IGHISYEWUT 12
12
1Ompö osiswechoni kuchop kong pöytoghin Erode pipö kanisa walaka. 2Kïpar chok ompö Yakopo werto ompö Yoana. 3Kikany kisïwa lö kiköromchï pipö Yaudi ngölyontononi, kulet tagh kïnam Petro tïkwïl. Kighisyö ngalechoni ompö osiswo Ichon pö Makatin cho puryö Mumar. 4#Wuw 12:1-27. Otini kinam Petro, kïtorchï chela, akutö surutöy angwan cho kitïngeto anka tïkwïl askarin angwan kïrip nyinte. Kitat lö, atowonyö Pasaka,* kumïtï Petro kerwokyï ompö tawu pich. 5Kïlenyona kekörchï nyu Petro chela, wölo kïsagh pipö kanisa Tororöt nyoman kungarak nyinte.
Kakityokunö Petro chela
6Akwompö oghononi kimököy Erode kumïtöy Petro kïwö tawu pich, kitökïmi Petro kïrïwöy kwenu askarin odeny. Kïrata nyinte sïrïmtin odeny, akimito askarin cho kiripöy kuketo chelanoni. 7Panini lawel kughyongö malaykayanta Echotyon atoni, kulïwochï löpoyïn chelanay. Kïchakwar malaykayantanay Petro kara, akunget, akïlenchï, “Ngeta lawel!” Nyini lawel kïchïntegho sïrïmtinechay ewuno Petro. 8Kïlenchï malaykayantanay, “Laka kegh ailut kweghköku kel.” Kwigh Petro lenyoni. Kïlenchï malaykayantanay ngat, “Kicha angweto muyengu airïpkanïn.” 9Kïlït sany, kïrïp nyinte. Akimenkïtnye lö, nyoman kïyoni kighöy malaykayan: kïlenchini kegh kasïwa ana sïwïyagh. 10Kuwer ripinto tagh nko nyo pö odeny ntökurelchï kukat nyo pö karïn nyo kïlïtöy tökepa kanasyan. Kïyata kukanay onkït kïpa chane kïlïtöy sany. Kïpa nyu kïrïp or nyo kiröytö akïtö kïnyini lawel kïpakach malaykayantanay Petro.
11Atolapay kïpköchï Petro nyo pö nyoman lö, kitökikungwïna nyinte chela ori, kïlö, “Konkïtwan ye nyu nyoman lö köyonï Echotyon malaykayantenyu kungwïn kïsörwanïn atömechopanïn kong Erode, akïsörunenanïn tïkwïn lapay cho kömököy pipö Yaudi kwighwanïn!”
12Kïkany kunkïtï lenyoni, kïwö kutang kö pö Marya, nyo le yoto Yoana nyo kikuro kaynenyi anka Marko. Kichang pich cho kimi nyoryogh köyoni akïsoghöy. 13Otini kikönykony Petro kukat, kungwïn työ nyo kighöy pöghisyö nyo kikuro Roda kïter, 14kïkany kunkïtï chepay lö, kuti Petro nyini, kïngarak nyoman amökïyatnye kukanay, kuyoda kegh kïwö kïmwatïta lö, ghyongo Petro sany. 15Kïlenchï pïchay, “Ipotinyi oy so.” Wölo kukïniniö chepay lö, mi Petro kukat sany nyoman. Kïlö pïchay, “Malaykayantenyi nyoni.”
16Kïtas tagh Petro kukonykonyisyö. Ato mi löt kiyat pïchay kukanay, kïkany kïsïwa nyinte, kïtangany. 17Kïngölonchinö pïchay morichi kïsisyö, atolapay kwomchï wölo kemïtunta Echotyon nyinte kïngetunö chela. Kïlenchï pïchay, “Ape amwochï ngalechï Yakopo nko tupcheni walaka.” Atolapay kïnget akïwö woptö anka.
18Kïkany kïyech, kuwöngisyö askarin nyoman, akïtep kegh lö, “Köwö Petro lö ne nya?” 19Otini kiyar Erode nyinte, amökïnyorïnye, kïsem ripichay akï mwa ketïgh chane.
Atolapay kïröytö Erode Yudea kïwö kutang Kaysaria akïtöpö wölini.
Kama Erode
20Kïnörekyï Erode pipö Tiro nko Sidon nyoman, kïlenyona kïtuyö pïchay akïpa kïngalan nko Erode. Otini kinam kongot nko Plastas nyo kiripöy wölo kimönyöy pöytoghintö, kïwö wölo mi Erode akïtep kalya, ompöwölo kitigho kegh korengwa omisyö nyo ngwïno oreto pöytoghintononi.
21Kulach Erode sïrokachi cho pö kirwok ompö asis nyo kökikïl nyinte, kïtöpö ngacharunyi nyo pö Paytagh, akïngölonchï chane. 22Kuteghyö pich lö, “Möchinye nyï ngölonöy, wölo tororöt.” 23Kïnyini lawel kïmuny malaykayanta Echotyon. Kuyin nkut, atolapay kïma ompöwölo kimetönye Tororöt konyït.
24Wölo Kitas tagh ngölyonto Tororöt akulet.
25Kuwany Parnapa nko Saulö pöghisyengwa akïmïloncheghö Yerusalem, kïpa nko Yoana nyo kayne anka ki Marko.
Kakïkïl Parnapa nko Saulö akeyonta
Currently Selected:
IGHISYEWUT 12: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
