MARAKUS 8
8
Yesus-nen ap kwarat, enpe 4,000, mburu mak indid wene
8:1-10
(Mt 15:32-39)
1Siyag-et woraruk misik tarem-e ap kwarat tuguruk Yesus eram ndok worogola-ge, ir-e nunggwi mende mondok lak alama karug-e, Yesus-nen at owosirak wene mbo unpuruk, yak ondosolar-e: 2”Ap kwarat yu-ge an totno woragolat kenan tarem-et nene yidnak me, nunggwi mende na lak yidnak ala, an-nen-e enabuwa kasu-o. 3It erep na unuwi erepma-nen lobok yidnak me, an-nen nere min-et wirik unpumu-ge, tundumu inkiris paga mbud ma-o” luk yak indij-o.
4Yak ondosoloma, at owosirak-nen wene erep nggarogolar-e: ”Karu me yu nggal ma-nen-e nunggwi mende-ge ngga-nen wanuruk, ap kwarat yu-ge ndak mak undurag-o?” luk yiga-o.
5Yogolikma-ge, Yesus-nen it kin wok onposolar-e: ”Kir-e oroti mburu-ge nunggwirik worasu-o?” luk yosoloma, it-nen-e: ”Tuju worasu-o” luk yiga-o.
6Yogolikma-ge, Yesus-nen ap kwarat na ene amawi min-et yak ondosolar-e: ”Nggweyak pem kore yil mberer-o” yak unduruk yarig-e, oroti mburu tuju na wanuruk, ”Mbal Pem Nagawan, wa-o” yak turuk, ndeksa ligik puruk, owosirak-nen ap kwarat yu na tembet unduwakluk, wok indij-o. Wok ondosoloma-ge, it-nen ap kwarat na tembet indiga-o. 7Nde, ir-e keyane marik siyak mbi woragaid ereya na-ge Yesus-nen-e: ”Mbal Pem Nagawan, wa-o” yuruk, at owosirak na yak ondosolar-e: ”Keyane yu na iri nggal-et kwasa tembet ender-o” luk yak indij-o. 8Tembet indikma-ge, ap pidsa inmbitsa ningga-o. Nde, ningga nab-e enpe 4,000 nggal-o. 9Mak unduruk, Yesus owosirak-nen-e erep minggirik iri na ndok wurukmu-ge, mul sum tuju irit kobong yij-o. Iri rak purug-e, Yesus-nen ap ereba na wirik unpurug-e. 10Yesus owosirak inmin-e ereya na-net e koma bem Ndalmanuta uwi mbiriga-o.
Parisi nap-nen ”Kagwi buk mende kwari-o” luk yiga wene
8:11-13
(Mt 16:1-4)
11Mberamu-ge, Parisi nap erep mbi Yesus eram lobok yogolar-e, at imin ngguno tel korogolat, at abut mbaruwokluk-nen yak togolar-e: ”Kat nde Mbal Pem Nagawan-nen kibil lobok yidnak ala-ge, kagwi buk mende mbi kwari-o” luk yak tiga-o. 12Yak togolikma-ge, Yesus na-nen: ”O” luk, indi age wirik puruk-nen yosolar-e: ”Kit yawo worali nap yu-ge noluk-nen kagwi buk mende nggi yili-o? Mondok lag-o. An-e kagwi buk mende mbi mondok mirik kinpimin pug-o” luk yij-o.
13Yurug-e, it keyap tak unpuruk, e koma arem tuguruk ngguruk, eyak ele bem ndil lagaij-o.
Parisi nap min Erores min-nen idnak lomboroso mende wene
8:14-21
(Mt 16:5-12)
14Mborogolar-e, at owosirak na-ge oroti mburu meme rak puruk lobok yidnak me, e koma arem-e oroti mburu misiget nak nde waruk lobok yiga-o. 15Nde, Yesus-nen it yak ondosolar-e: ”Parisi nap min Erores min-nen idnak oroti lomboroso mende abiyem-o luk, mondok kwil kwalsa wolmer-o” luk yak indij-o.
16Yak ondosoloma-ge, it na-nen yak kerak mbogolar-e: ”At iri yusu iri-ge nit-nen oroti mburu waruk lobok yigit lak yige iri bem-nen yusu-o” luk yak kerak mbiga-o.
17Yogolikma-ge, Yesus-e it-nen wene nggok tak pili na-ge aru luk, it yak ondosolar-e: ”Noluk-nen kir-e oroti waruk lobok yigit lak yidnak wene nde nggok tak pili-o? Kir-e yenggerak puruk, kinndi yebet kali bug-a? Kinndi ebebeyal worak-nen yili, lak? 18Kit kenlengen-e worasu-t nde, kali bug-a? Keneyanggo na worasu-t nde, kulili bug-a? Kir-e yu na yep tak worali bug-a? 19Oroti mburu lima nag-et nde, ndeksa puruk, ap lima ribu (5,000) mak indigi na-ge, erep minggirig-e mul sum-e nunggwirik arem yarak pigeb-o?” luk yij-o. Yosoloma-ge, it-nen yak togolar-e: ”Mul sum-e duabelas kobong yid nar-o” luk yiga-o.
20”Nde, iri-nen oroti mburu tuju nag-et nde, ap empat ribu (4,000) mak indigi na-ge, erep minggirig-e mul sum nunggwirik arem yarak pigeb-o?” luk yij-o. Yosoloma-ge, it-nen at yak togolar-e: ”Mul sum-e tuju yat yid nar-o” luk yiga-o.
21Yogolikma-ge, Yesus-nen it yak ondosolar-e: ”Irit nde, kir-e awo yenggerak pigit lak yili-a?” luk yak indij-o.
