MATIUS 27
27
Yesus Ara Pilatus Bek Bo Byik Yuba
(Mrk. 15:1; Luk. 23:1-2; Yoh. 18:28-32)
1Hyak lugunaĘľ nonga gwelegel yabok dara, nidyaĘľ Imik Neyung yuba wa gakaĘľ dub nang eb, Yahudi soko dub nang eb dara, Yesus oboka dibnemab aboka seleb yuba sabdakoka garawek. 2Wera sikda Yesus ak gel heng adya goubeekanya, Roma nim dubnya Pilatus bek bo elegel byik.
Yudas Yuba Diyimoknya Somogok Yuba
(Kis. 1:18-19)
3 #
Kis. 1:18-19
Wera Yesus amba yuba dil bilimoknya Yudas bera, Yesus ara seleb oboka dibnemak an yuba kebok dara, alda angoo salya ubsa senewok. Dara yuba dil bilimokaʾ amba aboka perak rupiah dengaʾ hnonok elegemekaʾ ara, Imik Neyung yuba wa gakaʾ dub nang eb, Yahudi soko dub nang ek sik dam nang lolonggol busuk. 4Dara Yudas bera, ”Nara malya unaʾ oroknya bek salyaʾ oblulum aboka yuba dibsaʾ ak, nara malya ubsa,” hyok. Bok sikda alak lebekja, ”Nera nunja de? Amba anjinya!” hyek. 5Anasa Yudas bera dengnaʾ domok rupiah era Imik Neyung e lomok sam salyaʾ bobok loboka, byuukanya, al nong ara henga ngangak geregoka galek elekdok.
6Dara, Imik Neyung yuba wa gakaʾ dub nang edya, ban rupiah era sik dam nang dobeekanya, lebnemekaʾ ara, ”Ban rupiah enera nim olumnaʾ rupiah. Nunja yub ek sam lelemlaʾ ara, Imik Neyung ek sam ara nenesonya nera beilinaʾ mem hyok,” hyek. 7Wenhyek dara, rupiah era, solowaka unuruwaʾ memen damba si silimak soko ek dekek. Dara, ”Ban soko era sekel yanggan nang ek somogan enyek soko lokna danasa lebab,” hyek. 8Ban unumekaʾ amba leboka, ban soko era wenebabya, ”Eneng deknaʾ soko,” alamak. 9#Za. 11:12-13Ban unuweknya nera, youmaʾ ununumnaʾ lelemoknya Yeremia bedya lebokja, ”Israeli nim edya alsamba aboka perak rupiah denga hnonok domek. 10Wenelesilnya bedya nak orugenyok sok sunuwoka, sikja ban rupiah enedya hein soko dekemek,” amoknya nera an gigiwok.
Pilatus Bera Yesus Ak Yana Lelebok Yuba
(Mrk. 15:2-5; Luk. 23:3-5; Yoh. 18:33-38)
11Wera Yesus ara bo balamekaʾ ara, Yudea mok soko dubnya Pilatus bek bo byik. Dara, Pilatus bedya Yesus ak, ”Anak Yahudi nang dubnya ululam de?” wenyaboka heibok. Wenyek Yesus ara, ”Alan anja seleb lelam an,” hyok. 12Bok Imik Neyung yuba wa gakaʾ dub nang eb, Yahudi sokok dub nang eb dadya, Yesus ak yok-yok damoka yana kiboka lelemek dara, alda yuba hnon mekaʾ doro sabnenggumok. 13Wera anasa, Pilatus bera Yesus ak, ”Anda yokaʾ-yokaʾ ara anak sam yana kilinjakaʾ ara eiyilam gom?” wenyaboka lebok. 14Bok Yesus ara yuba hyak mekaʾ doro sabnenggubuk enyek, Pilatus bedya dara seilinya senewok.
Yesus Ara Gal Ak Oboka Glabek Yuba
(Mrk. 15:6-15; Luk. 23:13-25; Yoh. 18:39–19:16)
15Wera Israeli nim edya, hnon perob sum oka dan dara, gibnaʾ gigiro mok soko dubnya bera, nim adya lebnaʾ sunuwoka, henga geregamna nim era hnon henga lob lomok. 16Anasa ban salek era, nimi ben hnon alja si nera Barabas, alja ununaʾ edya nimi nidyaʾ ella ulumeknya bek, henga geregoka beiyimek. 17Wera anasa, nimi longowek dara, Pilatus bedya sikenek, ”Ugunja dara, heknyek nunsamba henga lob lobsulul senelum do? Barabas bek lob lobnesin gom, Yesus, Kristus alamaknya benyek lob lobnesin gom?” wenyaboka heibsuk. 18Pilatus bedya, ban wenyaboka leboknya nera, Yahudi dub nang edya Yesus ara sikja hman ganya boboka alak oboka dibnemab aboka doboka elegemekaʾ anasa, ella umokaʾ adya lebok.
