LUKAS 3

Ap yi maroso nap Yoanes-nen yak indidnak wene

3:1-20

(Mt 3:1-12; Mk 1:1-8; Yo 1:19-28)

1Tiberius na nagawan Kaisat men luk worasolat, olengen limabelas pem-e, Pontius Pilatus na-ge Yurea nggweyak pem gubernor woragaij-o. Nde, Erores na-ge Nggalilea nggweyak pem nagawan woralat, at owot Pilipus na-ge o Iturea min o Terakonitis min nagawan woralat yiga-o. Nde, Lisanias na-ge o Abilene iri me nagawan woragaij-o. 2Nde, Anas min Kaipas min-e tepan omborak nagawan irit woraiga-o. Iri tarem-e Sakaria ambara Yoanes na-ge karu me worasoma, Mbal Pem Nagawan-nen wene yak tij-o. 3Yak tosoloma-ge, Yoanes na-ge yi Yorodan arem woragwi urusu mbut pidsa waring kasolat-nen yosolar-e: ”Mbal Pem Nagawan-nen kit meya yidnak amberam tak puwakluk, kir-e meya yidnak keya buruk kondok yogola-ge, yi ma kunpurag-o” luk yak indil nij-o. 4Mbal Pem Nagawan ene lomboksa yoso nap Yesaya-nen at engga bem mbarosolar-e:

”Karu me-nen ene nggoksa yosolar-e:

’Nagawan Indo mbururak urula yager-o.

At urula ndung tak per-o!

5O nggorok kobok pidsa kemek tak posolat,

ndobo nggulok min ndobo teberak min oboksa

yanggona mbirik tak posolat,

tu yunuk wanuk na mot tak posolat,

tu lalik nggwilik na mbirik tak posolat ma-o.

6Nde, ap yi wi ndi wi oboksa-nen Mbal Pem Nagawan-nen ap inmiri yosola, kujwa-o’ ” luk mbarij-o.

7Yoanes-nen yi ma unpuwaklug-e, ap kwarat at eram ndok worogola-ge, Yoanes-nen it yak ondosolar-e: ”Meya yugwi nap kit yu-ge wa-e. Mbal Pem Nagawan isilepma-nen lak tak kunpurak na inggem-nen ta-nen mbela mburugub-o luk yak kindij-o? 8Meya kwarugwi keya buruk, kondok luk-nen kwarugwi mende mbi nam tak per-o! Kir-e: ’Abaram iri-ge nit nonmbo-nen yusu-o’ luk yurak pug-o. Yak kendeyeg-o: Mbal Pem Nagawan-nen-e kerep yeba bem-nen Abaram-nen wigarak nap nggal kwasa ndak wat unpurak na ndak-net yusu-o! 9E mengen kuri tebera mbo beyeklug-e, ije kunarak worasu-o. Engen konak poso buk e pidsa-ge ndara kan ma buwa-o” luk yij-o.

10Yosoloma-ge, ap kwarat ereba-nen Yoanes na kin wok obogolar-e: ”Iri ala-ge, nir-e ngge nde kwarul-o?” luk yiga-o.

11Yogolikma-ge, Yoanes-nen it yak ondosolar-e: ”Sum mberen worak nap-nen-e misig-e sum lak nap wok tosolat, nunggwi mende worak nap-nen na iri nggal-et kwasa tumbururag-o” luk yij-o.

12Yak ondosoloma-ge, pemerinta enmanggim tol ndok wurugwi nap ereb-e it na yi ma unpuwakluk Yoanes erem lobok yogolat-nen at kin wok obogolar-e: ”Mul Nondoso Nap wa-e. Nir-e ngge kwarul-o?” luk yogola-ge, 13Yoanes-nen it yak ondosolar-e: ”Tol nggi yogolar-e, iri nggal purag-o yidnak na keya buruk, terak mena nggi yili meyog-o” luk yak indij-o.

14Yosoloma-ge, san winde erep-nen at kin wok obogolar-e: ”Nit perak nde ngge nde kwarul-o?” luk yogola-ge, Yoanes-nen it yak ondosolar-e: ”Kit kenmawi bem-nen na irit, enesiget wene bem-nen na irit, ap enarengge mengga wanurak pug-o. Nde, kit-nen wanidnak pem onggo wok kindili iri-ge, ’Yu-ge ndag-er-o’ luk kinndi abu wolmomtag-o” luk yak indij-o.

