YOHANA 10
10
Olukano lwo Mwayi
1Yesu yaboola, “Mubool'langa tooto: Omundu orenjil'la musilibwa siesikuli siamakondi, nebutswa nabir'ra elubeka lundi, omwene uyo nomwibi khandi nomwikul'li. 2Omundu owinjil'langa musilibwa nomwayi wamakondi. 3Omulindi amwikul'langa esilibwa ne amakondi kahulilanga omwoyokwe, olwa alanganga sielikondi neliira lialio, nakemel'la okhurula esioba. 4Olwamal'le okhuhinia amakondi kosi esioba, akemel'langa imbeli, ne nako nikamulonda, sichila kamanya omwoyokwe. 5Amakondi yako sikakhalonda omundu omucheni tawe, nebutswa kakhamwilukha, sichila sikamanyile omwoyo kwomundu omucheni tawe.” 6Olukano luno Yesu yali okhubabool'la, ne sibali okhumanyilisia esifune sialwo tawe.
Yesu no Mwayi omulahi
7Kho Yesu khandi nababool'la, “Mubool'langa tooto: Ise nise esilibwa siamakondi. 8Bosi abali okhwitsa imbeli wanje nabebi nende abekul'li, nebutswa amakondi sikabahul'la tawe. 9Ise nise esilibwa; omundu wosi naba niyenjila nabirila khu ise, alahona, ma nayenjilenge nende okhurula, nanyoola obwayilo. 10Omwibi yetsanga okhwiba nende okhwira, nokhwononia. Ise ndetsa mbu babe nobulamu, ne khandi babe n'nabwo obusilan'ne.
11“Ise nise omwayi omulahi, omwayi omulahi ahaananga obulamubwe okhufwila amakondi. 12Omundu owahandikwa orungwanga, orali omwayi, khandi narali omwene makondi, nalola esibwe nisitsanga, ne alekha amakondi niyelukha, ma esibwe siketsumba nisikasalania. 13Yelukhanga sichila norungwanga, ne siahendelanga amakondi tawe. 14Ise ndi omwayi omulahi; nase ndamanya amakondi kanje, nako kaimanya. 15Singa obwa Papa yamanya ise, nase nimbwo ndehaananga okhufwila amakondi.#Mat. 11:27; Lk. 10:22 16Ndi nende amakondi kanje kandi akarali musikuuli sino. Kambel'le okhukaleera nako kakhahul'la omwoyo kwanje; ma kabe esiayo silala, nende omwayi mulala.
17“Papa wainyanza sichila mbaananga obulamu bwanje, khe mbe onyala okhububukula khandi. 18Abulaho onyala okhunuula obulamu bwanje, nebutswa mbuhana omwene. Ndi nobunyali okhubuhana, ma ndi nobunyali okhububukula khandi, yaka niko aka Papa yandaka okhukhola.”
19Abayahudi nibachiaka okhuhingana khandi sichila amang'ana kaake. 20Abenji khubo nibaboola, “Wasienwa! Ulalukhile! Busina muhul'lisianga akaboolanga?” 21Abandi nabo nibaboola, “Amang'ana yaka sikali akomundu wasienwa tawe. Owasienwa anyala okhufunula tsimoni tsiababofu?”
Yesu asulwa na Bayahudi
22Olwene yilwo liali litukhu lielisabo eliokhutsienulwa khwe Hekalu mu Yerusalemu, ne kali amatukhu kobusindu. 23Yesu yali nachendanga mu Hekalu, khulusimbo lwa Solomoni. 24Abayahudi betsa nibamufumbila, nibamureeba mbu, “Lwakhabe okhwola lina khulalekhe okhuhayahayia? Noba noli Masihi, okhubool'le bulahi.” 25Yesu nabakalusia mbu “Ndali okhumubool'la nenywe simwasubila tawe. Emilimo echiakholanga muliira lia Papa, nichio echingobokhelanga. 26Nebutswa inywe simusubilanga, sichila simuli khubamakondi kanje. 27Amakondi kanje kahul'langa omwoyo kwanje, nase ndakamanya, khandi kanondanga. 28Nase ngahelesianga obulamu oburahwa sichila abulaho kata mulala olakahinia okhurula mumakhono kanje. 29Papa wanje, owamba nomukhongo okhuyomba bosi, ne abulaho onyala okhukahinia mumakhono ka Papa. 30Ise nende Papa khuli mulala.”
31Abayahudi batoola amachina khandi bamulase. 32Yesu nababool'la, “Emilimo eminji emilahi ndamumanyisie echirula khu Papa, nimulimo sina muchio omubi okuchila mundase namachina?” 33Abayahudi nibamukalusia, “Sikali ni khulwa omulimo omulahi okwa khukhulasilakhwo tawe, nebutswa kali sichila wechelanianga Nyasaye; khandi sichila ibe, olwoli omundu namundu wekholanga okhuba Nyasaye!”#Abal. 24:16 34Yesu nabakalusia mbu “Kahandikwa mumalako kenywe mbu ‘Nyasaye yaboola, Inywe muli abanyasaye.’#Etsisa. 82:6 35Nyasaye yalanga abandu yabo abanyasaye, aba mang'ana kaake ketsa khubo, ne khwamanya mbu Amahandiko kaboolanga akatooto khasotso. 36Busina inywe muboolanga khuye, owa Papa yali okhutsienula namuruma musibala mbu ‘Wechelanianga Nyasaye.’ Khulwa mbu ndali okhuboola ‘Ise ndi Omwana wa Nyasaye?’ 37Kho murasubila tawe nimba nirakhola ebindu bia Nyasaye yenyanga khole. 38Nebutswa nimba ninjikhola ne kata nimuba nimurasubila khwise, subile emilimo chianje; mbu mutoole okhumanya nokhumanyilisia obwa Papa ali mwise, nase mu Papa.” 39Kho nibenya khandi okhumufumila; ne narula mumakhono kabwe.
40Narulaho khandi natsia injelekha wa Yorodani, habundu tsana aha Yohana yali okhubaputisa olwokhuranga namenyayo.#Yoh. 1:28 41Abenji nibatsia owayali nibaboola mbu “Tooto, Yohana siyakholakhwo akamangalimwa kosi tawe nebutswa kosi aka yaboola khumundu uno nakatooto.” 42Abandu abenji basubila khu Yesu.
Currently Selected:
YOHANA 10: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
