IGHISYEWUT 13
13
1Akimito kanisa nyo kimi Antiokia werkoy nko konetï chane kï Parnapa nko Simion (nyo kikuro Lotuw) nko Lukio (nyo kingwïno Kurene) nko Manaen (nyo kinar nko pöytoghin Erode) nko Saulö. 2Kïlenchï Mïkulögh nyo Tïlil chane otini kipöghisyechini Echotyon kïkïruröy akïsoghöy Tororöt, “Okonanïn Parnapa nko Saulö kïpka, kwighwanïn ighsyö nyo kyosötyan chane.”
3Kïkany kuwany kïkïruröy akïsoghöy, kukanagh ewunekwa parakungwa akuyoktö kïpa.
Parnapa nko Saulö ompö Kupro
4Akwotini kökikuyoktö Mïkulögh nyo Tïlil Parnapa nko Saulö, kïpa kïröytö Seleukia, kïpegha meli ntökwit Kupro. 5Otini kïtïta Salami, kwamta ompö wöloni ngölyonto Tororöt ompö kori sowut pö pipö Yaudi. Akimi Yoana Marko kungöroköy chane.
6Akwotini kiwerata kore kïmïkul nyo kikwen pögh ntökwit Papos, kïnyorchï wöloni ponin, nyo kïkuro Paryeso nyo kile chi pö Yaudi aki werkoyonto putintön. 7Kimi chichoni nko pöytoghinto korononi nyo kikuro Serkio Paulö, chi nyo kichïrer. Kïkur pöytoghintonay Parnapa nko Saulö, kïpa wölo kimi nyinte ompöwölo kimököy kïlïmöy ngölyonto Tororöt. 8Wölo kïmir ponintonay le Elimas chane (kaynenyi nyoni ompö ngala Krik). Kimököy kulyoktoy pöytoghintonay lö tömeghan Kristo.* 9Atolapay kuchirchï kong Saulö, nyo kikuro Paulö nyo kinyïghï Mïkulögh nyo Tïlil, ponintonay 10akïlenchï, “Nyi Wero Onyöt! Aichï punyonto kïgh anka tïkwïl nyo karam, nyïghitatïnyi ngöghomnyö nyo pö ghöytyö, mepïstonenyinye kïnure ortïna Echotyon cho ghïteghote? 11Kïlenyona nyorunyi ye ewu Echotyon. Ikörenyi amesïwïyenyinye löpoyïn ompö osis cho te.”
Kïnyini lawel kupöryolisyö konyi Elimas akïnam tuwïn, kutor samsamata lö, tonyorï pich cho reton. 12Atolapay kughan pöytoghintonay otini kisïwa kïyoni kïgha, akïtöngönchï kinetut pö Echotyon.
Mi Parnapa nko Paulö Kanasyanta Antiokia nyo mi Pisidia
13Kiwö nyu Paulö nko pich cho kimi nko nyinte kïpegha meli kïngeta Papos ntökwit Perka kanasyan nyo mi Pampulia. Kïpïstö Yoana Marko chane ompö atoni akïwö kutang Yerusalem. 14Kurelö Perka ntökwit Antiokia nyo mi Pisidia. Ato mi asispa Sapato* kïpa kïlïtöy kö pö saghat* akumpur ngwïny.
15Kïkany kewany kisomön Kirurut pö Musa nko kikirut pö werkoy, kuyoktö wowïntino kö pö saghat pich kïpa wölo mi chane kïlenchï, “Tupchenicho, ato otïng ngölyon anka tïkwïl nyo muköy kukilöy pich amwagh.” 16Kughyö Paulö akuporunö ewunyi akïlö,
“Pipö Israel nko akwa tïkwïl cho okonyïtöy Tororöt atere! 17#Wuw 1:7; 12:51. Kilöwön Tororöt pö pïchï pö Israel kukötinecho, akwigh chane kïlïku söpïch nyo wow atakinya kimi chane le to koro Misri. Kumïtuna Tororöt chane Misri ompö owesyenyi nyo wow, 18#Kiy 14:34; Krt 1:31.akïmïkukön nko chane ompö surkwen ompö könyis tömönut angwan. 19#Krt 7:1; Yos 14:1. Otini kökikunyar punton cho le mut nko odeny cho kimi koro Kanan kutö pikachi kïpöyï koronay, 20#Kir 2:16; 1Sam 3:20. ompö könyis 450.
