MATIUS 23
23
Parisi Nang Eb Yuba Wa Gak Nang Enesa Leboka Wenewosuk Yuba
(Mrk. 12:38-39; Luk. 11:43, 46, 20:45-46)
1Dara onoʾ Yesus adya alja yuba doro diriga ban nang ek hnon, yok longomek nimi nauba ak hnon lebokaʾ ara, 2”Imik Neyung yuba lesinaʾ gak nang eb Parisi nang eb dara, momnya domok yuba damok enesa unuwok aboka yana lelen damba Musa bek lunuwek. 3Anasa wera sikja yuba lelemakaʾ ara pe keboka nidyaʾ unulumnulum bok, sikja unulumak ununaʾ nong era, sikja yuba lelemakaʾ sunuwoka ununggulumakaʾ anasa, ugunda sikja diligaʾ donaʾ ara mem. 4Sikda iginnya nenyek, nimi yok nim ek bol dilimak bok, sikja dara, uruma anaba mekaʾ donaʾ orok. 5#Bil. 15:38; Ul. 6:8; Mat. 6:1Sikja unulumaknya nera, nimi yok nim edya pelemak senenanya nenyek laga unulumak. Sikda Imik Neyung ak giblenunaʾ aboka gweidyaʾ sobnedamaʾ ab warana ongolmorun akleng eb dara, nimi kemen danasa ongolomak! 6Sikda masa senenggomaʾ youboka delemnaʾ ak ara, eibsinok senenaʾ ak ok bukoka, Yahudi nim edya yuba don ek ara, men nonokdob ekla bunaʾ ak ok wekoka bulumak. 7Hnonda, senenggom deknaʾ gasaʾ ak ara, Neyung neklesilimnya, perob aboka giblesinok senewoka, nim hogung dibnelewoka sekdo yabalamak.”
8”Anasa ugunuk dara, ugunjaʾ neksinya bera hnonok ok ulusilekanya, ugunda nidyaʾ hiboka, hemyab ok ululumaʾ anasa, neksin nang aldanaʾ ara mem. 9Wera, ugunjaʾ neyung bera hnonok ok, al imik heikek ululanya bek hnonok ulumlaʾ anasa, nimi hnonok sibin anaba sokok anara neyung anaʾ ara mem. 10Ugun bo usinya bera hnonok ok, Kristus, Imik Neyung adya soko nim blebnamla amoknya bek hnonok bo usinya ulumlaʾ anasa, ugunja dara, nuk bo usin nang aldanaʾ ara mem. 11#Mat. 20:26-27; Mrk. 9:35, 10:43-44; Luk. 22:26Ugun gangganek an senenggomaʾ ulumak nim era, wera ugunuk arawoka welemnemak nim ara an. 12#Luk. 14:11, 18:14Wenyek ganya imik nenebdangoka ulumak nim era, eimik era sokok nenewanasilikanya, onoʾ wenyek ganya sokok nenebdangoka ulumak nim enyek, eimik era sikenek imik nenewanasil,” hyok.
Sene Or-or UnaĘľ Amba Mem Hyok Yuba
(Mrk. 12:40; Luk. 11:39-42, 44, 52, 20:47)
13”Ugunda yuba neksin nang eb Parisi nang eb dara, hyak omom nongaʾ ak ululum! Ugun hyak sene bol nenenaʾ hwam nim ek ululum. Ugunda nimi yok nang era, Imik Neyung wenesin heikek pika garalelum. Ugun nong anaba Imik Neyung mabo danganggululumukanya, yok nim Imik Neyung wenesin heikek pika garalelum. 14Ugunda yuba neksin nang eb Parisi nim eb dara, hyak omom nongaʾ ak uboka sene bol nenesinaʾ hwam nim ululum. Ugunda nenya orok gelewa ek sondaʾ leboka, sikja ek ulumlaʾ doluwoka dololumukanya, yok nim eibsinokaʾ aboka, ugunda heng uboka waranaʾ mololelum. Ban unululumaʾ adya ugun nong anyek hyak nauba obnesil. 15Ugun yuba neksin nang eb, Parisi nim eb dara, hyak omomaʾ ak ululum! Ugunda hyak sene bol nenenaʾ hwam nim ek ululum! Ugunda nimi hnonoknya bemba, nunja dolomab yub ek nimi hnonok makesilyaʾ anaba aboka, senenggom mek gwan pik biniboka, hnonda hyak mok sam biniboka yeiriwoka elelum. Wera bera seleb ugunja dololum yub ek sam maksin dara, alda uka desin heik delemnalanya uboka, alja yu hwam era lika penya sounuwoka dangalamla.”