19Wera Pilatus bera nimi yana lelesin ek anam bulumok salek, alja gel gedya momnya donaʾ beibukaʾ ara, ”Nara alsamba hnon omom so lendara enyek manabok anasa, anda malya unaʾ oroknya bemba yub enyek, neikaʾ denewoka sanaʾ ara mem loblom,” hyok. 20Bok Imik Neyung yuba wa gakaʾ dub nang eb, Yahudi soko dub nang eb dadya, yok nim ek dukaʾ lolowoka, Barabas bek dara nunsamba henga lob lobnesilem, alda Yesus ak dara, dibaʾ oboka gal ak glabnemak henelum aboka yeiriwoka lelemek. 21Anasa, mok soko dubnya Pilatus bera sikenek, ”Ban penya nang danara, ugunja dara, heknyek nunsamba henga lob lobnesil senelum do?” wenyaboka heibsuk. Wenyek sikda, ”Barabas benyek nunsamba henga lob lobsilom,” hyek. 22Dara onoʾ Pilatus bera, ”Wera Yesus, Kristus alamaknya bera, nadya dara, hekaʾ hubnamna do?” wenyaboka heibsuk. Anasa sikda, ”Alak dara, oboka gal ak glabnok,” hyek. 23”Bok alak okoka oboka dibneseng malya unaʾ era hekaʾ ak ubok do?” wenyaboka lebok. Bok sikda hyak yeiriwoka, ”Alda oboka gal ak glabnok!” wenyaboka lelemek.
24 #
Ul. 21:6-9
Anedya Pilatus bera albeyok dookanya, yok nim era nauba adya, mem aboka yuba seknamen danggubuk. Anasa alda nimi hnoum laga meka doboka, alja soruka meka elekdangoka lebokaʾ ara, ”Ban somoganamlaʾ ara nadya huka bobnenggunumna! Nera ugunja huka borowolum!” hyok. 25Dara nimi nidyaʾ anyagan wekemek nim edya, ”Yo, Yesus somoganamlaʾ ara, nun an wen umab nim eb, nunja mab eimik liknemak nim eb dadya, huka bobab!” hyek. 26Dara Pilatus bera, Barabas bera henga lob lobookanya, nimi nauba wekemekaʾ ak Yesus ara saboka ololulum aboka orugookanya, oboka gal ak glabnelum aboka doboka elegosuk.
Yin BonaĘľ Nang Yesus Ak Obek Yuba
(Mrk. 15:16-20; Yoh. 19:2-3)
27Dara yin bonaʾ nang edya Yesus ara doboka, mok soko amba yuba san e senenggom e eremek bo yek dara, yok yin bonaʾ nang nidyaʾ hiboka Yesus ak akneb ganagoka longowek. 28Dara sikda Yesus adya akleng era gwiriwoka, mouk dok bokaʾ akleng ongiyiwek. 29Anya si heng adya Yesus adyaʾ huk ak gweboka gwaragiyiwek. Dara onoʾ gamaʾ dungunaʾ adya, Yesus adyaʾ sirik soruk ak sam beiyiboka, aljaʾ saramek sam kom lumugoka derewoka walamek. Anya lelemekja, ”Yahudi nim dubnya o, perob aboka gibjab!” aboka sene wenyalamek. 30Dara Yesus ak gamalaʾ solob goluwoka, ikimek gamaʾ edya wisa golowom-golowom aro olomek. 31Anya Yesus ak hyak nauba malya geboka saboka obgogowek dara, mouk dok akleng ongiyimekaʾ ara gwiriwoka, onoʾ alja akleng yokaʾ ongiyiwek. Dara oboka glabnobaʾ aboka bo byik.
