LUKAS 4

Sere-nen Yesus indi ngaridnak wene

4:1-13

(Mt 4:1-11; Mk 1:12-13)

1Yesus na-ge Yorodan arem-nen mborosoma-ge, Konak Indi-ge at arem kobong yosolar-e, Konak Indi-nen wok uburuk, karu me ap lak ma ibil mbirij-o. 2Mberarig-e, Sere-nen at indi ngarosolar-e, empat pulu (40) nene yij-o. Nde, iri me woralar-e, ar-e mburu ninggit lak we nak woraidnak me, nere kwarat kagaij-o.

3Iri ala-ge, Sere-nen at yak tosolar-e: ”Kar-e Mbal Pem Nagawan Ambara nde ala-ge, kerep yu-ge mburu kwat min-o luk yak ti-o” luk yij-o.

4Yak tosoloma-ge, Yesus-nen at yak tosolar-e: ”Mbal Pem Nagawan engga mbarak pem-nen yosolar-e: ’Ab-e mburu bem nag-e unluk woragwi bug-o’ luk mbarak worasu-o” luk yij-o. 5Iri lug-e, Sere-nen Yesus waruk ndobo anggul pem ibil lasolug-e, nggweyak ma yu me-nen tenagaidnak wi pidsa-ge enlengen sambok yugwi nggal ndaget nak mirik ibij-o. 6Mirik uburuk, Sere-nen at yak tosolar-e: ”Nggweyak ma nagawan enmawi-nen tenagaidnak wi pidsa min iri me woraso yi mende ndi mende pidsa min kar-et wok kirimin-o. Yeba pidsa-ge an ninggem pidnak me, ta-nen nde an-nen wok turak perasolug-e, wog-et timin-o. 7Nde, kat-nen an nerembel wanosolat, an neram kendaru yunggusa wandu yosola-ge, pidsa kat karengge ma-o” luk yak tij-o.

8Yak tosoloma-ge, Yesus-nen at yak tosolar-e: ”Mbal Pem Nagawan engga mbarak pem-nen yosolar-e: ’Kenmbal Pem Nagawan nak erembel wanogolat, at nak ndegel obogolat wolmomtag-o!’ luk mbarak worasu-o” luk yij-o.

9Iri lug-e, Sere-nen Yesus waruk Yerusalem mberarig-e, Mbal Pem Nagawan uwi kirin pem koreyak uburuk-nen yak tosolar-e: ”Kar-e Mbal Pem Nagawan Ambara nde ala-ge, yu me-nen kat kambikpebe-t kud mboksa mbi-o. 10Mbal Pem Nagawan engga mbarak pem-nen yosolar-e: ’Mbal Pem Nagawan-nen-e at-nen idnak aid nab-e kat kwara yongga kuruwakluk, wirik inpil mbuma-o’ yurug-e, 11’Kere-nen kijok abis mbaruwa naru, aid nap ininggi mok pem tak kubuwa-o’ luk mbarak worasu-o” luk yij-o.

12Yosoloma-ge, Yesus-nen at yak tosolar-e: ”Mbal Pem Nagawan engga mbarak pem-nen yosolar-e: ’Kar-e Kembal Pem Nagawan indi ngarusu meyog-o’ luk mbarak worasu-o” luk yij-o.

13Sere-nen Yesus indi ngarosolat yi kwatlik ndi kwatlik kwatlug-e, abok na indi ngarimin-er-o peraruk, at keya buruk mbirij-o.

Nggalilea-nen Yesus eyabu tel kwirid wene

4:14-15

(Mt 4:12-17; Mk 1:14-15)

14Iri lug-e, Konak Indi amawi at imin worasola-ge, Yesus na-ge tuguruk Nggalilea wok yij-o. Wok yosoloma, at obog-e o iri me pidsa wigak yij-o. 15Nde, ar-e it tepan yugwi ma ereba me-nen mul indil nosola-ge, ap pidsa-nen at erembel wanogolat woraiga-o.

