MARKUS 3
3
Soruka Darasam Heimoknya Hwebok Yuba
(Mat. 12:9-14; Luk. 6:6-11)
1Wera yok sum enyek Yesus ara saaboka, Yahudi nim edya yuba don ek wekel balamok. Dara, anyaganara, soruka darasam somogomoknya be hnon ulumok. 2Dara nimi hnonda, Yesus adya meknewoka Sabat mem sum bok, nimi hweblya dara, alak malya nenewoka uniyiwanamab aboka, nang era dibnelemek. 3Wenyek Yesus adya soruka darasam somogomoknya bek, ”Hnoumung an sekel yalom,” hyok. 4Dara onoʾ anyagan ulumek nim ek Yesus adya, ”Nunja dolomab yub edya dara, Sabat mem sum era hekaʾ ak or unulululum hyok do? Perobnya nek ok unulululum hyok gom, malyinya nek unulululum hyok gom? Nimi nonga bleblelulum hyok gom, ololulum hyok gom?” aboka heibsuk. Bok sikda dogom ab ligiwek.
5Dara Yesus ara yu ganya boboka gokgoba nidyaʾ keeb ganagoka ubok bok, Parisi nanga nong anyek, hyak gasa ganya bolomekaʾ anasa, alda angoo senewoka ganya sugumok. Dara Yesus adya soruka somogomoknya bek lebokaʾ ara, ”Anja soruka nginigalom,” hyok. Wera bera, soruka nginigok dara, al wene salek enyek merewok. 6Dara Parisi nim era, goboka yibiikanya, Herodes nang eb neikaʾ hiboka, Yesus ak hekaʾ huboka obnemab do aboka yuba salamek.
Nauba Mek Gemek Sam Nimi Nauba Meriyiwosuk Yuba
7-8Wera Yesus ab, alja yuba doro diriga ban nang eb dara, lanaboka Galilea mek gwan gemek sam byik. Dara, Galilea mok sam ulumek nimi nauba, Yesus ak dobol yalamek. Sikda nidyaʾ Yesus ak yalamekaʾ ara, alja nidyaʾ unulamla an yuba kemekaʾ anasa, eibnobaʾ aboka alak yalamek. Dara, Yudea sokok ab, Yerusalem heikek ab, Idumea mok eb, Yordan meka gemek yali sam ab, Tirus heikek mok ab, Sidon heik mok ab, yalamek. 9Nimi nauba longol yalamekaʾ anasa, Yesus adya, nimi mandebnaʾ danedya nak goknenaʾ anasa, mek ekla bunaʾ hnon bo yananulum aboka alja yuba don nim ek orugusuk. 10Yesus ara nimi nauba merellilisukaʾ anasa, yok neiklemek nang edya dara, alak bebeganob senewoka, ol gogoldalamek. 11Dara bisaʾ gong era, Yesus ak eibnaʾ gigiro, al saramek oumuwoka gibnekanya, ”Anda Imik Neyung bedya me ululam e!” alamek. 12Bok Yesus ara, bisaʾ gong ek an, alda benyek ulumla anaʾ ara mem aboka nauba wenyalasuk.
Yesus Ara Obadya Yuba LenaĘľ Gak Nang Weboka Dobsuk Yuba
(Mat. 10:1-4; Luk. 6:12-16)
13Yesus ara, alda meinik sam welewoka bukumok dara, alja nak yanaseng senemok nang era, yoululum husuk dara, wera nang dara, alak yek. 14Dara, Yesus adya obadya nang ek sekiyiwookanya, yuba lenaĘľ gak nang aboka si sibuk. Ban unuwokaĘľ ara, alablaboka neikaĘľ ulunokaĘľ aboka hnon, perob yuba lelenokaĘľ aboka hnon, 15anya bisaĘľ yaknaĘľ migib bo ulunok senewoka, oruklenunaĘľ aboka sekiyisuk.
16Wera ban obadya nang sikja si nera ban, Ben hnon alja si nera Simon, bok Petrus aboka si sibuk, 17hnonda Zebedeus bedya mabo penya, Yakobus beb, alja weis Yohanes beb (ban mabo danara sikja si nera, liming bedya mabo aboka, Boanerges aboka si sibsuk), 18hnonda Andreas, hnonda Pilipus, hnonda Bartolomeus, hnonda Matius, hnonda Tomas, hnonda Alfeus bedya me Yakobus, hnonda Tadeus, hnonda AsaĘľanya Simon, 19hnonda Yesus ak yuba dil bilimoknya, Yudas beb sekiyisuk.
