LUKAS 24

Yesus Ara Embengaʾ Suboka Bukok Yuba

(Mat. 28:1-10; Mrk. 16:1-8; Yoh. 20:1-10)

1Dara minggu en men sum era, hyak lugunaʾ nong enyek, gelewa dara, gen-gen song meklaʾ ab, ngiknaʾ meka meewoka beiyimekaʾ ab bobek dara, Yesus diyimek girik damek sam bo byik. 2Yesus diyimekaʾ ak balamek enyek, diyimek girik era seleb dangawoka demegemokaʾ ak eibek. 3Wera sikda Yesus diyimek girik dam nong ok sam byik bok, Wenelesilnya Yesus alja beʾ ara, eibnenggubek.

4Gelewa dara, sikda ganya ebsukaʾ anasa, anam seiniro seklemek dara, wene salek enyek nimi penya nang geisa akleng ok ongo-ongo bilirek nang enyek sik berem sekdek. 5Wera gelewa dara, hyak lok ganya boboka, hogunga sokok oumuwoka ulumek bok, penya nang danadya sikenek, ” Nimi somoklomakaʾ ak sam ab embengaʾ suboka bukelanya benyek, ugunda hekasa an elelum do? 6#Mat. 16:21, 17:22-23, 20:18-19; Mrk. 8:31, 9:31, 10:33-34; Luk. 9:22, 18:31-33Alda seleb subumlakanya, anyagan unggulumla! Alda Galilea ulumok sum enyek, ugunuk lebsukaʾ anyek, ugunda pe bekoka seiniwanalum. 7Ara, nimi dibaʾ me nera malya unaʾ nim ek doboka eleganamak dara, alda oboka gal ak glabnemaakanya, lika winilyabaʾ sum era embengaʾ suboka buknamla, hyok,” herek. 8Danyek wera gelewa dara, Yesus adya men sikenek lesuk yub era seiniwek.

9Wera Yesus dilinaʾ ak ab gelewa dara yeiniboka, Yesus adyaʾ goklombadya yuba doro diriga ban nang eb, yok yuba dolomek nim ek hnon, nidyaʾ sikja eibekaʾ ara nekdo yek. 10Nidyaʾ unumokaʾ anyek, Yesus adya yuba doro diriga ban nang ek nekdo yeilimek gelewa dara, Maria Magdalena geb, Yohana geb, Yakobus alja genong Maria geb, ono sikeneb neikaʾ ulumek gelewa dadya, yok nim ek hnon nekdo yek. 11Bok yuba lero ban nang edya dara, gelewa danadya lebek yuba dara, or salyaʾ lelem sondaʾ amba miniwoka lebak gom senemek. Anya sikda gelewa danadya nekdo yek yub era dib senewanggumek. 12Bok Petrus bera alda Yesus dilinaʾ ak sam yeiriwoka bik-bika kemel byuk. Biniboka geiniwoka lomok sam kemelemok enyek, gouluwoka keboka diyimek boksom ok eibuk. Petrus bera nidyaʾ unumokaʾ anyek seleb okoka eibuk dara, alda saaboka ganya gong seinibgiga ek sam yok.

Emaus Heikek Ban Pikek Ab Ubok Yuba

(Mrk. 16:12-13)

13Dara onoʾ al neik sum enyek, Yesus adya yuba doro diriga ban nanga penya mek heik, si ara Emaus heikek, Yerusalem heikek ab dara, Olsekla uboka Ngeregen heikek anaso, heikek balarek. 14Sikda pikek anam balarek ek ab dara, yokaʾ-yokaʾ nidyaʾ seleb unumokaʾ anyek sabgiga balarek. 15Wera sikda anam wenyaboka ganya aamaʾ ubdangoka unuwo aboka sabgiga balarek salek enyek, Yesus ara sik gangganek sam geleleng yeiniboka neikaʾ balamek. 16Sikda Yesus ak dara, okoka eilin dara eiyirek bok, okoka al nong ella dangan dara, yokaʾ adya gom ella danggurek.

17Danyek Yesus adya sikenek, ”Ugunda hekaʾ yub ak pik enyek anara salarum do?” aboka heibsuk. Sikda hogunga sal-salyaʾ uboka balarekaʾ ara sek lobdek. 18Dara onoʾ penya nang danara, ben hnonda alja si nera, Kleopas bedya Yesus ak, ”Neyung o, anak hnonok wera Yerusalem heikek anara sekel yanggannya benya bek ululamaʾ adya, wene salek yokaʾ-yokaʾ unulamlaʾ ara, okoka eilinggululam de?” aboka heibuk.

