MATIUS 21

Yerusalem nggosola, Yesus igijak wiriga wene

21:1-11

(Mk 11:1-11; Lk 19:28-40; Yo 12:12-19)

1Nde, it iri na Yerusalem panggo yogolar-e, o Mbetpage Saitun Ndobo bem iri na wok yogolar-e, Yesus na at owosirak mberen iri nanduk wirik onposolat-nen 2yak ondosolar-e: ”O siri kentarem emnde bem iri me mburugupndik, kelerai wam mirik yilik amarik min worasola ndag-et nak karug-e, kelerai wam iri na amarik min wesera an neram waruk lobok yer-o. 3Nde, ap misik-nen nde imiri yosola-ge, kit-nen yogolar-e: ’Wam yu-ge Nagawan Indo at-nen kwarurak mbi worasu-o’ luk yak togola-ge, ereya na-net wam na waruk mborobokluk keya kunpuwa-o” luk yak indij-o.

4Iri nggal kwarid iri-ge Mbal Pem Nagawan ene lomboksa yoso nap-nen yidnak wene ndak ndak tak posolat-nen kwarij-o. Wene iri-nen yosolar-e:

5”Sion ara yak ter-o:

Yu nde ki-o. Kat Nagawan na-ge keram lobok yusu-o.

At iri-ge indi yanggonak me, kelerai wam ombolwak pem kore luk lobok yusu-o.

Angin worak mende waruk noso kelerai wam amarik na ombolwak pem kore luk lobok yusu-o.”

6Iri yak ondosoloma-ge, at owosirak mberen iri na mbirigarik, Yesus-nen yak indid iri na nggal-et kwarogolar-e, 7kelerai wam na amarik min waruk lobok luk, wam na ombolwak pem it unsum ndamak pogola, Yesus na-ge iri bem kore yij-o. 8Kore yosola-ge, ap mondok kwarat-nen-e it unsum-e tulabiyem ndamak pogolat, it erep-nen-e e ndumbul kala tulabiyem ndamak pil mbiriga-o. 9Iri luk, at mborosola imin anggul mbitli nap min abok mbitli nap min-nen enne ngguloksa-t yogolar-e:

”Ndaud Ambara nak kek tag-o!

Nagawan Indo unu bem lobok yusu nap yu-ge imbiringgat worak-nen yusu-o!

At woraso sa mondok teram iri me-nen na at nak kek tag-o!” luk yiga-o.

10Nde, Yesus na Yerusalem nggosola-ge, o siri iri me woragwi nab-e at inik inik tak pogolat inni enne no no mborogola karuk, ap erep-nen-e: ”Ap yu-ge ta-o?” luk kin wanogola-ge, 11ap mondok kwarat iri-nen wene erep nggarogolar-e: ”At yu-ge Mbal Pem Nagawan ene lomboksa yoso nap Yesus, Nggalilea wi o Nasaret woraso nap-nen yusu-o” luk yiga-o.

Yesus-nen Mbal Pem Nagawan ama konid wene

21:12-17

(Mk 11:15-19; Lk 19:45-48; Yo 2:13-22)

12Iri luk, Yesus na-ge Mbal Pem Nagawan ama nggwarik, o ma iri me-nen onggo pogolat, wene worogolat kwarugwi nap oboksa sera wirik inpij-o. Iri rak puruk, uwang logat pogat yaga wanugwi nap ontol ondoro na nden yaga nggilal kasolat, it towe nggwende onggo wanugwi nap na koreyak woragwi sa na nden yaga nggilarak posolat-nen 13it yak ondosolar-e: ”Mbal Pem Nagawan engga mbarak pem-nen wene yu mbarak worasu-o: ’An nama iri imin-e tepan yugwi ma-o luk yuwa-o’ luk yij-et nde, kit-nen-e o ma yu-ge yariya wanugwi nap ondoro nggal tak pili-o” luk yak indij-o.

14Nde, Mbal Pem Nagawan ama iri me-nen-e enlengen ngguru nap nde, unuwok kambung puk tak woragwi nde, at eram lobok yogola-ge, at-nen-e ki rak inpij-o. 15Alama-ge, it tepan omborak nagawan nagawan nde, imiri mbarak pidnak wene enaru nap nde-nen yik kaiganggal-e, at-nen kwiye worak mende kwaridnak na min Mbal Pem Nagawan ama-nen li marik marik-nen yogolar-e: ”Ndaud Ambara nak kek tag-o!” luk enne lek kaidnak karuk, iri na bem insilepma kwarat yiga-o. 16Yuruk, it-nen Yesus yak togolar-e: ”Li yu-nen yili yu-ge kar-e kulusu, lak?” luk yak togolikma-ge, Yesus-nen wene erep nggarosolar-e ”Eyo. Kulusu-o. Nde, engga mbarak pem-nen mbaridnak wene yu-ge: ’Li marik marik nde, kamo nunggwi nggisiya nde, enemendam-nen-e kat kerembel kwara wanuwakluk mul indigen-o’ luk mbaridnak wene iri-ge kir-e wonarugwi bug-a?” luk yij-o. 17Wene iri na yak undurug-e, Yesus na it keya unpuruk, o siri iri me-nen Mbetania mberarik, iri me nene yij-o.

