Tekang Kbuten 22
22
Ktilów Dwata ke Abraham
1Kogolen bè yó, tnilów Dwata Abraham ke tahu yóm kimónen du, tnabahen, monen, “Ó Abraham.”
Mon Abraham se, “Hó. Ni ou.”
2Bud mon Dwata, “Nitem Isak, yóm tek sotu ngaem, yóm alì kenbong nawahem. Mógów ye etu bè benwu Muraya. Angat wen bulul toloku kóm ditu, ne ditu tahen gónóm hmatay du mò dsù hkekebem ebéléu.”
3Tahu se, hol hlafus bè yó, wen koyu nsô Abraham mò snuken yóm hedsù Dwata du. Ominen lemulón du ta yóm kudà asnu ne niten Isak. Ne wen lewu bè yó kem gel tóbóng lówóhen bud nwiten. Mógów le ebè yóm benwu deng tulón Dwata du. 4Bè yóm deng getlu le kdaw mógów, ton Abraham mayuk yóm bulul tulón Dwata du. 5Ominen mon du bè yó kem tóbóng lówóhen, monen, “Na ye tebel bè ni bè kudà. Na me mógów etuu lewu me nim ngau na me e tmaba ebè Dwata bè yó, bud me mulék edini kedeng.”
6Htihang Abraham ke Isak yóm koyu snuken yóm dsuen ne fen du mit yóm suk ne yóm bala ofi. Yóm igò le mógów, 7yó mon Isak mò ke maen, “Ó Mà.”
Bnalà Abraham se, monen, “Boluyen de, ngà?”
Mon Isak, “Wen ofi nwit te ne wen snuken okóm nô se yóm ngà ubiha mò dsuem du?”
8Yó balà Abraham du, monen, “Dwata he, ngà, fen bemlay du kut yóm mò dsù te.” Omin le yó hlós.
9Timbow le kól bè yóm benwu deng tulón Dwata ke Abraham, omin Abraham semsodò yóm botu mò gónón demsù, ne senfótólen tahen yó kem koyu nwiten. Ominen mfét ke Isak ne hlasaen ta yó kem koyu deng senfótólen yó. 10Ominen ma yóm suk ne hol tô hnatayen se yóm ngaen, 11sen-gengen se wen hógów Dwata tmaba ebéléen gu bè longit, monen, “Ó Abraham, Abraham.”
Mon Abraham se, “Hó. Ni ou.”
12Bud mon yóm hógów Dwata, “Hlasaem yóm suk. Béen abay wen nmoem béléen yóm ngà. Ni ne deng tngónu wen klikoem ke Dwata ne tey kimónem du, abay se là kô nalihem du béléen yóm hol tek són ngaem.”
13Ominen tódô wen ubiha logi ton Abraham geskét lem yóm ngà koyu lefungu hangahen. Ne tódô nwahen, ominen hmatay du ne hkekeben ebè Dwata mò dsuen mò tles yóm ngaen tô dsuen. 14Yó hlós boluy Abraham du yóm bulul yó, “Dwata fen bemlay.” Efet nim kmoen ni, gel mon yó kem tau, “Bè yóm kun bulul Dwata, du fen bemlay.”
15Ominen bud tmaba ebè Abraham bè gewuhen dulék yóm hógów Dwata tmaba gu bè longit yó koni, monen, 16“Ni wen hol fasad mget fasadu kóm hlanu bè boluyu. Ou se Dwata mon du nim ni. Lemwót bè yóm deng nmoem ni, yóm là kngalihem du dou yóm tek sotu ngaem, tendo tnóbóngu uu. 17Ne angat hol hwenu bólem, lómón kwen le blotik bè longit ne lómón kwen le helek bè kilil mohin. Ne angat le gel matù bè yó kem hohon le. 18Lemwót bè yóm tey kimónem dou, angat wen bè yó kem bólem gónóhu hlan du yóm tóbóngu yóm kdéen but tau talak tonok.” 19Kogolen bè yó, omin le Abraham mulék ebè yó kem tóbóng lówóhen mangat kul ne bud le slomong mulék ebè Birsiba, yóm benwu gónó Abraham henek nô.
20Kogolen bè yó, gungol Abraham deng wolu ne kem ngà Milka logi, yóm yehen yóm dumun sulil-lem boluyen Nahor. 21Yó boluy le lenwóten bè twogu, Us, ne Bus ne Kimwél (yóm gónó le gu semfu yó kem tau Aram), 22ominen Kis ne Hasu ne Pildas ne Jidlaf ne Bituél. 23Mngà Bituél, duhen Ribika. 24Yó bud tnù yó kem wolu ngà Milka logi, bud wen kem ngà Nahor bè yóm libun nmuhen boluyen Ruma. Yó boluy le, Tiba ne Tahas ne Maaka.
Currently Selected:
Tekang Kbuten 22: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
