MATIUS 27

Yesus na Pilatus eram pil mbiriga wene

27:1-2

(Mk 15:1; Lk 23:1-2; Yo 18:28-32)

1O nda yosola-ge, tepan omborak nagawan nagawan pidsa min Yawuri nap ogore yidnak nap min-e Yesus wururak wene mbaruwokluk ndok wiriga-o. 2Iri luk, at na kere kamarak puruk, waga gubernor Pilatus na eram piga-o.

Yuras wat yid wene

27:3-10

(YidW 1:18-19)

3At wesel indidnak nap Yuras at-nen yik kagaidnggal-e, Yesus na wururak wene ebem pidnak ala karuk, at indi puru luk, kerep tol tiga pulu ereya na tuguruk tepan omborak nagawan nagawan min ogore yidnak nap min wok indil mbirij-o. 4Mberarik, at-nen yosolar-e: ”An-e mondok meya yigirig-o! Ap mondok meya yoso bug-et nde, at wuruwakluk wesel indigi-o!” luk yij-o. Yosoloma-ge, it-nen wene erep nggarogolar-e: ”Nde, iri-ge nit nenpem nde kasu-a? Kat kondomok kebem-net yusu-o” luk yiga-o. 5Yogolikma-ge, Yuras na-ge kerep tol ereya na-ge Mbal Pem Nagawan ama iri me mbo bil ngguruk, mborosolar-e, at ondomok urusuwak ngonoksa tiyong yij-o.

6Iri ala-ge, tepan omborak nagawan nagawan na-ge tol na wanuruk-nen yogolar-e: ”Tol yu-ge eyabi onggo pidnak me, Mbal Pem Nagawan ama-nen uwang ndok wurugwi sa iri ma pil nggurag-e mondok meya-o” luk yiga-o. 7Iri yuruk, wene iri na mbarak purug-e, uwang na waga ap sal yapma unpurak nggweyak kwat makluk. Yimbe Konugwi Nap Onggweyak na onggo piga-o. 8Iri bem-e nggweyak iri na unu yarogolar-e, Eyabi Nggweyag-o luk yawo kuri-nen na yili-o.

9Iri kwariga iri-ge Mbal Pem Nagawan ene lomboksa yoso nap Yeremia-nen yidnak wene na ndak ndak tak piga-o. At-nen yosolar-e: ”Isarael nap-nen-e at onggo-ge iri nggal-o luk wene wiriga kerep tol tiga pulu na waga yigarig-e, 10yimbe konugwi nap onggweyak onggo piga-o. Nagawan Indo-nen-e ’Irit kwarurag-o’ yak niridnak iri na nggal-et kwariga-o” luk yij-o.

Pilatus-nen Yesus kin wok ibid wene

27:11-14

(Mk 15:2-5; Lk 23:3-5; Yo 18:33-38)

11Yesus na-ge gubernor Pilatus na eram ibil lobok yogola-ge, Pilatus-nen at kin wok obosolar-e: ”Kar-e Yawuri nap nagawan-nen yusu, lak?” luk kin wok obosoloma-ge, Yesus-nen wene erep nggarosolar-e: ”Kat-nen yigen irir-o” luk yij-o. 12Alat nde, it tepan omborak nagawan nagawan min ogore yidnak nap min-nen at ebem piga wene-ge Yesus-nen-e wene erep mondok nggarigit lak, larok yij-o. 13Larok yosoloma karuk, Pilatus-nen at yak tosolar-e: ”It-nen kebem pili wene ereba oboksa-ge kar-e kulusu bug-a?” luk yij-o. 14Alat nde, Yesus na-ge wene erep mondok nggarigit lak, larok nak yosoloma karuk, gubernur na-ge kwarat wi yij-o.

