OKHUCHIAKA 7

Emikhula chiamaatsi

1OMWAMI yabool'la Noa mbu, “Tsia winjile musafina halala nende abeinyumba yiyo bosi. Niwe owanduutsi noli omulunji musibala siosi. 2Khubuli imbila yetsisolo tsisiyikhu obukulekhwo tsine natsitaru tsisaatsa ne tsine natsitaru tsikhasi, ne khutsisolo etsirali tsisiyikhu obukulenjekhwo tsibili, isaatsa nende ikhasi. 3Khandi khubuli imbila yamanyonyi obukulekhwo kane nakataru amasaatsa, khandi kane nakataru amakhasi. Okhole akene yaka kho mbu buli imbila yesolo nohomba yamanyonyi etsilil'le okhuba khusibala nende okhwibulana. 4Olwa matukhu kane nakataru nakabe nikahweye, nangwisie ifula khusibala khulwa amatukhu amakhumi kane, om'basu nende obutukhu, khulwa okhumulula ebindu biosi ebiandalomba musibala.” 5Noa yakhola kosi aka Nyasaye yamulaka.

6Noa yali nemihika etsimia tsisasaba olwemikhula chietsa khusibala. 7Ye nende omukhasiwe nende abaanabe nabakhasi babaana baabe benjila musafina khulwokhwehonia okhurula khumikhula chiamaatsi yitsio.#Mat. 24:38-39; Lk. 17:27 8Ne buli es'saatsa nesikhasi khutsisolo tsiosi tsisiyikhu nende etsirali tsisiyikhu, nende amanyonyi, nende biosi ebimoolanga hasi, 9bienjila halala nende Noa, singa Nyasaye yali nalachile. 10Inyuma wamatukhu kane nakataru, emikhula chiamaatsi chiamala nichiba khusibala.

11Olwa Noa yali nali nemihika etsimia tsisasaba, omwesi wakhabili nikuli likhumi nende khane nakhataru, tsimoni tsiamaatsi tsiosi etsiomulutungu tsiafutukha ne ebilibwa biemikhula tsiomwikulu nibiikulwa.#2 Pet. 3:6 12Ifula yakwa khusibala khulwa amatukhu amakhumi kane, om'basu nende obutukhu. 13Khwitukhu liene yilio, Noa niyenjila musafina nende omukhasiwe ma nende abaanabe bataru Shemu, Hamu nende Yafetsi nabakhasi babwe. 14Benjila nende tsimbila tsiosi etsietsisolo tsiom'bulimo nende etsiarukwa, tsingali nende tsindititi, nende tsimbila tsiosi etsiamanyonyi ma nende etsiebindu ebimoolanga hasi biosi. 15Biosi b'bili, es'saatsa nende esikhasi bienjila musafina halala nende Noa, 16singa obwa Nyasaye yali nalachile. Ma OMWAMI niyekala omuliango.

17Emikhula nichitsilil'la khusibala khulwa amatukhu amakhumi kane, ma amaatsi nikameetekha nikachinga esafina ikulu, nayo neba ikulu weliloba. 18Amaatsi kameetekha okhusila ne esafina nayo niyelemakhwo ikulu. 19Amaatsi kasilaana tsingufu okhusila ma kata nikafuunikha ebikulu ebiali ebirambi biosi. 20Katsilil'la okhumeetekha okhwola olwakayombela ebikulu etsimiita tsine natsitaru. 21Ebindu biosi ebiali nobulamu khusibala biafwa, amanyonyi kosi, etsisolo tsiosi nende abandu bosi. 22Ebindu biosi khusibala ebialimwo emiiya chiokhuheelana biafwa. 23OMWAMI yamulula ebindu biosi ebiali nibili mwoyo khusibala. Yamulula abandu, etsisolo, amanyonyi nende ebikooko. Noa niye owasikala yenyene nende abayali n'nabo musafina. 24Amaatsi kamala khusibala amatukhu emia ndala nende amakhumi karano nikasili okhutitiha.

Currently Selected:

OKHUCHIAKA 7: EBAIBO

Highlight

Copy