Yesus Ara Galek Oboka Glabek Yuba
(Mrk. 15:21-32; Luk. 23:26-43; Yoh. 19:17-27)
32Dara Yesus oboka dibnobaʾ bo bek salek, Kirene mok ebnya alja si Simon bek eibek. Dara sikda benyek an dukaʾ lolom-lolom aboka, Yesus adya oboka glabnemek gal era, alak boblom aboka boyiwek. 33Dara bo balameknya nera, mok soko si Golgota meinik sam, nunja yub edya dara, ”Nimi huk yanggol meinik,” alamek meinik sam bo byik. 34#Mzm. 69:22Dara anyagan era, linggum mek adya powegemek mek enyek, Yesus ak delom aboka sik diniyiwek. Bok alda debyaawoka lobok.
35 #
Mzm. 22:19
Nen seleb dara, oboka glameekanya, yina bomdewoka, alja boksom dobnobaʾ aboka yina akleng bomdewek. 36Unubgogowoka, yin bonaʾ nang era Yesus adya beʾ dakoka dobijek aboka diri ulumek. 37Dara Yesus oboka glamek gal dubuk alja huk dameijek ara, sikja sondaʾ amba yana kiboka omek mininaʾ yuba, ”Yahudi nim dubnya Yesus ara an e,” an momnya donaʾ enyek weboka elegemek. 38Dara onoʾ Yesus ab nimi hokaʾ donaʾ nanga penya neikaʾ, ben hnonda sirikek sam, ben hnonda waneng ek sam, oboka glabsik. 39#Mzm. 22:8, 109:25Dara Yesus oboka gal ak glamekaʾ pik an yaban nim edya dara, nganga gwakdewoka, Yesus ak derewoka walamek. 40#Mat. 26:61; Yoh. 2:19Sikja wenyalamekaʾ ara, ”Imik Neyung e golowoka beibnyekanya, nadya dara, lika winilya ok sobnamna alalamnya benyaʾ! Anya, anda aldib Imik Neyung me ulumen dara, wera oboka glanjakaʾ al ab, buru beiya yinggimenekanya, saaboka blebdalom!” wenyaboka walamek.
41Anasonya neneba, Imik Neyung yuba wa gakaʾ dub nang eb, yuba neksin nang eb, Yahudi dub nang eb dadyaʾ anaba, alak wenyaboka walamekaʾ ara, 42”Nimi yok nim ek dara, merellilisil bok anasa, wera al damnya saaboka blebdamenggom! Alda aldib Israeli nim dubnya ululyebok dara, wera oboka glamak galak ab mereboka yinggilya enyek, nunda alak dib senewanamab. 43#Mzm. 22:9Alda Imik Neyung dib senelamlakanya, nara Imik Neyung bedya me aldalamla. Wera anasa, Imik Neyung alja senemlyaʾ dara, laga blebel yabalyaʾ ak eibnob,” wenyaboka derelemek. 44Hnonda Yesus ab neikaʾ oboka glasik nang edyaʾ anaba, neik so unu derewoka walarek.
Yesus Ara Dubhwina Dakok Yuba
(Mrk. 15:33-41; Luk. 23:44-49; Yoh. 19:28-30)
45Dara hyak yubyek dukdukanek nong enyek, mok soko nidyaʾ ara iniwoka gunaʾ ok dok. 46#Mzm. 22:2Dara onoʾ sin dangoka henga wekel bununaʾ aboka dalaloblamla wenyek, Yesus ara yuba nauba bii aboka, ”Eli, Eli, lama sabakhtani?” Nunja yub era, ”Nadyaʾ Imik Neyung o, nadyaʾ Imik Neyung o, hekasa nak gwab lobnelem do?” aboka bii alamok. 47Wenyek nimi wene nim anyagan seklemek nim era, unu gwekel yabokaʾ ak kebek nim edya dara, ”Alda Elia bek youblamla!” wenyabdek. 48#Mzm. 69:22Onoʾ nimi ben hnon sik gangganek ab, berra aboka esaʾ anyek yu mekek sam hwiboka bo yookanya, gal benggenaʾ ak lomowoka Yesus adyaʾ sibamaʾ ak diniyiwok. 49Bok yok nang edya danyek, ”Nera men ununggom, Elia bedya yeiniboka blebel yabelyaʾ anyek, eibnemab bar!” hyek.
