LUKAS 9
9
Yesus nyuhu duo balas murid-Oh
(Mat. 10:5-15; Mrk. 6:7-13)
1Yesus na'ah koduo balas murid-Oh, turus nonga ahkan'ndo kowasa ahkan muhko roh ja'at tutang ngopios ponyahkit. 2Pongohuli Io nyuhu iro tulak ngopios ulun ijo poros tutang monyiar borihta tohou koloukuwoh Pohotala moretah kolou Lahca. 3#Luk. 10:4-11 ‘‘Ara ngomin ino-inon ang ponomuoi'mu,’’ hion Yesus umba iro. ‘‘Ara ngomin sukah, ata'ai kambut derma, ata'ai ukun, ata'ai duit, ata'ai ka duo lambar pokajan. 4Ang umoh iou ihkam tonorima, mohcon ang anan nyiring ihkam nohtah lowu rih. 5#Kes. Ras. 13:51 Tutang ang umoh ihkam eam tonorima, aang ohkot ihkam nohtahoh lowu rih nokahohrih korawu tahkan bolak pa'an'mu, mangat monjadi pongingat tohimo iro.’’
6Murid-murid Yesus tulak, turus nitu karon-lowu, mangat mborihta Kabar Hinut rih, tutang ngopios ulun poros ang umo-umoh.
Horodes bingung
(Mat. 14:1-12; Mrk. 6:14-29)
7 #
Mat. 16:14; Mrk. 8:28; Luk. 9:19 Kotihka Horodes ijo moretah ang Galilea, ngonih tohou paring ang nyolung rih, io bingung. Tului anai ijo nuhtui Yohanes Popondus jari bolum huli. 8Anai ka'a ijo nuhtui ijo Elia jari lombut hino. Ulun bohkon hino nuhtui, anai ihcobehti nabi tahkan nabi-nabi ijo jaman lomoi jari bolum hoduli. 9Horodes nuhtui, ‘‘Ahku jari nyuhu ulun nohtok kuhung Yohanes. Tahpi ulun tuh iai komorongoh Io? Anai aro ijo jari ahku ngonahan tohou Io.’’ Mahka Horodes ngurah jalan ahkan dahpot nohto Yesus.
Yesus nonga ukun ahkan limo kujan behti
(Mat. 14:13-21; Mrk. 6:30-44; Yoh. 6:1-14)
10Rasul-rasul Yesus buli tutang nyorihta ahkan Yesus paring ijo iro jari nguaioh. Yesus nakihit iro, turus tulak hombo-homboh, iro bongon'ndo nokuh lowu Betsaida. 11Tahpi kotihka ulun-ulun kota'an tohou hal rih, iro ngohasu Yesus. Io norima iro, turus bopander umba iro, tohou koloukuwoh Pohotala moretah kolou Lahca. Tutang Io ka'a ngopios ulun poros ang louk iro.
12Kotihka mahtanondou kani bolop, koduo balas murid Yesus lombut nokuh Io turus nuhtui, ‘‘Amai unuk tuh mahcu. Labih pios Amai nyuhu ulun-ulun tuh hihkas, mangat iro duon ngurah ukun tutang unuk iro mohcon ang kapung-kapung tutang lowu-lowu ang kodiling tuh.’’
13Tahpi Yesus mutah, ‘‘Ihkam beweu nonga iro ukun.’’
Murid-murid Yesus nuhtui, ‘‘Ihkai baya ngina limo luhte tutang duo kungan ohcindanum. Inonrih ihkai harus tulak moli ukun ahkan ulun paring tuh?’’ 14(Anai kurang labih limo kujan ulunbahkas ang anan.)
Yesus nuhtui umba murid-murid-Oh, ‘‘Nyuhurih ulun-ulun tuh tuot hopulou-hopulou kurang labih limo pulu behti aang ihco kopulou.’’
15Murid-murid Yesus rih, nguan inon ijo nyuhu Yesus umba'ndo. 16Turus Yesus ngomin limo luhte tutang duo ohcin rih, uliorih nokara nokuh langit tutang ngohawot torimakasih ahkan Pohotala. Pongohino Io milah-milat luhte tutang ohcin rih hapan longoi-Oh, turus nongaoh ahkan murid-murid-Oh mangat magi-milah ahkan ulun aro rih. 17Iro paringoh kuman nyiring bosuh. Turus murid-murid Yesus nipun kolowiu ukun rih karoi duo balas tahkin.
Kahku Petrus tohou Yesus
(Mat. 16:13-19; Mrk. 8:27-29)
18Aang sino ondou, kotihka Yesus bodo'a bongoi, murid-murid-Oh lombut nokuh Io. Yesus ngisok umba iro, ‘‘Numbun hion ulun, Ahku tuh iai?’’
19 #
Mat. 14:1-2; Mrk. 6:14-15; Luk. 9:7-8 Iro mutah, ‘‘Anai ijo nuhtui Yohanes Popondus. Anai ka'a ijo nuhtui Elia, ijo bohkon hino nuhtui tahkan ihcobehti nabi jaman lomoi ijo jari bolum huli.’’