Yesus-nen e ara imbiri lamut tak pid wene

21:18-22

(Mk 11:12-14,20-24)

18Nene luk, kub-e tuguruk o siri na nggwe lobok yosoma-ge, Yesus na-ge nere ebem wok yij-o. 19Nde, e ara misik tu mbanggo ma karuk, e na elem pem mbiridnggal-e, engen pigit lak, engga nak ala-ge, at-nen e na yak tosolar-e: ”Kar-e mondok kengen yugun pug-o!” luk yak tosola ereya na-net e ara na umbuk yij-o. 20Umbuk yosoloma-ge, at owosirak-nen iri karug-e, wi langgu mbariga-o. Iri luk, it-nen kin wok obogolar-e: ”E ara na-ge nggesa-nen mimo ndag-et nak umbuk yij-o?” luk yiga-o. 21Yogolikma-ge, Yesus-nen wene erep nggarosolar-e: ”An-nen yak kendeyeg-o: Kit kinndi angin tubu luk, kinndi-nen te rak pigit lak ala-ge, an-nen e ara yu kwat pigi yu nggal-et kwarugub-o. Nde, iri nag-e lag-o. Are, ndobo yu yak togolar-e: ’Kat kondomok konoksa yi koma arem tabak yil nggwi-o’ luk yak togola na irit kwat ma-o. 22Kit kinndi angin tubu luk, tepan yogolat-nen nggi yugup mende-ge wanugub-er-o” luk yij-o.

”Kar-e ta-nen yidnak pem-nen kwarusu-o?” luk Yesus kin wok piga wene

21:23-27

(Mk 11:27-33; Lk 20:1-8)

23Nde, Yesus na-ge Mbal Pem Nagawan ama nggwarik, ap mul ondosolat worasoma-ge, it tepan omborak nagawan nagawan nde Yawuri nap ogore yidnak nap nde, at eram lobok luk-nen at kin wok obogolar-e: ”Kar-e ta amawi bem-nen yi kwatlik ndi kwatlik kwarusu-o? Nde, ta-nen ’Iri kwari-o’ yak kiridnak pem-nen iri kwarusu-o?” luk yiga-o. 24Yogolikma-ge, Yesus-nen wene erep nggarosolar-e: ”Nde, an-nen na wene misiget nak kin wok kinpimin-o. Nde, kit-nen nde wene iri onggo yak norogola-ge, an-nen-e iri amawi bem-nen yi kwatlik ndi kwatlik kwarusu iri yak kindimin-o. 25Yoanes na-ge ap yi marosolat woragaid iri-ge ta-nen yidnak pem-o? Mbal Pem Nagawan-nen yidnak pem, lak? Are, ki nap-nen yidnak pem-a?” luk kin wok inpij-o. Kin wok onposoloma, it na it-net wene mbal kerak mbogolar-e: ”Nit-nen nde: ’Mbal Pem Nagawan-nen yidnak pem-o’ luk yogola-ge, at-nen-e: ’irit nde, kir-e noluk-nen at ebem kinndi angin tubu yigit lak yigeb-o?’ luk yak nunduwa-o. 26Nde, nit-nen nde: ’Ki nap-nen yidnak pem-o’ luk yogola-ge, ap kwarat yu-nen-e Yoanes iri-ge Mbal Pem Nagawan ene lomboksa yoso nab-o luk eberagwi me, it iri na ngge kwat nunpuwa-o? It inndi aye-o” luk yiga-o. 27Yurug-e, it-nen Yesus onggo yak togolar-e: ”Nir-e nenaru bug-o” luk yiga-o. Yogolikma-ge, Yesus-nen it yak ondosolar-e: ”Iri ala-ge, an-nen na iri amawi bem-nen yi kwatlik ndi kwatlik kwarusu iri yak kindimin pug-o” luk yak indij-o.

Ambararak mberen enpem nden karuk yidnak wene

21:28-32

28”Wene yu-ge kit kinndi-nen-e ngge nde perali-o? Ap mbi ambararak mberen woragaij-o. At-nen-e ambara manggu iri na eram mberarik yak tosolar-e: ’Nambara wa-e. Yawo-ge kar-e anggut yapmu iri me yabu wil mbiri-o’ luk yak tij-o. 29Yak tosoloma-ge, la iri-nen wene erep nggarosolar-e: ’An-e nimbir-o’ luk yij-et nde, abok nggwe indi konurug-e, yabu wil mbirij-o. 30Nde, ap iri na-nen ambara labo na eram mberarik, wene owe yak tid iri na nggal-et yak tosoloma-ge, owot iri-nen wene erep nggarosolar-e: ’Ob-o. Neid wa-e’ luk yij-et nde, mbirigit lak, larok yij-o. 31Nde, li mberen iri na-ge at eid indi-n pidnak kwarij-e ta kali-o?” luk yak ondosoloma-ge, it-nen yogolar-e: ”Ambara manggu irir-o” luk yogola-ge, Yesus-nen it yak ondosolar-e: ”An-nen yak kendeyeg-o: Mbal Pem Nagawan-nen tenagaidnak wi nggogolar-e, kit abok tak kunpurak, pemerinta enmanggim tol ndok wurugwi nap min terak ye inpil nugwi kwami min, it nanduk nde nggwili-o. 32Yoanes na kendam lobok yarig-e, lud tak nak kwarugwi tula mirik kinpij-et nde, kit-nen-e at-nen yidnak wene na bem kinndi angin tubu yigit lak yigeb-o. Alat nde, it pemerinta enmanggim tol ndok wurugwi nap min terak ye inpil nugwi kwami min it perak nde at-nen yidnak wene na bem inndi angin tubu yogola, kit-nen kaigeb-et nde, kinndi nden karuk at ebem kinndi angin tubu yurag-e larok yigeb-o” luk yak indij-o.

