MARAKUS 5
5
Nggerasa nap kugi arem lin yidnak wirik pidnak wene
5:1-20
(Mt 8:28-34; Lk 8:26-39)
1Yesus owosirak inmin-e Nggalilea koma eyak ele bem Nggerasa nap enma ndil laiga-o. 2Ndil lagarik, Yesus na e koma arem-nen mbidnggal-e, ap mbi-ge ap yapma inpidnak sa waring kaso iri na Yesus eram wok yij-o. 3Nde, ap iri-ge kugi arem lin yidnak me, ap yapma inpidnak sa nak woraso-o. Worala-ge, ap-nen kere posid kere bem kamarak pidnag-et nde, mondok meya-o. 4It-nen at kamarogolar-e, mbunu bem-et inggi ijok posid kere bem kamarak piga-t nde, ar-e posid kere na ndela keya bosolat, posid owak ijok pem pidnak na yigisa keya boso me, at amawi kwarat me, ap misik-nen ebem laruk nggweyak ma purak na meya-o. 5Ap iri-ge pempa lengge-nen kubu-nen ap yapma inpidnak sa-nen na, ndobo bem-nen na, ene kwa bem waring kasolar-e, kerep pem ondomok mbal koraso-o.
6Nde, iri yoso nap na-ge erepma-nen Yesus yik karuk, at eram puburak mberarik, at eram mbud luk erembel wanosolat-nen 7ene nggoksa yosolar-e: ”Kek tak woraso Mbal Pem Nagawan Ambara Yesus wa-e. Kar-e no kwat nubugun-o? Mbal Pem Nagawan unu bem-et kemengen mbarusu-o. An lel mberel nuburak pug-o” luk yij-o. 8(Iri yid iri-ge Yesus-nen kugi na yak tosolar-e: ”Kugi meya wa-e. Ap yu arem-nen kenangga mbiri-o” yak tosoloma-nen yij-o.)
9Yosoloma-ge, Yesus-nen kin wok obosolar-e: ”Kat kunu-ge ta-o?” luk kin wok obosoloma, at iri-nen yosolar-e: ”Nit nenpe-ge kwarat me, an nunu-ge kwarar-o” luk yij-o. 10Iri yurug-e, kugi iri na mbepme ereba wirik unpuwa naru, ar-e Yesus emengen kiri keresa mbarij-o.
11Nde, o iri koroga ereba me-ge wam kwarat ndobo eralu mungga nasolat woragaij-o. 12Worasola-ge, it kugi pidsa-nen Yesus emengen mbarogolar-e: ”Wam iri arem ngguwok-nen wirik ninpi-o” luk yiga-o. 13Yogolikma-ge, Yesus-nen: ”Ob-o” yak ondosoloma-ge, kugi meya na ap iri arem-nen mborogolar-e, wam ereba na arem nggwiga-o. Nggogolikma-ge, wam-e kwarat, duaribu nggal na-ge mberabak nggwe me, nggilaluk mbosolar-e, yi koma arem kerabera nggosolar-e, pip yonggok ndonggok wat yij-o.
14Iri lug-e, it wam yik karok woragwi nap na-ge puburak mborogolar-e, wene iri na-ge o siri iri me min o inggi inggi woragwi ereba min wene na wigarogola-ge, it ap-nen iri kwaridnak wene na kuluruk, kil lobok yiga-o. 15Kil lobok yogolat, Yesus eram wok yiganggal-e, kugi Kwarat arem lin yidnak woragaid nap iri na indi kwatluk, sum yutluk, iri me koreyak worala karuk, it pidsa kwiye kaiga-o. 16Kagolikma-ge, it inmbiri bem kwaridnak nap-nen-e kugi arem lin yidnak nap kwat ibidnak wene min wam iri na wene min kenggara yak indiga-o. 17Yak ondogolikma-ge, it-nen-e: ”Yesus wa-e. Nit nenma yu me wolmomtak pug-o. Mbiri-o” luk emengen mbariga-o. 18Yogoloma, Yesus na e koma arem nggosola-ge, kugi arem lin yidnak woraidnak nap na-nen emengen mbarosolar-e: ”Yesus wa-e. An-e totnor-o” luk Yesus emengen mbarij-o.
19Yosoloma-ge, Yesus-nen: ”Lag-o” luk, at yak tosolar-e: ”Kat kama kowe kowosi endam mburugundik, Nagawan Indo-nen kat kwat kibidnak wene min kat kubud-nen kwat kibidnak wene min it yak indil mbiri-o” luk yak tij-o.
20Yak tosoloma-ge, at iri na mborosolar-e, O Siri Sepulu iri me Yesus-nen kwat ibidnak wene wigaril mborosoloma-ge, ap pidsa-nen wi langgu mbariga-o.
