar-e: ”Simon wa-e. Simon wa-e. Kuli-o! Ap-nen yi mende ndi mende engen arik lena bogolat, owak min aboro min keya bili na nggal, iri nggal-et Sere-nen kit pidsa kinndi ngareyekluk Mbal Pem Nagawan emengen mbarij-o. 32Alat nde, Simon wa-e. Kat kindi angin tubu yigen iri-ge tugup lak woranokluk, an-e kat kamanggim tepan yigi-o. Nde, kar-e tuguruk an neram lobok yugundig-e, kat kanggamirak na inndi eyak wurugun na-e” luk yak tij-o.
33Yak tosoloma-ge, Peterus-nen at yak tosolar-e: ”Nagawan Indo wa-e. An-e kat totno o kubu me ninpil ngguwama, totno wat momtak iri-ge abu lud tak puruk worasur-o!” luk yij-o. 34Yosoloma-ge, Yesus-nen yosolar-e: ”Peterus wa-e. An yak kereyeg-o. Yawo o nda yigit lak ma towe wam ene yigit lak ma-net kar-e kenan tarem an nimin-e: ’Ap iri-ge an naru bug-o’ luk yugun-o” luk yij-o.
”Kot manik min sum min kabo min wanurag-o” yid wene
22:35-38
35Iri luk, Yesus-nen it yak ondosolar-e: ”An-e nanduk wirik konposolar-e: ’Kot manik min sum min kunuwok sum min waruk mbururak pug-o’ luk yak kundukmu, waruk mbirigit lak yigepndig-e, kir-e ndak nigep, lak? Are, meya-a?” luk yak ondosoloma-ge, ”Lag-o. Mondok ndak nige-o” luk yiga-o.
36Yogolikma-ge, Yesus-nen it yak ondosolar-e: ”Alat nde, yawo-ge ta-nen nde kot manik min sum min worak nab-e mondok waruk mbururag-o. Nde, ta-nen nde agabo lak nap-nen-e at yoroso sum na mondok onggo wanuruk, kabo onggo purag-o. 37An yak kendeyeg-o. Mbal Pem Nagawan engga bem-nen an nimin yosolar-e: ’At iri-ge meya yugwi nap nggal tak ibidnak nab-o’ yidnak wene iri-ge mondok ndak ndak irit kwat ma-o. Nde, an kwat nuburak wene mbarak iri na ndak ndag-et yawo kwat nibili-o” luk yij-o.
38Yosoloma-ge, at owosirak-nen yogolar-e: ”Nagawan Indo wa-e. Yalawi mberen yu nde ker-o” luk yogoloma-ge,
Yesus-nen it yak ondosolar-e: ”Mberen iri-ge ndag-o” luk yak indij-o.
Yesus-e Saitun ndobo bem tepan yid wene
22:39-46
(Mt 26:36-46; Mk 14:32-42)
39Yesus na o silmu-nen at pem mboroso ereba na nggal-et Saitun ndobo bem mborosola-ge, at owosirag-e imin-et mbiriga-o. 40Nde, iri me wokluk, at-nen it yak ondosolar-e: ”Kit kinndi ngaruwa naru, tepan yogolat wolmer-o” luk yak indij-o.
41Yak unduruk, Yesus na it endam-nen mboksa mbirij-e kerep misik tarem mbising karuk yoboksa mboso ereya nggal mberarik, endaru yunggusa kore luk, tepan yosolar-e: 42”Neid wa-e. Kat-nen nde ndak ala-ge, andi bandi mende nebem mbuwa mende yu lak tak pi-o. Alat nde, an nindi-nen pidnak kwat momtak iri-ge meya-o. Are, kat kindi-nen pidnak nak irit kwat mag-o” luk tepan yij-o. 43[Iri yosola-ge, aid nap misik aid arem-nen mbuwarik, at amawi rak pij-o. 44Nde, Yesus na kwiye-nen indi andi kwarat yosolar-e, tepan kwarat yij-o. Nde, irigak na eyabi nggal ndung ndung mbij-o.]
45Tepan yuruk tuguruk at owosirak na endam wagaidnggal-e, it na inndi puru kwarat yidnak me, nene yukmu eneyagaij-o. 46Eneyaruk, at-nen it yak ondosolar-e: ”Kir-e noluk nene yili-o? Kit kinndi ngaruwa naru, kir-e men luk, tepan yogolat wolmer-o” luk yak indij-o.
Yesus tenaiga wene
22:47-53
(Mt 26:47-56; Mk 14:43-50; Yo 18:3-11)
47Yak ondosolat worasoma-ge, Yesus owosirak duabelas iri na ennggendumu-nen at misik unu-ge Yuras na-nen anggul tak puruk, ap kere misik wok yogolar-e, Yuras na-ge Yesus eram mberarik, paluksa wa yak tij-o. 48Alat nde, Yesus-nen at yak tosolar-e: ”Yuras wa-e. Ap Ambara an niminep wosorosolar-e, paluksa wa yak nurusu-a?” luk yak tij-o.
49Yesus imin nugwi nap-nen at kwat uburak na yenggerak karuk-nen yogolar-e: ”Nagawan Indo wa-e. Ap yeba-ge yalawi bem mbal unpuwog-a?” yiga-o. 50Yogoloma-ge, it ennggendumu ap misik-nen tepan ombo kek tak ndegel oboso nap na yalawi bem eyanggo kigit nggwe irit tebera mberak pij-o.
