MARAKUS 14

Yesus wururak obok mbariga wene

14:1-2

(Mt 26:1-5; Lk 22:1-2; Yo 11:45-53)

1Mberen nak nene luk, O Anggul Pandok Mbiridnak yebet kagwi tarem min Oroti Lomboroso Mende Pigit Lak Worakwi tarem min yebet kujwokluk woragolar-e, tepan omborak nagawan nagawan min imiri mbarak pidnak wene enaru nap min-e mbik mbok Yesus tenaguruk, wururak wene mbarogolat woraiga-o. 2Woragolar-e, it-nen yogolar-e: ”Ap pidsa nari wari mbuwa naru, sakwi tarem-nen tenagurag-e lag-o” luk yiga-o.

Emben worak yi Yesus anggul pem kilidnak wene

14:3-9

(Mt 26:6-13; Yo 12:1-8)

3Mbetani-nen Yesus na-ge ndigiril laso mbijap ebem yidnak nap Simon na ama mburu nasolat koreyak worasoma-ge, kwe mbi-ge emben worak yi, onggo nggulok nak pugwi iri nggweyak yimbe arem kenanggo waruk lobok yarig-e, yimbe na emende yenggak tak puruk, yi-ge Yesus anggul pem kilik pij-o. 4Kilik posola-ge, iri me woraiga nap erep-nen insilepma min yak kerak mbogolar-e: ”Emben worak yi yu-ge no amanggim-nen urusuwaga mbo busu-o? 5Emben worak yi yu onggo uwang kwarat wanuruk insilobulo lak nap wok undurag-et nde-o” luk insilepma min-et kwe na met ibiga-o.

6Met obogolikma-ge, Yesus-nen yosolar-e: ”An konag-et kwat nibidnak me, kir-e noluk-nen met ibili-o? Kwe yu keya ber-o. 7Insilobulo lak nab-e kit kinmin pempa worali-o. It yongga undurak peragolug-e, yongga ondogolat woragub-o. Alat nde, an-e pempa kit kinmin woramin-e lag-o. 8Kwe yu-nen kwarid iri-ge, at-nen kwarurak irit kwarij-o. An yapma nibigit lak ma, abuwok ma-net yapma nuburak pem amburu nebem kilik pij-o. 9An-e ndemeret yak kundusu-o. Yi wi ndi wi oboksa aid wene wigarogolar-e, at unu ki rak pogolar-e, kwe yu-nen kwarid wene-ge yil-et nuwa-o” luk yij-o.

Yuras-nen Yesus wesel indidnak wene

14:10-11

(Mt 26:14-16; Lk 22:3-6)

10Iri lug-e, Yesus owosirak duabelas na ennggendumu-nen Yuras Ikariot na-ge Yesus wesel endeyekluk tepan omborak nagawan nagawan endam mbirij-o. 11Endam wok yarig-e, it na-nen wene iri kuluruk, enalen karug-e, ”Onggo wok kurul-o” luk yak tiga-o. Yak togolikma-ge, Yuras-nen: ”Ngge tarem nggal-nen wesel indimin-o?” luk tu kore yosolat woragij-o.

O Anggul Abandok Mbiridnak Tarem yebet kagolat ningga wene

14:12-21

(Mt 26:17-25; Lk 22:7-14,21-23; Yo 13:21-30)

12Nde, Oroti Lomboroso Mende Pigit Lak Worakwi tarem iri na tel korogola tarem, ap-nen O Anggul Pandok Mbiridnak tarem yebet kagolat lomba wam wurugwi tarem lomba wam worogola-ge, at owosirak-nen at yak togolar-e: ”O Anggul Pandok Mbiridnak tarem sagurak pem-e ngge me-nen kamanggim lid lud tak purak perasu-o?” luk yak tiga-o.

