YOHANES 5

Mampakeleh oloh hong talaga Betesda

1Limbah te aton pesta ain oloh Yehudi, maka Yesus haguet akan Yerusalem. 2Hong Yerusalem tokep “Lawang Tabiri” #5:2: tokep “Lawang Tabiri” aton ije talaga: atawa tokep “Kolam Tabiri” aton ije eka. aton ije talaga, je huang basa Ibrani inggare Betesda.#5:2: Betesda: pire-pire naskah jaman horan: Betsata. Intu hete aton lime laladang. 3Hong kare laladang te are oloh haban menter; aton je babute, aton je batimpang, tuntang aton je lumpuh. [Ewen uras mentai danum hong talaga te hariak. 4Basa aton katikae malekat Tuhan mohon akan talaga te tuntang mampariak danume. Tuntang oloh haban je pangkasolake tame akan huang talaga te metoh danume hariak, tau keleh bara panyakit en bewei je buah ie.] 5Hong eka te aton ije oloh hatue je jari haban telo puluh hanya nyelo katahie. 6Yesus mite ie menter intu hete tuntang katawan je ie jari tahi toto haban; maka Yesus misek ie, “En ikau maku keleh?”

7Oloh haban te tombah, “Bapa, jaton oloh hong hetoh je tau mampasewu aku akan talaga te katika danume hariak. Tuntang pandehan aku manalih talaga oloh beken jari sewu helo bara aku.”

8Maka Yesus hamauh dengae, “Hingkat ih, gatang amakm tuntang haguet mananjong.” 9Hemben te kea oloh te keleh. Ie manggatang amake tuntang mananjong.

Hal te manjadi hong andau Sabat. 10#Neh. 13:19; Yer. 17:21 Tagal te kare panguasa Yehudi hamauh dengan oloh je harue keleh te, “Andau toh andau Sabat. Ikau dia tau manggatang amakm.”

11Tapi oloh te tombah, “Oloh je mampakeleh aku endau manyoho aku manggatang amakku tuntang mananjong.”

12“Eweh Ie je manyoho ikau manggatang amakm tuntang mananjong?” koan ewen misek.

13Tapi oloh je jari keleh te dia katawan eweh oloh te, basa Yesus jari jaton hong marak oloh are te.

14Limbah te tinai Yesus hasondau dengan oloh te hong Human Tuhan, tuntang hamauh dengae, “Toh ikau jari keleh. Ela ih badosa tinai mangat dia buah taloh je labih papa.”

15Maka oloh te haguet palus mansanan akan kare panguasa Yehudi je Yesus te je jari mampakeleh ie. 16Tuntang tagal te ewen manggau jalan uka mangapehe Yesus, basa Ie mampakeleh oloh hong andau Sabat.

17Tapi Yesus hamauh dengan ewen, “Bapa-Ku harajur bagawi sampai wayah toh, tuntang Aku mahin bagawi kea.”

18Kare auh te mawi kare panguasa Yehudi sasar manggau akal uka mampatei Ie. Ewen mawie kalote, dia baya awi Ie malanggar atoran agama tahiu Andau Sabat, tapi awi Ie kea hamauh je Hatalla te Bapae; rimae Ie manyama arepe dengan Hatalla.

Kuasa ain Anak

19Yesus tombah kare oloh te kalotoh, “Percaya bewei, Anak jaton tau malalus taloh en-en hapan kuasae kabuat. Ie baya malalus taloh je gitae ilalus awi Bapae. Karana taloh je ilalus awi Bapa, jete kea je ilalus awi Anak. 20Basa Bapa sinta Anak tuntang mamparahan Akae kakare taloh je Awie kabuat. Bapa handak mamparahan Akae gawi je labih hai haream sampai keton hengan. 21Bapa te mambelom oloh matei tuntang manenga akan ewen pambelom je bujur tuntang katatahie; kalote kea Anak manenga pambelom je katatahie akan oloh je akae te Ie handak manenga pambelom. 22Bapa kabuat dia mahakim eweh bewei. Salepah kuasae hapan mahakim jari inyarah akan Anak. 23Bapa malalus jete mangat oloh samandiai mahormat Anak kilau ewen mahormat Bapa. Oloh je dia mahormat Anak dia kea mahormat Bapa je manyoho Anak.