Yesus wururag-o luk, wat tak piga wene

27:15-26

(Mk 15:6-15; Lk 23:13-25; Yo 18:39–19:16)

15Nde, pempa O Anggul Pandok Mbiridnak tarem-e gubernor na-ge o kubu me pil nggwidnak nap misig-e it ap kwarat-nen nggi yidnak iri na-t wesera wok ondoso-o. 16Iri tarem-e ap pidsa-nen at obok kulugwi meya kwaroso nap misik unu-ge Mbarabas o kubu me woragaij-o. 17Worasola-ge, ap kwarat ereba na ndok worogola karuk, Pilatus-nen it kin wok onposolar-e: ”Kit kenmanggim ta nde wisirik pimin-o? Mbarabas wisirik pimin, lak? Are, Yesus na unu misig-e Kerisut yugwi na wisirik pimin-a?” luk yij-o. 18Pilatus-nen iri yid iri-ge it enlengen ale Yesus ebem pogolat-nen at inggem tak piga iri-ge ar-e aru-o.

19Nde, Pilatus na ap enpem wene mbarugwi sa koreyak worasoma-ge, at ogwe-nen wene wosa at yak tosolar-e: ”Kar-e lud tak nak yoso nap iri ebem owene erep tenagurak pug-o. Yawo kubu nabi at imin kagirik me, kwiye kwarat kagi-o” luk yak tij-o.

20Nde, Pilatus-nen Mbarabas na weserak posolat, Yesus na mondok worosolat makluk, it tepan omborak nagawan nagawan min ogore yidnak nap min-nen-e ap kwarat enarem woraika-o. 21Iri ala, gubernor na-nen it kin wok onposolar-e: ”It mberen nap yu-ge kir-e kit kenmanggim-e an-nen-e ta nde wisirik purak perali-o?” luk yosoloma-ge, it-nen wene erep nggarogolar-e: ”Mbarabas irit wisirik purag-o” luk yiga-o. 22Yogolikma-ge, Pilatus-nen it kin wok onposolar-e: ”Iri ala-ge, Yesus an unu misik Kerisut yugwi iri-ge ngge kwat ibimin-o?” luk yosoloma-ge, it pidsa-nen wene erep nggarogolar-e: ”E lang pang tak pem panggarak uburag-er-o!” luk yiga-o. 23Alat nde, Pilatus-nen kin wok onposolar-e: ”Noluk-nen iri yili-o? Ar-e meya no kwaramu-o?” luk yij-et nde, it ereba na enne paleksa amawi min-et yogolar-e: ”E lang pang tak pem paggarak uburag-er-o!” luk yiga-o. 24Iri yogola karuk, Pilatus-nen yik kasolar-e, wene yurag-e meya ala karuk, nde it nari wari mburak ala karuk, at-nen-e yi waga ap kwarat ereba na inmbiri bem at inggi yi marosolat-nen yosolar-e: ”Ap yu na eyabi-ge an nebem-e lag-o. Kit kenpem-o” luk yak indij-o. 25Yak ondosoloma-ge, ap kwarat ereba na-nen enne misiget arem lek karuk, enne paleksa amawi min-et yogolar-e: ”At eyabi-ge nit nenpem na nit ninlirak enpem na wolmag-o” luk yiga-o. 26Iri luk, Yesus na linggamburok wutluk, e lang pang tak pem panggarak ubuwakluk, it ininggem pij-o.

San ombo-nen Yesus nggweyel ibiga wene

27:27-31

(Mk 15:16-20; Yo 19:2-3)

27Iri luk, Pilatus-nen idnak san ombo ereba-nen Yesus waga gubernor-nen wene mbarugwi ma pil ngguruk, san ombo kere oboksa Yesus lop lop tak piga-o. 28Iri rak puruk, at usum yonggora keya buruk, sum mimi yirik ibiga-o. 29Iri luk, isile worak kere kago wosa wirik nggal kwasa at anggulwak pem puruk, wangun misig-e at inggi kigit nggwe inggem piga-o. Iri luk, at eralu yunggusa kore luk, at nggweyel obogolat-nen yogolar-e: ”Yawuri nap nagawan wa-e. Wiwa-o!” luk yiga-o. 30Iri yuruk, wusi tebara ebem puruk, wangun iri na waga at anggulwak lel kaiga-o. 31Nde, at nggweyel paga keya bogoluk, sum na yunggurik puruk, at ambik usum na tuguruk yirik puruk, e lang pang tak pem panggarak ubuwokluk waruk mbiriga-o.