Nasaret-nen Yesus insili rak piga wene

4:16-30

(Mt 13:53-58; Mk 6:1-6)

16Iri lug-e, Yesus na mberarig-e, at sugwe rak ibidnak sa Nasaret wok lug-e, at-nen kwaroso kwarosolar-e, we woragwi tarem-e tepan yugwi ma nggwarik, Mbal Pem Nagawan engga wonareyekluk men yosoma-ge, 17Mbal Pem Nagawan ene lomboksa yoso nap Yesaya-nen mbaridnak engga iri wok tiga-o. Wok togolikma-ge, at-nen engga na wusutlug-e, engga wene mbaridnak mbi kagaij-o. Nde, engga wene na-nen yu mbarag-o:

18”Nagawan Indo Indi-ge an nebem worasu-o.

Aid wene-ge insilobulo lak nap yak unduwakluk, an len nibij-o.

O kubu me woragwi nap wisirik unpurak wene yak unduwakluk,

Enlengen ngguru woragwi enlengen kuwarak puwakluk,

Ap-nen tebel inpidnak nap wisirik unpuwakluk,

19Nagawan Indo-nen at elem nap inmiri yaga wok undurak tarem iri na yak unduwakluk, an wirik nibij-o!” luk yidnak wene na wonarij-o.

20Wonatluk, Yesus-nen-e engga na tuguruk nggitlik puruk, engga ndok woroso winde wok turug-e, kore yij-o. Kore yosola-ge, tepan yugwi ma woraidnak nap pidsa enlengen-e at ebem nak kere kererak woraiga-o. 21Worakmu-ge, at-nen it yak ondosolar-e: ”Urul pidnak engga wene ya-ge kit-nen kologola ereya na-net ndak agaij-o” luk yak indij-o.

22Yak ondosoloma-ge, it oboksa-nen-e at erembel wanogolat, at-nen yidnak wene-ge konak nak ala, wi langgu mbarogolat-nen yogolar-e: ”At yu-ge Yusup ambara-ge lag-a?” luk yiga-o. 23Yogolikma-ge, Yesus-nen it yak ondosolar-e: ”Kit-nen-e nden karuk wene yu yak nurugub-o luk nindi yebet kasu-o: ’Ndoktet wa-e. Kat kondomok-net ki yi-o’ luk yak norogolat, ’Kaperenaum-nen kwiye worak mende kwarigen kobok kulige na-ge kat kelem ma yu me-nen na kwari-o’ luk yak norogolat yugub-o” luk yak indij-o. 24Yurug-e, at-nen misik min yak ondosolar-e: ”Ndemeret yak kundusu-o. Mbal Pem Nagawan ene lomboksa yugwi nab-e enambik enma-nen-e kek tak unpugwi bug-o. 25Alat nde, wene yu koler-o. Elia worala-ge, talme mbigit lak olengen tiga rak puruk, waneya enam woragolar-e, o iri me oboksa nogoro mbud yarik worala-ge, Isarael nap enma-ge kweyap togwe kwarat woraiga-t nde, 26Mbal Pem Nagawan-nen-e Elia na-ge it togwe ereba ennggendumu misiget ter-o luk eram wirik pigit lag-o. Are, Siron nggweyak pem o Sarapat woraso kwe togwe eram nde wirik pij-o. 27Nde, Mbal Pem Nagawan ene lomboksa yoso nap Elisa worala tarem-e Isarael nap enngendumu-nen-e ndigiril laso mbijap enpem yidnak nab-e kwarat woraiga-t nde, misiget ter-o luk ambut tak pigit lag-o. Are, Siria nap Naman arig-et nak ambut tak pij-o” luk yij-o.

28Nde, wene iri na yosoloma kulurug-e, tepan yugwi ma woraiga nap oboksa-ge insilepma kwarat yiga-o. 29Insilepma luk men yogolar-e, Yesus na langgara pak ombol nggwe wirik pil mbutlug-e, it unuwi-ge ndobo anggul pem wiridnak me-ge panggalsa lembet mberak puwokluk lembet anggulmu waruk mbiriga-o. 30Alat nde, Yesus na-ge ap kwarat na ennggendumu-nen nggogora mberamu-o.

