MARAKUS 15

Yesus na Pilatus eram woraidnak wene

15:1-5

(Mt 27:1-2,11-14; Lk 23:1-5; Yo 18:28-38)

1Kubu kabu-ge tepan omborak nagawan nagawan-e ogore yidnak nap min imiri mbarak pidnak wene enaru nap min wene mbarugwi nap erep pidsa min-e inmin wene mbariga-o. Wene mbatlug-e, Yesus na kere kamatluk, waruk mbirigarig-e, Pilatus eram pil mbiriga-o. 2Nde, Pilatus na-nen Yesus kin wok obosolar-e: ”Kar-e ndemeret Yawuri nap Nagawan-nen yusu, lak?” luk at kin wok obosoloma-ge, at-nen yosolar-e: ”Kat yigen irir-o” luk yij-o. 3Yosoloma-ge, it tepan omborak nagawan nagawan-nen-e wene kwarat at ebem piga-o. 4Alama-ge, Pilatus na-nen tuguruk at kin wok obosolar-e: ”Kar-e wene erep nggarigit lak yusu-a? It-nen wene kwarat kat kebem pili yu-t nde” luk yij-o. 5Alat nde, Yesus na-ge wene erep mondok nggarigit lak ala karuk, Pilatus na-ge wi yij-o.

”Yesus wururag-o” luk mbariga wene

15:6-15

(Mt 27:15-26; Lk 23:13-25; Yo 18:39–19:16)

6Nde, pempa O Anggul Pandok Mbiridnak tarem-e Pilatus na-ge o kubu me pil nggwidnak nap misig-e it ap kwarat-nen nggi yidnak iri na-t wesera wok ondoso-o. 7Alama-ge, ”Pemerinta nap enne kulul pug-o” yugwi bem o kubu me inpil nggwidnak nap ennggendumu-ge pemerinta imin wim mbaragolat ap wiridnak nap mbi unu-ge Mbarabas irit woragaij-o. 8Worala-ge, pempa sakwi tarem-nen o kubu me-nen wesera wok ondoso iri na nggal wok unduwaklug-e, ap kwarat ndok wirigarik, Pilatus emengen mbariga-o. 9Emengen mbarogolikma-ge, Pilatus-nen it kin wok onposolar-e: ”An-e Yawuri nap nagawan iri wesel kundurag-e kindingen, lak?” luk kin wok inpij-o. 10Nde, kin wok inpid iri-ge Yesus unu kek tak pugwi bem tepan omborak nagawan nangawan-nen enlengen ale at ebem pogolar-e, Pilatus inggem piga na yenggerak puruk-nen kin wok inpij-o. 11Alat nde, tepan omborak nagawan nagawan-nen-e: ” ’Mbarabas irit wesel nindi-o’ luk yak turag-o” luk ap kwarat iri na enarem woragil niga-o. 12Alama-ge, Pilatus-nen it tuguruk kin wok onposolar-e: ”Iri ala-ge, kit-nen ’Yawuri nap nagawan-nen yusu-o’ yili nap yu-ge ngge rak ibimin-o?” luk kin wok inpij-o. 13Yosoloma-ge, it pidsa enne amawi min-et nggoksa yogolar-e: ”E lang pang tak pem mondok wururag-er-o!” luk yiga-o. 14Yogolikma-ge, Pilatus-nen it kin wok onposolar-e: ”Ar-e no meya kwaramu-nen yili-o?” luk yosoloma-ge, it pidsa-nen ebem lud enne amawi min ngguloksa yogolar-e: ”E lang pang tak pem wururag-er-o!” luk yiga-o. 15Alama-ge, Pilatus na-nen ap kwarat na inndi yanggonosolar-e, Mbarabas na wesel indij-o. Iri luk, ”Yesus na linggamburok werer-o” yak unduruk, e lang pang tak pem panggarak ubuwakluk, sam ombo ininggem pij-o.