20 #
Yoh. 6:68-69
‘‘Tahpi numbun ihkam bongom, Ahku tuh iai?’’ hion Yesus.
Petrus turus mutah, ‘‘Amai anai Lahca Ponyolamat ijo nobowot Pohotala.’’
Yesus bopander tohou koporos tutang popahtoi-Oh
(Mat. 16:21-28; Mrk. 8:31–9:1)
21Turus Yesus nuhtui umba murid-murid-Oh, ‘‘Ara samasino nyorihta hal rih ahkan iai ka.’’ 22Yesus nuhtui ka'a, ‘‘Anak Ulun puna harus aro konoporos tutang konolawan bain okon-okon, tutang imam-imam kopala, tutang guru-guru agama. Io ahkan tomunu, tahpi a'ang ondou tolu ia ahkan tonombolum hoduli.’’
23 #
Mat. 10:38; Luk. 14:27 Pongohino Yesus nuhtui umba paring ulun ijo anai ang anan, ‘‘Ulun ijo kani nutut Ahku, harus nolingou kogunanahkaioh bongoi, ngohtun sopolahkioh nyinong ondou, tutang turus nutut Ahku. 24#Mat. 10:39; Luk. 17:33; Yoh. 12:25 Tului ulun ijo kani potahan pombolumoh, ahkan nihou pombolumoh. Tahpi ulun ijo mohonou pombolumoh bain tului ahkak-Ku, ahkan monyolamat pombolumoh. 25Inon utungoh amat ihcobehti tepun hapus kolunon tuh, tahpi io rusak tutang nihou pombolumoh? 26Amat ulun mia ngahku Ahku tutang bara-Ku, Anak Ulun ka'a mahi mia ngahku ulun rih ang ohkot Io lombut noin honong kowasa-Oh, tutang honong kowasa Amai-Oh, tutang kowasa molehkat-molehkat ijo borasih! 27Ngota'an beweu: tahkan louk ihkam ang ohtoi anai ijo eam ahkan mahtoi, amat jaham io nohto Pohotala moretah.’’
Yesus ponohajo
(Mat. 17:1-8; Mrk. 9:2-8)
28 #
2Ptr. 1:17-18
Kurang labih ihco menggu uli Yesus majar hal-hal rih, Io ngomin Petrus, Yohanes, tutang Yakobus nokuh ihco pupung puruk mangat bodo'a. 29Podehan Yesus bodo'a ang anan, baui-Oh hubah tutang pokahjai-Oh puhti mokilat boloang. 30-31Songela duo behti, iorih Museh tutang Elia ngorinah aropoh honong koloang tahkan soruga. Iro nuhtui umba Yesus tohou popahtoi-Oh, ijo eam tahi hino ahkan tonihtoi-Oh ang Yerusalem. 32Aang ohkot rih Petrus tutang karon-injahoh tiruh, tahpi songola monyun, nohto Yesus boloang tutang duo behti rih tombok umba Io. 33Aang ohkot duo behti rih kani nohtah Yesus, Petrus nuhtui umba Yesus, ‘‘Amai Guru, momih samasino ihto ang ohtoi. Piosrih ihkai nombok tolu kemah, ihco ahkan Tuan, ihco ahkan Museh, tutang ihco ahkan Elia.’’ (Petrus nuhtui kolourih eam kota'an inon ijo tonuhtuioh.)
34Pondehan Petrus magun nuhtui, lombut buhtup baunondou tutang nyokulop iro, nyiring iro mihkoh. 35#Yes. 42:1; Mat. 3:17, 12:18; Mrk. 1:11; Luk. 3:22 Pongohuli tahkan buhtup baunondou rih konahan auh ijo nuhtui, ‘‘Io Tuhrih Anak-Ku ijo Ahku mitih-Oh. Ngonih auh-Oh!’’
36Uli auh orih rih tondo, iro nohto Yesus bongoi iou ang anan. Murid-murid-Oh tonih beweu tohou paring orih, tutang eam nyorihta ahkan iai ka, inon ijo jari iro nohtooh.
Yesus ngopios anakbiou ijo sonyalung roh ja'at
(Mat. 17:14-18; Mrk. 9:14-27)
37Aang ngohkosoh ondouoh Yesus tutang kotolu murid-Oh dih mosuluh tahkan pupung puruk rih, tutang ulun aro lombut nokuh Yesus. 38Ihcobehti bahkas tahkan tohun ulun aro rih ngoriak, ‘‘Amai Guru, dohop nohto anak'ku – io tihkas ihco-ihcooh anak'ku! 39Amat roh ja'at nyarang io, io songela ngombak tutang behtiuoh konyereng-kohejang nyiring bauioh hopuhtak. Roh rih turus nyarata io tutang eam kani soluka tahkan io! 40Jari ahku nyawot umba murid-murid Amai muhko roh ja'at rih, tahpi iro eam dahpot.’’
41Yesus mutah, ‘‘Eam inon ihkam tuh! Ihkam tu'u ulun-ulun ijo nyapang tutang eam porocaya! Johcok mira Ahku harus mohcon umba ihkam tutang bosabar toharep ihkam? Ngomin anak'mu rih ahkan ohtoi!’’