Yesus-nen kugi arem nggwidnak nap kugi wirik pidnak wene

4:31-37

(Mk 1:21-28)

31Iri lug-e, Yesus na-ge Nggalilea nggweyak pem o Kaperenaum mberarig-e, we woragwi tarem-nen ap mul ondosolat woragaij-o. 32Nde, at-nen mul ondoso iri na-ge at ene-ge amawi worak ala karuk, wi langgu mbariga-o. 33Worakmu-ge, tepan yugwi ma iri me-ge kugi arem lin yidnak nap mbi woragaij-o. Ap iri-ge ene ngguloksa yosolar-e: 34”E! Yesus Nasaret nap wa-e. Kar-e ngge rak nenpeyekluk lobok yigen-o? Nit nendeyekluk lobok yigen, lak? Kar-e an-e naru-o. Kar-e Mbal Pem Nagawan-nen wirik kibil lobok yidnak karik lenak nap-net yusu-o” luk yij-o.

35Yosoloma-ge, Yesus-nen kugi iri met posolat-nen yak tosolar-e: ”Ke-ne lak luk, ap yu arem-nen mbiri-o!” luk yak tosoloma-ge, kugi na-nen it pidsa ennggendumu-nen ap na mbud tak uburuk, at arem-nen mborosolar-e, andi bandi rak ibigit lak irit mbirij-o.

36Iri kwarosola karuk, it pidsa-nen wi yogolat-nen it nak it nak yak kerak mbogolar-e: ”At yu ene-ge nagawan-nen yugwi nggal amawi worak me, kugi-t nde, ’Mbiri-o’ luk yak tosola-ge, kwiye mbirid iri-ge ijar-o!” luk yiga-o. 37Nde, Yesus obog-e o iri me pidsa nono mbirij-o.

Yesus-nen ap kwarat ki rak inpidnak wene

4:38-41

(Mt 8:14-17; Mk 1:29-34)

38Yesus na-ge tepan yugwi ma-nen mberarik, Simon ama nggwidnggal-e, Simon owan iri-ge kugi embem wuloksa wiridnak worasola-ge, kwe na yongga wuruwaklug-e, ap-nen Yesus yak tiga-o. 39Yak togolikma-ge, Yesus-nen kwe na nene yoso sa nggwarik, embem wuloksa wiridnak na ”Lak min-o” luk yosoloma, embem na lak lug-e, kwe na-ge ereya na-net men luk, it ndegel inpij-o.

40Nde, molengen woroksa nggosola-ge, it ennggamirak-nen kugi nin tak nan tak enpem mbidnak nab-e Yesus eram inpil lobok yogola, at inggi-nen enambik tak tena unpurug-e, pidsa ki rak inpij-o. 41Kugi na ap kwarat enarem-nen mborogolat-nen enne nggoksa yogolar-e: ”Kar-e Mbal Pem Nagawan Ambara-nen yusu-o!” luk yiga-o. Alat nde, kugi iri-nen-e Yesus iri-ge Kerisut-o luk enaru me, Yesus-nen-e: ”Kenne yurak pug-o” luk enne lak tak pij-o.

Yesus-nen tepan yugwi ma ereba me aid wene yil nidnak wene

4:42-44

(Mk 1:35-39)

42O nda yosoloma-ge, Yesus na o iri me keya buruk, ap lak ma mbirij-o. Alat nde, ap na at ogore, luk, kagoluk yigarig-e, it keya unpuruk mburuwa naru larok tak ubuwokluk yiga-o. 43Alat nde, Yesus-nen it yak ondosolar-e: ”Mbal Pem Nagawan-nen tenagaidnak wi wene, aid wene iri-ge o erep na irit mondok yil waring kamin-o. Iri maklug-e Mbal Pem Nagawan-nen wirik nibid irir-o” luk yak indij-o. 44Yak undurug-e, Yurea nggweyak pem tepan yugwi ma pidsa-nen aid wene ya yak indilik nij-o.

Currently Selected:

LUKAS 4: inondx

Highlight

Copy