16”Ugunda hyak heng lum dub nang uboka hyak omomaʾ ak ululum! Ugunja yok nim ek sam yuba neknamna dara, nim Imik Neyung saramek ak dib unuwanamna alamla dara, wenyananya bera Imik Neyung gibnaʾ e sibuka yuba garalamla dara, dib danganggulumla, bok alda Imik Neyung ek ulumla bonaʾ ek si sibuka dib unuwanamna alamla dara, dib dangalamla, alalum. 17Ugunda heng luma hyak dongdang anaʾ nang ek ululum! Ugunja dara, har nerek perob senelelum, perob bonaʾ enyek goma, Imik Neyung e adya perob bonaʾ en munaʾ geblamlaʾ anyek perob senelelum gom? 18Onoʾ ugunja yok nim ek yuba lebnamna dara, nimi ben hnon alja Imik Neyung amba uka daboka gibnaʾ oulyang ak si sibuka dib unuwanamna alamla dara, dib danganggululabok, alda bo beil bilimna bonaʾ ek si sibuka dib unuwanamna alamla dara, dib dangalamla, alalum. 19Ugunda hyak heng lum nang ululum. Ugunja dara, har nerek perob dib senelelum do? Imik Neyung amba bo beil balamak bonaʾ enyek perob gom, alda uka daboka gibnaʾ oulyang edya munaʾ geblamlaʾ anyek perob gom? 20Anasa wera, nimi ben hnon Imik Neyung amba uka daboka gibnaʾ oulyang ak si sibuka dib unuwanamna alamla dara, wera bera alda uka daboka gibnaʾ oulyang ab an eilib beillilemak bonaʾ ab hiboka amba si sibuka dibaʾ wenyalamla. 21Onoʾ nimi ben hnon yuba don e ak si sibuka dib unuwanamna alamla dara, wera yuba don e nenesa hnon lelemlakanya, onoʾ e nenyek an ululanya bek hnon si sibuka dibaʾ wenyalamla. 22#Yes. 66:1; Mat. 5:34Anya onoʾ nimi ben hnon imik heikek si sibuka dibaʾ unuwanamna alamla dara, wera nera Imik Neyung bulumla ekla ak hnon, Imik Neyung bululanya bek hnon, si sibuka dibaʾ wenyalamla.”
23 #
Im. 27:30
”Ugun unuwanalum an yuba neksin nang eb Parisi nim eb dara, hyakaʾ omom nongaʾ ak ululum! Ugunda hyak or-or unaʾ hwam nim ek ululum. Masa dokoka youlumakaʾ digumaʾ song meklaʾ, gourumnaʾ, doknaʾ meklaʾ ara, sagenya nera Wenelesilnya bek bo beil balalumjok, Imik Neyung yub ek sam momnya dobokaʾ ara, pe seiniwoka unaʾ ab, angoo yadyek senenaʾ ab, bojam unaʾ ab, dara dib nong bok, ugunja dara dolbaleka geblelum. Ban dibnya unulumnesomokanya, yoknya neneba lobnenggunusom. 24Ugunda hyak heng lumaʾ bo usin nang ek ululum! Poma ugunjaʾ den mekek sam weklelanya nera ugunda gwadyaʾ yaboka dololum bok, ugunjaʾ abaksin pam edya dara doboka meneklelum! 25Ugunda yuba neksin nang eb Parisi nim eb dara, hyak omom nongaʾ ak ululum! Ugunda hyak sene bol nenenaʾ hwam nim ek ululum! Ugunja denaʾ yanganaʾ ab mek hmeiya ab dara, or eilibek ok mek eleklelum bok, lomok sam ara hokaʾ donaʾ ab, yu ganya unuruwaʾ ab dadya deknewoka ulumla. 26Ugunda Parisi heng lum nim o! Ugunja denaʾ yanganaʾ ab mek hmeiya ab dara, lomok sam anyek pe mek elegomunaʾ anadya, wera eilibik sam anaba pe geisa ubnamla!”