Yesus na e lang pang tak pem wiriga wene

27:32-44

(Mk 15:21-32; Lk 23:26-43; Yo 19:17-27)

32It na mborogolar-e, o Kirene nap unu-ge Simon na imin lid pid yurug-e, at iri-nen-e Yesus-nen idnak e lang pang tak iri na amanggim waruk mburuwakluk lembesa yak tiga-o. 33Mbirigarig-e, o unu-ge Nggolnggota iri me wok yiga-o. Nde, Nggolnggota iri yogolar-e, Enanggulwak Pugwarak Sa-o. 34Iri me-ge anggut engen amburu min ngari worak yi min omok wiridnak yi iri na mak tiga-t nde, at na-ge undu wal karug-e, keya bij-o.

35It na-nen at iri-ge e lang pang tak pem panggara keya burug-e, at usum tembesa wanuwoklug-e, engga mbara ligik purug-e, ”Urugwe nggwe tud yosola-ge, an wanimin-o. Nde, esaligik nde ala-ge kat wanugun-o” luk, at usum-e iri kwasa-nen timbiriga-o. 36Iri luk, it na at yik karok koreyak woraiga-o. 37Nde, at anggul nduk abam nggwe-ge at ebem pidnak wene mbara bogolar-e: ”At yu-ge Yesus Yawuri nap nagawan-nen yusu-o” luk mbarak piga-o. 38Ap-nen at e lang pang tak pem worogolar-e, at imin-e ap nden unpugwi nap mberen, misig-e at inggi kigit nggwe, misig-e at inggi kware nggwe e lang pang tak pem panggarak inpiga-o.

39Nde, ap iri nggwe lagolat wagolat-nen at nggweyel obogolar-e, it enanggul waring kagolat-nen 40at yak togolar-e: ”Kat-nen-e Mbal Pem Nagawan uwi iri-ge mijat luk, kenan tarem wirimin-o luk yigen-a? Nde, kar-e ndemeret Mbal Pem Nagawan Ambara nde ala-ge, kondomok kimiri yosolar-e, e lang pang tak pem-nen mbuwasug-o!” luk yak tiga-o. 41Yak togolikma-ge, it tepan omborak nagawan nagawan min imiri mbarak pidnak wene enaru nap min ogore yidnak nap min-nen na iri nggal-et at nggweyel obogolat-nen 42yogolar-e: ”At yu-ge nin nap inmiri yij-et nde, at ambik imiri yurag-e meya yusu-o. At yu-ge Isarael nap nagawan-net yusu, lak? Nde, ar-e e lang pang tak pem-nen mbuwasola-ge, nir-e ndenerer-o luk eberaul-o. 43At indi-ge Mbal Pem Nagawan ebem mbung mbung tak worasolat-nen yosolar-e: ’An-e Mbal Pem Nagawan Ambara-net yusu-o’ luk yoso ala-ge, Mbal Pem Nagawan-nen at indingen nde ala-ge, yawo-t at imiri yuwag-o” luk yiga-o. 44Nde, it ap nden unpugwi nap at totno e lang pang tak pem panggarak inpidnak nap-nen na iri nggal-et at nggweyel ibiga-o.

Yesus wat yid wene

27:45-56

(Mk 15:33-41; Lk 23:44-49; Yo 19:28-30)

45Nde, mo enggendumu-net o iri me obok ndamuk luk woralar-e, keyama jam tiga agaij-o. 46Nde, jam tiga bem-e, Yesus-nen ene ngguloksa yosolar-e: ”Eli, Eli, lama sabaktani?” yid iri-ge ”Nambal Pem Nagawan wa-e. Nambal Pem Nagawan wa-e. Kar-e noluk keya nibigen-o?” luk yosolat-nen yij-o. 47Iri yosoloma, iri me mendak woraiga nap ereb-e wene na kuluruk-nen yogolar-e: ”At yu-ge Elia wene mbo busu-o” luk yiga-o. 48Yogolikma-ge, it ennggendumu-nen ap misik puburak mberarig-e, ndum ndum nggal iri waga engen amburu ngari worak iri na yugut luk, e eraret pem puruk at emndam pil lagaij-o. 49Alat nde, it ap erep-nen yogolar-e: ”Pug-o! Elia-nen at yu imiri yil lobok yuwa, lak, ngge-o? Yik karok wolmog-o” luk yiga-o. 50Yogolikma-ge, Yesus na kwa nggulok yuruk, indisep worok yij-o.