“Atolapay kutö chane kirwokot ntökïtenö osiswo werkoyon Samwel. 21#1Sam 8:5; 10:21. Otini kïtep chane Samwel lö kïyöröy pöytoghin, kutö Tororöt chane Saulö, wero Kis nyo kipö ara Penchamen, kïlïkwï pöytoghintengwa ompö könyis tömönut angwan. 22#1Sam 13:14; 16:12-13; Tum 89:20. Kïkany kunategha nyinte, kutö Tororöt chane Daudi kïlïkwï pöytoghintengwa, akïsöwintönchï lö, ‘Kasïwan Daudi wero Yese lö chi nyo koyöran akï chi nyo ighöy machatenyan lapay.’ 23Akumïtyï Tororöt pipö Israel Ghetin, Yeso, ompö ara chichoni kïle wölo kikuyomistö nyinte. 24#Mrk 1:4; Luk 3:3. Akwotini kitomönye kutor Yeso pöghisyenyi kwomchï Yoana pipö Israel kïmïkul kïpïstö ngokikwa atökepatisan. 25#Mat 3:11; Mrk 1:7; Luk 3:16; Yna 1:20,27. Akwotini kimököy Yoana kuwongöy pöghisyenyi kïlenchï pïchay, ‘Olentekwa ochan ngo nya? Molenchï kegh ochan chichini kokönyekwa. Wölo arose köny. Mi rïpkanïn, akimömïchinanïnye otyokyï kweghkachi.’
26“Kïlenyona, werköcho, cho ochï monïngo Apraam nko pichi walaka tïkwïl cho mi kwenunkwa cho konyïtöy Tororöt kakwitwech ngölyontonï pö sörunöt. 27Ompöwölo menkïtïcha pich cho mönyöy Yerusalem nko kintöghoghikwa nyinte, möpköchïcha ngala werkoy cho kisomönöy ompö asispa Sapato anka tïkwïl. Kupuntö chane ngalechoni otini kirwokyï Yeso kepar. 28#Mat 27:22-23; Mrk 15:13-14; Luk 23:21-23; Yna 19:15. Kïrkegh kimösïwacha kïgh nyo kimïchini nyinte kïma, wölo kïsom chane Pilato kurwokyï nyinte Kepar. 29#Mat 27:57-61; Mrk 15:42-47; Luk 23:50-56; Yna 19:38-42. Kïkany kïpïntö kïgh anka tïkwïl nyo kimwa Kikirut ompö nyinte, kurekunö nyinte kimurtöwon akïrorchï nyinte pïrïm. 30Wölo kïnget Tororöt nyinte kututunö ngwen. 31#Ist 1:3. Akïsïwa nyinte ompö osis cho chang pich cho kipusuna Kalilaya nko nyinte kïpka Yerusalem. Akï chane cho le söwichi ye ompö pipö Israel. 32Akipkokwa Lökoy cho Karamach cho kiyomis Tororöt papotïnecho, 33#Tum 2:7. kikwighwecha nyete, acha, cho kichï monekwa, otini kinget Yeso. Kïle wölo kikikirta ompö tumwöyi Salat nyo pö odeny lö,
‘Ichinyi werïnyan,
koyiyinyi asete!’