50Dara onoĘľ Yesus ara hyak nauba ebngalogoka ngeboka ganya dibaĘľ dubhina dakoka somogok. 51#Kel. 26:31-33Ban salek era, Imik Neyung ek sam wiknelemek boksom akleng perobaĘľ ara, imik abaĘľ ara sokok gweldek dakok. Anya senenggom sougumaĘľ dorogoka, girika nidyaĘľ ara salyaĘľ joboka lekdo yibuk. 52Hnonda nimi somogomekaĘľ, seleb soko lokomek nim beĘľ nidyaĘľ ara, pika bakdo yibuukanya, nim Imik Neyung geisa mabo bok somogomek nimi nauba era embengaĘľ suboka bura yibek. 53Wera Yesus ara seleb somogoka embengaĘľ suboka bukok dara, ban nim Imik Neyung mab ulumek bok men somogomek nim era, sikba embengaĘľ suboka Yerusalem geisa heikek wekel yalamekaĘľ ak, nimi nauba eibik.
54Dara yin bonaʾ nang dubnya beb, alja mab eb dara, sogoumaʾ warawokaʾ nidyaʾ unuru yibokaʾ ak eibek dara, hyak loka dabsuk. Anasa yin bonaʾ dubnya bedya, ”Aldib ban benera Imik Neyung bedya me ulumo e!” hyok. 55#Luk. 8:2-3Wera neikek ara, gelewa nauba mok so ab uboka Yesus ak kemero seklemek. Ban gelewa danara, hnonda Yesus ak Galilea mok ebaʾ ara arawoka neikaʾ yabalamek gelewa. 56Gelewa dara, Maria Magdalena ge hnon, Yakobus beb Yusuf beb sikjaʾ genong Maria ge hnon, Zebedeus bedya mabo sikjaʾ genong geb, gelewa danyek seklemek.
Yesus Ara Dibek Yuba
(Mrk. 15:42-47; Luk. 23:50-56; Yoh. 19:38-42)
57Iniwonunaʾ aboka gunaʾ dakal yabok salek era, Yusuf be Arematea moka perobnya bera mok enyek an yeilimok. Albabya Yesus ak diriga bannya ulumoknya. 58Dara alda Pilatus bek biniboka, Yesus adya beʾ dakoka dibnamna aboka molowok. Dara Pilatus bera, Yesus adyaʾ beʾ era, ”Benedya or dakoka dibnamla,” hyok. 59Dara Yusuf bera, Yesus adya beʾ era dakoka, wenyek nekesa geisa boksom akleng edya nong ara wamiyiwok. 60Anya Yusuf bera, alja orowek hoklomok girik lomok meinik sam doronggok. An unu doronggoka, senenggom girik edya pik ara gasa dangawoka serek loboka byuk. 61Bok Maria Magdalena geb, yok Maria geb dara, an dibokaʾ ak an mok so ab kemero bulurek.
Yesus Diyimek Ak Nimi Wemek Yuba
62Wera sek sum yeiniboka, ampum maboka gwelegok dara, Imik Neyung yuba wa gakaʾ dub nang eb Parisi nang eb dara, Pilatus bek biniboka, 63#Mat. 16:21, 17:23, 20:19; Mrk. 8:31, 9:31, 10:33-34; Luk. 9:22, 18:31-33lebekja, ”Neyung o, youmaʾ sondaʾ hwamnya bera anam embengaʾ ulumok salek era, hnon seleb wenyalamokaʾ ara, Liga winilya seleb mablye dara, embengaʾ suboka buknamna, alamok. 64Anya, alja yuba doro diriga ban nang edya dobijekanya, sondaʾ anasa wera seleb embengaʾ suboka bukiyiwal hijek aboka, nimi yok nang ek lika winilya websiniwanalum aboka oruganesilim. Dara, youmaʾ sondaʾ lelemoknya nera, dolbalek so bok, eimik sondaʾ lebnesaknya nek dara, hyak okna deisilyek anasa,” aboka lebek.
65Anasa Pilatus bera sikenek, ”Ugun dam nang or anyagan nimi yin bonaʾ nanga hnon boboka, hyak pero-pero keeboka welenokaʾ aboka meewoululum,” hyok. 66Dara sikda Yesus diyimekaʾ ak sam biniboka, pika seregemek girik era gasa darawoka seregeekanya, Yesus beʾ nongok mekaʾ galanaʾ lobnokaʾ aboka, yin bonaʾ nanga weboka sekiyiwek.
Currently Selected:
MATIUS 27: LAINLC
Highlight
Share
Copy
Want to have your highlights saved across all your devices? Sign up or sign in