15Iri tarem-e ap kwarat-nen it na it nak yak kerak mbogolar-e: ”Yoanes yu-ge Kerisut lobok yuwa-o luk nit yik karok worali na-ge yu-t, lak?” luk yiga-o. 16Yogolikma-ge, Yoanes-nen it pidsa yak ondosolar-e: ”An-e we yi bem mat kunpusu-t nde, an-e teberak-nen yusu-o. An nimbirig-e ap nggulok mbi lobok yuwa-o. An nggal-nen-e at ijok sum kere wusururag-e meya-o. At iri-nen-e Konak Indi bem, kanduk pem yi mat kunpuwa-o. 17Nggandum mbato ebe min ababul min lena arik tak pugwi mende-ge at inggem worasu-o. Lena arik tak purug-e, nggandum mbato ebe-ge ndok wosa pil nggugwi sa posolat, abapno-ge nigi yoso buk kanduk iri na me kan puwa-o” luk yak indij-o.

18Nde, Yoanes-nen aid wene na ap kwarat iri yak ondosolar-e, nggomo wene kwarat yak ondosolat woragaij-o. 19Alat nde, nagawan Erores Nggalilea wi tena woraso na-ge at ambik owot ogwe Erorias iri wanosolat, meya mende erep min-et kwarosolat woraidnak pem-e Yoanes-nen Erores na met ibij-o. 20Alat nde, Erores na-nen meya ebem tebesa kwarosolar-e, Yoanes na waga o kubu me ibil nggwij-o.

Yesus yi ma bidnak wene

3:21-22

(Mt 3:13-17; Mk 1:9-11)

21Ap erep pidsa yi ma unpurug-e, Yesus na irit yi ma bij-o. Yi ma bosola, at-nen tepan yosolat worasoma-ge, mbal na ngak luk, 22Konak Indi-ge towe nggwende nggal luk, at ebem mbuwagaij-o. Nde, aid arem-nen ene pil mbuwasolar-e: ”Kar-e an nambara nindi kundik-nen yusu-o. Kar-e an nindi alen tak pusu-o” luk yij-o.

Yesus eid omborak unnu wonaridnak wene

3:23-38

(Mt 1:1-17)

23Yesus na-ge ndesa mburuk, olengen tiga pulu nggal woraruk pem-e, at eyabu tel korosola-ge, ap-nen at eberagolar-e: ”At yu-ge Yusup ambara-nen yusu-o” luk eberaiga-o. Nde, Yusup na-ge Eli ambara, 24Matet ambara, Lewi ambara, Malki ambara, Yanai ambara, Yusup ambara, 25Matisa ambara, Amos ambara, Nakum ambara, Esli ambara, Nagai ambara, 26Mat ambara, Matisa ambara, Simei ambara, Yosek ambara, Yora ambara, 27Yowanan ambara, Eresa ambara, Serubabel ambara, Saltiel ambara, Neri ambara, 28Malki ambara, Adi ambara, Kosam ambara, Elmaram ambara, Et ambara, 29Yesua ambara, Eliaset ambara, Yorim ambara, Matet ambara, Lewi ambara, 30Simeon ambara, Yewura ambara, Yusup ambara, Yonam ambara, Eliakim ambara, 31Melea ambara, Mina ambara, Matata ambara, Natan ambara, Ndaud ambara, 32Isai ambara, Obet ambara, Mboas ambara, Salmon ambara, Nagason ambara, 33Aminaram ambara, Atmin ambara, Arini ambara, Eseron ambara, Peres ambara, Yewura ambara, 34Yakup ambara, Isak ambara, Abaram ambara, Tera ambara, Nagot ambara, 35Serung ambara, Eregu ambara, Pelek ambara, Ebet ambara, Salmon ambara, 36Kenan ambara, Arapagasat ambara, Sem ambara, Nu ambara, Lamek ambara, 37Metusala ambara, Enok ambara, Yaret ambara, Magalalel ambara, Kenan ambara 38Enos ambara, Set ambara, Aram ambara, Mbal Pem Nagawan ambara-o.

Currently Selected:

LUKAS 3: inondx

Highlight

Copy