51Alat nde, Yesus-nen yosolar-e: ”Iri nggal kwarurak pug-o!” luk ap iri na eyanggo na waga ondolma pij-o.
52Iri luk, Yesus-nen at tenagil lobok yiga nap tepan omborak nagawan min Mbal Pem Nagawan ama urum woragwi san ombo min Yawuri nap ennggendumu enne kulugwi nap min yak ondosolar-e: ”Kir-e an meya yoso ala-nen tege min mbut min lid lud tak puruk an tena nubuwokluk lobok yigeb-a? 53An-e pempa kit kennggenggerak Mbal Pem Nagawan ama woraso-t nde, kir-e tena nibigit lak yigeb-o. Alat nde, yawo-ge kit-nen idnak tarem min ndamuk ombo-nen amawi yurak tare min-nen yusu-o” luk yij-o.
Peterus-nen Yesus imin ”An naru bug-o” yid wene
22:54-62
(Mt 26:57-58,69-75; Mk 14:53-54,66-72; Yo 18:12-18,25-27)
54Iri yosoloma-ge, it-nen Yesus tenaga, tepan ombo nggulok na ama waruk mborogola-ge, Peterus na-ge abog-et ya labok mbirij-o. 55Nde, tepan ombo kek tak na uwi mborom ennggendumu-ge it-nen kan maburuk koreyak worakmu-ge, Peterus na it endam kore yil mbirij-o. 56Kan tonggosolat koreyak worasoma-ge, ndegel oboso kwami misig-e Peterus na karuk, kwara abage mbatluk-nen yosolar-e: ”Ap yu-ge Yesus imin noso nab-er-o” luk yij-o.
57Yosoloma-ge, Peterus-nen yubul posolat-nen yosolar-e: ”Ap iri-ge an-e mondok kaso bug-o” luk yij-o. 58Iri luk, siyak woraruk, ap misik-nen Peterus na yik karuk-nen yak tosolar-e: ”Kat na it inmin waring kaso-t keyagi-o!” luk yosoloma-ge, Peterus-nen yosolar-e: ”La yu-ge wa-e. An-e mondok lag-o!” luk yij-o.
59Iri luk, satu jam nggal woraruk, ap misik-nen ene amawi min yosolar-e: ”Ap yu-ge o Nggalilea nap me, lag-e lag-o. Yesus imin waring kaso-nen yusu-o!” luk yij-et nde, 60Peterus-nen yosolar-e: ”La yu-ge wa-e. Wene kat-nen yusu yu-ge an-e yebet kasu bug-o!” luk yosola ereya na-net towe wam kusi ene yij-o. 61Yosoloma-ge, Nagawan Indo na nden karuk, Peterus na yik kasoloma-ge, Peterus na-ge Nagawan Indo-nen at yak tosolar-e: ”Yawo o nda yigit lak ma, towe wam kusi ene yigit lak ma-net kenan tarem an nimin-e: ’Ap iri-ge an-e naru bug-o’ yugun-o” luk yak tid iri na indi yebet kagaij-o. 62Wene na yebet karuk, Peterus na mbepme mberarig-e, yip kondok lud mbij-o.
Yesus na nggweyel pogolat, mbut worogolat yiga wene
22:63-65
(Mt 26:67-68; Mk 14:65)
63Yesus yik karok woraiga nab-e at nggweyel obogolat, mbut worogolat yiga-o. 64It-nen at erare muruk tak puruk-nen kin wok obogolar-e: ”Ta-nen kirij-o? Kat-nen yi-o!” luk yiga-o. 65Yogolar-e, ap nggweyel onpogolat-nen yugwi wene kwarat yak tiga-o.
Yesus na wene mbarugwi nap endam waruk mbiriga wene
22:66-71
(Mt 26:59-66; Mk 14:55-64; Yo 18:19-24)
66O nda yosoloma-ge, Yawuri nap ennggendumu enne kulugwi nap min tepan omborak nagawan min imiri mbarak pidnak wene enaru nap min ndok worogolikma-ge, Yesus na ebem wene mbaruwakluk, it endam waruk mbiriga-o. 67Nde, it-nen at yak togolar-e: ”Kar-e ndemeret abok lobok yuwa nap Kerisut ala-ge, yak nindi-o” luk yogolikma-ge,
Yesus-nen it yak ondosolar-e: ”An-nen yak kondosola, kinndi angin tubu yugup pug-o. 68Nde, an-nen kin wok kinpimin-et nde, wene na onggo yugup pug-o. 69Alat nde, yawo kuri-nen Ap Ambara an-e Mondok Amawi worak Mbal Pem Nagawan inggi kigit eralu koreyak woramin-o” luk yij-o.
70Yosoloma-ge, it pidsa-nen yogolar-e: ”Iri yigen me-ge, kar-e Mbal Pem Nagawan Ambara-nen yusu, lak?” luk yogoloma-ge,
at-nen it yak ondosolar-e: ”Kit-nen yigep irir-o” luk yij-o.
71Yosoloma-ge, it-nen yogolar-e: ”Nir-e ap enne ma-ge ngge sa kulul-o? At ondomok emende nggwe-nen yosola kulige irir-o!” luk yiga-o.
Currently Selected:
LUKAS 22: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