13Yak togolikma-ge, Yesus-nen at owosirak mberen wirik onposolat-nen yak ondosolar-e: ”Kir-e o silmu mberer-o. Mburugupnggal-e, ap misig-e yimbe misik arem yi kenangga waruk mborosoma, lid pid luk, imbirik mburugupndig-e, 14at-nen o misik nggosola-ge, kit-nen o iri winde yak togolar-e: ’Mul Nondoso Nap-nen yosolar-e: An nowosirak inmin-e O Anggul Pandok Mbiridnak tarem yebet kagolat nunggwi mende-ge ngge me-nen nul-o yamu-o luk yak ter-o.’ 15Yak tukmu-ge, at-nen o teram kuri worak nggulok misik abu lid lud tak worak irit mirik kunpuwama, kit-nen iri me nit norak mende saga lid lud tak pogolat wolmer-o” luk yak indij-o.

16Yak ondosoloma-ge, at owosirak na mbirigarig-e, o silmu iri na me wok yiganggal-e, Yesus-nen yak indid iri na nggal-et karug-e, O Anggul Pandok Mbiridnak tarem yebet kagolat norak mende saga lid lud tak piga-o.

17Nde, o ndamuk yosola-ge, Yesus-e owosirak duabelas na inmin luk lobok yiga-o. 18Lobok yigarik, mburu nonggolat koreyak woragolat-nen Yesus-nen yosolar-e: ”An-e ndemeret yak kundusu-o. Kit an totno mburu nili nap mbi-nen-e an niminep wusuruwa-o” luk yij-o.

19Yosoloma, wene iri na kulurug-e, at owosirag-e inndi puru kwarat luk, enambik tak-nen kin wok obogolar-e: ”Nagawan Indo wa-e. An nde yigen, lak?” luk yil lobok yiga-o.

20Yogolikma-ge, Yesus-nen it yak ondosolar-e: ”Iri kwaruwa nab-e ap misik kit duabelas kennggendumu-nen an totno piring misiget pem nili nab-er-o. 21Ap Ambara wat ma iri-ge Mbal Pem Nagawan engga bem-nen urul pidnak na ndak ndag-et wat ma-t nde, Ap Ambara iminep wisirid nap iri perak nde abuwa-o! At iri-ge ndesa mbigit lak nggal-e konak lombog-o” luk yij-o.

Konak mende ningga wene

14:22-26

(Mt 26:26-30; Lk 22:14-20; 1 Kor 11:23-25)

22Nde, it mburu nonggolar-e, Yesus-nen mburu wanosoluk, Mbal Pem Nagawan wa yak turuk, ndeksa ndeksa posoluk at owosirak wok ondosolat-nen yosolar-e: ”Yu-ge an nebe-nen yusu-o. Waga mer-o” luk yij-o. 23Iri lug-e, yimbe anggut engen amburu kenanggo wanosoluk, Mbal Pem Nagawan wa yak turuk, at owosirak wok ondosola-ge, it pidsa-nen ningga-o. 24Nunggukmu-ge, Yesus-nen it yak ondosolar-e: ”Yu-ge ap kwarat enmanggim wirik purak eyabi, Mbal Pem Nagawan-nen urul pidnak wene na ebe rak pusu neyabi-nen yusu-o. 25An-e ndemeret yak kundusu-o. Anggut engen amburu yawo nili kuri-nen ninggit lak irit woramindik, Mbal Pem Nagawan-nen tenagaidnak wi iri me-nen anggut engen amburu ngget lambuksa nul-o” luk yij-o. 26Yuruk, it-nen ndawi yurug-e, Saitun ndobo ben mbiriga-o.

