MARAKUS 12
12
Yabu winde min parugu woraiga nap min enpem nden karuk yidnak wene
12:1-12
(Mt 21:33-46; Lk 20:9-19)
1Iri luk, Yesus-nen nden karuk wene bem it tepan omborak nagawan nagawan min imiri mbarak pidnak wene enaru nap min Yawuri nap nagawan nagawan min yak ondosolar-e: ”Ap misik-nen-e anggut engen uwi yaguruk, leget wanuruk, engen amburu mbulurak ondoro nggweyak yaluruk, yik karok wolmomtak o lije teram mbi wirij-o. Iri rak puruk, ap erep-nen parugu woraidnak pem engen mbi wanuwakluk yak undurug-e, at iri-ge o nin sa mbirij-o. 2Mberarik woralar-e, engen ogore yoso ndak ndak tarem at-nen at ndegel oboso nap mbi anggut engen erep na wok tuwakluk, parugu worali nap na endam wirik ibij-o. 3Wirik ebamu-ge, it parugu worali nap na-nen-e ndegel obosa nap na tenaguruk, nggambu wosa we irit wirik ibiga-o. 4Iri yogolikma-ge, yabu winde iri-nen-e ndegel oboso nap nin mbi-ge tuguruk it endam wirik ibil lobok yosola-ge, it parugu worali nap-nen-e at anggulwak mep tak puruk, inggiri wosa langgara wirik ibiga-o. 5Wirik ibiga-t nde, yabu winde-nen-e tugurug-et ndegel oboso nap nin mbi wirik ibil lobok yosola-ge, it-nen mondok wiriga-o. Iri nggal nag-et kwat tenak worogolar-e, ndegel ubugwi nap ereb-e nggambu ondogolat ereb-e mondok abu ondogolat yiga-o. 6Yogolikma-ge, yabu winde eram-e ap misiget nak woragaij-o. Nde, iri-ge at ambara indi kundugu irit worala-ge, abok nggwe-ge at ambara-ge it endam wirik obosolat-nen yebet kasolar-e: ’An nambara yu-ge it-nen-e kek tak ubuwa-o’ luk yebet kagaij-et nde, 7yabu parugu worali nap na-nen yak kerak mbogolar-e: ’Eid onggweyak winde yuwa nab-e yur-o. Onggweyak winde yuwok-nen wuruwog-o’ luk yiga-o. 8Yogolug-e, ambara na tenaigarik, wosa yabu leget ombol nggwe mbo biga-o.
9Iri ala karug-e, yabu winde na-nen-e ngge kwaruwa kali-o? At na lobok yuwarig-e, parugu worali nap iri undurug-e, yabu iri-ge nin nap enpem puwa-o. 10Mbal Pem Nagawan engga bem-nen yosolar-e:
’O wurugwi nap-nen mbo bidnak kerep iri-ge o unggut paro pidnak irit kwat yij-o.
11Iri kwat yid iri-ge Nagawan Indo-nen kwaridnak me,
nit-nen-e kwiye worak irit kali-o’
luk mbaridnak wene iri-ge kir-e kagwi bug-a?” luk yij-o.
12Yosoloma-ge, Yawuri nap ap yok nggok ereba-nen-e: ”Nden karuk wene yid yu-ge nir-et yak nindij-o” luk Yesus tenaguwokluk yiga-t nde, ap kwarat ereba na enaye-nen at keya buruk, mbiriga-o.
Kaisat amanggim tol purak wene
12:13-17
(Mt 22:15-22; Lk 20:20-26)
13Nde, Yesus are pogolat, kin wok ubuwokluk, it Parisi nap erep min Eroriani nap erep min-e Yesus eram wirik inpil mbiriga-o. 14Wirik onpogolikma-ge, it na Yesus eram mbirigarik, at yak togolar-e: ”Mul Ondoso Nap wa-e. Kar-e mot mot nak kwarosolat, ap enpage lombonoso buk iri-ge nir-e nenaru-o. Nde, kar-e ap entare na mbenaroso buk me, Mbal Pem Nagawan indi-nen nggweyak ma nap-nen kwaruwag-o luk perasu wene-ge kar-e mot mot nak mul nundusu-o. Kar-e iri yoso me, nit-nen wanugwi imiri mbarak pidnak wene bem-e nit-nen Kaisat amanggim tol purag-e meya lak? Nir-e mondok purag-a? Are, purak pug-a?” luk kin wok ibiga-o. 15Alat nde, Yesus na-ge it inndi nin woragolat-nen kin wok ibiga iri na yenggerak eneyaruk, at-nen it yak ondosolar-e: ”Kir-e noluk-nen an nare pili-o? Kerep tol misik an kayek-nen nuk kil lobok yer-o” luk yak indij-o. 16Yak ondosoloma-ge, kerep tol mbi pil lobok yogolikma-ge, at-nen it kin wok onposolar-e: ”Tol yu ebem-e ta amorok ndak worak min ta unu min mbarag-o?” luk kin wok onposoloma-ge, it-nen yogolar-e: ”Kaisar-o” luk yiga-o. 17Yogolikma-ge, Yesus-nen it yak ondosolar-e: ”Iri nde ala-ge, Kaisat arengge ala, Kaisat amanggim purag-o. Nde, Mbal Pem Nagawan arengge ala, Mbal Pem Nagawan amanggim purag-o” luk yosoloma kuluruk, wi langgu mbariga-o.
