MARKUS 8
8
Yesus nonga ukun ohpat kuhjan behti
(Mat. 15:32-39)
1Eam pira kotahiu pongohuli, anai hino ihcokopulou ulun aro lombut hopuhpung. Tului iro eam anai ukun, Yesus na'ah murid-murid-Oh tutang nuhtui, 2‘‘Ahku ngasi ahkan ulun aro tuh. Jari tolu ondou kotahiu iro homboh-umba Ahku, tutang uhuntuh iro eam anai ukunoh. 3Amat Ahku nyuhu iro buli honong butui buang, iro ahkan lousiong ang beteng jalan. Inonhino ang louk iro anai ijo lombut tahkan mahcu.’’
4Murid-murid Yesus mutah, ‘‘Ang unuk ijo benyem koloutuh, ang umohrih ulun tou dahpot sukup ukun ahkan paring ulun tuh?’’
5‘‘Anai pira karon luhte aang ihkam?’’ hion Yesus.
‘‘Pihtu,’’ hion'ndo.
6Mahka Yesus rih nyuhu ulun aro tuot ang ngosan tana, turus ngomin kopihtu luhte rih tutang ngohawot torimakasih ahkan Pohotala. Pongohuli Io milat-milat luhte rih umba longoi-Oh tutang nonga-Oh ahkan murid-murid-Oh mangat hobagi-bagi ahkan ulun-ulun. Mahka murid-murid-Oh nguanangrih. 7Iro anaingina pira-pira kungan ohcin koik ka'a. Yesus ngohawot torimakasih ahkan Pohotala ngosan ohcin-ohcin rih, turus nyuhu murid-murid-Oh hobagi-bagi ohcin-ohcin rih ka'a. 8-9Iro kuman nyiring bosuh – anai kira-kira ohpat kuhjan behti ijo kuman. Pongohuli murid-murid Yesus nipun kolowiu ukun – pihtu tahkin tuwi. Turus Yesus nyuhu ulun-ulun rih buli, 10tutang Io homboh murid-murid-Oh turus jahkat alut tutang tulak nokuh daerah Dalmanuta.
Ulun Parisi nyawot Yesus napa kahtahelan
(Mat. 16:1-4)
11 #
Mat. 12:38; Luk. 11:16 Pira-pira ulun Parisi lombut nokuh Yesus, tutang nopara bodebat umba Yesus, ahkan nyokohtung-Oh. Iro nyawot Yesus napa kahtahelan kolou tanda ijo Io lombut tahkan Pohotala.
12 #
Mat. 12:39; Luk. 11:29 Yesus ngotu'uh turus mutah, ‘‘Bain inon ulun-ulun uhuntuh nyawot Ahku napa kahtahelan? Eam! Ahku eam nonga kahta kolou rih ahkan iro!’’
13Turus Yesus nohtah iro, tutang turus jahkat ahkan luwang alut; pongohuli tulak mihtah nokuh pohoi danou rih.
Ragi ulun-ulun Parisi tutang Horodes
(Mat. 16:5-12)
14Murid-murid Yesus tolingou iro ngomin sukup luhte. Iro tihkas anai ngina luhte ihcokobuhtup ang alut. 15#Luk. 12:1 ‘‘Bua-buahrih toharep ragi ulun-ulun Parisi tutang ragi ulun ain Horodes,’’ hion Yesus umba iro.
16Mahka murid-murid Yesus rih nopara momander, hal orih. Iro nuhtui, ‘‘Io nuhtui kolourih, tului ihto eam aro ngina luhte.’’
17Yesus kota'an inon ijo iro momanderoh. Tului orih Io ngisok iro, ‘‘Ombai ihkam bopander tohou eam anai luhte? Inon ihkam eam ta'an tutang jaha solembang ka'a? Kolourih tahpakkah tiruk'kam? 18#Yer. 5:21; Yeh. 12:2; Mrk. 4:12 Ihkam anai mahta – ombai eam nohto? Ihkam anai tolinga – ombai eam ngonih? Eamkah ihkam bingat 19ahkan limo luhte rih ijo Ahku jari mbagi-milahoh ahkan limo kuhjan behti? Pira ohcong tuwi, kolawin ukun ijo ihkam nipunoh?’’
‘‘Duo balas ohcong,’’ mutah iro.
20‘‘Tutang ohkot Ahku mbagi-milatoh pihtu kobawak luhte ahkan ohpat kuhjan behti,’’ kisok Yesus hino, ‘‘pira ohcong kolowiu ukun ijo ihkam nipuioh?’’
‘‘Pihtu,’’ mutah iro.