19Danyek Yesus adya sikenek, ”Hekaʾ ak unulamlaʾ ak do?” aboka heibsuk. Wenyek penya nang edya, ”Nazaret mok ebnya Yesus ak an unulamlaʾ anyek,” herek. ”Alda ununumnaʾ lelelanya bek ulumok. Alja yuba sanaʾ gom, alja nong ununaʾ gom ara hyak senenggom migib edya unulumok. Nera or Imik Neyung adya gom, nim adyaʾ anaba pelemla senelemek. 20Imik Neyung yuba wa gakaʾ dub nang eb, nunjaʾ Yahudi sokok sam dub nang eb dadya, bera oboka dibnelum aboka doboka elegeisik dara, wera seleb oboka galak glarob! 21Alda nunja dara, alja Israeli sokok nidyaʾ blebnesil senelemouba! Anya wera al orob salek era, sum winilinya sum era dal. 22Anya hnonda, nu gangganek an ulumak gelewa dadya, nunja ganya lobaʾ nenewoka loka dangiyisak. Hyak lugunaʾ nong enyek gelewa dara, Yesus diyirobaʾ nong ok sam bilibmak. 23Bok Yesus adya beʾ gal ara eibnenggumak. Dara onoʾ on pik yeiniboka, ‘Nunda lero nanga hnon eiyimab, dara lero nang enedya Yesus ara seleb suboka embengaʾ bukumla arak,’ aro yeilimak. 24Anya nunjaʾ hemyab edya hnon nang era biniboka seleb kemel bilimak bok, Yesus ak dara, aldib eibnenggumak,” herek.

25Dara Yesus adya sikenek lebnesukaʾ ara, ”Ugunda hyak dongdang anaʾ nang ek ulurum! Ununumnaʾ lelemek nang edya ugunuk nidyaʾ lesikaʾ ara, ugunda okoka berra ganya dib senenggulurum nang ek ulurum! 26Kristus, nimi blebsinaʾ dubnya bera, men dara, hyak nauba igina kweboka gweknamlakanya, eimik era alda imik senenggomnya dubnya nenewanamla henggubuk de?” hyok. 27Dara onoʾ Yesus adya sikenek sam, men danyek Musa bedya hnon, nidyaʾ ununumnaʾ len nang edya alsamba leboka momnya dorob yub enyek lelewoka neksuk.

28Wera balarekaʾ ara heik berem lanal binomaʾ aboka ubdek. Alda Yesus ak dara or anam bindibiganamnaʾ anaso uyiwosuk, 29bok sikja danyek alak banggom aboka salaleng sok ubdek. Anya sikja alak, ”Wera seleb iniwalaganya gunaʾ dalaʾ anasa, anda nunja ek an mabnelam,” aboka lebdek. Dara Yesus ara sikjaʾ ek mabnunaʾ aboka neikaʾ wekek.

30Wera neikaʾ bukoka delemeekanya, Yesus ara gwanenga doboka, Imik Neyung ak perob aboka giboka molowok dara, gwaneng era alja soruk adya soboka, sikenek bokoka elegosuk. 31Danyek sikja dara, anara Yesus ak senewoka ella dangarek. Bok al anam kemel yaberek sab-sab enyek dengaro lobok. 32Dara sik moumen lel dalarekja, ”Pikek anam yalmanam dara, nub neikaʾ yuba salmab dara, Imik Neyung yuba bukuk sam ulumla yub enyek, nuk nidyaʾ lelewoka nekelmeisil dara, nunja ganya weldo-weldo sekelmeisilaʾ anano?” herek.

33Dara wenyek sikda sekoka onoʾ Yerusalem heikek yarek. Wera Yerusalem heikek ara, Yesus yuba doro diriga banaʾ goklombadya nang era, yok nang eb neikaʾ longomekaʾ ak eibsirek. 34Dara nang danadya sikenek, ”Alda Wenelesilnya bera aldib seleb embengaʾ suboka bukumla! Alda Simon bek seleb nara embengaʾ subna aboka laga aabdangamla!” herek. 35Dara onoʾ wenyok anam yarek yuba donaʾ nang edya, sik pikek anam balarek salek enyek unusukaʾ hnon, hnonda sikeneb neikaʾ gwaneng soboka demekaʾ anyek neksirik.