”Yesus-e an naru bug-o yugun-o” luk Peterus yak tidnak wene

14:27-31

(Mt 26:31-35; Lk 22:31-34; Yo 13:36-38)

27Mbirigarig-e, Yesus-nen it yak ondosolar-e: ”Mbal Pem Nagawan engga bem-nen yosolar-e: ’Mbal Pem Nagawan-nen lomba wam ombo worosola-ge, lomba wam-e ndibi ndi yuwa-o’ luk yid iri na nggal-et kit pidsa-nen an keya nuburuk mburugub-o. 28Alat nde, an tuguruk nuruk tak nubuwama-ge, an-e kit kentaremok Nggalilea mbirimin-o” luk yij-o. 29Yosoloma, Peterus-nen at yak tosolar-e: ”It pidsa-nen kat keya kubuwa-t nde, an-e mondok keya kibimin pug-o” luk yij-o. 30Yosoloma-ge, Yesus-nen at yak tosolar-e: ”Karu wolmin-o. Yawo kubu yu-nen towe wam kusi ene-ge mberen pem yigit lak worala, an nimin-e ’At iri-ge an naru bug-o’ luk kenan pem-et yugun-o” luk yak tij-o. 31Alat nde, Peterus-nen mondok watsa yosolar-e: ”Lag-o. Kat nenmberek wat yurag-et nde, kat kimin-e ’An naru bug-o’ luk mondok yimin pug-o” luk yij-o. Yosoloma, at owosirak erep pidsa-nen na iri nggal nag-et yiga-o.

Yesus-e Nggetsemani yapmu-nen tepan yid wene

14:32-42

(Mt 26:36-46; Lk 22:39-46)

32Ir-e o misik unu-ge Nggetsemani wok yil mbiriga-o. Wok lug-e, Yesus-nen at owosirak yak ondosolar-e: ”Kir-e ya koreyak woragola, an-e tepan yil mbirimin-o” luk yak indij-o. 33Yak undurug-e, Peterus min Yakobus min Yoanes min inmin mberarig-e, ar-e kwiye nggulok kasolat, wendet yosolat-nen 34it yak ondosolar-e: ”An nindi puru yosolat, wat momtak nggal irit yusu-o. Kit yu me woragolar-e, kwara yik karok wolmer-o” luk yak indij-o. 35Yurug-e, Yesus na iri me-nen siyak mberarig-e, erare nggwe nggweyak ma tud luk-nen tepan yosolar-e: ”Andi bandi nebem mbusu yu lak tak purak op ala-ge, lak tak pi-o” luk yij-o. 36Yurug-e, ”Neid wa-e, Neid wa-e. Kat-nen yi mende ndi mende kwarurag-e ndak–nen yusu-o. Andi bandi an nebem mbusu yu an nebem-nen wabi-o. Nde, an nindi-n pidnak kwarurag-e lag-o. Alat nde, kat kindi-n pidnak nak kwat mag-o” luk yij-o.

37Tepan yuruk, lobok yidnggal-e, at owosirak na nene yukmu, eneyarug-e, Peterus na yak tosolar-e: ”Simon wa-e, Kar-e nene yusu-a? Jam misiget tet kar-e kuruk wolmomtag-e meya-a?” luk yij-o. 38Iri luk, Yesus-nen it yak ondosolar-e: ”Kinndi ngaruwa naru, yik karok woragolat, tepan yogolat wolmer-o. Kinndi-nen-e lud tag-et kwareyeg-o yili-t nde, kenpe-nen-e ndeyak yusu-o” luk yak indij-o.

39Iri luk, Yesus na tuguruk mberarig-e, tepan-e nanduk yid na nggal-et yij-o. 40Iri luk, at na tuguruk lobok yidnggal-e, at owosirak na enlengen lamborosoloma, nene yikma, eneyagaij-o. Alama-ge, wene no yak turak nggal inndi kabak yiga-o.

41Alama-ge, Yesus na kenan pem tak posolat-nen lobok yarik, it yak ondosolar-e: ”Kir-e nene yogolat, kenpabok kwarogolat kwat tenak worali-a? Yawo-ge ndak agaij-o. Ap Ambara na wesera meya yugwi nap ininggem purak tarem-e abu wok yij-o. 42Men luk, log-o. An wesel nuburak nab-e lobok yusu iri ker-o” luk yak indij-o.