34 #
Isa 55:3. Kïle wölini kitutunö Tororöt nyinte ngwen, nyo melö tökuyodo kegh ngat wölini atökïnïn, kïngalan lö,
‘Okonokwa kisoyönut cho tïlilöch akï pö man,
kisoyönut cho kyoyomisyan Daudi.’
35 #
Tum 16:10. Kïle wölo mwoytoy ompö Kikirutkö walaka lö,
‘Melö ipïsyinenyi mötworintengu Nyo Tïlil kïnyorï kiwurat.’
36Ompöwölo kikany kuwany Daudi kwigh machata Tororöt ompö pïntanyi, kïpas aketïp nko papotïnechi, akïnïn portanyi. 37Wölo manïnye nyinte nyo kingetunö Tororöt ngwen. 38Kïlenyona werköcho, onkïtunö lö, kyomwokwa atosïkö lastaghpa ngokï ompö chichoni le Yeso, 39ankïtï nyu lö anka tïkwïl nyo ghönöy nyinte, ketyoko ngokichi löwïr cho kimemuchönye kutyoköy Kirurut pö Musa. 40Okïr kegh nyu tömönyorwok ngala cho kimwa werkoy lö,
41 #
Apk 1:5. ‘Atere nyu, akwa cho ochï sösï, atanganya apotyö!
Ompöwölo oghan kïgh ompö osiswekwa,
kïgh nyo moghönekwanye kïrkegh kömwowokwa!’ ”
42Akwotini kimi Paulö nko Parnapa kïpegho köyay pö saghat, kïsom pïchay chane lö omïlonchö asispa Sapato nyo kirïptoy atökïmwochï pich ngalechoni ngat. 43Kïkany kïngeta pïchay nyoryonay, kïrïp Paulö nko Parnapa pipö Yaudi cho chang nko pipö punton cho kikikïcham kighanata pipö Yaudi. Kïngölonchï Paulö nko Parnapa chane akukil kulet tagh kïmöngisyö ompö pöropcho Tororöt.
44Ato mi asispa Sapato nyo kirïptoy kïghamïtuna kegh pich lapay kanasyan kïpka kïlïm ngölyonto Echotyon. 45Kïkany kïsïwa pipö Yaudi nyoryotïnechay kwipö pïchay sikong. Kïtiyö ngal cho kimwa Paulö akumwoghsyö. 46Kïngalan Paulö nko Parnapa ompö nyakanan lö, “Kömïchï kemwowokwa ngölyonto Tororöt nyo pö tagh. Wölo otini kataghakwa ye nyu, kï korwokyikwa kegh akwane achamakwa lö, merokonokwanye söpon pö kokay, kakïpïstokwa yenyu akepa koro punton. 47#Isa 42:6; 49:6. Ompöwölo lenye nyoni wölo kimwowuntecha Echotyon lö,
‘Kotöninyi lïkuna löpoyïn pö punton,
atepchinö sörunöt ngwïny kïmïkul.’ ”
48Nyini kilïm pipö punton lenyoni, kïngörekyö akïsal ngölyonto Echotyon, kughan pich ompö atoni cho kökikïlchï Tororöt söpon pö kokay.
49Kulet ngölyonto Echotyon wop tïkwïl ompö korononi. 50Wölo kuwulyö pipö Yaudi pipö kanasyantanay cho echön nko kor cho pö punton cho ororöch cho kisoghöy Tororöt. Kutor kïghapghap Paulö nko Parnapa akïyona chane korengwa. 51#Mat 10:14; Mrk 6:11; Luk 9:5; 10:11. Wölo kïparta kiyoktoghï terïtyeko kelyekwa kïlïkwï söwintön nyo gha nyo pö kanasyantanoni akïpa kutang Ikonio. 52Akingörekyote nyoman kighönï cho kimi Antiokia akïnyïghitate Mïkulögh nyo Tïlil chane nyoman.
Mi Paulö nko Parnapa kanasyanta Ikonio
Currently Selected:
IGHISYEWUT 13: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
