IGHISYEWUT 14
14
1Kilïtöy Paulö nko Parnapa kö pö saghat* ompö Ikonio, atolapay kïngalan nyoman tökughan pipö Yaudi cho chang nko pipö punton, 2Wölo kïpechï pipö Yaudi cho kimeghancha Yeso kuwulyö akwigh pipö punton kurey chane. 3Kumpur kiyoktoghï wölini osis cho chang, akingölonöy ompö nyakanan paraku Echotyon, kïsöwintönchï ngölyonteto pöropchenyi, akutö chane owesyö nyo igho kiporunöt nko töngönchin. 4Wölo kïmuryö pïchay kimi kanasyantanay, kipöyit walaka pipö Yaudi kïpöyit walaka kiyoktoghï.
5Atolapay kuchumï poryot nyo kikïporyeghö kiyoktoghï, poryot nyo kingetï pipö punton nko Yaudi, kïmi nko kintöghoghikwa akïghapghap akïwira chane koghïn. 6Nyini kinkïtï kiyoktoghï ngalechoni, kupertoy kutang okumpö Lustra nko Derpe, kanastina koro Lukaonia nko koroswe walaka cho lekïtöch. 7Kwamtegha wölini Lökoy cho Karamach.
Mi Paulö nko Parnapa Lustra nko Derpe
8Kimito chi nyo kimönyöy Lustra nyo kisipisyote kelyön. Kingwolöy kingeta keyï, amöwestönye nyonikïny. 9Kimi chichoni kïteröy ngala Paulö, kuchirchï kong kïsïwa Paulö lö tïng kighanat nyinte yöröy kisopöt. 10Kïmwa ompö kut nyo wow lö, “Ghyongenö kelyeku lasiny!” Kughyö chichay lenyini akïwestö. 11Kïkany kïsïwa söpïchischay kïyoni kigh Paulö, kuteghyö ompö ngalekwa pö Lukaonia lö, “Körökwecha tororötinö ompö körkeyïn pö ptangengmötin!” 12Kïkurö Parnapa Seus, akïkuro Paulö Ermes ompöwölo ki nyinte nyo kile ngöloninte. 13Kimi kö pö saghata Seus kanasyan sany. Kïrongwï tïsinto Seus nko söpïch eghin akwipï seret lö tökutötö amöros.
14Kïkany kïlïm Parnapa nko Paulö kïyoni kimököy pïchoni kwighöy kïkarer sïrokökwa akïryagh kutang tuyonay kwen, akuteghyö lö, 15#Wuw 20:11; Tum 146:6.“Kölö ne taghakwa le nyï nya pïchï? Kichicha ptangengmötin le akwa! Kïmitecha yi kemwowokwa Lökoy cho Karamach, cho pö Yeso atamuka owöghökisyenö atömasagha ngat tïkuchï mötïny kinyiwut apkonchï Tororöt nyo söpöy, nyo kigh yïm nko ngwïny nko nanam nko tïkwïn lapay cho mi orinyi. 16Kipïsï pich könyisyok kïpesta le wölo kimöchtöy. 17Wölo porï nyinte kegh osis lapay ompö tïkwïn cho ighöy cho karamach, konokwa rop nyo ngwïno yïm, akïkonok osiswo ilö konokwa omisyö akwighak ongörekyenö.”
18Kïrkegh kimwochï kiyoktoghï ngalechoni, kimemïcha kïmir nyoryonay kïpelchï chane amöros.
19Kïpkana pipö Yaudi walaka kanastina Antiokia nko Ikonio, kwigh nyoryonay kïrïp ngalekwa, kïpechï kïwir Paulö akuchut kïngeta kanasyantanay kunonöy lö kima. 20Wölo otini kipka kighönï kuwit nyinte, kïnget akïmïla kutang kanasyantanay. Atomi asis nyo pö odeny kïwö nyinte nko Parnapa kutang Derpe.
Kömïlisyö Paulö nko Parnapa Antiokia
21Kyamta Paulö nko Parnapa Lökoy cho Karamach ompö Derpe kughan pich cho chang Yeso. Atolapay kïmïlisyö kutang Lustra, kïpa Ikonio, ntökwit Antiokia nyo mi Pisidia. 22Kuchïchim kighönï cho kökikughan Yeso kughyö lasiny, akukil chane kïnam kighanatengwa. Kunet chane lö, “Weröy pich lapay cho ghönöy Yeso nyörilwok cho chang otete tökïsöpchot atökumï nyu kïlïtöy Pöyunöto Tororöt ompö osis cho pkonöy.” 23Akwotini kiwany kwomtoy kïkïlchï poy kanisa anka tïkwïl akïsagh, kïmi nko kïrurat akutö chane mori Echotyon, nyo kökikughan chane.
24Kïkany kuwany kïpa kuwer koro Pisidia, kïpka ntökwitï Pampulia. 25Kwomchï pich Lökoy cho Karamach ompö Perka atolapay kïröytö kutang Atalia, 26akïngetunö atoni kïmïlisyö ntökwit Antiokia wölay kikitöneghö chane ripöto Tororöt nko pöropchenyi ompö pöghisyonay kakupuntö chane. 27Nyini kitï chane Antiokia kunyoryö pipö kanisa akïmwochï chane ngal lapay cho kegh Tororöt nko chane nko wölo kiyatïta nyinte are atökughan puntonï tïkwïl. 28Kitïpï wölini nyo kogh nko kighönichay.
Kokwo kanisa ompö Yerusalem
Currently Selected:
IGHISYEWUT 14: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