Yesus Ab Beelzebul BisaĘľ Dubnya Beb Yuba
(Mat. 12:22-32; Luk. 11:14-23, 12:10)
20Seleb dara, Yesus ara nim un ek yeilimok. Dara onsok, nimi nauba Yesus ulumokaʾ ak sam longol yalamekaʾ adya, Yesus ab alja yuba doro diriga ban nang eb dara, denaʾ demenggom dangamok. 21Wera nimi hnonja, ”Alda goloknaʾ gologamla,” alamek yub enyek, alab neikek ulumek nim edya kebek dara, Yesus ak ganagoka bo yanobaʾ aboka bilimek. 22Dara nimi yuba neksin nang Yerusalem heikek ab yeilimek nang edya dara, ”Ban benera Beelzebul bek gologamla! Anya bisaʾ dubnya bedya bisaʾ arobaʾ yaklamla,” alamek.
23Danyek Yesus ara sikenek nak yoululum hyookanya, sununaʾ yub enyek sikenek neksukaʾ ara, ”Satan bedya al damnya bek har so yakdanamso do? 24Senenggom mok soko nimi neik meneng mok soko nimi moumen mala weboka obdanaseng dara, wera sikja mok soko era pe ubdabnenggunumso. 25Anya nim e lom anaba, neik ek nim edya sik moumen isaʾ nenebdangoka oldanaʾ hwam ok mabnamso dara, wera sikja ek nim eneba pe ubdabnenggunuseng. 26Dara neikso, bisaʾ dubnya Satan beneba, alja meneng digum ab, isaʾ nenebdangoka doluwoka oldanaʾ ok maro lobnamso dara, wera alda ubdabnenggunumso, bok alja denganaʾ damok lanawanamso. 27Onoʾ nimi be hnon hyak migib nongnya bedyaʾ ek sam wekoka bonaʾ hokaʾ dobnamso dara, e damnya migib nongaʾ anyek, men henga goubnenggusodyok dara, alda weknenggunumso. Bok, e damnya benyek men henga gouboka beibsoʾ adya, alda e lalawoka dobnamso.”
28”Nara ugunuk hyak dib lebnesin, nim ara malya uboka, yok-yok yuba edya derewoka wabnemak malya unaʾ anaba, ban nidyaʾ ara sikenek ab sobaʾ meewanasil. 29Bok nimi hnon Imik Neyung Geisinya bek derewoka walamla dara, alja anaso malya unaʾ era, sobaʾ ulmoublamla malya unaʾ anasa, alja ban unuwanamla malya unaʾ era alak ab meewanggunumla,” hyok. 30Yesus adya ban wenyaboka lebokaʾ ara, hnon nim edya alak, alda bisaʾ gologamla alamekaʾ anasa, lebsuk.
Yesus Adya Ek Nimi Yuba
(Mat. 12:46-50; Luk. 8:19-21)
31Nen seleb dara, Yesus eilinggeb, alja weisab eb, sikda yek. Dara sikda beiyik sam sekel yeiniboka, Yesus ak sikenek yoululaʾ aboka yuba beibek. 32Ban salek era, nimi nauba Yesus berem nauba denewoka buk ganakdo yabalamek. Anya sikja Yesus ak, ”Wera neyung o, anja genong geb, anja weisab eb dara, anak elenjaakanya, beiyik sam diri seklenjak,” wenyaboka lebek. 33Anasa Yesus ara sikenek, ”Nadya genong gera hek nimi do? Nadya weisab era hek nang do?” wenyaboka heibsuk. 34Dara onoʾ Yesus alak aknewoka buk ganagamek nang ek keeb ganakdo lebsukaʾ ara, ”Wera nadya genong, nadya weisab era ban! 35Imik Neyung bedya unuwanok senelamlaʾ anyek unulumak nim enyek, sikenek danyek, nadyaʾ hemyabo, nadya hmal gelewa, nadya genong yab ulumakaʾ ara an,” wenhyok.
Currently Selected:
MARKUS 3: LAINLC
Highlight
Share
Copy
Want to have your highlights saved across all your devices? Sign up or sign in