42Pondehan anak rih nyalan nokuh Yesus, roh ja'at rih mingas io tutang nguan behtiuoh konyereng-kohejang. Tahpi Yesus moretahoh roh ja'at rih soluka tutang piosrih anak orih. Turus anak orih tonyarah huli ahkan amaioh. 43Paring ulun helan nohto kowasan Pohotala ijo kolourih kohajoioh.
Yesus nuhtui hino tohou popahtoi-Oh
(Mat. 17:22-23; Mrk. 9:30-32)
Ang ohkot ulun-ulun magun aang kohelan'ndo nohto paring ijo konuaioh, Yesus nuhtui umba murid-murid-Oh, 44‘‘Nohtoani pio-pios tutang ara nolingou tuhtui-tuhtui-Ku tuh: Anak Ulun ahkan tonosorah, ahkan kowasan kolunon.’’ 45Tahpi murid-murid Yesus rih eam paham umba auhoh rih. Hal rih tongulim ahkan'ndo, mangat'ndo eam solembang. Tahpi iro mihkoh ngisok hal rih umba-Oh.
Iai ijo hajo
(Mat. 18:1-5; Mrk. 9:33-37)
46 #
Luk. 22:24
Ang louk murid-murid Yesus lombut solisihpander tohou iai tahkan iro ijo hajo. 47Yesus ta'an tiruk'ndo, tului orih Io ngomin ihcobehti anak-inyam tutang nyuhu 'nakinyam rih tombok ang silan-Oh. 48#Mat. 10:40; Luk. 10:16; Yoh. 13:20 Turus Io nuhtui umba murid-murid-Oh, ‘‘Ulun ijo norima anak tuh tului Ahku, rimai norima Ahku. Tutang ulun ijo norima Ahku, Io norima ijo nyuhu Ahku. Tului ulun ijo paling koik ang louk ihkam, iorih ijo paling hajo!’’
Ulun ijo eam hokolawan umba ihkam, iro orih anai barih ihkam
(Mrk. 9:38-40)
49Yohanes nuhtui, ‘‘Ihkai nohto ulun muko sehtan hapa aran Tuan, tutang ihkai baca io, tului io eam barih ihto.’’
50‘‘Ara baca io,’’ hion Yesus umba Yohanes tutang murid-murid Yesus ijo bohkonoh, ‘‘tului ulun ijo eam ngolawan ihkam, rimai hobarih umba ihkam.’’
Ihco lowu ang Samaria eam kani norima Yesus
51Kotihka jari doni ohkotoh Yesus ahkan konahtang nokuh soruga, Io ngomin koputusan mangat tulak nokuh Yerusalem. 52Mahka Io nyuhu ulun tulak nosolu Io. Ulun-ulun ijo sonuhu-Oh rih tulak, turus nyolong nokuh ihco lowu ang Samaria unuk nyodia aang'co bagi Yesus. 53Tahpi ulun-ulun ang lowu rih eam kani norima Yesus, tului ta'an sosino, Io rahat nitu Yerusalem. 54#2Lahc. 1:9-16 Mahka ang ohkot murid-murid Yesus, iorih Yakobus tutang Yohanes ta'an tohou hal rih, iro nuhtui, ‘‘Tuhan, inonkah Tuhan kani, ihkai nyawot baho tahkan langit, unuk polumus ulun-ulun tuh?’’
55Yesus ngulos, turus ningak iro. 56Uliorih iro tulak nokuh lowu bohkon.
Ulun-ulun ijo kani monjadi murid-murid Yesus
(Mat. 8:19-22)
57Pondehan Yesus tutang murid-murid-Oh noturus ponyalan'ndo, anai ulun nuhtui umba Yesus, ‘‘Amai, ahku kani ngohasu Amai, nokuh umoh ponyalan Amai ih!’’
58Yesus mutah, ‘‘Horomaung anai luwangoh, tutang bulung anai kosalahoh, tahpi Anak Ulun eam aro unuk pokaling kuhung-Oh.’’ 59Turus Yesus nuhtui umba ihcobehti ijo bohkon, ‘‘Ngohasu Ahku.’’
Tahpi ulun rih nuhtui, ‘‘Amai, ahku poromisi buli houn ahkan nanom amai'ku.’’
60Yesus mutah, ‘‘Nauh ulun mahtoi ngolowong ulun mahtoioh bongoi. Tahpi ihko ngohasu Ahku tulak tutang nuhtui borihta ijo Pohotala jari nopara moretah.’’
61 #
1Lahc. 19:20
Anai ka'a ihcobehti bohkon ijo nuhtui, ‘‘Amai, ahku kani ngohasu Amai, tahpi ahku buli houn ahkan poromisi umba injah-jolahak'ku.’’
62Yesus nuhtui umba ulun rih, ‘‘Ulun ijo nopara moluku turus ngulos nopahjah likutoh, eam gunai monjadi anak ukup Pohotala.’’
Currently Selected:
LUKAS 9: OTD
Highlight
Share
Copy
Want to have your highlights saved across all your devices? Sign up or sign in
@ LAI 1997 Indonesian Bible Society (Lembaga Alkitab Indonesia)