San ombo-nen Yesus nggweyel ibiga wene

15:16-20

(Mt 27:27-31; Yo 19:2-3)

16Iri lug-e, san ombo-nen Yesus waruk mbirigarig-e, gubernor woraso sa, ap enpem wene mbarugwi ma nggwigarig-e, san ombo kwarat erep na yonggo onpogola, ndok wiriga-o. 17Ndok wutluk, it-nen-e nagawan-nen yurugwi sum yirik uburuk, isile worak kere kago wosa wirik nggal kwasa at anggulwak pem puruk, 18at wa yak togolar-e: ”Yawuri nap nagawan wa-e. Wiwa-o!” luk wa yak tiga-o. 19Wa yak togolug-e, wangun pem anggulwak lel kagolat, wusi tebal pogolat, at erembel wanidnak nggal at eralu entare nggwe tud yogolat yiga-o. 20Iri luk, at nggweyel uburuk, nagawan-nen yurugwi sum iri na yunggwirik puruk, at ambil usum yirik uburuk, e lang pang tak pem panggarak ubuwokluk waruk mbiriga-o.

Yesus na e lang pang tak pem wiriga wene

15:21-32

(Mt 27:32-44; Lk 23:26-43; Yo 19:17-27)

21Aleksandet min Urupus in ineid o Kirene nap Simon iri na-ge ama nggwe-nen o siri nggok nggwe mborosoma-ge, ”Yesus wosa burak e lang pang tak yu kud ti-o” luk lembesa yak tiga-o. 22Iri rak puruk, Yesus na-ge o unu-ge Nggolnggota iri me waruk mbiriga-o. Nde, Nggolnggota iri-ge Enanggulwak Pugwarak Sa-o yogolar-o. 23Waruk mbutluk, anggut engen amburu min mut min lambuksa kenanggo iri na mak tiga-t nde, Yesus na keya bij-o. 24Keya bosoloma-ge, e lang pang tak pem panggarak uburug-e, at usum tumburuwokluk-nen engga mbara ligik pogolar-e: ”Urugwe nggwe tud yosola-ge, an wanimin-o. Nde, esaligit nde ala-ge, kat wanugun-o” yurug-e, at usum na iri kwarak puruk-nen timbiriga-o. 25At worogolar-e, mo kererak posola, jam sembilan pem e lang pang tak pem panggarak piga-o. 26Nde, at ebem pidnak wene-ge: ”Yu-ge Yawuri nap nagawan-o” luk engga mbarak puruk e lang pang tak na anggul pem piga-o. 27Purug-e, Yesus imin e lang pang tak pem panggarak onpogolar-e, ap nden unpugwi nap mberen, misik inggi kigit ambigit nggwe, misik inggi kware ambigit nggwe panggarak inpiga-o. 28(Iri kwat yid iri-ge, Mbal Pem Nagawan engga bem-nen yosolar-e: ”At tet meya kwaroso nab-o luk uburujwa-o” luk yidnak iri na ndak ndag-et kwat yij-o.)

29Nde, ap iri nggwe lagolat wagolat-nen at inggiri worogolat, enanggul mbisik tak pogolat-nen yak togolar-e: ”Su! ’Mbal Pem Nagawan wi mijarak puruk, kenan tarem nak wirimin-o’ yigen nap kat yu-ge 30kat kambikpebe kimiri yosolar-e, e lang pang tak pem-nen mbuwasug-o” luk yak tiga-o. 31Iri nggal-et tepan omborak nagawan nagawan min imiri mbarak pidnak wene enaru nap min-nen at pesel obogolat-nen yak kerak mbogolar-e: ”At yu-ge nin nap inmiri yoso-t nde, at ambikpebe imiri yurag-e meya yusu-o. 32At yu-ge Kerisut, Isarael nap nagawan nde ala-ge, e lang pang tak pem-nen mbumag-o. Mbuwasola-ge, nit-nen iri karuk at ebem ninndi angin tubu yuwok-nen-o” luk yiga-o. Iri-nen at imin e lang pang tak pem panggarak inpiga nap mberen-nen na irit at pesel ibiga-o.

