YOHANA 16

1“Mubooleye kho mulekhe okhwesiraala mubusubili bwenywe. 2Balimwilusia okhurula mutsisinakoki; khandi esaa yitsanga, eyomundu omwiranga inywe alikanakana mbu akhol'langa Nyasaye omulukha. 3Ne balikhola yako khwinywe sichila sibamanyile Papa, kata ise tawe. 4Nebutswa mubooleye amang'ana yaka, kho nyinga esaa tsana yakhoole, muletsul'le mbu ndali nindamubool'la.

Omulimo kwo Mwoyo Omutsienukhu

“Sindamubool'la amang'ana yako mukhuranga tawe, sichila ndali nisili halala n'nenywe. 5Nebutswa luno nzitsanga khuye owaruma, ne abulaho mulala khwinywe oureba ahanzitsanga. 6Ne luno olwa mubooleye yaka, emioyo chienywe chitsuye mwo esibeela. 7Nebutswa aka mubool'langa nakatooto. Nakobukhala khwinywe mbu khatimba nzie, okhuba nimba niratsia tawe Omuhotselesia siyakhetsa khwinywe tawe. Nebutswa nimba ninzia, namurume khwinywe. 8Naye, nyinga yakhetse, alibuula khubomusibala mbu bali nesikha khutsimbi tsiabwe, nende khubulunji, nende khukokhukhalaka khwa Nyasaye khwesiina. 9Bali nesikha khutsimbi sichila sibasubila khu ise tawe; 10bali nesikha khukobulunji, sichila nzitsanga owa Papa, ne simulindolakhwo khandi tawe; 11ne bali nesikha khu kokhukhalaka esiina, sichila omukhongo wesibala yisi umal'le okhukhalachilwa esiina.

12“Sili namang'ana amenji akokhumubool'la, nebutswa simuli abanyala okhukahul'la luno tawe. 13Nebutswa nyinga Omwoyo watooto obuulanga akatooto khuka Nyasaye aliba niyetsele, alimwemel'la mukatooto kosi. Sialiboola khubunyali bubwe akaake omwene tawe; nebutswa alil'loma khu yako akahul'langa khandi alimuribulila amang'ana kosi aketsa okhukwa. 14Yakhambelesia oluyali sichila alabukula khukanje namuribul'la. 15Kosi aka Papa ali n'nako nakanje; niko akachila nimboola, abukulanga khukanje, namuribulila.

Esibeela nende obusangali

16“Hasili hatututu, simulindola tawe, khandi hasili hatututu mulindola.”

17Abechi baabe nibarebana abene, “Ning'ana sina aliakhubol'langa, ‘Hasili hatututu simulindola tawe, ne khandi hasili hatututu mulindola’ khandi aboolanga mbu ‘Kali sichila nzitsanga owa Papa.’ ” 18Ma nibaboola, “Ning'ana sina eliaboolanga, ‘Hasili hatututu?’ Sikhumanyile eliaboolanga tawe!”

19Yesu yamanya mbu benya okhumureeba ling'ana, kho yababool'la, “Murebananga aka ndali okhumubool'la mbu ‘Hasili hatututu ne inywe simulindola, khandi hasili hatututu ma mulindola?’ 20Mubool'langa tooto, inywe mulilakaya khandi muliekhuula, nebutswa nabo abomusibala balisangala; ne inywe mwakhabe nesibeela, nebutswa esibeela sienywe silikalukhanibwa okhuba obusangali. 21Omukhasi nalumwanga abetsanga nesibeela, sichila esaa yiye eyeinumwa yol'le; nebutswa namal'le okhwibula omwana, siyetsul'langa khandi okhusalila khwe tawe, okhuba asangalanga mbu omwana omutoro wibuywe musibala. 22Nimbwo kali khwinywe; luno muli nesibeela; nebutswa ndakhamulole khandi, ne mulisangala mumioyo chienywe, obusangali tsana abulaho owakhabuhinie khwinywe.

23“Mwitukhu tsana simulisaba esindu kata silala. Siahene, siahene mubool'langa, Papa, yakhamuhe esindu siosi esia mwakhamusabe muliira lianje. 24Musili okhusabakhwo esindu siosi muliira lianje; sabe nenywe mulanyoola, kho obusangali bwenywe bwitsule.

Yesu yakhaleke esibala

25“Rumikhiye tsingano okhumubool'la amang'ana yaka. Nebutswa inyinga yitsanga eya ndibula okhuboola n'nenywe mutsingano tawe, nebutswa ndibool'lana n'nenywe kol'lani khumang'ana ka Papa. 26Litukhu tsana niliol'le, mwakhasaaye khu Papa muliira lianje; ne simubool'langa mbu, ndakhamusaayile khu Papa tawe; 27sichila Papa mwene wamuyanza. Amuyanzanga sichila inywe mwainyanza ise, khandi mwahuchil'la mbu ndarula khu Nyasaye. 28Ndarula khu Papa, ninzitsa musibala; khandi, rulanga musibala ninzia khu Papa.”

29Abechi baabe nibamubool'la, “Oboolanga kol'lani luno, ne siobool'langa mutsingano tawe. 30Luno khwakhamanya mbu wamanya amang'ana kosi, ne sikahel'le omundu akhurebe amang'ana tawe. Khwing'ana yili khusubilanga mbu Ibe warula khu Nyasaye.”

31Yesu nabakalusia mbu “Luno musubilanga noho? 32Esaa yitsanga ne eyatsana yamala okhwola, nyinga mulisalanibwa, siomundu owabwe, ne mulindekha ise sienyene. Nebutswa sindi sienyene tawe, sichila Papa ali halala n'nase. 33Mubooleye, amang'ana kano mbu mube nomulembe khulwo khuhambana mwise. Esibala nasimukhupie esibi, nebutswa mulume ikholo okhuba ise mal'le okhuleka esibala!”

Currently Selected:

YOHANA 16: EBAIBO

Highlight

Copy