IGHISYEWUT 3
3
1Kimi ato kiwetöy Petro nko Yoana kïsoghöy ompö Kö pö Tororöt* ato le satïn mut nko angwan. 2Akimi chi atoni nyo kingwolöy kingeta keyï, nyo kikösönu pikökwa osis löwïr kïpkonöy kutöni kuka Kö pö Tororöt nyo kikuro, “Kukat nyo Pïchigh,” atökïsom pich ropïyen cho kipkonöy kïsoghöy. 3Nyini kisïwa Petro nko Yoana karich kïlït ori, kïsomsyö. 4Kïnama Petro nko Yoana chichay kong akïlenchï, “Rosecha ya!” 5Ato lopoy kuros chichay ompö Petero, kukönöy lö, sïko kïgh chane. 6Wölo kïlö Petro, “Motïngetanye silpa anta koltin, wölo okoninyi kini otïngetan. Kolan ngeta weghenö keltöngu ompö kaynata Yeso Kristo* nyo pö Nasaret!” 7Kïnam nyinte ewu tagh akunget kughyö. Panini lawel kïchïchïm kelyechi nko tïtïnywokö. 8Kïnget lawel kughyö, akïwö kïlït Kö pö Tororöt nko pïchay, kïwetöy akudöngonyotoy akïsölotoy Tororöt.
9Kïsïwa pich tïkwïl nyinte kïwestoy akïsölotoy Tororöt. 10Nyini kinkïtï lö nyinte nyay somsïyi ompö Kö pö Tororöt atay kïlentöy, “Kukat nyo Pïchigh,” kwotyö akïtöngönchï kini kigha ompö nyinte.
Amtaghpa Petro ompö Kö pö Tororöt
11Akwotini kitökïnömotoy chichay Petro nko Yoana, kïryöwï pich lopoy wölo kimi chane, ato le körkör nyo kikuro “Körköru Solomon.” 12Nyini kïsïwa Petro pïchay, kïngölonchï pïchay kïlenchï, “Akwa pipö Israel, ompö ne tatanganyakwa le nyï, akölö ne tarosechakwa le ato owesyencha nko köromnyencha nyo kegh chichï kïwestö? 13#Wuw 3:13. Tororöt pö Apraam nko Isak nko Yakopo Tororöt pö papotïnecho nyo kegh, Mötworintenyi Yeso kwororit. Yeso nyo Kyotötekwa ataghakwa nyinte ompö tawu Pilato, otinö kimököy Pilato kutyoku nyinte. 14#Mat 27:15-23; Mrk 15:6-14; Luk 23:13-23; Yna 19:12-15. Wölo ataghakwa chi nyo Tïlil akï pö man. Omwochikwa Pilato kutyokwokwa pörin. 15Aparakwa kitorinto söpon, wölo kigh Tororöt nyinte kututï akechicha söwi. 16Kaynata Yeso nko kighanat nyo mi kaynatanoni nyini kegh chichï osïwïyekwa, ankïtökwa kï chïchïm. Kighanat ompö Yeso nyini kesop chichi lö chïkïl le otini osïwïyekwa ye tïkwïl.
17“Kïlenyona ye nyu tupchenichu, onkïtön lö kyaghakwa nko kintöghoghikwo lenyoni ompö sölwontön. 18Wölo kimwowï Tororöt könyisyok kuwerï werkoy lö, kinyörilöy Kristo tanyi nyo mötïny, akikwigh nyinte ngölyontononi kïpïntö. 19Okötenö nyu, awöghökisyö, atömanyïl kemwötwokwa ngokikwo, atökïpka nyu osiswö cho pö ngörekyö cho pkono tawu Echotyon. 20Atökuyokwï Kristo nyo kikïkïl akwompö akwa, nyo kï Yeso. 21Akï nyo mötïny kïtöpunö yïm, tökïtenö kïpka osiswö cho kïwöghököy tïkwïn kïrelachitu, le wölini kimwa Tororöt könyisyok kuwerï werkoykachi cho tïlilöch. 22#Krt 18:15,18. Kimwa Musa lö, ‘Yokwokwa Tororöt werkoyon, nyo le werïnkwa le wölini kiyokwanïn. Ater ngal lopoy cho mwowokwa nyinte. 23#Krt 18:19. Kipesyegho pich chi anka tïkwïl nyo möterönye ngölyonto werkoyontononi.’
24“Kimwowï werkoy tïkwïl ompö kut akonga ngala osiswechete, kïngeta werkoyon Samwel nko werkoy walaka cho kirïpï. 25#Tow 22:18. Ochikwa monïngo werkoy apoyekwa muma* nyo kyam Tororöt nko papotïnekwa. Le ato kimwochï Apraam lö, ‘Osoyönan pipö ngwïny kïmïkul kuwerï yiyengu.’ 26Kïlenyona kïkïl Tororöt akïyonï mötworintenyi Yeso kïnya kungwïnchokwa, atökusoyönokwa, kwighakwa omïlisyeghenö ortïnekwo cho ghach.”
Petro nko Yoana ompö Kokwö*
Currently Selected:
IGHISYEWUT 3: PIPÏLIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