27 #
Kis. 23:3
”Ugunda yuba neksin nang eb Parisi nim eb dara, hyak omomaʾ ak ululum! Ugunda hyak sene bol nenenaʾ nim ek ululum! Ugunda geisaʾ adya ngikimna nimi beʾ anasoʾ ak ululum. Eilibek sam ara geisa ngiklemak bok, lomok sam ara blolomla song eb, yokaʾ-yokaʾ malyaʾ adya ok deknewoka ulumla sokaʾ ak ululum. 28Anasa ugunda anaso nim ek ululum. Ugunda hogung adya dara, yok nim ek pe ulumak nim senen bok, ugunja ganya lomok ara sondaʾ hwam ab bleknaʾ mandebnaʾ ab dadya deknenaʾ hwam nim ek ululum,” ara Yesus adya wenyhusuk.
Parisi Nang Yuba Neksin Nang Obnesil Hyok Yuba
(Luk. 11:47-51)
29”Ugunda yuba neksin nang eb, Parisi nim eb dara, hyak omom nongaʾ ak ululum! Ugunda hyak sene bol nenesinaʾ hwam nim ek ululum! Ugunda ununumnaʾ len nanga dilinaʾ ak sam pe meewoka, nimi pe ulumek nang dilinaʾ sam pe memelelum. 30Anya ugunja dara, Nunda youmaʾ nunjaʾ neyung yabo ulumek nim eb, neikaʾ ulusibya dara, ununumnaʾ len nang era nunja dara, hyak mekaʾ obnenggunusibya, alalum. 31Bok ugun dam nang adya, ununumnaʾ len nang obek nang yilaʾ era nunda an ulumab aboka, laga leldalalum! 32Wera anasa, ugunja neyung yab edya unulumek malya unaʾ era, ugunja unubgiga sidyaʾ daknalum!”
33”Ugun nong ara bagaʾ anaso malya unaʾ nim ululumukanya, onoʾ ugunja neyung yab eneba anaso nim ulumek! Uka delesil heikek oboka uka desin heikek ab hekadya nunda blebdanamab senelelum do? 34Anasa pe keblulum. Nara eimik era ugunuk sam ununumnaʾ len nang eb, geremseng un nang eb, yuba neksin nang eb bokol yanasin dara, hnon nim era ugun nong adya obnelum, dara onoʾ hnon nim era oboka gal ak glabnelum. Hnon darasam nim era ugun Yahudi nim edya yuba don ek sam ab malya nenewoka saboka olomnelum, onoʾ yok nim era ugunja hnon heikek abaʾ ara doboka obgiga yok heikek sam doboka ora doblemnelum. 35Anasa wera, nimi nidyaʾ malya unaʾ orok bok salyaʾ oblumaʾ ara, pe ulumoknya Habel bek abaʾ obdongora youlumaʾ ara moruwoka Berekhya bedya me Zakharia bera Imik Neyung e lomok uka daboka gibnaʾ oulyang berem oblumaʾ amba leboka, Imik Neyung adya ugumba lunuwoka nauba obnesil. 36Ugunda banyek dib senewanalum. Ban nidyaʾ lebnanya nera, wen an ugun liklum nim ek danasil,” hyok.
Yesus Ara Yerusalem Heik Ak Yadyek Ubok Yuba
(Luk. 13:34-35)
37”Yerusalem o, Yerusalem o! Ununumnaʾ len nanga nidyaʾ ara anja oblum. Imik Neyung adya anak bokol yalanjok nim era, anja nidyaʾ girik adya seikoka saboka oblum. Anak an ulunjak nim era, wining adya alaʾ me ak ol lomok sam doronggoka bolomla sok ubnunaʾ aboka ulunabok, anja lek alalamaʾ anasa lobna! 38Ban nenesa leboka, Imik Neyung ara anja e nek ara lobnamlakanya, ganya gwe henemla. 39Ugunda dib senewanalumaʾ ara, ugunda wene salek enyek moruwoka dibaʾ gobdo eibnenggununulumukanya, ban lebnelum sum enyek, alda Wenelesilnya be si sibuka yalalanya bera perobaʾ dangalalul, hemun sum ek eibnenulum,” hyok.
Currently Selected:
MATIUS 23: LAINLC
Highlight
Share
Copy
Want to have your highlights saved across all your devices? Sign up or sign in