”Wat yidnak nap men luk, ngge ma-o?” luk kin wanidnak wene
12:18-27
(Mt 22:23-33; Lk 20:27-40)
18Nde, it Saruki nab-e: ”Wat yidnak nab-e men yugwi bug-o” luk yugwi nap na-nen Yesus eram mbirigarik, at kin wok obogolar-e: 19”Mul Ondoso Nap wa-e. Nit-nen kwarurak yu Musa-nen nenmanggim mbarosolar-e: ’Ap misik nde la ndakit lak wat yosola-ge, at owe owot nde worasola-ge, wat yid nap iri na ondolma la puwakluk ogwe togwe iri na-ge owe owot-nen wanurag-o’ luk mbarij-o. 20Nde, ap enpe tuju nderak irit woraiga-o. Nde, onowe manggu na-nen kwe wanij-et nde, la ndakit lak irit wat yij-o. 21Wat yosoloma-ge, kwe togwe na-ge owot imbirik-nen wanij-et nde, la ndakit lak irit at na wat yosola-ge, kwe na owot misik imbirik iri na wanij-et nde, iri na nggal-et kwarij-o. 22Nde, irit tit kwe iri na-ge ap enpe tuju iri na-nen waniga-t nde, la ndakit lak iri-net pidsa wat yiga-o. Nde, abok nggwe kwe na war-et yij-o. 23Nde, kwe iri-ge ap enpe tuju iri pidsa-nen wanidnak me, wat yidnak nap men ma tarem-e, kwe iri-ge ta ogwe nde ma-o?” luk kin wok ibiga-o.
24Kin wok obogolikma-ge, Yesus-nen onggo yosolar-e: ”Kir-e Mbal Pem Nagawan engga min Mbal Pem Nagawan amawi min-e kenaru buk me, kir-e mondok kinndi kabak yili-o. 25Wat yidnak nap mendak unpuwa tarem-e, wok kerak mbuwa bug-o. Are, aid nap aid arem worali iri nggal nak wolmomtag-o. 26Nde, wat yidnak nap unluk tak purak wene-ge Musa-nen mbaridnak engga bem-e e sugwe kan amare lagaid wene na-ge kir-e kagwi bug-a? Nde, engga iri arem-nen Mbal Pem Nagawan-nen Musa yak tosolar-e: ’An-e Abaram min Isak min Yakup min Enmbal Pem Nagawan-nen yusu-o’ luk yak tij-o. 27Iri yid iri-ge Mbal Pem Nagawan-e wat yidnak nap Enmbal Pem Nagawan-e lag-o. Are, unluk worali nap Enmbal Pem Nagawan-nen yusu-o. Kir-e mondok kabak yili-o” luk yak indij-o.
Mbal Pem Nagawan-nen ”Iri nggal kwarurag-o” yidnak wene iri enggendumu owak ndum lombog-e yu-o” luk yidnak wene
12:28-34
(Mt 22:34-40; Lk 10:25-28)
28Iri luk, imiri mbarak pidnak wene aru nap misik lobok yarig-e, Yesus min Saruki nap min kin wok kerak mbili iri na kulidnggal-e, Yesus-nen-e wene onggo-ge ndak ndag-et yosola kuluruk, at-nen Yesus kin wok obosolar-e: ”Mbal Pem Nagawan-nen ’Iri nggal kwarurag-o’ yidnak wene enggendumu owak ndum lombog-e ngge-o?” luk kin wok obosoloma-ge.
29Yesus-nen yosolar-e: ”Mbal Pem Nagawan-nen ’Iri nggal kwarurag-o’ yidnak wene enggendumu owak ndum lombog-e yur-o: ’Israel nap wa-e. Kwara koler-o. Nagawan Indo nit Nenmbal Pem Nagawan iri-ge Nagawan Indo mondok misiget-nen yusu-o. 30Nagawan Indo kit Kenmbal Pem Nagawan abuwa kagolar-e, kinndi oboksa min kenpe oboksa min kinndi nggat nggat oboksa min kenmawi pidsa min-net at abuwa kagolat wolmer-o.’ 31Nde, Mbal Pem Nagawan-nen ’Iri nggal kwarurag-o’ yidnak wene enggendumu owak ndum lombok misig-e yur-o: ’Kat kambikpebe kabuwa kasu nggal-et kat kennggamirak enabuwa ki-o.’ Mbal Pem Nagawan-nen ’Iri nggal kwarurag-o’ yidnak wene enggendumu wene ereb-e te nggal-et nde, owak ndum lombog-e mberen irir-o” luk yij-o.