Yesus tenaiga wene

14:43-52

(Mt 26:47-56; Lk 22:47-53; Yo 18:3-12)

43Yesus na wene yosoma, ereya na-net ap duabelas inmin waring kaso nap Yuras na-ge lobok yosola-ge, at imin-e tepan omborak nagawan min imiri mbarak pidnak wene enaru nap min ogore yidnak nap min-nen wirik inpidnak nap, ap kwarat lobok yogolar-e, posid tege wanugwi, mbut wanugwi luk lobok yiga-o. 44Nde, at iminep wisirid nap na-nen it yenggerak puwakluk yak ondosolar-e: ”An-nen paluksa wa yak timin nap irit tenasa mondok kwara waruk mbururag-o” luk yak indij-o.

45Iri luk, Yuras na lobok yosolar-e, ndag-et nak Yesus eram lobok luk, at yak tosolar-e: ”Mul Nondoso Nap wa-e” yurug-e, paluksa tenaburuk wa yak tij-o. 46Iri yosola-ge, at imin lobok yiga nap-nen-e Yesus tenaga kamariga-o. 47Alat nde, iri me woraidnak nap misik-nen-e eyalawi lit kasolar-e, tepan ombo nagawan ndegel oboso nap na-ge eyanggo lem tebera mberak pij-o. 48Nde, Yesus-nen it kin wok onposolar-e: ”An-e meya yoso nap ala-nen kir-e tege min mbut min wanuruk, an tena nubuwokluk, lobok yili-a? 49An-e pempa kit kinmin Mbal Pem Nagawan ama-nen ap nggomo ondosolat worasola-ge tena nibigit lak yigeb-o. Alat nde, Mbal Pem Nagawan engga bem-nen mbaridnak iri na ndak makluk-net kwatli-o” luk yij-o.

50Yosoloma-ge, at owosirak pidsa-ge at keya buruk, kwiye mbiriga-o.

51Keya bogolikma-ge, ap sugwe mbi sum loro misik langguksa yirik Yesus imbirik mborosoma-ge, ap ereba-nen at tenabuwokluk yiga-t nde, 52sum loro iri na yonggora keya buruk ngenwa irit mbirij-o.

Yesus na wene mbarugwi na endam-nen kwat ibiga wene

14:53-65

(Mt 26:57-68; Lk 22:54-55,63-71; Yo 18:13-14,19-24)

53Nde, Yesus na-ge tepan ombo nagawan ama ibil mborogola-ge, tepan omborak nagawan nagawan pidsa min ogore yidnak nap min imiri mbarak pidnak wene enaru nap min-e iri me ndok wurukmu, ibil mbiriga-o. 54Nde, Peterus na-ge Yesus imbirik yalambo mberarik, tepan ombo nagawan uwi mborom wok yarik, san ombo inmin kan tonggosolat koreyak woragij-o. 55Worasoma-ge, tepan omborak nagawan nagawan min wene mbarugwi nap pidsa min-e Yesus wurukwokluk at-nen kwarid elem mbenariga-t nde, elem marig-et ter-o luk at ebem-e kagit lag-o. 56Alama-ge ap kwarat-nen enesiget wene Yesus ebem pogolat kinggiriga-t nde, it-nen at ebem enesiget wene pidnag-e nin tak nan tak nde yiga-o.

57Iri luk, ap erep men yigarik, enesiget wene at ebem pogolat-nen yogolar-e: 58”Nit kolak worakmu-ge, at yu-nen yosolar-e: ’Mbal Pem Nagawan uwi ap ininggi-nen wiridnak yu-ge an-nen tud tak puruk, kenan tarem nak ki nap-nen wururak puk o irit wirimin-o’ luk yosola, kulige-o” luk 59yiga-t nde, it-nen at ebem pidnak wene-ge ndak ndag-e lak, are, arik tak irit kiringgiga-o.