Yesus Ara Subna Aboka Laga Aabdok Yuba

(Mat. 28:16-20; Mrk. 16:14-18; Yoh. 20:19-23; Kis. 1:6-8)

36Sikda wenyaboka nekoka anam yuba saro balamek sab-sab, Yesus ara sik gangganek sekoka lebokja, ”Ganya heknaʾ ara, ugunuk ulusulul!” hyok. 37Sikja dara, bisaʾ ak eiyimabaʾ aboka lok dangoka, loka dabek. 38Bok Yesus adya dara, ”Ugunda hekasa ganya eb menegoka, onoʾ lok ganya bololum do? Hekasa ugunja ganya lomok wili-wale alalum do? 39Na nong anyek an okoka ulumnaʾ anasa ugunda ella dananulum! Ugunda nak an kendunululum. Bisaʾ ganya ara nong soub ab, yok ab dara unggulumlaʾ anasa, wera na nong ak ulunabok anasa, nadya soruka yana soruka salabyaawoka ubnululum,” hyok.

40Yesus ara wenyaboka alja soruk eb yan ab sikenek aawosuk. 41Wera sikda hnon ganya era, anam lok gar-gadyaʾ uboka ei-ei ganya bobekaʾ adya, anam dib senewanggubek salek enyek, Yesus ara sikenek, ”Ugunda denaʾ hnon beiyilum gom?” aboka heibsuk. 42Dara sikja Yesus ak hadyaʾ gararobaʾ penya dob elegek. 43Wenyek Yesus ara sik hogung ak sam laga doboka jok.

44Seleb dara Yesus adya sikenek, ”Ban yub enyek ugunda nablaboka anam ulumouba dara, seleb ugunuk leb elegesisa ara, Imik Neyung yuba bukuk sam, Musa bedya unuwanalum an yuba webok bukuk sam hnon, ununumnaʾ len nang edya webek bukuk sam hnon, Mazmur yub ek momnya dobokaʾ nidyaʾ ara gigiwoka unuwanamla amsaʾ ara an,” hyok.

45Dara onoʾ Yesus adya, Imik Neyung yuba momnya domokaʾ ara anasa aboka ella danokaʾ aboka, sikja ganya bakdebsuk. 46Onoʾ hnon Yesus adya sikenek, ”Imik Neyung yuba bukuk lomok sam ara lero momnya dobokja, Kristus, nimi blebsinaʾ dubnya bera nauba igina kweboka gweknamlakanya, winilinya sum era somoklomakaʾ ak ab onsok embengaʾ suboka buknamla. 47Anya onoʾ nimi blebsinaʾ dubnya bedya si pik moruwoka, nidyaʾ soko yuba lero yabalameija dara, sikda nidyaʾ malya unaʾ ak ab ganya dangawanamak dara, Imik Neyung adya sikja malya unaʾ sikenek ab sobaʾ meewanasil. Anasa, ban lero ban yub era Yerusalem heikek ab uboka einiwanamak. 48Ugun nong anyek, ban damok en eiblum nang ulumnelum e. 49#Kis. 1:4Nadyaʾ anaba, Imik Neyung adya ugunuk lebsukaʾ anyek, ugunuk bokol yanasin. Bok ugunda al heik enyek anyek ok ulumunaʾ ara, imik migib era ugunuk goulul yanasil,” hyok.

Yesus Ara Imik Heikek Welewok Yuba

(Mrk. 16:19-20; Kis. 1:9-11)

50Wera Yesus ara alja yuba doro diriga ban nanga nidyaʾ heikek abaʾ ara bo gobsuukanya, Betania heikek bo busuk. Anyek anyeb dara, alja soruk lakoka, alja mab ek perobaʾ leb elegosuk. 51Ban unul yabok sab-sab, alda sikenek ab bokdangoka, imik heikek doboka bo welewok. 52Sikda nidyaʾ Yesus ak gibgogoweekanya, hyak ei-eiya ganya boboka Yerusalem heikek yek. 53Anya sikda Imik Neyung ek sam wekoka, Imik Neyung ak sobaʾ perob aboka gibelsinilemek.

Currently Selected:

LUKAS 24: LAINLC

Highlight

Copy