Anggut yabu parugu woragwi nap enpem nden karuk yidnak wene

21:33-46

(Mk 12:1-12; Lk 20:9-19)

33Yesus-nen yosolar-e: ”Nden karuk wene misik yu koler-o. Nggweyak winde nap misig-e eyabu anggut yabu woragaij-o. Worala-ge, leget waga kambuk tak puruk, engen amburu mbulurak ondoro nggweyak yaluruk, yik karok wolmomtak o lije teram misik wirij-o. Wutlug-e, it-nen parugu woraidnak pem engen erep wanuwakluk, ap yak unduruk, at iri na-ge o nin sa mbirij-o. 34Mberarik worasoma-ge, anggut engen ogore yosoma mbarugwi tarem panggo yosola-ge, yabu winde na-nen at ndegel pugwi nap wirik onposolar-e, at amanggim pidnak engen wok unduwakluk, it parugu worali nap endam wirik inpij-o. 35Alat nde, parugu worali nap ereba na-nen yabu winde na ndegel pugwi nap na tena unpuruk, misig-e nggambu worogolat, misig-e mondok worogolat, misig-e kerep pem worogolat tak inpiga-o. 36Iri rak puruk, yabu winde iri na-nen tuguruk ndegel pugwi nap erep wirik onposolar-e, nanduk siyag-et nak wirik inpid nggal-e lag-o. Ap kwarat nggal wirik inpij-et nde, it parugu worali nap-nen nanduk kwat inpiga na nggal-et kwat inpiga-o. 37Worok tak posolar-e, yabu winde iri na-nen-e: ’An nambara ala karuk, kek tak ubuwa-o’ perasoluk, at ambik ambara wirik ibij-o. 38Alat nde, parugu worali nap-nen at ambara na karuk, it nak yak kerak mbogolar-e: ’Eid eyabu winde yuwa nab-e yur-o. At yu nde wuruwog-o. Wutlug-e, at onggweyak yu-ge nit-nen winde yul-o’ luk yiga-o. 39Wene iri yuruk, ambara iri na tenaga anggut yapmu-nen leget ombol nggwe lesa mbo buruk, mondok wiriga-o.

40Nde, anggut yabu winde iri na lobok yuwarik, parugu worali nap ereba na ngge kwat unpuwa kali-o?” luk yij-o. 41Yosoloma-ge, it-nen wene erep nggarogolar-e: ”Meya iri nggal kwarugwi nap iri-ge ndemeret unduruk, anggut engen ogore yosoma mbarugwi tarem-nen mbarogolat, engen ereb-e mbara ombo iri na-t wok turak nap parugu wolmomtak nap nin irit wok unduwa-o” luk yiga-o. 42Yogolikma-ge, Yesus-nen it yak ondosolar-e: ”Kir-e Mbal Pem Nagawan engga mbarak pem-nen wene yu-ge wonarugwi bug-a? Wene iri-nen yosolar-e:

’O wurugwi nap-nen mbo bidnak kerep iri-ge

o unggut paro bidnak irit kwat yij-o.

Iri agaid iri-ge Nagawan Indo-nen kwaridnak me,

nit nenlengen ma-ge kwiye worak mende irit kali-o!’

43Iri bem-e an-nen yak kendeyeg-o: Mbal Pem Nagawan-nen tenaga-idnak wi-ge kit kininggem-nen mengga wanuruk, Mbal Pem Nagawan-nen tenagaidnak wi engen konak puwa nap enlem irit wok unduwa-o. [44Nde, ta-nen nde kerep yu bem wosa mbuwa nab-e, yigisa labuk ma-o. Nde, kerep yu-nen yumnduwa nab-e yigisa mabe rak puwa-o]” luk yij-o.

45Yosoloma-ge, tepan omborak nagawan nagawan min Parisi nap min-nen kuliganggal-e, Yesus-nen nden karuk yidnak wene iri-ge it inmin nde yoso karug-e, 46at tenagurak peraiga-t nde, ap kwarat iri-nen Yesus-e Mbal Pem Nagawan ene lomboksa yoso nap eberagwi me, it inndi aye-nen larok yiga-o.

Currently Selected:

MATIUS 21: inondx

Highlight

Copy