60Iri ala karug-e, tepan ombo nagawan na ennggendumu-nen men luk, Yesus kin wok obosolar-e: ”It yu-nen wene kat kebem kiringgili yu-ge kar-e erep nggarigit lak yusu yu-ge ngge-o?” luk kin wanij-o. 61Kin wok ibij-et nde, Yesus-e onggo mbi yigit lak, ene lak nak woragaij-o. Alama, tepan ombo nagawan na-nen tuguruk at kin wok obosolar-e: ”Kar-e Kerisut, Kek tak Woraso Nap Ambara-nen yusu, lak?” luk kin wanij-o. 62Yosoloma-ge, Yesus-nen yosolar-e: ”An-e Kerisut-net yusu-o. Nde, Ap Ambara iri-ge Mondok Amawi worak Nap inggi kigit nggwe koreyak worala, kagub-o. Mbal pem-nen nggan nggan arem lobok yosola, kagub-o” luk yij-o. 63Yosoloma-ge, at tepan ombo nagawan na-nen at usum ndela keya buruk-nen yosolar-e: ”Ap-nen at ebem wene kurunggurak na mondok lag-o! 64At-nen Mbal Pem Nagawan obok pij-e kit kuligep irir-o. Kit-nen at ebem-e no wene mbarugub-o?” luk yosoloma-ge, it pidsa-nen yogolar-e: ”At yu-ge meya kwaroso me, mondok wururak nap-net yusu-o” luk yiga-o.

65Yogolug-e, it ereb-e wusi tebara at ebem pogolat, at erare muruk tak puruk, ndumbuk worogolat-nen yak togolar-e: ”Kat kitli nap unnu mbi yi-o” luk yak tiga-o. Nde, it san ombo-nen na wiriga-o.

Peterus-nen ”Yesus-e an naru bug-o” yidnak wene

14:66-72

(Mt 26:69-75; Lk 22:56-62; Yo 18:15-18,25-27)

66Nde, Peterus na-ge o mborom iri na me-t worasoma-ge, tepan ombo nagawan ndegel oboso kwe mbi lobok yij-o. 67Lobok yarik, Peterus na kan tonggosoma karuk, at erare kwara limbit lombot karuk-nen yak tosolar-e: ”Kat na Nasaret nap Yesus imin totno woraso nar-o” luk yij-o. 68Alat nde, Peterus-nen yosolar-e: ”Lag-o. An naru bug-o. Kat-nen yusu yu-ge an-e yebet kasu bug-o” luk leget ndanggi nggwe mbirij-o. (Mborosoma ereya na-net towe wam kusi ene yij-o.) 69Iri lug-e, ndegel oboso kwe iri na-nen tuguruk Peterus yik karuk, ereba mendak worali nap ereba na yak ondosolar-e: ”It totno woragwi nap mbi-ge yur-o” luk yij-o. 70Yosoloma-ge, Peterus-nen tuguruk yosolar-e: ”An-e naru bug-o” luk yij-o. Siyag-et woraruk, ereba worali nap-nen tuguruk Peterus yak togolar-e: ”Kar-e Nggalilea nap me, it inmin woraso-net yusu-o. Yubul purag-e meya-o” luk yak tiga-o. 71Yak togolikma-ge, at Peterus-nen owak mbarosolat-nen yosolar-e: ”Kit-nen yili nap iri-ge an-e mondok ndemeret naru bug-o” luk owak mbarosola, 72ereya na-net mberen pem tak posolar-e, towe wam kusi ene yij-o. Yosoloma-ge, Yesus-nen Peterus yak tosolar-e: ”Towe wam kusi ene-ge mberen pem yigit lak worala-ge, kar-e kenan pem an nimin-e ’Ap iri-ge an naru bug-o’ yugun-o” luk yidnak na-ge Peterus na-nen yebet karug-e, yip kondok lud mbij-o.

Currently Selected:

MARAKUS 14: inondx

Highlight

Copy