Yairus ara min Yesus usum tenagaidnak kwe min-nen yidnak wene
5:21-43
(Mt 9:18-26; Lk 8:40-56)
21Yesus na tuguruk yi koma eyak ele bem-nen ndil wasola-ge, ap kwarat at eram yi koma eyak pem iri me ndok worogolar-e, at lop lop wiriga-o. 22It ndok wiriga ennggendumu-ge Yawuri nap tepan yugwi ma winde mbi unu-ge Yairus na lobok yarig-e, Yesus na karug-e, at eralu tud yij-o. 23Tud luk, ar-e kiri keresa Yesus emengen mbarosolar-e: ”An nara marik wat teyekluk yusu-o. Kat lobok yugundik an nara kinggi tena buruk, ki rak posola, uruk mag-o” luk yosoloma-ge.
24Yesus na-ge at imin luk mbirij-o. Mborosola-ge, ap kwarat at langgaluk mborogolar-e, inmik mik-nen panggona keya biga-o.
25Ereba na ennggendumu-ge kwe mbi-ge eyabi nak mborosolar-e, olengen duabelas woraidnak mbi woragaij-o. 26Woralar-e, ndoktet kwarat-nen obat wok togola, kwe na-nen at arengge pidsa ondoro rak pij-et nde, ki yigit lak, andi-ge nggokma nde yosolat woragaij-o. 27Kwe iri na-ge Yesus-nen kwaroso wene-ge koloso me, ap kwarat iri na ennggendumu nggosolar-e, Yesus ombol nggwe panggosa mborosolar-e, Yesus usum erep tenabeyekluk-nen 28perasolar-e: ”We at usum erep nak tena bimin pemnet ki yimin-o” luk peragaij-o.
29Usum tena bosola ereya na-net eyabi pok yosoloma-ge, ondomok abage lombot pidnggal-e abu ki yidnak irit kagaij-o. 30Tena bosola ereya na-net Yesus na-ge at ebem-nen amawi nggigisa mborosola karug-e, nden karuk, ap kwarat iri na ennggendumu yik kasolat-nen kin wok onposolar-e: ”Ta-nen an nusum erep tena bij-o?” luk yij-o.
31Yosoloma-ge, at owosirak-nen at yak togolar-e: ”Ap kwarat inmik mik-nen panggon kibili yu-t nde, kar-e ’Ta-n tena nibij-o?’ luk yusu-a?” luk yak tiga-o.
32Alat nde, Yesus-e at usum erep tena bid kore yosolar-e, eralu ya na mbenarij-o. 33Mbenarosoloma-ge, kwe na-ge at ebem kwaridnak na aru me, kwiye-nen ebem kot kot yosola, lobok yarik, Yesus eralu tud luk, at kwat ibidnak wene na lud tak nag-et para yak tij-o. 34Yak tosola-ge, Yesus-nen kwe iri yak tosolar-e: ”Nara-o. Kat kindi angin tubu yigen iri na-nen kimiri yij-o. Kindi yek tag-et mbiri-o. Kar-e abu ki yigen-o” luk yak tij-o.
35Wene iri yak tosoma-ge, ap Yairus ama-nen ap lobok yigarik, at yak togolar-e: ”Kat kara na-ge mondok wat yamu-o. Noluk-nen Mul Nondoso Nap yu anggun panggun tak ubusu-o?” luk yiga-o.
36Iri yogola kagir-et Yesus-nen Yawuri nap tepan yugwi sa o winde Yairus na yak tosolar-e: ”Kar-e kwiye kasu-ge meyog-o. Kindi angin tubu yi-o” luk yak tij-o. 37Yak turug-e, ”Ap misiger-o luk tet an nimbirik lobok yurak pug-o” yurug-e, Peterus min Yakobus min owot Yoanes min nak mbiriga-o. 38Mbirigarig-e, ir-e Yawuri nap tepan yugwi ma winde Yairus na ama wok yogolat, Yesus-nen yik eneyagaidnggal-e, ap kwarat-nen sa nggwa mbogolat, yip lenggu marogola, kulij-o. 39Kuluruk, Yesus na o ma nggwarik-nen it yak ondosolar-e: ”Kir-e noluk-nen sa nggwa mbogolat, yip yu nggal yili-o? La kwe yu-ge wat yigit lag-o. We nene yusu-o” luk yak indij-o.
40Yak ondosoloma-ge, it-nen at nda wat obogola karug-e, at-nen it pidsa mbepme wirik unpuruk, la kwe na eid ija min at owosirak kenan na inmin lug-e, la kwe worasu sa na nggwiga-o. 41Nggwigarig-e, at-nen la kwe iri na inggi tena buruk, Iberani wene bem yak tosolar-e: ”Talita kum” yij-o. Iri yid iri-ge nit nenne bem yogolar-e: ”La kwe yu-ge wa-e. Men min-o yak kurusu-o” yosolat-nen yij-o.
42Iri yosola ereya na-net la kwe iri na-ge men luk, waring kagaij-o. (La kwe iri-ge olengen duabelas woraidnag-o.) Iri kwarosola kaiga nab-e mondok kwiye kwarat yiga-o. 43Alat nde, Yesus-nen ene amawi min it yak ondosolar-e: ”Wene yu-ge ap misiger-o luk tet mondok yak undurak pug-o” yak undurug-e: ”La kwe yu-ge mburu mak ter-o” luk yak indij-o.
Currently Selected:
MARAKUS 5: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