Yesus wat yidnak wene

15:33-41

(Mt 27:45-56; Lk 23:44-49; Yo 19:28-30)

33Nde, o iri me pidsa lengge silmu jam duabelas pem-nen ndamuk irit worasolat, jam tiga agaij-o. 34Keyama, jam tiga yosoloma-ge, Yesus na ene ngguloksa yosolar-e: ”Eloi, Eloi, lama sabaktani?” luk yij-o. Wene iri yid iri-ge: ”Nembal Pem Nagawan wa-e. Nembel Pem Nagawan wa-e. Noluk-nen keya nibigen-o?” luk yosolat-nen yij-o. 35Yosoloma-ge, iri me woraiga nab-e at-nen yidnak wene kuluruk-nen yogolar-e: ”Koler-o. Elia wene mbo busu-o” luk yiga-o. 36Yogolikma-ge, ap misig-e puburak mberarig-e, ndum nggal pem anggut engen amburu amak worak yugut luk, e erep pem nggoksa puruk, Yesus emende bem posolat-nen yosolar-e: ”Pug-o. Elia na-nen at yu-e lang pang tak pem-nen ibil mbuma, lak? luk yik karok wolmog-o” luk yij-o. 37Yosoloma-ge, Yesus-nen nggwa lug-e, wat yij-o.

38Wat yosola-ge, Mbal Pem Nagawan ama uguri worak woraso sum na-ge abam nggwe-nen ngaksa ena nggwe mbosolar-e, mberen agaij-o. 39Nde, san ombo nagawan Yesus e lang pang tak urugwe nggwe mendak woragaid na-nen Yesus wat yosolat-nen kwarid iri kasoluk-nen yosolar-e: ”Ap yu-ge ndemeret Mbal Pem Nagawan Ambara kagi-o!” luk yij-o.

40Kweyap na irit o erepma-nen yik karok woraiga-o. It enggenggerag-e o Magaralena kwe Maria min Salome min Yakobus abok nderak min Yoses min iniya Maria min irit woraiga-o. 41Kweyap ereya-ge Yesus na Nggalilea worala-ge, at imin mbirigarik, ndegel piga kweyap irir-o. Nde, Yesus imin luk Yerusalem lobok yiga kweyap kwarat erep na irit iri me woraiga-o.

Yesus yapma piga wene

15:42-47

(Mt 27:57-61; Lk 23:50-56; Yo 19:38-42)

42O ki yosola-ge, Yusup Arimatea nap na lobok yij-o. 43Nde, at iri-ge wene mbarugwi nap ennggendumu-nen unu kek tag-o. Nde, at iri-ge Mbal Pem Nagawan-nen tenagaidnak wi wok ma-o luk yik karok woraso-o. Nde, at lobok yid tarem-e we wolmomtak pem lid lud tak pugwi tarem ala karug-e, Yusup na-ge kwiye lag-et Pilatus eram mberarik, Yesus orogak na nggi yij-o. 44Nggi yosoloma-ge, Pilatus na Yesus wat yid wene iri kulurug-e, wi yij-o. Wi lug-e, san ombo nagawan iri na yonggo puruk, at kin wok obosolar-e: ”Yesus na-ge pi wat yamu, lak?” luk kin wok ibij-o. 45Kin wok obosoloma-ge, san ombo nagawan na-nen ”Pi-net wat yamu-o” luk yak tosoloma-ge, ”At orogak iri-ge wani-o” luk Yusup na yak tij-o. 46Yak tosoloma-ge, Yusup-nen-e sum loro konak mbi onggo puruk, Yesus orogak na waga pil mbuwaruk, sum na-nen mbetla keya buruk, kerep ndobo puru bem-nen tela ondoro nenaridnak iri na me pil ngguruk, kerep nggok misik lembera tumende na nggelak pij-o. 47Iri kwarosola-ge, o Magaralena kwe Maria min Yoses ija Maria min-e Yesus yapma pidnak sa iri kwara kaiga-o.

Currently Selected:

MARAKUS 15: inondx

Highlight

Copy