51Worok yosola ereya na-net Mbal Pem Nagawan ama uguri worak woraso sum na-ge abam nggwe-nen ngaksa ena nggwe mbosolat, mberen agaij-o. Nde, o lele yosolar-e, kerep na yak ngak mbosolat, 52ap yapma inpidnak sa yuwak kuwak mbosolar-e, wat yidnak nap, lud tak nak kwariga nap kwarat ereba na men yiga-o. 53Men luk yigarig-e, Yesus na uruk agaid ombol nggwe-ge ir-e yapma inpidnak sa-nen it ereba-ge Marak O Siri Yerusalem iri me nggogola-ge, ap kwarat-nen eneyaiga-o.

54Nde, san ombo wari min at imin woragwi san ombo ereba na min-e Yesus na yik karok worakmu-ge, o lele yosolat kwaridnak mende oboksa karug-e, ir-e kwiye mondok kwarat luk-nen yogolar-e: ”Ap yu-ge ndemeret Mbal Pem Nagawan Ambara-net yusu-o” luk yiga-o.

55Nde, iri me-ge kwami kwarar-e erepma-nen yik karok woraiga-o. Kwami ereba-ge Nggalilea-nen Yesus imbirik nogolar-e, at yongga worogolat woraiga-o. 56It ennggenggerag-e o Magaralena kwe Maria nde Yakobus min Yusup min iniya Maria nde Sebendeus ilirak iniya nde woraiga-o.

Yesus yapma piga wene

27:57-61

(Mk 15:42-47; Lk 23:50-56; Yo 19:38-42)

57O ki yosola-ge, o Arimatea nap, isilobulo worak nap unu-ge Yusup iri na lobok yij-o. At iri na irit Yesus imin noso nab-er-o. 58At iri-ge Pilatus eram mberarig-e, Yesus orogwak nggi yij-o. Nggi yosola-ge, Pilatus-nen yak ondosolar-e: ”Yesus orogwak iri-ge at yu wok ter-o” luk yak indij-o. 59Yak ondosoloma-ge, Yusup na-ge at orogwak iri na wanosoluk, sum ngget loro-nen perena keya buruk, 60at ondomok yapma uburak kerep ndo ngget nenaridnak iri me pil nggwij-o. Pil nggosoluk, kerep nggulok mbi lembera kerep ndo tumende na nggelak puruk mbirij-o. 61Nde, o Magaralena kwe Maria min Maria misik na min-e kerep ndo na eralu koreyak woraiga-o.

San ombo-nen kerep ndo yik karok woraiga wene

27:62-66

62Nene luk kub-e, Hari Jumat iri na ombol nggwe-ge it tepan omborak nagawan nagawan min Parisi nap min-e lambuksa Pilatus eram ndok worogolat-nen 63at yak togolar-e: ”Nap wa-e. Nit-nen yebet kagolar-e, ap kabak tak onposo nap iri na uruk woralat-nen yosolar-e: ’Mberen nene luk, kenan tak purak pem nuruk yimin-o’ luk yoso na yebet kaige-o. 64Iri bem-e, kerep ndo na mondok kwara yik karok worakmu, kenan tak purak tarem keya buwakluk, kat kene amawi min yak indi-o. Nde, yik karok woragit lak-nen-e at owosirak ereba-nen-e at orogwak na yariya wanogoluk-net nde, ap yak ondogolar-e: ’Lag-o. At yu na uruk luk mberamu-o’ luk yuwa naru-nen yige-o. Nde, iri kwaruwa nggal-e, nanduk kabak tak inpidnag-e marig-et nde, abok-nen kabak tak unpuwa iri-ge mondok ija nggal-o” luk yiga-o. 65Yogolikma-ge, Pilatus-nen it yak ondosolar-e: ”Yik karok wolmomtak san ombo wok kundusu yur-o. Mburugupndig-e, kerep ndo iri-ge mondok kwara-t yik karok wolmer-o” luk yak indij-o. 66Yak ondosoloma-ge, it yu na mbirigarik, kerep tu lerak piga na bem lop nok tak pugwi mende puruk, san ombo na-ge yik karok woraiga-o.

Currently Selected:

MATIUS 27: inondx

Highlight

Copy