O Mbetsaira-nen ap erengen ngguru mbi Yesus-nen erengen kuwarak pid wene
8:22-26
22Nde, ir-e Mbetsaira wok yiga-o. Wok yogolikma-ge, ap-nen-e ap erengen ngguru mbi Yesus eram pil lobok yurug-e, Yesus-nen ap erengen ngguru iri na tena buwakluk, at emengen mbariga-o. 23Emengen mbarogolikma-ge, Yesus-nen-e ap erengen ngguru na inggi tenaburuk, o silmu-nen waruk mberarig-e, erengen pem wusi toboksa puruk, inggi tenaburuk-nen kin wok obosolar-e: ”Yawo kar-e yi mende ndi mende mbi kasu, lak, lag-a?” luk kin wok ibij-o.
24Kin wok obosoloma-ge, erengen abam nggwe lik karuk-nen yosolar-e: ”Ye. Ap eneyasu-t nde, ir-e e-nen tu mborosola nggal nde eneyasu-o” luk yij-o.
25Yosoloma-ge, Yesus na-nen inggi-ge ap na erengen tuguruk tenabosoloma-ge, at-nen kwara yik kagaidnggal-e, erengen kuwak yosolar-e, yi mende ndi mende pidsa nam nak kagaij-o. 26Iri rak puruk, Yesus-nen ap yu na wirik obosolat-nen yak tosolar-e: ”Kar-e o silmu nggwe mbururak pug-o” luk yak tij-o.
Peterus-nen: ”Kar-e Kerisut-nen yusu-o” luk nam-et para yidnak wene
8:27-30
(Mt 16:13-20; Lk 9:18-21)
27Iri rak puruk yarig-e, Yesus owosirak inmin mborogolar-e, o Kaisaria Pilipi o siri inggi nggwe ya wok mborogolar-e, tundumu-nen Yesus-nen at owosirak kin wok onposolar-e: ”Ap-nen an nimin-e ta nde neberali-o?” luk kin wok inpij-o.
28Kin wok onposoloma-ge, it-nen wene onggo yogolar-e: ”It erep-nen-e Yoanes ap yi maroso nap-nen yusu-o luk yili-o. Nde, erep-nen-e Elia-o luk yili-o. Nde, ap erep-nen yogolar-e: Mbal Pem Nagawan ene lomboksa yugwi nap ereba ennggendumu ap misik-nen yusu-o luk yili-o” luk yiga-o.
29Yogolikma-ge, at-nen kin wok onposolar-e: ”Nde, kit-nen-e ta nde neberali-o?” luk kin wok onposoloma-ge, Peterus-nen yosolar-e: ”Kar-e Kerisut-nen yusu-o” luk yij-o.
30Yosoloma-ge, Yesus-nen ene amawi min-et yak ondosolar-e: ”Kir-e an nowene iri-ge ap misiger-o luk tet mondok yak undurak pug-o” luk yak indij-o.
Yesus-nen at andi bandi rak uburak wene min at wat momtak wene min yak indid wene
8:31–9:1
(Mt 16:21-28; Lk 9:22-27)
31Yak unduruk yarig-e, Yesus na-nen at owosirak mul ondosolar-e: ”Ap Ambara iri-ge kwarat andi bandi kujwa-o. Nde, andi bandi kasolar-e, ogore yidnak nap min tepan omborak nagawan nagawan min imiri mbarak pidnak wene enaru nap min-nen pelek pelek tak puruk, wuruwa-o. Wuruwama-ge, mberen nene luk, tuguruk uruk tak puwa-o” luk yij-o. 32Yesus-nen-e nam-et para at owosirak na wene iri yak indij-o. Yak ondosoloma-ge, Peterus-nen Yesus imin luk, enarikmu laigarig-e, ”Kat iri nggal yusu meyog-o” luk yak tij-o. 33Yak tosoloma-ge, Yesus na nden karuk, owosirak erep na yik eneyasolat-nen Peterus na met posolar-e: ”Sere wa-e. Kar-e mbiri-o! Kar-e Mbal Pem Nagawan-nen peraso mende yebet kagit lag-et ki nap-nen peragwi mende nak yebet kasu-o!” luk yak tij-o.
34Yak turug-e, ap kwarat min at owosirak inmin wene mbo unpuruk-nen it na yak ondosolar-e: ”Ap-nen nimbirik nurak ala-ge, at-net at ambikpebe isili rak puruk, e lang pang tak ebem pidnak na pijanuruk, an nimbirik nuwag-o. 35Ta-nen nde at indi abuwa nggok tak puwa nab-e uruk wolma bug-o. Alat nde, an nebem ala na, aid wene bem ala na, at indi abuwa lak tak puwa nab-e at ondomok imiri yaga wanuwa-o. 36Ap-nen-e o nggweyak yu pidsa winde yuwa-t nde, at ondomok indi pul yuwarig-e, no nde lesa wanuwa-o? Wewesa-o! 37At uruk wolmomtak iri na-ge yi mende ndi mende min onggo onggo rak purag-e ndag-a? 38Yawo Mbal Pem Nagawan keya buruk, meya nak kwatli tarem-nen an min an-nen mul ondoso wene min para yurak ininggiri pasiyem tak puwa nab-e, abok Ap Ambara an-e Neid abinal min lenak inpidnak aid nap inmin lobok yosolar-e, iri yuwa nap na it onpok para yurak na an-nen ninggiri pasiyem tak pimin-o” luk yij-o.
Currently Selected:
MARAKUS 8: inondx
Highlight
Share
Copy
Want to have your highlights saved across all your devices? Sign up or sign in
@LAI 1992, 1994