21‘‘Orih, jahakah ihkam solembang ka'a?’’ hion Yesus hino.
Yesus ngopios ulun bobulen ang Betsaida
22Iro johcok ang Betsaida. Ang anan ulun ngomin ihcobehti ulun bobulen nokuh Yesus, tutang nyawot mangat Io ninjok ulun bobulen rih ahkan ngopios io. 23Mahka Yesus nambit longon ulun bobulen rih, tutang niting io nyoluka lowu rih. Pongohuli Yesus ngoluhca mahtan ulun rih. Io nginarih longoi-Oh ang mahtan ulun rih, turus ngisok umba io, ‘‘Duon ihko nohto aangco huntuh?’’
24Ulun rih nohto ahkan boun, turus nuhtui, ‘‘Yo, ahku nohto ulun nyala-nyalan; tahpi iro topahjahoh kolou pu'un kahju.’’
25Yesus ngina hino longoi-Oh ang mahtan ulun rih. Sino tuh ulun rih bousaha nohto sodahpot-dahpot. Mahtaioh pios, tutang io nohto paringaoh, honong jelas samasino. 26Turus Yesus nuhtui umba io, ‘‘Buli iou, tutang ara hoduli nokuh lowu orih.’’
Kahkun Petrus tohou Yesus
(Mat. 16:13-20; Luk. 9:18-21)
27Yesus tutang murid-murid-Oh tulak nokuh dukuh-dukuh ang kodiling Kaisarea Pilipi. Ang beteng jalan Yesus ngisok umba iro, ‘‘Numbun hion ulun, iairih Ahku tuh?’’
28 #
Mrk. 6:14-15; Luk. 9:7-8 Hioniro mutah, ‘‘Anai ijo nuhtui: Yohanes Popondus; anai ka'a ijo nuhtui, Elia; tutang ijo bohkon hino, nuhtui: anaiihco ihcobehti nabi.’’
29 #
Yoh. 6:68-69
‘‘Tahpi numbun ihkam bongom, Ahku tuh, iai?’’ hion Yesus.
Petrus mutah, ‘‘Amai anairih tuh Lahca Ponyolamat!’’
30Turus Yesus mopingatoh iro, mangat eam iro momborihtaoh ahkan iai ka tohou arop-Oh.
Yesus mander tohou koporos tutang popahtoi-Oh
(Mat. 16:21-28; Luk. 9:22-27)
31Ulioh rih, Yesus nopara majar murid-murid-Oh ijo Anak Ulun musti ngarot aro, tutang ahkan tonolawan bain okon-okon, imam-imam kopala, tutang guru-guru agama. Io ahkan tomunu, tahpi aang ondou tolu Io ahkan bolum hoduli. 32Honong jelas samasino Yesus monyorihtaoh hal orih ahkan murid-murid-Oh. Mahka Petrus nguhut Yesus nokuh saro, hawui ningak Io. 33Tahpi Yesus ngulos tutang nopahjah murid-murid-Oh, turus ningak Petrus, ‘‘Hahtun tahkan ohtoi, Ponihkos! Tiruk'mu rih tiruk ulun; bohkon tiruk Pohotala!’’
34 #
Mat. 10:38; Luk. 14:27 Pongohino Yesus na'ah ulun aro ijo anai ang anan hombo-homboh umba murid-murid-Oh. Turus Io nuhtui umba iro, ‘‘Ulun ijo kani ngohasu Ahku, harus nolingou kogunanoh bongoi, pongohuli ngohtun sopolahkioh, tutang turus ngohasu Ahku. 35#Mat. 10:39; Luk. 17:33; Yoh. 12:25 Tului ulun ijo kani ngondehen pombolumoh, ahkan nihou pombolumoh. Tahpi ulun ijo nyarah pombolumoh ahkak-Ku tutang ahkan Kabar Hinut tahkan Pohotala, ahkan monyolamat pombolumoh. 36Inon utungoh ahkan ihcobehti, amat sohopus kolunon tuh monjadi io tehpui, tahpi io nihou pombolumoh? 37Duonkah pombolum orih tonokiri umba angihco?
38Amat ihcobehti mia ngahku Ahku tutang ajaran-Ku ang jaman dorhaka tutang ja'at tuh, Anak Ulun ka'a ahkan mia ngahku ulun rih, ang ohkot io lombut noin honong kowasa Amai-Oh, tohomboh molehkat-molehkat ijo borasih.’’
Currently Selected:
MARKUS 8: OTD
Highlight
Share
Copy
Want to have your highlights saved across all your devices? Sign up or sign in
@ LAI 1997 Indonesian Bible Society (Lembaga Alkitab Indonesia)