32Yosoloma-ge, imiri mbarak pidnak wene aru nap na-nen Yesus yak tosolar-e: ”Mul Nondoso Nap wa-e. Lud tag-et yigen-o. Nagawan Indo iri-ge Mbal Pem Nagawan misiget nak-nen yusu-o. Mbal Pem Nagawan nin mbi mondok lak me, 33ap-nen at abuwa kagolar-e, enpe min inndi min enmawi min pidsa-nen at abuwa kudtag-o. Nde, it enambik enabuwa kali nggal-et ennggamirak enabuwa kudtag-o. Nde, Mbal Pem Nagawan amanggim wam ebis-et kan pili min wam witli min iri-ge teberag-et nde, iri kwarugwi iri-ge nggok-nen yusu-o” luk yij-o. 34Yosoloma-ge, Yesus-nen yik kagaidnggal-e, imiri mbarak pidnak wene aru nap iri-nen wene onggo-ge ludsa nak yosola karuk, Yesus-nen ap na yak tosolar-e: ”Kar-e Mbal Pem Nagawan elem nap yurak kwat yusu-o” luk yak tij-o.
Iri rak purug-e, ap misiger-o luk tet tuguruk wene Yesus kin wok uburag-e kwiye yiga-o.
”Ndaud ambara-ge ta-o?” luk kin wanid wene
12:35-37a
(Mt 22:41-46; Lk 20:41-44)
35Misik tarem Yesus-nen Mbal Pem Nagawan ama-nen ap mul ondosolat-nen yosolar-e: ”It imiri mbarak pidnak wene enaru nap-nen-e: ’Kerisut-e Ndaud ambara-nen yusu-o’ yili yu-ge noluk-nen yili-o? 36Ndaud at na Konak Indi-nen yak tosola, Ndaud-nen yosolar-e:
’Nagawan Indo-nen an-nen idnak Nagawan Indo yak tosolar-e:
An ninggi kigit nggwe koreyak irit worasoma, kat kuwim nab-e an-nen
kat kuwok unggutmu teberak inpimin-o luk yak tij-o.’
37Iri ala-ge, Ndaud at-nen Kerisut na imin-e ’Nagawan Indo-o’ luk yidnak me, Nagawan Indo iri-ge ngge rak puruk-nen Ndaud ambara-o luk yurag-o?” luk yij-o.
Yesus-nen: ”Imiri mbarak pidnak wene enaru nap enabiyem-o luk kwil kwalsa wolmer-o” yid wene
12:37b-40
(Mt 23:1-36; Lk 20:45-47)
Yosoloma-ge, it ap kwarat-nen Yesus-nen mul ondosola, enalen min kolak woraiga-o. 38Yesus-nen ap mul ondosolat-nen yosolar-e: ”Imiri mbarak pidnak wene enaru nap iri enabiyem-o luk kwil kwalsa wolmer-o. It iri-ge mot sum yutluk waring kagola, onggo wanugwi sa-nen ap-nen kek tak unpurak na indingen, 39Yawuri nap tepan yugwi ma-nen ap kek tak-nen kore yugwi sa nak kore yogolat, nunggwi mende sakwi tarem-nen ap nggok-nen kore yugwi sa min nak kore yurak peragwi-o. 40It-nen kweyap togwe enmberam lagolar-e, it unuwi mengga wanogoluk, it meya yidnak iri na lumurogolar-e, tepan mondok mot lit karuk mburugwi-o. Nde, iri kwatli nap iri-ge angin worak mende mondok enpem puwa-o” luk yij-o.
Kwe togwe-nen Mbal Pem Nagawan amanggim pidnak wene
12:41-44
(Lk 21:1-4)
41Yesus na-ge Mbal Pem Nagawan ama-nen Mbal Pem Nagawan amanggim yarak pugwi labu mbarak iri na eralu koreyak woralar-e, ap-nen uwang yarak pili iri na lombot posolat woragaij-o. Worasoma-ge, insilobulo worak nap kwarat-nen uwang mbunu-t yarak piga-o. 42Nde, isilobulo lak kwe togwe mbi lobok yosolar-e, kerep tol mberen, ebe lak mende irit yarak pij-o. 43Yarak posoloma-ge, Yesus-nen at owosirak wene mbo unpuruk, it yak ondosolar-e: ”An-e ndemeret yak kundusu-o. It ereb-e marig-et yarak piga-t nde, isilobulo lak kwe togwe yu perak nde mondok kwarat yarak pij-o. 44It erep pidsa-ge insilobulo kwarat iri na bem-nen yarak piga-t nde, kwe togwe iri perak nde isilobulo lag-et nde, misig-e keya bigit lak, at norak mende onggo purag-et nde, at arengge oboksa yarak pij-o” luk yak indij-o.
Currently Selected:
MARAKUS 12: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