24Toto haliai kare auh-Ku toh: Oloh je manantuani kare auh-Ku, tuntang percaya dengan Ie je manyoho Aku, oloh te mandino pambelom je bujur tuntang katatahie. Ie dia akan ihukum; ie jari liwus bara pampatei tuntang mandino pambelom. 25Percaya bewei: Kareh dumah katikae – toh mahin jari sampai katikae – oloh matei kareh mahining auh Anak Hatalla. Tuntang oloh je mahining jete kareh belom. 26Sama kilau Bapa kabuat batang pambelom, Ie manjadian Anak Ayue batang pambelom kea. 27Ie jari manenga akan Anak Ayue hak mangat mahakim, awi Ie Anak Olon. 28Ela keton hengan mahining hal toh, karana katikae kareh sampai kakare oloh je jari matei mahining auhe, 29#Dan. 12:2 palus balua bara kubur. Oloh je jari malalus gawi bahalap kareh misik tuntang belom. Tapi oloh je jari malalus gawi papa kareh misik tuntang ihukum.”

Kare bukti tahiu Yesus

30“Aku jaton tau malalus taloh en-en awi kahandak-Ku kabuat. Aku baya mahakim tumon je inyoho Hatalla. Tuntang kaputusan je iawi-Ku te bujur, awi Aku dia manumon kahandak-Ku kabuat, malengkan kahandak Bapa je manyoho Aku.

31Paribasa Aku manenga kasaksian tahiu arep-Ku kabuat, maka kasaksian te dia tau imercaya. 32Tapi aton oloh beken je manenga kasaksian tahiu Aku, tuntang Aku katawan je kasaksian Ayue te toto. 33#Yoh. 1:19-27, 3:27-30 Keton jari manyoho oloh manalih Yohanes, tuntang ie jari manenga kasaksian je toto tahiu Aku. 34Aku mansanan hal toh dia awi Aku manggau kasaksian bara olon, tapi mangat keton inyalamat. 35Yohanes te kilau sumbo je hanyala tuntang mampamancar kalawa. Pandehan toh keton hanjak manarima kalawa te. 36Tapi kasaksian ayung-Ku labih hai bara kasaksian Yohanes. Taloh je iawi-Ku wayah toh, iete gawi je inyoho Bapa Aku mawie, jete mambukti je Bapa jari manyoho Aku. 37#Mat. 3:17; Mrk. 1:11; Luk. 3:22 Tuntang Bapa je manyoho Aku, manenga kea kasaksian tahiu Aku. Keton hindai puji mahining auh Ayue atawa mite ampin Aie. 38Kare auh Ayue jaton melai hong atei keton awi keton dia percaya dengang-Ku je inyoho Awie. 39Keton bajar tahiu Surat Barasih awi keton manyangka hapan cara jete keton tau mandino pambelom je bujur tuntang katatahie. Tuntang Surat Barasih te kabuat manenga kasaksian tahiu Aku. 40Tapi keton dia maku dumah manalih Aku mangat mandino pambelom je katatahie.

41Aku dia manggau tara bara oloh kalunen. 42Aku kasene keton. Aku katawan keton dia sinta Hatalla huang atei keton. 43Aku dumah mahapan kuasan Bapa-Ku, tapi keton dia manarima Aku. Tapi amon oloh beken dumah dengan kuasae kabuat, keton maku manarima ie. 44Kilen ampie keton tau percaya, amon keton manggau tara bara sama arep keton, tuntang dia manggau jalan mandino tara bara Hatalla je Tunggal? 45Ela manyangka Aku kareh manyalan keton intu taharep Bapa. Je kareh manyalan keton iete Moses, ie je iharap keton. 46Paribasae keton percaya dengan Moses, keton kea handak percaya dengang-Ku, basa ie manyurat tahiu Aku. 47Tapi amon keton dia percaya dengan taloh je inyurat Moses, kilen ampie keton tau percaya dengan taloh je insanang-Ku?”

Currently Selected:

YOHANES 5: NIJ

Highlight

Copy